ប្រជានេសាទនៅតំបន់ព្រៃលិចទឹកស្រុកឯកភ្នំ ខេត្តបាត់ដំបងខកចិត្តនឹងអាជ្ញាធរស្រុកដែលបានធ្វើការយឺតយ៉ាវក្នុងការដកមន្ត្រីអាវុធហត្ថប្រចាំស្នាក់ការ៥០៨ចេញពីតំបន់បឹងទន្លេសាប។ ប្រជានេសាទលើកឡើងថា មន្ត្រីអាវុធហត្ថទាំងនេះមិនបានទប់ស្កាត់បទល្មើសនេសាទទេ ប៉ុន្តែបាននាំគ្នាប្រព្រឹត្តអំពើពុករលួយពីអ្នកធ្វើនេសាទខុសច្បាប់ ហើយតែងតែគាបសង្កត់បង្ខំទារប្រាក់ពីប្រជា ពលរដ្ឋដែលធ្វើនេសាទជាលក្ខណៈគ្រួសារជាប្រចាំ ដូច្នេះមិនអាចទុកឲ្យនៅបន្តទៀតបានទេ។
ប្រជានេសាទនៅស្រុកឯកភ្នំលើកឡើងថា ពួកគាត់បាននាំគ្នាដាក់ញាតិស្នើទៅអភិបាលស្រុកឯកភ្នំ ដើម្បីឲ្យដកមន្ត្រីអាវុធហត្ថប្រចាំទីស្នាក់ការលេខ៥០៨នៅតំបន់បឹងទន្លេសាបឃុំកោះជីវាំង ស្រុកឯកភ្នំ ជាច្រើនថ្ងៃហើយ ប៉ុន្តែអភិបាលស្រុកមិនទាន់មានវិធានការតាមការស្នើសុំរបស់ពួកគាត់នៅឡើយ ហើយមន្ត្រីអាវុធហត្ថទាំងនោះនៅតែឈរជើងទីស្នាក់ការរបស់ខ្លួនដដែល។
ប្រជានេសាទ ឃុំកោះជីវាំង លោក ជា សារិន ឲ្យដឹងនៅថ្ងៃទី៣តុលាថា ប្រមាណ៣ឆ្នាំចុងក្រោយនេះ ប្រជាពលរដ្ឋដែលប្រកបរបរធ្វើនេសាទតូចតាច ដើម្បីរកប្រាក់ដោះស្រាយជីវភាពគ្រួសារនៅតំបន់ព្រៃលិចទឹកបឹងទន្លេសាបស្រុកឯកភ្នំបានជួបការលំបាក ដោយមិនអាចធ្វើនេសាទរកប្រាក់ចំណូលបានដូចពេលមុនៗនោះទេ។ លោកថា កត្តាចម្បងដោយសារមន្ត្រីអាវុធហត្ថប្រចាំការនៅឃុំកោះជីវាំងនេះ ដែលកន្លងមកតែងធ្វើទុក្ខបុកម្នេញ មកលើអ្នកនេសាទជាលក្ខណៈគ្រួសារ គឺបង្ខំឲ្យបង់ប្រាក់ចន្លោះពី៣ទៅ៥ម៉ឺនរៀល ដើម្បីជាថ្នូរបានធ្វើនេសាទជាលក្ខណៈគ្រួសារនោះ៖ «និយាយទៅអត់បានអីដែលត្រូវទប់ស្កាត់ផង ហើយយកដាក់ច្រើនបើប្រទេសយើងសន្តិភាពអស់ហើយ ម្យ៉ាងទៀតការងារគ្រប់គ្រងធម្មជាតិមានមន្ត្រីបរិស្ថាន មន្ត្រីជលផល និងមានប៉ូលិសប៉ុស្តិ៍អីអស់ហើយ ហើយពួកនេះមកការងារអីធ្វើអី ?» ។
ប្រជានេសាទរូបនេះបន្ថែមទៀតថា ចំណែកអ្នកមានលុយកាក់អាចធ្វើនេសាទខុសច្បាប់ដោយសេរី ព្រោះអ្នកទាំងនោះបានបង់ប្រាក់ជាច្រើនម៉ឺនរៀលទៅឲ្យមន្ត្រីអាវុធហត្ថខិលខូចទាំងនោះ ហើយបញ្ហានេះធ្វើឲ្យពីមួយឆ្នាំទៅមួយឆ្នាំធនធានមច្ឆាជាតិនៅតំបន់បឹងទន្លេសាបកាន់តែថយចុះ ហើយបានប៉ះពាល់យ៉ាងខ្លាំងដល់ការរស់នៅរបស់ពួកគាត់៖ « បើនិយាយទីវាពិបាកនឹងថ្លែងបណ្ដោយ ទាំងគេទាំងខ្ញុំជួបប្រទះវាញឹកញយពេកហើយ ដូច្នេះមានតែពេលណាមានថ្នាក់លើចុះមក យើងនាំគ្នាជូនញាតិទៅគាត់ទៅ ប៉ុន្តែបើគាត់ដោះស្រាយមិនដោះស្រាយជារឿងរបស់គាត់ទេ ហើយបើគេដឹងឈ្មោះយើងអ្នករាយការណ៍គេមករករឿងយើងទៀត គេថាយើងអ្នកអញ្ចេះអ្នកអញ្ចុះ អូសវាពិបាករស់ណាស់ ព្រោះគ្មានសេរីភាពក្នុងការនិយាយ » ។
មេបញ្ជាការកងរាជអាវុធហត្ថប្រចាំការលេខ៥០៨នៅឃុំកោះជីវាំង លោក ពៅ ទុំ មានប្រសាសន៍ថា នៅតំបន់បឹងទន្លេសាបឆ្នាំទឹកធំជាងឆ្នាំកន្លងមក ហើយរដូវនេះក៏មិនមានការធ្វើនេសាទខុសច្បាប់នោះទេ។ចំណែកសំនួរពាក់ព័ន្ធការប្រព្រឹត្តអំពុករលួយនោះ លោកមិនបានឆ្លើយតបទេ ហើយក៏បិទទូរស័ព្ទទៅវិញ៖ « ខ្ញុំមិនសូវដឹងច្បាស់ សូមបងសួរទៅខាងជំនាញជលផលបានគេដឹងច្បាស់ ព្រោះខ្ញុំនៅខាងនេះអត់ច្បាស់ទេ ពាក់ព័ន្ធបញ្ហាបទល្មើសនេសាទ។តែនិយាយឲ្យចំវាទឹកលិចអស់ហើយប្រជាពលរដ្ឋគាត់ធ្វើអីមិនបានទេ គាត់ដើររើសខ្យង ព្រោះតាំងបីខែសីហាមកទឹកចេះតែឡើងខ្លាំង ព្រោះឆ្នាំនេះទឹកធំ » ។
អភិបាលស្រុកឯកភ្នំលោក ម៉ិល សុផល អះអាងថា ថ្មីៗនេះលោកបានដឹកនាំកម្លាំងសមត្ថកិច្ចចុះទប់ស្កាត់បទល្មើសនេសាទនៅតំបន់ព្រៃលិចទឹកនោះ ប៉ុន្តែមិនសូវមានប្រជាពលរដ្ឋធ្វើនេសាទសុខច្បាប់ដូចឆ្នាំមុនៗនោះទេ។ចំណែកការស្នើឲ្យមន្ត្រីអាវុធហត្ថចេញពីតំបន់នោះ លោក មានប្រសាសន៍ថា នេះគ្រាន់តែសំណើរបស់ពលរដ្ឋនៅក្នុងវេទិកាសាធារណៈទេ ចំណែកឯរឿងរ៉ាវពិតប្រាកដ ដែលសមត្ថកិច្ចប្រព្រឹត្តិអំពើពុករលួយនោះ លោកពុំបានដឹងទេ។អភិបាលស្រុករូបនេះបន្ថែមទៀតថា លោកមិនបានព្រងើយកន្តើយនឹងសំណើរបស់ពលរដ្ឋនោះទេ ហើយបញ្ហាយឺតយ៉ាវដោយសារលោកកំពុងរៀបចំឯកសារបញ្ជូនទៅសមាជិកក្រុមប្រឹក្សាស្រុក ដើម្បីប្រជុំវាយតម្លៃ នឹងបញ្ជូនទៅស្ថាប័នពាក់ព័ន្ធបន្តទៀត៖ «ចំពោះខ្ញុំជាគណៈបញ្ជាការឯកភាពស្រុក ក៏ប៉ុន្តែមិនមានសិទ្ធិកែសម្រួលកងកម្លាំងទាំងនេះទេ ព្រោះ ខ្សែបណ្ដោយរបស់ខ្លួនសម្រាប់បង្ក្រាបបទល្មើសនានានៅបឹងទន្លេសាប ហើយការងារនេះយើងបានធ្វើរបាយការណ៍ជាលាយលក្ខណ៍អក្សរដើម្បីបញ្ជូនទៅថ្នាក់លើបន្តទៀត»។
ប៉ុន្តែតំណាងប្រជានេសាទខេត្តបាត់ដំបងលោក ហ៊ុត ហាន លើកឡើងថា បទល្មើសនេសាទឆ្នាំនេះមិនបានថយចុះនោះទេ ហើយមានសន្ទុះកាន់តែខ្លាំង ចំណែកអាជ្ញាធរស្រុកឯកភ្នំដែលបានចុះទៅត្រួតពិនិត្យមើលនោះ គឺមិនចំទីតាំងដែលមានការធ្វើនេសាទខុសច្បាប់ទ្រង់ទ្រាយធំនៅក្នុងព្រែកនរិន្ទ និងឃុំព្រៃចាស់នោះទេ ពីព្រោះអ្នករៀបចំដឹកនាំគណៈ បញ្ជាការស្រុកមួយនេះទៅមើលតំបន់ដែលមិនសូវមានការនេសាទខុសច្បាប់។ លោក ហ៊ុត ហាន អះអាងទៀតថា ការធ្វើនេសាទខុសច្បាប់នេះ បើរំពឹងតែសមត្ថកិច្ចក្នុងមូលដ្ឋានគឺមិនអាចទប់ស្កាត់បានទេ ព្រោះសមត្ថកិច្ចហាក់ត្រូវរ៉ូវគ្នាជាមួយអ្នកប្រព្រឹត្តបទល្មើស៖ «ព្រោះខ្ញុំធ្វើការមកយូរហើយខ្ញុំដឹងថានៅបឹងទន្លេសាប មន្ត្រីទាំងអស់ដែលចុះទៅបឹងទន្លេសាបគឺគ្មានមន្ត្រីណាដែលមិនពុករលួយទេ កន្លងមកគេបង្ក្រាបបានតែអ្នកនេសាទតូចតាចគ្មានខ្សែអ្នកធំទេ។ម្យ៉ាងទៀតឆ្នាំនេះសមត្ថកិច្ចមិនឲ្យអ្នកធ្វើនេសាទជំពាក់លុយទេ គឺអ្នកណាធ្វើនេសាទថ្ងៃណា គឺសមត្ថកិច្ចយកលុយថ្ងៃនោះឲ្យខានតែបាន » ។
មន្ត្រីសម្របសម្រួលសមាគមការពារសិទ្ធិមនុស្សអាដហុក(Adhoc)ខេត្តបាត់ដំបងលោក យិន ម៉េងលី កត់សំគាល់ថា នៅតំបន់បឹងទន្លេសាបមានកម្លាំងសមត្ថកិច្ចចម្រុះដាក់ប្រចាំការ ក្នុងរូបភាពដើម្បីការពារភូមិឃុំមានសុវត្ថិភាព ប៉ុន្តែជាក់ស្ដែងមិនមែនដូច្នេះឡើយ ដោយលោកប្រដូចថា ការដាក់កម្លាំងដ៏ច្រើននេះ នឹងធ្វើឲ្យអន្សមខ្លោចទៅវិញ ។លោកយិន ម៉េងលី ស្នើឲ្យអាជ្ញាធរខេត្តបាត់ដំបងពិនិត្យមើលសំណើនេះឲ្យបានហ្មត់ចត់ ហើយត្រូវដោះស្រាយជូនប្រជាពលរដ្ឋឲ្យបានឆាប់ ដើម្បីកុំឲ្យមានការរិះគន់ពីពលរដ្ឋ បញ្ហាសមត្ថកិច្ចប្រព្រឹត្តិអំពើពុករលួយ ហើយធ្វើបាបពលរដ្ឋក្រីក្រដូចពេលមុនទៀត៖ «បញ្ហាទាំងនេះមិនមែនទើបតែកើតឆ្នាំនេះទេ កើតមកច្រើនឆ្នាំហើយ ក៏ប៉ុន្តែពលរដ្ឋគាត់ចេះតែទ្រាំហើយដើររអ៊ូរទាំគ្នាគាត់ ពីកន្លែងមួយទៅកន្លែងមួយ ដោយគាត់ដើររកស្ថាប័នណាជឿទុកចិត្តបានដើម្បីធ្វើការដោះស្រាយ ហើយឥឡូវនេះ អាជ្ញាធរបានធ្វើវេទិកានៅទីនោះ បានពលរដ្ឋគាត់លើកឡើង។ ហើយបើយើងមិនដោះស្រាយទេ បានន័យថាយើងមិនមែនជាអ្នកបម្រើប្រជាពលរដ្ឋទេ ហើយជាការផ្ទុយនឹងគោលនយោបាយរបស់រដ្ឋាភិបាលអាណត្តិទី៦ ថាអស់លោកជាមន្ត្រីជាអ្នកបម្រើប្រជាពលរដ្ឋ មិនមែនជាម្ចាស់របស់ពលរដ្ឋទេ » ។
ប្រជានេសាទ និងមន្ត្រីសង្គមស៊ីវិល សម្ដែងការព្រួយបារម្ភថា ពីមួយឆ្នាំទៅមួយឆ្នាំ បរិមាណត្រីនៅតំបន់បឹងទន្លេសាបកាន់ថយចុះបន្តិចម្ដងៗ ហើយបញ្ហានេះប្រសិនបើរដ្ឋអំណាចរបបលោក ហ៊ុន សែន នៅតែបណ្ដោយឲ្យអាជ្ញាធរមូលដ្ឋានមើលការខុសត្រូវ ដោយមិនមានការទប់ស្កាត់ឲ្យបានឆាប់ទេ គឺត្រីទាំងតូចទាំងធំ នឹងហិនហោចពីតំបន់បឹងទន្លេសាបក្នុងពេលដ៏ឆាប់ខាងមុខនេះ។ លោក ហ៊ុត ហាន អះអាងថា នៅពេលដែលអស់ត្រីពីតំបន់នោះ នឹងធ្វើឲ្យប៉ះពាល់ដល់ពលរដ្ឋរាប់ពាន់គ្រួសារនៅក្នុងស្រុកឯកភ្នំ ដោយសារពួកគាត់រស់នៅលើទឹកគ្មានដីដាំដុះ ដូចពលរដ្ឋនៅតំបន់ផ្សេងទេ ហើយពួកគាត់ត្រូវពឹងផ្អែកទាំងស្រុកទៅលើរបរនេសាទ ដូច្នេះពួកគាត់នឹងត្រូវធ្វើចំណាកស្រុកទៅរស់នៅតំបន់ផ្សេង និងទៅប្រទេសថៃ កាន់តែច្រើនដើម្បីរកប្រាក់ដោះស្រាយជីវភាពគ្រួសារ។ ចំណែកកុមារតូចៗក៏ប្រឈមជួបគ្រោះមិនចេះអក្សរ ដោយសារពួកគេមិនបានចូលសាលារៀន ព្រោះត្រូវទៅរស់នៅតាមឪពុកម្ដាយនៅឯក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។