នាវាពីរគ្រឿងនៃកងកម្លាំងស្វ័យការពារជើងទឹកជប៉ុន ឈ្មោះ "សេតូយុគិ" “SETOYUKI” និង "ស៊ីម៉ាយុគិ" “SHIMAYUKI” នឹងមកកម្ពុជាក្នុងដំណាច់ខែកុម្ភៈនេះ ក្នុងដំណើរហ្វឹកហ្វឺនលើលំហសមុទ្រ។ នាវាទាំងពីរគ្រឿងដឹកនាំដោយវរនាវីឯក លោក យ៉ូស៊ីយូគី ណាកាហ្គាម៉ា (Yoshiyuki NAKAGAMA) នឹងចូលចតកំពង់ផែស្វយ័តក្រុងព្រះសីហនុ រយៈពេល៤ថ្ងៃ ចាប់ពីទី២៥ ដល់ទី២៨ ខែកុម្ភៈ។
ស្ថានទូតជប៉ុនប្រចាំកម្ពុជា ចេញសេចក្ដីប្រកាសព័ត៌មាន កាលពីម្សិលមិញ ឱ្យដឹងថា គោលបំណងនៃដំណើរទស្សនកិច្ចរបស់ទ័ពជើងទឹកជប៉ុននេះ គឺដើម្បីពង្រឹងទំនាក់ទំនងមិត្តភាពរវាងជប៉ុន និងកម្ពុជា តាមរយៈការផ្លាស់ប្ដូរកម្មវិធីផ្សេងៗ ក៏ដូចជាផ្ដល់ឱកាសនាយនាវិក កម្មសិក្សាការីចំនួន ១០៩នាក់ដែលទើបបញ្ចប់ការសិក្សា បានស្វែងរកអំពីវប្បធម៌ និងវិស័យយោធានៅកម្ពុជា។
កាលពីខែមករា កន្លង មក មាននាវាចិនចំនួន ៣គ្រឿង បានចូលចតនៅកំពង់ផែក្រុងព្រះសីហនុ រយៈពេល៤ថ្ងៃ ដើម្បីរឹតចំណងសាមគ្គីភាព និងបង្កើនកិច្ចសហប្រតិបត្តិការយោធារវាងកម្ពុជា-ចិន ជាពិសេសកងទ័ពជើងទឹកនៃប្រទេសទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។