ជំនួបរវាងក្រសួងការបរទេសនិងស្ថានទូតទាំងអស់ផ្ដោតលើការពង្រឹងទំនាក់ទំនងការងារ
2016.05.05
ជំនួបរវាងក្រសួងការបរទេស និងស្ថានទូតទាំងអស់ប្រចាំនៅកម្ពុជា នៅថ្ងៃទី៥ ខែឧសភា ឆ្នាំ២០១៦។ RFA/Tha Kitya
RFA/Tha Kitya
រដ្ឋមន្ត្រីថ្មីនៃក្រសួងការបរទេសកម្ពុជា លោក ប្រាក់ សុខុន បានជួបប្រជុំជាមួយប្រធានបេសកកម្មការទូតបរទេសទាំងអស់ និងតំណាងអង្គការសហប្រជាជាតិ ប្រចាំក្រុងភ្នំពេញ នៅរសៀលថ្ងៃទី៥ ខែឧសភា។
ក្នុងជំនួបនោះ ពុំបានលើកយកបញ្ហាលទ្ធិប្រជាធិបតេយ្យ បញ្ហាសិទ្ធិមនុស្សទៅជជែកគ្នាឡើយ ក្រៅតែផ្ដោតលើការពង្រឹងទំនាក់ទំនងការងារ និងស្វាគមន៍ចំពោះលោក ប្រាក់ សុខុន ដែលបានឡើងកាន់តំណែងជារដ្ឋមន្ត្រីក្រសួងការបរទេស។
អ្នកនាំពាក្យក្រសួងការបរទេស លោក ជុំ សុន្ទរី ឲ្យដឹងថា ក្នុងជំនួបប្រមាណមួយម៉ោងនោះ ទាំងរដ្ឋមន្ត្រីក្រសួងការបរទេស លោក ប្រាក់ សុខុន និងប្រធានបេសកកម្មការទូតបរទេសទាំងអស់ ព្រមទាំងតំណាងអង្គការសហប្រជាជាតិ ប្រចាំក្រុងភ្នំពេញ សុទ្ធតែបានប្ដេជ្ញាពង្រឹងទំនាក់ទំនងការងារទ្វេភាគី និងពហុភាគី ព្រមទាំងពង្រឹងទំនាក់ទំនងលើផ្នែកសកម្មភាពសង្គម៖ «ក្រៅពីទំនាក់ទំនងការងារ គឺសកម្មភាពសង្គមដើម្បីបង្កើនភាពស្និទ្ធស្នាលរវាងក្រសួង និងស្ថានបេសកកម្មការទូត ក្នុងនោះមានដូចជាសកម្មភាពកីឡា និងការរៀបចំដំណើរកម្សាន្តទៅតាមខេត្តជាដើម»។
អ្នកនាំពាក្យក្រសួងការបរទេស បញ្ជាក់ថា ក្នុងជំនួបរវាងលោក ប្រាក់ សុខុន និងបណ្ដាអង្គទូតទាំង ២៩ នេះ មិនបានពិភាក្សាលើបញ្ហាស្ថានភាពនយោបាយដែលមានការចាប់ខ្លួនសកម្មជនសិទ្ធិមនុស្ស និងអ្នកនយោបាយក្នុងរយៈពេលចុងក្រោយនេះឡើយ៖ «ឯកឧត្តមទេសរដ្ឋមន្ត្រី មិនបានលើកឡើងពីបញ្ហាហ្នឹងទេ ព្រោះជាក់ស្តែងស្ថានបេសកកម្ម បានគោរពចំពោះអធិបតេយ្យភាពរបស់កម្ពុជា ដោយស្ថានតំណាងអត់បានលើកឡើងអំពីបញ្ហាណាមួយ ដែលមានលក្ខណៈបង្ហាញពីការជ្រៀតជ្រែកកិច្ចការផ្ទៃក្នុងរបស់កម្ពុជា គឺអត់មានលើកឡើងឡើយ។ ដូច្នេះវាមិនចាំបាច់ទៅលើកឡើងទៅលើបញ្ហាហ្នុងទេ»។
ស្ថានភាពនយោបាយមួយរយៈចុងក្រោយនេះ ហាក់មានសភាពតានតឹងឡើងវិញ បន្ទាប់ពីអង្គភាពប្រឆាំងអំពើពុករលួយ និងតុលាការ ចាប់ឃុំខ្លួនមន្ត្រីការពារសិទ្ធិមនុស្សអាដហុក (ADHOC) ចំនួន ៤រូប មន្ត្រី គ.ជ.ប ១រូប និងចោទប្រកាន់មន្ត្រីអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ១រូប ពាក់ព័ន្ធការចោទប្រកាន់របស់អ្នកនាង ខុម ចាន់តារាទី ហៅ ស្រីមុំ ដែលថារូបនាងត្រូវបានណែនាំឲ្យនិយាយភូតកុហកសមត្ថកិច្ច។
ទន្ទឹមគ្នានេះដែរ តំណាងរាស្ត្រ និងមេដឹកនាំគណបក្សសង្គ្រោះជាតិ ត្រូវបានសាលាដំបូងរាជធានីភ្នំពេញ ចេញដីកាឃុំខ្លួន និងកោះហៅឲ្យចូលខ្លួនបំភ្លឺជាបន្តបន្ទាប់តាមបណ្ដឹងរបស់កញ្ញា ធី សុវណ្ណថា ពីបទបរិហារកេរ្តិ៍ និងពីបទពេស្យាចារ ក្នុងរឿងអាស្រូវស្នេហារវាងលោក កឹម សុខា និងអ្នកនាង ខុម ចាន់តារាទី ហៅ ស្រីមុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
