មតិពលរដ្ឋជុំវិញខួបមួយខែករណីឃាតកម្មលើលោកបណ្ឌិត កែម ឡី
2016.08.10
យុវជន ហុង លី ផ្ដល់បទសម្ភាសន៍អំពីឃាតកម្មបណ្ឌិត កែម ឡី នាស្ថានីយប្រេងឥន្ធនៈកាល់តិច (Caltex) នៅថ្ងៃទី៩ ខែសីហា ឆ្នាំ២០១៦។ RFA/Ou Banung
RFA/Ou Banung
ថ្ងៃទី១០ សីហា គឺជាខួបគម្រប់ ៣០ថ្ងៃនៃការបាញ់ប្រហារលោកបណ្ឌិត កែម ឡី នៅឯហាងលក់ទំនិញស្ដារម៉ាត (Star Mart) ក្នុងស្ថានីយប្រេងឥន្ធនៈកាល់តិច (Caltex) បូកគោ រាជធានីភ្នំពេញ។ ករណីនេះស្ថិតនៅក្រោមការស៊ើបអង្កេតរបស់សមត្ថកិច្ចនៅឡើយ។ ប្រជាពលរដ្ឋមួយចំនួនបានបញ្ចេញទស្សនៈផ្សេងៗគ្នា ជុំវិញករណីឃាតកម្មនេះ។
សម្រែកទាមទាររកយុត្តិធម៌សម្រាប់បណ្ឌិត កែម ឡី នៅតែបន្តចាប់តាំងពីឃាតកម្មកើតឡើង រហូតមកដល់ថ្ងៃទី១០ ខែសីហា ដែលមានគម្រប់មួយខែគត់។
បុរសវ័យចំណាស់មួយរូបដែលកំពុងអង្គុយនៅក្បែរតុកាហ្វេក្នុងស្ដារម៉ាត កាល់តិច បូកគោ ជាទីដែលឃាតកបាញ់សម្លាប់លោកបណ្ឌិត កែម ឡី ថ្លែងក្នុងលក្ខខណ្ឌមិនបញ្ចេញឈ្មោះថា លោកជាពលរដ្ឋមកពីខេត្តកណ្ដាល។ មូលហេតុដែលលោកមកទីនេះ ដោយសារលោកចង់ដឹងទីដែលលោកបណ្ឌិត រងទុក្ខទារុណដល់បាត់បង់ជីវិតដោយគ្រាប់កាំភ្លើងដោយសារបុព្វហេតុជាតិ ដោយព្រោះតែហ៊ាននិយាយការពិត។ នៅពេលផ្ដល់សម្ភាស លោកថ្លែងដោយប្រយ័ត្នប្រយែងថា លោកមានក្ដីស្រណោះនឹកអាណិត និងស្រឡាញ់ទស្សនៈរបស់លោកបណ្ឌិត កែម ឡី ជាពន់ពេក។ ជាងនេះទៅទៀត លោកពេញចិត្តនូវយុទ្ធនាការ ១០០រាត្រីរបស់គាត់៖ «ថ្ងៃនេះជាលើកទី១ដែលខ្ញុំបានមកដល់ទីនេះកន្លែងគាត់ហូបហ្នឹង។ ខ្ញុំមកនេះរំលឹកនូវវីរភាពរបស់គាត់ដែលគាត់ហ៊ានពលីជីវិតដើម្បីបុព្វហេតុប្រជាធិបតេយ្យ។ ខ្ញុំពេញចិត្ត ខ្ញុំសរសើរអស់ពីដួងចិត្តដល់វីរភាពរបស់គាត់បានខ្ញុំសុខចិត្តមកទីនេះ ព្រោះខ្ញុំមនុស្សចាស់ចូលចិត្តកាហ្វេ ហើយគាត់កាហ្វេដែរ កាហ្វេគឺជាការពិភាក្សាគ្នា ដើម្បីរកភាពអភិវឌ្ឍន៍»។
អង្គុយក្នុងស្តារម៉ាតកាល់តិចនេះដែរ យុវជន ហុង លី វ័យ ២៣ឆ្នាំ ថ្លែងថា គាត់នៅតែបន្តតាមដានករណីនេះ៖ «ខ្ញុំចេញពីធ្វើការមកខ្ញុំជិះកាត់ហ្នឹង មកទិញអីញ៉ាំសម្រាកបន្លិចហើយក៏ចេះតែចង់ឃើញទិដ្ឋភាពជាក់ស្ដែង ថាកន្លែងហ្នឹងមានការប្រែប្រួលអីម៉េចៗហើយ។ ក្នុងនាមជាយុវជនម្នាក់ដែរគ្រាន់តែថា ចង់ឲ្យមានការស៊ើបអង្កេតជាក់លាក់គាត់ជាវីរបុរសដែលមានសមត្ថភាពគាត់មានចំណេះដឹងច្រើន»។
ចំណែកស្ត្រីវ័យ ៧៣ឆ្នាំមួយរូប លោកស្រី ច្រឹក យឿន ជាពលរដ្ឋនៅខណ្ឌចំការមន មានទស្សនៈថា លោកស្រីធ្លាប់ស្គាល់ និងចូលរួមស្ដាប់លោកបណ្ឌិត កែម ឡី និយាយដោយផ្ទាល់នៅក្នុងសិក្ខាសាលាជាញឹកញាប់ ដោយបានអប់រំ និងផ្ដល់ចំណេះដឹងដល់យុវជន។ លោកស្រីរំឭកថា គាត់រន្ធត់ចិត្តនឹកស្មានមិនដល់ចំពោះការបាត់បង់លោកបណ្ឌិត។ អ្វីដែលសោកស្ដាយបំផុត គឺចំណេះវិជ្ជាដែលបានបាត់បង់ទៅជាមួយលោកបណ្ឌិត កែម ឡី។ មកដល់ពេលនេះ លោកស្រីមិនសង្ឃឹមសោះថា តុលាការកម្ពុជា នឹងផ្ដល់យុត្តិធម៌ក្នុងករណីឃាតកម្មនេះ៖ «មួយខែគត់គ្មានឃើញអីសោះ គឺប៉ុន្មាននាក់មកហើយគឺចាំតែមើលរហូតតាំងពី ពិសិដ្ឋ ពិលីការ ជា វិជ្ជា ឈុត វុទ្ធី អ្នកអស់ទាំងនោះគឺស្លាប់នៅក្នុងព្រៃ ជា វិជ្ជា ក៏នៅនេះ ហើយលោកតា សម ប៊ុនធឿន ក៏គ្មានឃើញអ្វីទាំងអស់ ដល់លោក កែម ឡី នេះកណ្ដាល ហើយនៅក្នុងម៉ាត (Mart) ក៏គេរកអីមិនឃើញទេ និយាយទៅខ្ញុំអាណិតកូនខ្មែរណាស់។ ខ្ញុំនិយាយតឹងទ្រូងណាស់ មិនគួរណាខ្មែរគេធ្វើបាបខ្មែររបៀបនេះ ខ្ញុំមិនដែលឃើញទេ ធ្វើបាបគ្រប់កន្លែងកាលៈទេសៈទាំងអស់ គឺខ្ញុំកើតទុកនឹងរឿងជាតិ កើតទុកទី២ រឿងប្រជាជនយំស្រែក ដោយសាររឿងដី រឿងធ្លី ហើយសម្លាប់មនុស្សដោយអយុត្តិធម៌ ខ្ញុំឈឺចាប់ណាស់»។
ស្រដៀងគ្នានេះដែរ ពលរដ្ឋមួយរូបទៀតរស់នៅរាជធានីភ្នំពេញ គឺលោកស្រី អ៊ា សម័យ បានអំពាវនាវសហគមន៍អន្តរជាតិ ស្វែងរកយុត្តិធម៌ឲ្យលោកបណ្ឌិត កែម ឡី៖ «យល់បានជួបនិងយល់ឲ្យបានច្បាស់លាស់ថា រកយុត្តិធម៌ឲ្យគាត់បាន ខ្ញុំអរណាស់ ប្រជាជនស្រលាញ់គាត់ អាណិតគាត់ ខ្ញុំទៅដល់ផ្ទះគាត់គាត់អត់មានអីទេ។ ខ្ញុំស្រក់ទឹកភ្នែក ខ្ញុំអត់មានឃើញអីក្នុងផ្ទះគាត់សោះ គាត់ហ្នឹងគឺថា ស្រលាញ់ជាតិ ស្រលាញ់ទឹកដីណាស់ អត់មានលោភលន់ទ្រព្យសម្បត្តិអីទេ»។
ដោយចង់ឃើញពន្លឺយុត្តិធម៌ដល់លោកបណ្ឌិត កែម ឡី ស្ត្រីអ្នកលក់ដូរនៅលើដងវិថីសុធារស ដែលអះអាងថាគាត់បានចូលរួមដេញជនសង្ស័យដែលបានរត់កាត់វិថីនេះជាមួយពលរដ្ឋដទៃដែរ គាត់ស្នើឲ្យអាជ្ញាធរបង្ហាញសាធារណជនឲ្យឃើញវីដេអូក្នុងកាមេរ៉ាសុវត្ថិភាព៖ «ពេលដឹងថា បាញ់គាត់បងរន្ធត់មែនទែន! ព្រោះអីគាត់អ្នកវិភាគល្អនៅស្រុកខ្មែរយើងនេះ គាត់អត់ខ្លាចទេ គឺនិយាយតែការពិត។ ស្ដាយគាត់ អាណិតគាត់ ចង់ឲ្យប៉ូលិសបង្ហាញកាំម៉េរ៉ាសុវត្ថិភាពដើម្បីបង្ហាញប្រជាពលរដ្ឋទាំងអស់គ្នាបានដឹង ចង់ឲ្យដឹងថា នរណាអ្នកបាញ់រកឃាតកពិត»។
ជុំវិញពន្លឺយុត្តិធម៌ដល់លោកបណ្ឌិត កែម ឡី អ្នកស្រី ចាន់ ចរិយា ដែលនិយមទៅទទួលទានកាហ្វេ និងតែងជួបមុខលោក កែម ឡី នៅស្តារម៉ាតនេះ ពុំមានសង្ឃឹមសោះឡើយថានឹងមានយុត្តិធម៌៖ «ខ្ញុំគិតថា បើទាមទាររកយុត្តិធម៌គឺវាអត់មានទេសម្រាប់គាត់ ប៉ុន្តែអ្វីដែលយើងអាចធ្វើបានគឺមានតែយើងធ្វើយ៉ាងណាបំពេញបំណងរបស់គាត់ដែលគាត់បានធ្វើកន្លងមក អ្វីដែលសំខាន់គឺចង់ឲ្យខ្មែរយើងសាមគ្គីគ្នា»។
ទោះបីជាយ៉ាងណាក៏ដោយ ពួកគាត់នៅតែទន្ទឹងរង់ចាំយុត្តិធម៌ និងមិនទាន់ប្រាកដក្នុងចិត្តទេថា លទ្ធផលនៃការស៊ើបអង្កេតនេះអាចផ្ដល់យុត្តិធម៌ដល់លោកបណ្ឌិត កែម ឡី និងគ្រួសារលោកបណ្ឌិតនោះឡើយ ដោយសារករណីមុនៗ សមត្ថកិច្ចនៅមិនទាន់វែកមុខជនល្មើស និងអ្នកនៅពីក្រោយខ្នងនៃការបាញ់សម្លាប់សិល្បករ មេដឹកនាំសហជីព និងសកម្មជនបរិស្ថាន ឃើញនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋរិះគន់ថា ភ្លើងឆេះព្រះឆាយាល័ក្ខណ៍ព្រះមហាក្សត្រ ជាការធ្វេសប្រហែសរបស់អាជ្ញាធរក្រុងភ្នំពេញ
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- អតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា ត្រូវឃាតកបាញ់សម្លាប់នៅប្រទេសថៃ
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ
អត្ថបទពេញនិយម
សង្គម
- ភ្លើងឆេះរូបព្រះឆាយាល័ក្ខណ៍ព្រះមហាក្សត្រតាំងនៅមុខវាំងនៅយប់ឆ្លងឆ្នាំ
- លោក ហ៊ុន តូ ព្រមានចាត់វិធានការតាមច្បាប់លើលោក ហេង សិទ្ធី ដែលចោទលោកថា ឆបោកប្រាក់ជនបរទេស និងនៅពីក្រោយឧក្រិដ្ឋជនឆបោកតាមអនឡាញ
- ជនបរទេសជិត ៦០នាក់នាំគ្នារត់ចេញពីអគារអនឡាញរបស់លោក លី យ៉ុងផាត់ ក្នុងខេត្ត ឧត្តរមានជ័យ
- អតីតឧកញ៉ា ហេង សិទ្ធី បន្តចោទមន្ត្រីក្នុងជួររដ្ឋាភិបាលជាប់ពាក់ព័ន្ធនឹងឧក្រិដ្ឋកម្មឆបោកតាមអនឡាញ