ពលរដ្ឋនៅក្រុងប៉ោយប៉ែតព្រួយបារម្ភថា ផ្លូវរថភ្លើងគ្មានរនាំងការពារបង្កគ្រោះថ្នាក់ដល់អាយុជីវិតមនុស្សកាន់តែខ្លាំង
2018.09.24
ប្រជាពលរដ្ឋនៅខេត្តបន្ទាយមានជ័យមួយចំនួនព្រួយបារម្ភថា ការធ្វើដំណើរឆ្លងការផ្លូវរថភ្លើងនៅក្រុងប៉ោយប៉ែតសព្វថ្ងៃមិនមានសុវត្ថិភាពទេ ហើយប្រឈមនឹងគ្រោះថ្នាក់ដល់អាយុជីវិតរបស់មនុស្សកាន់តែខ្លាំងទៀតផង។ ពលរដ្ឋអះអាងថា មូលហេតុដែលបណ្ដាលឲ្យគ្រោះថ្នាក់ ដោយសារអាជ្ញាធរមិនធ្វើរនាំងការពារនៅកន្លែងឆ្លងកាត់ផ្លូវឲ្យបានត្រឹមត្រូវ។
ប្រជាពលរដ្ឋនៅក្រុងប៉ោយប៉ែតលើកឡើងថា ចាប់តាំងពីក្រសួងសាធារណការនឹងដឹកជញ្ជូនបើកដំណើរផ្លូវដែកពីទីរួមខេត្តបន្ទាយមានជ័យទៅក្រុងប៉ោយប៉ែតមក គឺអ្នកធ្វើដំណើរនៅឆ្លងកាត់ផ្លូវដែកមួយនេះមិនមានសេចក្ដីសុខនោះឡើយ ដោយត្រូវផ្សេងព្រេងនឹងគ្រោះថ្នាក់ជារៀងរាល់ថ្ងៃ។
ពលរដ្ឋរស់នៅក្រុងប៉ោយប៉ែតម្នាក់ លោក វន វ័ន ឲ្យដឹងនៅថ្ងៃទី២៤ កញ្ញាថា មួយរយៈចុងក្រោយនេះ ពួកគាត់ខ្វល់ខ្វាយអំពីសុវត្ថិភាពនៃការឆ្លងកាត់ផ្លូវរថភ្លើងជាខ្លាំង ព្រោះអាជ្ញាធរមិនបានដាក់រនាំងការពារសុវត្ថិភាពនៅកន្លែងឆ្លងកាត់រថភ្លើងឲ្យបានគ្រប់ទីកន្លែងនៅឡើយ៖ «ចំពោះគ្រួសារខ្ញុំត្រូវប្រុងប្រយ័ត្នជារៀងរាល់ថ្ងៃ ព្រោះរថភ្លើងគ្មានស៊ីផ្លេដំណឹងប្រាប់មុន ធ្វើខ្ញុំអើតមើលផ្លូវរថភ្លើងដូចចាំ មើលម៉ែមកពីផ្សារអីចឹង ហើយបញ្ហានេះដោយសារតែអាជ្ញាធរមិនគិតគួរពីសុវត្ថិភាពរបស់ពលរដ្ឋ ហើយពួកខ្ញុំត្រៀមខ្លួនតែថ្ងៃណាមួយជួបគ្រោះថ្នាក់ទេ»។
លោកបន្ថែមទៀតថា កាលពីថ្ងៃទី២២ និងទី២៣ កញ្ញា រថភ្លើងបានបុកជាមួយរថយន្តចំនួន ២លើក នៅក្រុងប៉ោយប៉ែត ហើយបានបណ្ដាលឲ្យមនុស្សរបួសធ្ងន់ម្នាក់។
ចំណែកពលរដ្ឋនៅក្រុងប៉ោយប៉ែតម្នាក់ទៀត អះអាងថា គ្រោះថ្នាក់ដោយការឆ្លងផ្លូវរថភ្លើងនៅក្រុងប៉ោយប៉ែតកន្លងមក ដោយសារគ្មានរនាំងការពារសុវត្ថិភាព ហើយអ្នកដំណើរក៏មិនដឹងថា រថភ្លើងត្រូវឆ្លងកាត់តំបន់ ដែលពួកគាត់ធ្វើដំណើរនៅពេលណានោះឡើយ ហើយម្យ៉ាងទៀតបណ្ដាលមកពីគ្មានសមត្ថកិច្ចប្រចាំការ ដើម្បីជួយសម្រួលដល់អ្នកធ្វើដំណើរឆ្លងកាត់ផ្លូវរថភ្លើង ទើបបណ្ដាលឲ្យគ្រោះថ្នាក់ចរាចរញឹកញាប់នោះ៖ «រដ្ឋអំណាចដំណើរការផ្លូវរថភ្លើងនេះដូចជាយកជីវិតពលរដ្ឋទៅលេងសើច ព្រោះតាំងពីដំណើរការមកធ្វើឲ្យពលរដ្ឋភ័យខ្លាច ហើយនៅពេលរថភ្លើងមកដល់ម្ដងៗ គឺប្រឈមនឹងគ្រោះថ្នាក់ណាស់។ ខ្ញុំទទូចសុំរដ្ឋអំណាចពាក់ព័ន្ធធ្វើយ៉ាងណា ដើម្បីការពារកុំឲ្យមានគ្រោះថ្នាក់កើតឡើងទៅថ្ងៃក្រោយទៀត»។
ឆ្លើយតបនឹងបញ្ហានេះ ប្រធានមន្ទីរសាធារណៈការនឹងដឹកជញ្ជូនខេត្តបន្ទាយមានជ័យលោក គឹម សុវណ្ណ មានប្រសាសន៍ថា បញ្ហាគ្រោះថ្នាក់លើកផ្លូវរថភ្លើងកន្លងមក ដោយសារប្រជាពលរដ្ឋខ្លួនឯងខ្វះការប្រុងប្រយ័ត្ន និងមិនយល់ពីរបៀបឆ្លងកាត់ផ្លូវរថភ្លើង។ លោកបន្ថែមទៀតថា ចាប់ពីបើដំណើរផ្លូវរថភ្លើងក្នុងខេត្តបន្ទាយមានជ័យមក គឺមិនទាន់មានពលរដ្ឋណាគ្រោះថ្នាក់ដល់អាយុជីវិតនៅឡើយទេ៖ «បានដាក់រនាំងការពារសុវត្ថិភាពបានច្រើនហើយ ប្រជាពលរដ្ឋគាត់ធ្លាប់តែអត់មានរថភ្លើង ហើយគាត់ភ្លេចខ្លួន អាជ្ញាធរបានផ្សព្វផ្សាយជូនដំណឹងតាមវិទ្យុ ហើយថែមទាំងឲ្យប្រជាការពារភូមិទៅជួយផ្សព្វផ្សាយតាមភូមិទៀតផង»។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបន្ទាយមានជ័យ លើកឡើងថា កំហុសទាំងអស់នេះមិនមែនដោយសារពលរដ្ឋខ្វះការប្រុងប្រយ័ត្ននោះទេ តែដោយសារខ្វះការទទួលខុសត្រូវរបស់អាជ្ញាធរពាក់ព័ន្ធ ដែលមិនបានដាក់របាំងការពារសុវត្ថិភាពនៅចំណុចមានអ្នកធ្វើដំណើរឆ្លងកាត់ផ្លូវរថភ្លើងឲ្យបានត្រឹមត្រូវ។ លោកកត់សំគាល់ថា ប្រជាពលរដ្ឋមានមនុស្សឆ្លងកាត់ផ្លូវរថភ្លើងច្រើនជាងតំបន់ផ្សេងៗ នៅក្នុងខេត្តមួយនេះ ហើយពួកគាត់នៅតែប្រឈមគ្រោះថ្នាក់ ប្រសិនបើអាជ្ញាធរមិនព្រមដោះស្រាយបញ្ហានេះឲ្យបានត្រឹមត្រូវនោះ៖ «ព្រោះដោយសារតែយើងធ្វើរថភ្លើងហ្នឹងសម្រាប់បម្រើផលប្រយោជន៍មនុស្ស ដូច្នេះយើងត្រូវជួយសម្រួលយ៉ាងណា ដើម្បីឲ្យមនុស្សហ្នឹងរួចផុតពីគ្រោះ ហើយអ្នកធ្វើការងារនេះវាជាភារកិច្ចរបស់ភ្នាក់ងាររដ្ឋ គឺមិនមែនធ្វើចោលអីចឹងហើយអ្នកណាដើរៗ ទៅអ្នកណាបុកៗ ទៅ អញមិនខ្វល់ ហើយចោទមកពីមនុស្សដើរអត់មើលដើរមិនប្រយ័ត្នអីវាមិនត្រូវ»។
ក្រសួងសាធារណការនឹងដឹកជញ្ជូនបានបើកដំណើរការផ្លូវរថភ្លើងពីទីរួមខេត្តបន្ទាយមានជ័យទៅក្រុងប៉ោយប៉ែត កាលពីដើមខែមេសាឆ្នាំ២០១៨។ ចាប់តាំងពីបើកដំណើរការមក នៅក្រុងប៉ោយប៉ែតរថភ្លើងបានបុករថយន្តឆ្លងកាត់ផ្លូវចំនួន ៥លើកហើយ និងបណ្ដាលឲ្យមនុស្សរងរបួសធ្ងន់ចំនួន ៤នាក់។
ផ្លូវរថភ្លើងពីរាជធានីភ្នំពេញទៅក្រុងប៉ោយប៉ែតមានប្រវែង ៣៨៦គីឡូម៉ែត្រ ចំណាយអស់ថវិកាសាងសង់ជាង ៩៦លានដុល្លារអាមេរិក (៩៦.៦០០.០០០)។ ផ្លូវដែកមួយខ្សែនេះ ត្រូវបានបើកឲ្យដំណើរឡើងវិញ កាលពីខែកក្កដា ឆ្នាំ២០១៨។ រដ្ឋមន្ត្រីក្រសួងសាធារណការនឹងដឹកជញ្ជូនលោក ស៊ុន ចាន់ថុល ធ្លាប់អះអាងថា គម្រោងអភិវឌ្ឍន៍នេះ ជាថវិការបស់ធនាគារអភិវឌ្ឍន៍អាស៊ី ហៅកាត់ថា អេ.ឌី.ប៊ី (ADB) ប្រមាណ ១៣លានដុល្លារ និងថវិកាបដិភាគរបស់របបលោក ហ៊ុន សែន ជាង ៨៣លានដុល្លារ (៨៣.០០០.០០០) អាមេរិក។ ប្រធានមន្ទីរសាធារណការនឹងដឹកជញ្ជូនខេត្តបន្ទាយមានជ័យ ឲ្យដឹងថា ផ្លូវដែកមួយខ្សែនេះ អាជ្ញាធរកម្ពុជា និងថៃ គ្រោងបើកឲ្យដំណើរដឹកអ្នកដំណើរ និងដឹកទំនិញឆ្លងកាត់ប្រទេសទាំង ២នៅខែធ្នូ ចុងឆ្នាំ២០១៨នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។