អគ្គីភ័យបានឆាបឆេះបំផ្លាញតូបរបស់អាជីវករអស់ប្រមាណ ២៦៣តូប និងផ្ទះ ២៤ខ្នងទៀត នៅផ្សារកអណ្ដើក ស្ថិតនៅឃុំប្រាសាទ ស្រុកកំពង់ត្របែក ខេត្តព្រៃវែង នៅយប់រំលងអធ្រាត្រ ថ្ងៃទី២៥ ឈានចូលថ្ងៃទី២៦ វិច្ឆិកា។ ហេតុការណ៍ដែលកើតឡើងទាំងកណ្ដាលយប់នេះ គឺមិនមានគ្រោះថ្នាក់ដល់អាយុជីវិតមនុស្សទេ។
គំនរធ្យូង និងផេះ ព្រមទាំងដំបូលស័ង្កសី បានធ្លាក់រាបដល់ដីក្រោយពេលដែលអគ្គីភ័យបានឆាបឆេះផ្សារកអណ្ដើក តាមបណ្ដោយផ្លូវជាតិលេខ១ ស្ថិតនៅឃុំប្រាសាទ ស្រុកកំពង់ត្របែក ខេត្តព្រៃវែង។ ក្រុមអាជីវករមួយចំនួនដែលមានតូបលក់ដូរនៅក្នុងផ្សារ នាំគ្នាកកាយធ្យូងមានផ្សែងហុយៗ ដើម្បីរកមើលឥវ៉ាន់ និងសម្ភារៈក្រែងនៅសេសសល់របស់របរខ្លះក្រោយពេលភ្លើងឆេះនោះ។
លោក កឹម ថា ម្ចាស់តូបលក់ដូរនៅក្នុងផ្សារកអណ្ដើក បានថ្លែងទាំងក្ដុកក្ដួលថា អាជីវករដែលនៅក្បែរៗផ្សារនោះ មិនអាចពន្លត់ភ្លើងដែលឆេះទាំងកណ្ដាលយប់នោះបានទាន់ពេលទេ ដោយពួកគាត់ស្រវាបានតែក្មេងតូចៗដើម្បីកុំឲ្យគ្រោះថ្នាក់ដល់ជីវិត ហើយម្ចាស់តូបនៅក្នុងផ្សារនោះគឺសឹងតែមិនមានអ្នកណាម្នាក់យកឥវ៉ាន់បានឡើយ៖ «ខ្ញុំនៅជិតហ្នឹងដែរ នៅពេលដែលឆេះតំបន់ទី១ ប្រុងទៅជួយពន្លត់តែទឹកក៏មានតិច ដល់ត្រឡប់មកវិញភ្លើងកាន់តែខ្លាំង គឺយកបានតែកូនក្មេងទេ។ ការឆេះនេះគឺអស់ច្រើនណាស់ មិនស្មានបានទេ នៅសល់តែផេះនិងធ្យូង ព្រោះការរកស៊ីជាតិ ៣០ឆ្នាំមកនេះ គឺភ្លើងបំផ្លាញតែមួយភ្លែតទេ»។
ក្រុមសមត្ថកិច្ចនៅមិនទាន់កំណត់ពីមូលហេតុដែលបណ្ដាលឲ្យឆាបឆេះ ព្រមទាំងទំហំទឹកប្រាក់ដែលត្រូវខូចខាតនៅឡើយ។
ការឆាបឆេះនេះបានកើតឡើងតាំងពីម៉ោងជាង ១២ រហូតម៉ោង ៤ទៀបភ្លឺ ទើបអាចពន្លត់បាន។ ភ្នាក់ងារពន្លត់អគ្គីភ័យថ្លែងថា សមត្ថកិច្ចប្រើរថយន្តពន្លត់អគ្គីភ័យ ៤គ្រឿង និងទឹកអស់ប្រហែល ២០ស៊ីទែនរថយន្តទើបអាចពន្លត់បាន ម្យ៉ាងទៀតដោយសារតែទីតាំងប្រចាំការរបស់ភ្នាក់ងារពន្លត់អគ្គីភ័យនៅឆ្ងាយពីទីតាំងកើតហេតុ ទម្រាំតែមកដល់គឺភ្លើងបានឆេះពេញបន្ទុកទៅហើយ។
អភិបាលខេត្តព្រៃវែង លោក ហាស់ សារ៉េត មានប្រសាសន៍ថា ក្រោយពេលចុះមើលស្ថានភាពខូចខាតនៅផ្សារកអណ្ដើកនោះហើយ លោកនិងប្រធានក្រុមប្រឹក្សាខេត្ត ព្រមទាំងក្រុមការងារ នឹងរៀបក្រុមការងារបន្ទាន់មួយដើម្បីវាយតម្លៃការខូចខាត និងសិក្សាពីលទ្ធភាពសាងសង់ផ្សារឡើងវិញ៖ «ក្រុមការងាររបស់សាលាខេត្តនឹងសិក្សាប្លង់ និងទីតាំង ហើយទំនាក់ទំនងជាមួយពលរដ្ឋ អាជីវករ ដើម្បីពិភាក្សាគ្នាក្រោយពេលឆេះផ្សារហើយនេះ តើយើងត្រូវរៀបចំដោយរបៀបណា ដូចជាត្រូវធ្វើផ្សារឡើងវិញ ឬធ្វើដោយរបៀបណា»។
លោកបានបញ្ជាក់ទៀតថា ជាគោលការណ៍សម្រាប់ការសាងសង់ផ្សារនៅលើកក្រោយ គឺនឹងទុកចន្លោះផ្លូវធំៗ ដើម្បីងាយស្រួលដល់ការធ្វើចរាចរក្នុងផ្សារផង និងងាយដល់រថយន្តពន្លត់អគ្គីភ័យផង។ ទោះជាយ៉ាងណាក្រុមពន្លត់អគ្គីភ័យ សុំឲ្យពលរដ្ឋគ្រប់មជ្ឈដ្ឋានប្រុងប្រយ័ត្នចំពោះការកើតមានអគ្គីភ័យក្រែងអាចកើតមានលើកក្រោយជាយថាហេតុ ព្រោះរដូវខ្យល់រាំងស្ងួតចូលមកដល់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។