ក្រុម​អ្នក​លក់​ដូរ​តាម​ដង​ផ្លូវ ទាមទារ​ឲ្យ​បញ្ឈប់​ការ​បៀតបៀន និង​អំពើ​ហិង្សា ប្រឆាំង​អ្នក​​លក់​ដូរ​​តាម​ដង​ផ្លូវ

ដោយ ម៉ៅ សុធានី
2018-11-15
អ៊ីម៉ែល
មតិ
Share
បោះពុម្ព
អ្នកលក់ដូរតាម​ផ្លូវ សមាគម​ប្រជជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ និង​អង្គការ Oxfam ជួបជុំ​គ្នា​អបអរសាទេ​ខួប​លើក​ទី៦ នៃ​ទិវា​អ្នក​លក់ដូរ​តាម​ដង​ផ្លូវ​អន្ដរ​ជាតិ។
អ្នកលក់ដូរតាម​ផ្លូវ សមាគម​ប្រជជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ និង​អង្គការ Oxfam ជួបជុំ​គ្នា​អបអរសាទេ​ខួប​លើក​ទី៦ នៃ​ទិវា​អ្នក​លក់ដូរ​តាម​ដង​ផ្លូវ​អន្ដរ​ជាតិ។
រូប៖ ហ្វេសប៊ុក Visal T. Lek

ក្រុមអាជីវករលក់ដូរតាមដងផ្លូវ ស្នើសុំ​ឲ្យ​អាជ្ញាធរ​របប​ក្រុង​ភ្នំពេញ បញ្ឈប់​ការ​បៀតបៀន និង​ប្រើ​ហិង្សា​ប្រឆាំង​លើ​ក្រុម​ពួក​គេ។ សំណើសុំ​នេះ ធ្វើ​ឡើង​ក្នុង​ខួប​លើក​ទី៦ នៃ​ទិវា​អន្ដរ​ជាតិ ​អ្នក​លក់​ដូរ​តាម​ដង​ផ្លូវ នៅទី​ស្នាក់​ការ​សមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ នៅ​រាជធានី​ភ្នំពេញ​។

ក្រុមអ្នកលក់ដូរតាមផ្លូវ កាលពីថ្ងៃទី១៤ វិច្ឆិកា បានជួបជុំគ្នា នៅ​សមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ សង្កាត់អូរបែកក្អម ខណ្ឌទួលគោក ដើម្បីរំលឹកខួបអន្ដរជាតិ លើកទី៦ នៃទិវា​អ្នកលក់​ដូរ​តាម​ផ្លូវ។ តំណាង​ក្រុម​អាជីវករ​លក់​ដូរ​​តាម​ដង​ផ្លូវ​ជាង ១០០នាក់ នៅ​ក្នុង​រាជធានី​ភ្នំពេញ បាន​ចូលរួម ជាមួយ​ក្រុម​សង្គម​ស៊ីវិល។ អាជីវករលក់ដូរតាមដងផ្លូវ អះអាងថា ពួកគេមកពី​ម្ដុំ​ផ្សារ​ដើមគរ ម្ដុំ​ខណ្ឌ​សែន​សុខ ផ្លូវ២០០៤ មុខ​របង​មន្ទីរពេទ្យ​រុស្ស៊ី និង​អ្នក​រុញ​រទេះ​លក់​តាម​ផ្លូវ​ជាដើម។

ប្រធានអ្នកលក់ដូរតាមផ្លូវ នៃ​សមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ កញ្ញា ហួត គីមស័ង ឲ្យដឹងថា ទិវា​អន្ដរជាតិ​នៃ​អ្នក​លក់ដូរ​តាម​ផ្លូវ ត្រូវ​បាន​ប្រារព្វ​ឡើង​ដំបូង​នៅ​ឆ្នាំ២០១២ នៅ​ទ្វីប​អាហ្វ្រីក។ នៅ​ឆ្នាំ​២០១៤ ក្រុម​អ្នក​លក់​ដូរ​តាម​ផ្លូវ បាន​នាំ​គ្នា​ចាប់​ផ្ដើម​ប្រារព្វ​នៅ​កម្ពុជា ដើម្បី​ទាមទារ​ចង់​ឲ្យ​មាន​កន្លែង​លក់​ដូរ​ត្រឹមត្រូវ​តាម​ដងផ្លូវ ដោយ​មិន​មាន​ការ​ធ្វើ​ទុក្ខ​បុក​ម្នេញ​ពី​អាជ្ញាធរ៖ «»

អាជីវករលក់ដូរសំលៀកបំពាក់ និង​ស្បែក​ជើង នៅ​ផ្សារ​ដើម​គ​ម្នាក់ អ្នកស្រី ម៉ៅ លក្ខិណា ប្រាប់ថា ក្រុម​អាជីវករលក់ដូរក្នុងផ្សារ និង​តាម​ដង​ផ្លូវ​នៅ​ផ្សារ​ដើម​គ បាន​ចងក្រង ដើម្បី​រួមគ្នា​តស៊ូ​មតិ​ឲ្យ​បញ្ឈប់​​ការ​បៀតបៀន ការប្រើហិង្សា វាយ ជាន់​កម្ទេច​បន្លែ តាម​កញ្ច្រែង ល្អី របស់​អ្នក​លក់​តាម​ដង​ផ្លូវ។ អាជីវករ​រូប​នេះ សង្គេត​ឃើញ​ថា ប៉ុន្មាន​ថ្ងៃ​ចុង​ក្រោយ​នេះ ក្រុមសន្ដិសុខផ្សារដើមគរ បានដេញ​ចាប់​ គ្រវែង​កញ្ច្រែង កញ្ជើ របស់អ្នកលក់បន្លែ តាម​ផ្លូវ​នៅ​ម្ដុំផ្សារ​ដើម​គ​ជា​ច្រើន បើទោះ​បីជា​ពួកគេ​បាន​ខិត កញ្ច្រែង មក​លក់​ឆ្ងាយ​ពី​ផ្លូវ​ហើយ​ក្ដី។ អ្នកស្រី ម៉ៅ លក្ខិណា បន្ដថា អ្នកដឹកបន្លែ​ពីផ្សារ​នាគ​មាស មក​ដាក់​តាម​តូប​​ឲ្យ​​អាជីវករ​នៅ​ផ្សារ​ដើម​គ និង​ក្រុម​ម៉ូតូ​ឌុប ដែល​ចូល​ទិញ​បន្លែ និង​រត់​ម៉ូតូ​ម្ដុំ​ផ្សារ​ដើម​គ ក៏​រង​ការ​រឹបអូស​ម៉ូតូ យក​ទៅ​ខណ្ឌ​ទួល​គោក​ដែរ៖ «»

អ្នកលក់ចេកចៀន តាម​ផ្លូវ​ម្ដុំ​ផ្សារ​ដើម​គ​ម្នាក់ គឺ​អ្នកស្រី ណឹប សឿន រៀបរាប់​ថា នៅ​ពេល​មន្ត្រី​កង​កម្លាំងចុះចាប់​ម្ដងៗ តែងលើកបោះសម្ភារៈ ខ្ទះចៀនចេក ចង្កឹះ ចង្ក្រាន្ដ ជា​ដើម ដាក់​ឡាន​យក​ទៅ​ខណ្ឌ ដោយ​មិន​ស្ដាប់​ពី​ពាក្យ​អង្វរ​ទេ។ អាជីវករ​វ័យ​ចំណាស់​រូប​នេះ អះអាងថា តែងបានលើកពីទុក្ខ​កង្វល់​រៀប​រាប់​ប្រាប់​មន្ត្រី​សាលា​រាជធានី​ភ្នំពេញ ពេល​ចុះ​មក​ប្រជុំ​ជាមួយ​អាជីវករ​តាម​ផ្លូវ ប៉ុន្ដែ​មិន​សូវ​មាន​ការ​យក​ចិត្ត​ទុក្ខ​ដាក់​ច្រើន​ទេ៖ «»

សេចក្តីថ្លែងការណ៍របស់សមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ បង្ហាញ​ថា អ្នក​លក់​ដូរ​តាម​ផ្លូវ នៅ​កម្ពុជា ពិសេស​នៅ​រាជ​ធានី​ភ្នំពេញ កំពុង​ជួប​ប្រទះ​បញ្ហា ដូច​ជា គ្មាន​កន្លែង​លក់​ដូរ​សមរម្យ បញ្ហា​អនាម័យ សុខភាព បញ្ហា​សុវត្ថិភាព​​អ្នក​​លក់​ដូរ​តាម​ផ្លូវ​រង​ការ​បៀតបៀន​ពី​ម្ចាស់​ផ្ទះ និង​អាជ្ញាធរ​មួយ​ចំនួន បញ្ហា​ប្រឈម​នឹង​សិទ្ធិ បញ្ហា​ប្រឈម​ការ​បណ្ដេញ​ចេញ​ពី​កន្លែង​លក់​ដូរ ប្រឈម​ការ​វិនិយោគ ដើម្បី​អភិវឌ្ឍន៍ ហើយ​បណ្ដេញ​អ្នក​លក់​ដូរ​តាម​ដង​ផ្លូវ​ចេញ មិន​ទទួល​បាន​កិច្ច​​គាំពារ​​សង្គម គ្មាន​ប័ណ្ណ​មូល​និធិ​សមធម៌ និង​របប​សន្ដិសុខ​សង្គម ចំណូល​មិន​ទៀង​ទាត់ ថ្លៃ​ភាស៊ី​មិន​ច្បាស់​លាស់ រង​អំពើ​ហិង្សា​​ពេល​កង​កម្លាំង​ចុះ​រៀបចំ​សណ្ដាប់ធ្នាប់ ចាប់​ឥវ៉ាន់​អ្នក​លក់ដូរ ធ្វើ​ឲ្យ​ខូច​ខាត​សម្ភារៈ បង្ខាំង​ឥវ៉ាន់​លក់ដូរ​ក្នុង​ការិយាល័យ​សណ្ដាប់ធ្នាប់​យូរ និង​បាត់បង់​សម្ភារៈ ក្រោយ​ពេល​ចាប់​យក​ទៅ​ផ្សារ​ជា​ច្រើន មិន​គោរព​តាម​ការ​ណែនាំ ហើយ​នៅ​តែ​យក​ភាស៊ី​ពី​អ្នក​លក់​ដូរ​តាម​កញ្ច្រែង កញ្ជើ ល្អី និង​ទីសាធារណៈ​មួយ​ចំនួន សុខ​ចិត្ត​បិទ​ចោល មិន​ព្រម​បើក​ឲ្យ​អ្នក​លក់​​ដូរ​​តាម​​ផ្លូវ​មាន​ឱកាស​លក់​ដូរ​ជា​ដើម។

មន្ត្រីកម្មវិធី​សិទ្ធិ​ការងារ​ នៃ​មជ្ឈមណ្ឌល​សម្ព័ន្ធភាព​​ការងារ​ និង​​សិទ្ធិ​​មនុ​ស្ស ​​ហៅ​កាត់​​ថា ​សង់ត្រាល់ លោក ឌី ថេហូយ៉ា ដែលបានចូលរួមជាវាគ្មិន ក្នុងទិ​វា​អ្នក​លក់ដូរ​តាម​ផ្លូវ លើក​ឡើង​ថា ការ​បៀត​បៀន និង​អំពើហិង្សានេះ កើត​មាន​ដូច​គ្នា​សម្រាប់​អ្នក​លក់​ដូរ​តាម​ដង​ផ្លូវ នៅ​ប្រទេសថៃ ក្បែរ​ខាង​កម្ពុជា ប៉ុន្ដែ ក្រោយ​ពេល​អ្នក​លក់ដូរ​តាម​ដង​ផ្លូវ​ចងក្រង ជួយ​តវ៉ា​គ្នា នៅពេល​មាន​ការ​គាប​សង្កត់ សកម្ម​ភាព​ទាំង​នោះ បាន​កាត់​ខ្លះ​ហើយ នៅ​សព្វ​ថ្ងៃ៖ «»

ក្រោយបានរៀបរាប់ពីទុក្ខ​លំបាក និង​ការ​ចែក​រំលែក​បទ​ពិសោធន៍​នានា ក្រុម​អាជីវករ​តាម​ដង​ផ្លូវ និង​សង្គម​ស៊ីវិល បាន​យក​ញ្ញត្តិ បង្ហាញ​ទុក្ខ​កង្វល់​របស់​ពួក​គេ ទៅ​ដាក់​ជូន​ខុទ្ទកាល័យ​មេដឹកនាំ​របប​ក្រុង​ភ្នំពេញ នៅ​ក្រោម​ដើម​ពោធិ៍​មុខ​វត្ត​បុទុមវត្តី រដ្ឋសភា និង​សាលា​រាជធានី​ភ្នំពេញ។

ប្រធានសមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ លោក វ៉ន់ ពៅ ឲ្យ​ដឹង​ថា មន្ត្រី​ប្រចាំ​ការ​នៅ​ខុទ្ទកា​ល័យ លោក គង់ ចំរើន បាន​ទទួល​យក​ញត្តិ និង​សន្យា​ប្រគល់​ជូន​ថ្នាក់​លើ។ ចំណែក​នៅ​រដ្ឋ​សភា​វិញ គណៈកម្មការ​ទទួល​ពាក្យ​បណ្ដឹង​បាន​ចេញ​មក​ទទួល​ញត្តិ និង​សន្យា​ប្រគល់​ញត្តិ​ជូន​ថ្នាក់​លើ​ដូច​គ្នា។ នៅ​សាលា​រាជធានី​ភ្នំពេញ​វិញ ក្រុម​អ្នក​ដាក់​ញត្តិ បាន​ចូល​ទៅ​ដាក់​ដល់​ក្នុង​ការិយាល័យ​រដ្ឋបាល។

លោក វ៉ន់ ពៅ សង្គេតឃើញថា កន្លងមកអាជ្ញាធរ និងកងសន្ដិសុខផ្សារ បាន​អនុវត្ត​សារាចរណ៍​បញ្ឈប់​ការ​យក​ភាស៊ី​លើ​អ្នក​លក់​តាម​កញ្ច្រែង កញ្ជើ ល្អី បាន​ត្រឹម​ត្រូវ​តែ ២ ឬ ៣ខែ​ដំបូង​ប៉ុណ្ណោះ។ ​បច្ចុប្បន្ន​ នៅ​តាម​ផ្សារ​ជា​ច្រើន នៅ​រាជធានី​ភ្នំពេញ កង​សន្ដិសុខ​ផ្សារ និង​អ្នក​ដើរ​ទារ​ភាស៊ី នៅ​តែ​បង្ខំ​ទារ​យក​ភាស៊ី​ពីអ្នកលក់​តាម​កញ្ច្រែង កញ្ជើ ដដែល។ សង្គម​ស៊ីវិល​រូប​នេះ ទាមទារ​ឲ្យ​មាន​វិធានការ លើ​អ្នក​ល្មើស​នឹង​សារាចរណ៍​ណែនាំ​នេះ៖ «»

អាស៊ីសេរី មិនអាចសុំការបំភ្លឺ​ពី​អ្នក​នាំ​ពាក្យ​សាលា​រាជធានី​ភ្នំពេញ លោក ម៉េត មាស​ភក្ដី បាន​ទេ នៅ​​ថ្ងៃទី​១៤ វិច្ឆិកា ដោយសារ​ទូរស័ព្ទ​ជា​ច្រើន​ដង មិន​មាន​អ្នក​ទទួល។

សមាគម ​ប្រជាធិបតេយ្យ ឯករាជ្យ​ នៃ​សេដ្ឋកិច្ច​ក្រៅ​ប្រព័ន្ធ ផ្ដល់​យោបល់​ថា ដើម្បី​ដោះ​ស្រាយ បញ្ហា​របស់​អ្នក​លក់​ដូរ​តាម​ដង​ផ្លូវ អាជ្ញាធរ​ត្រូវ​រៀបចំ​សណ្ដាប់ធ្នាប់ ដោយ​ភាព​ទទួល​ខុស​ត្រូវ ចំពោះ​អ្នក​លក់​ដូរ​តាម​ដង​ផ្លូវ គឺ​ត្រូវ​បញ្ឈប់​ការ​ប្រើ​អំពើ​ហិង្សា ត្រូវ​រៀបចំ​កន្លែង​ឲ្យ​អ្នក​លក់​ដូរ​តាម​ផ្លូវ​សមរម្យ និង​មាន​អនាម័យ ដាក់​គំនូស​ខណ្ឌ​ចែក​ចំណែក​ចិញ្ចើម​ផ្លូវ ឬ​ដាក់​របង​សម្រាប់​បែងចែក​ចំណែក​ផ្លូវ​សម្រាប់​អ្នក​លក់​ដូរ​តាម​ផ្លូវ។ ការ​ធ្វើ​បែប​នេះ អង្គការ​សង្គម​ស៊ីវិល ចាត់​ទុក​ថា ជា​សោភ័ណភាព​ទីក្រុង ងាយ​ស្រួល​ក្នុង​ការ​ទិញ​លក់ និង​មាន​សុវត្ថិភាព និង​សុំ​បន្ដ​ឡើង​វិញ នូវ​ប័ណ្ណ​មូលនិធិ​សមធម៌ សម្រាប់​អ្នក​លក់​ដូរ​តាម​ផ្លូវ​ជា​ដើម​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល