នាវាកងទ័ពជើងទឹករុស្សី៣គ្រឿងមកទស្សនកិច្ចផ្លូវការនៅកម្ពុជា
2018.05.23
នាវាកងទ័ពជើងទឹករុស្សី ចុះចតនៅកំពង់ផែអន្តរជាតិក្រុងព្រះសីហនុ កាលពីថ្ងៃទី២២ ឧសភា ២០១៨។
Photo courtesy of AKP
នាវាកងទ័ពជើងទឹករុស្សី មកទស្សនកិច្ចផ្លូវការនៅកម្ពុជារយៈពេល៥ថ្ងៃ បានមកចុះចតនៅកំពង់ផែអន្តរជាតិក្រុងព្រះសីហនុ នៅកាលពីថ្ងៃទី២២ឧសភា ដើម្បីរឹតចំណងមិត្តភាពរវាងកម្ពុជា និងរុស្សី។
ប្រភពពីឧបករណ៍ឃោសនារបស់លោកនាយករដ្ឋមន្ត្រី ហ៊ុន សែន បានស្រង់សម្ដីអាជ្ញាធរខែត្រព្រះសីហនុ កាលពីថ្ងៃទី២២ ឧសភា ថា នាវាចម្បាំង ចំនួន៣គ្រឿងនេះ បានផ្ទុកនាវិកទាំងអស់ចំនួន៨១៩នាក់ ដឹកនាំដោយ លោកវរនាវីឯក Oleg Korolev ជាមេបញ្ជាការកងនាវាចម្បាំងរុស្សី ប្រចាំនៅតំបន់អាស៊ីប៉ាស៊ីហ្វិក។ ប្រទេសរុស្សី និងចិន កន្លងមកបានប្រកាសគាំទ្រការបោះឆ្នោតនៅកម្ពុជា ទោះបីគ្មានគណបក្សប្រឆាំង ខណៈអាមេរិក និងសហគមន៍អឺរ៉ុបប្រកាសមិនគាំទ្រ ថែមទាំងដាក់ទណ្ឌកម្មលើរបបលោក ហ៊ុន សែន ទៀត។
នាវាចម្បាំងរុស្សីមកទស្សនកិច្ចនៅកម្ពុជាពេលនេះ ធ្វើឡើងនៅក្រោយពីរដ្ឋាភិបាលសហរដ្ឋអាមេរិក បានសម្រេចកាត់ផ្ដាច់ជំនួយយោធាទាំងស្រុងជាផ្លូវការ ទៅឲ្យរបបលោក ហ៊ុន សែន ដោយសារតែស្ថានភាពរំលោភសិទ្ធិមនុស្ស និងការរំលាយប្រជាធិបតេយ្យធ្ងន់ធ្ងរ។
ជំនួយសំខាន់ៗ ដែលអាមេរិក សម្រេចឈប់ផ្ដល់ដល់របបលោក ហ៊ុន សែន តទៅទៀត រួមមានកម្មវិធីជំនួយបរទេស ជំនួយតាមរយៈកម្មវិធីរបស់ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ (USAID) និងកម្មវិធីជំនួយផ្នែកយោធាអាមេរិក ដែលធ្លាប់ផ្ដល់ឲ្យរបបលោក ហ៊ុន សែន ក្នុងការជួយដល់អគ្គនាយកដ្ឋានពន្ធដារ ជួយដល់ការកសាងសមត្ថភាពអាជ្ញាធររដ្ឋនៅតាមមូលដ្ឋាន និងជួយដល់កងយោធពលខេមរភូមិន្ទ នៅពេលកន្លងមក។ ការផ្ដាច់ជំនួយទៅដល់ផ្នែកសំខាន់ៗទាំងអស់នេះ ខាងរដ្ឋាភិបាលអាមេរិក បញ្ជាក់ថា គឺមកពីស្ថាប័នទាំងអស់នេះ សុទ្ធតែមានជាប់ពាក់ព័ន្ធទៅនឹងការបំផ្លាញលទ្ធិប្រជាធិបតេយ្យនៅកម្ពុជា។
ការសម្រេចផ្ដាច់ជំនួយដល់របបក្រុងភ្នំពេញ ពីសេតវិមានប្រធានាធិបតីអាមេរិក កាលពីដើមឆ្នាំ២០១៨នេះ គឺធ្វើឡើងតែពីរថ្ងៃប៉ុណ្ណោះ ក្រោយការបោះឆ្នោតព្រឹទ្ធសភា ដែលគណបក្សកាន់អំណាចប្រមូលយកអាសនៈទាំង៥៥ របស់គណបក្សសង្គ្រោះជាតិ ត្រូវបានរម្លាយ និងតំណាងរាស្ត្រ រួមទាំងមន្ត្រីជាន់ខ្ពស់របស់គណបក្សនេះ ត្រូវបានហាមឃាត់សិទ្ធិនយោបាយរយៈពេល ៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត