Opens in new windowសិស្សជាប់និទ្ទេស អេ (A) ម្នាក់ ក្នុងការប្រឡងសញ្ញាបត្រទុតិយភូមិ ឬបាក់ឌុប នៅខេត្តតាកែវ ដែលមានជីវភាពក្រីក្រ កំពុងខ្វល់ខ្វាយពីកន្លែងស្នាក់នៅ និងបញ្ហាជីវភាពប្រចាំថ្ងៃ នៅពេលមកស្នាក់នៅភ្នំពេញ ដើម្បីបន្តការសិក្សានៅមហាវិទ្យាល័យ។
អាជ្ញាធរឃុំសឹង្ហ និងគ្រូៗនៅវិទ្យាល័យ សុខ អាន ក្តីទន្ទឹម ស្រុកសំរោង ខេត្តតាកែវ ត្រេកអរជាខ្លាំងបន្ទាប់ពីសិស្សក្រីក្រម្នាក់ ឈ្មោះ ទុំ ឆាយ រៀននៅវិទ្យាល័យនោះ បានប្រឡងជាប់និទ្ទេស អេ ក្រោយចូលរួមប្រឡងសញ្ញាបត្រមធ្យមសិក្សាទុតិយភូមិ ឬហៅថា បាក់ឌុប ឆ្នាំសិក្សា២០១៤-២០១៥។
ក្រោយពីប្រកាសលទ្ធផលភ្លាមៗ យុវសិស្ស ទុំ ឆាយ បានទទួលអំណោយប្រាក់រង្វាន់ សម្ភារៈប្រើប្រាស់ អាហារូបករណ៍សិក្សាដោយមិនបង់ប្រាក់នៅមហាវិទ្យាល័យពីលោកនាយករដ្ឋមន្ត្រី ហ៊ុន សែន ដូចសិស្សពូកែដទៃទៀតដែរ។
ទោះយ៉ាងណា យុវជន ទុំ ឆាយ នៅតែមានក្ដីកង្វល់ក្នុងការសម្រេចចិត្តឲ្យត្រូវថា គួរជ្រើសរើសរៀនជំនាញបន្តនៅមហាវិទ្យាល័យមួយណា ហើយគួរចាប់យកនូវជំនាញអ្វី និងខ្វល់ពីរឿងកន្លែងស្នាក់នៅ និងប្រាក់ចាយប្រចាំថ្ងៃ ថ្វីដ្បិតតែរូបគេត្រូវនាយករដ្ឋមន្ត្រី ហ៊ុន សែន ផ្ដល់អាហារូបករណ៍ឲ្យសិក្សាមហាវិទ្យាល័យមិនបង់ប្រាក់ក្ដី។
យុវជនរូបនេះឲ្យដឹងទៀតថា ជម្រើសទីមួយគិតថា គាត់នឹងស្នាក់នៅវត្តលោក ប៉ុន្តែមិនដឹងថា វត្តអារាមនៅទីក្រុង អាចឲ្យគាត់ស្នាក់នៅដល់រៀនចប់មហាវិទ្យាល័យ ៤ឆ្នាំដែរ ឬអត់នោះទេ៖ «ចំពោះខ្ញុំ ខ្ញុំចង់អំពាវនាវថា បើសិនជាអាចមានសប្បុរសជនជួយឧបត្ថម្ភខ្ញុំផង ព្រោះអីជាក់ស្ដែងលទ្ធភាពនៃស្ថានភាពគ្រួសារខ្ញុំ គឺពិតជាលំបាកណាស់ហើយ ពិតជាត្រូវការជាខ្លាំងនូវការជួយពីសំណាក់សប្បុរសជននានា»។
យុវសិស្ស ទុំ ឆាយ កើតនៅថ្ងៃទី១០ ខែមេសា ឆ្នាំ១៩៩៧ ក្នុងភូមិក្រាំងស្តៅ ឃុំសឹង្ហ ស្រុកសំរោង ខេត្តតាកែវ។ បច្ចុប្បន្ន យុវជនរូបនេះមានអាយុ ១៨ឆ្នាំ រស់នៅជាមួយម្ដាយមេម៉ាយ ហើយមានជំងឺប្រកាច់ មិនដឹងខ្លួន និងប្អូនប្រុសម្នាក់ដែលរៀនបានត្រឹមថ្នាក់ទី៩ ក៏ឈប់រៀនដោយសារគ្មានអ្នកមើលថែទាំម្ដាយ។
ពាក់ព័ន្ធជម្រើសជំនាញសិក្សានេះ យុវសិស្ស ទុំ ឆាយ សង្ឃឹមថា នឹងរៀនជំនាញគ្រប់គ្រង៖ «ខ្ញុំបានចាប់យកជំនាញ រៀនការគ្រប់គ្រងព័ត៌មានវិទ្យា។ ប៉ុន្តែខ្ញុំគ្រាន់តែការសម្រេចចិត្តជំហានដំបូង ព្រោះខ្ញុំអត់សូវច្បាស់ដែរ ហើយចំពោះខ្ញុំ គឺចង់រៀននៅភ្នំពេញ ច្រើនជាង ព្រោះថា ភ្នំពេញ វាគឺជាបណ្ដុំកន្លែងមានការងារធ្វើ ក៏ដូចជាការរៀនសូត្រ កន្លែងរៀនគឺមានច្រើន ហើយវាចម្រុះទៅដោយវប្បធម៌ ឬក៏ការងារច្រើន អ៊ីចឹងខ្ញុំស្រួលជាងនៅខេត្ត ព្រោះថា ខេត្តអត់សូវមានព័ត៌មានអីផ្សេងៗទូលំទូលាយដូចនៅភ្នំពេញទេ»។
ទាក់ទងនឹងជីវភាពប្រចាំថ្ងៃរបស់គ្រួសារយុវសិស្ស ទុំ ឆាយ ត្រូវបានអាជ្ញាធរភូមិក្រាំងស្តៅ លោក កែវ កួន និងអាជ្ញាធរឃុំសឹង្ហ លោក ផែ ហាក់ ជាមេឃុំ អះអាងដូចគ្នាថា គ្រួសារ ទុំ ឆាយ មានប័ណ្ណក្រីក្រថ្នាក់លេខ១។ ម្តាយ ទុំ ឆាយ ជាស្ត្រីមេម៉ាយ និងមានជំងឺប្រចាំកាយ ដូចជាដើរភ្លឹកៗ ប្រកាច់ដួលមិនដឹងខ្លួន ឬហៅថា ឆ្កួតជ្រូក។ លោកអំពាវនាវសុំឲ្យសប្បុរសជនជួយឧបត្ថម្ភឲ្យយុវជន ទុំ ឆាយ បានរៀនដល់ចប់មហាវិទ្យាល័យផង ដើម្បីកុំឲ្យយុវជននោះ ងាកមកជួយគ្រួសារក្រីក្រ ហើយបោះបង់ការសិក្សាកណ្ដាលទីនោះ។
លោក កែវ កួន៖ «ម្ដាយគាត់ហ្នឹងវាមានជំងឺឆ្កួតជ្រូក ដើរត្រូវមើលទាល់តែយាមជាប់។ មិនស្រួលដើរៗ ប្រកាច់តាមផ្លូវ ប្រកាច់ក្នុងទឹក ក្នុងស្រែអ៊ីចឹង ដល់ហើយកូនចៅហ្នឹងទៅសិក្សាទាល់តែមានយាយ មានបង មានប្អូនការពារ ជួយមើលម្ដាយ។ ដល់អ៊ីចឹងរកស៊ីអីអត់កើត ហើយគ្រួសារហ្នឹង គាត់អត់មានអីទេ គាត់ក្រីក្រ។ បើសិនជាអាចជួយ ទុំ ឆាយ នេះបាន ត្រូវតែជួយទៅ ព្រោះអីគាត់ហ្នឹងមានប័ណ្ណជនក្រីក្រ ក្រ១ ក្រ២»។
ស្រដៀងគ្នានេះដែរ នាយកវិទ្យាល័យ សុខ អាន ក្តី ទន្ទឹម លោក ឡុង អិត ថ្លែងថា យុវសិស្ស ទុំ ឆាយ ធ្លាប់បានប្រឡងជាប់ជាសិស្សពូកែផ្នែកគណិតវិទ្យាម្ដងហើយ កាលពីថ្ងៃ២៤ ខែមេសា ឆ្នាំ២០១៥។ លោកថា ការសិក្សារបស់យុវជន ទុំ ឆាយ គឺពូកែ ទាស់តែបញ្ហាជីវភាពក្រុមគ្រួសារក្រីក្រខ្លាំង ដោយសារម្ដាយមេម៉ាយ ហើយមានជំងឺទៀតផង៖ «រហូតដល់លទ្ធផលដែលយើងទទួលបានពេលនេះ គឺជាមោទនភាពរបស់វិទ្យាល័យយើងដែរ ដែលបានសិស្សជាប់ច្រើន គឺ ៦៥,១៩%។ និទ្ទេស A ម្នាក់ B ៥នាក់ C ១៣នាក់ D ១៥នាក់ E ៩៩នាក់។ សិស្សជាប់និទ្ទេសបាន ១៣៣នាក់ ក្នុងចំណោមសិស្សដាក់ពាក្យប្រឡង ២០៤នាក់»។
បន្ថែមលើនោះ លោកគ្រូ មាស ម៉ុង ថ្លែងថា យុវសិស្ស ទុំ ឆាយ មានតែ ២នាក់បងប្អូន និងម្ដាយមានជំងឺ ក្រោយពីឪពុកចាកចេញពីពួកគេ។ លោកថា ពួកគេក្រីក្រ ព្រោះមេគ្រួសារមានជំងឺប្រកាច់ ឆ្កួតជ្រូក។ មូលហេតុ នេះទើបប្អូនប្រុសពៅរបស់ ទុំ ឆាយ រៀនត្រឹមថ្នាក់ទី៩ ក៏ឈប់នៅផ្ទះ មើលថែទាំម្ដាយ ហើយទុកឱកាសឲ្យយុវសិស្ស ទុំ ឆាយ បានបន្តរៀន រហូតទទួលបានការកោតសរសើរពីលោកនាយករដ្ឋមន្ត្រី ហ៊ុន សែន និងពីមនុស្សក្នុងមូលដ្ឋាន ភូមិឃុំ ដែល ទុំ ឆាយ កំពុងរស់នៅ៖ «ខ្ញុំបារម្ភថា អាហារូបករណ៍អត់បង់ថ្លៃសាលាហើយហ្នឹង គាត់អត់មានលទ្ធភាពចាយវាយនៅភ្នំពេញ នោះទៀតហ្នឹង»។
នៅក្នុងឆ្នាំសិក្សា២០១៤-២០១៥ មានសិស្សប្រឡងជាប់និទ្ទេស អេ ទូទាំងប្រទេស ១០៨នាក់។ យុវសិស្សទាំង ១០៨នាក់នោះ ត្រូវបាននាយករដ្ឋមន្ត្រី ហ៊ុន សែន អញ្ជើញមកជួបផ្ទាល់ ដោយមានផ្ដល់ថវិកាម្នាក់ៗ ២លានរៀល និង ថេបឡេត (Taplet Samsung) ១គ្រឿងម្នាក់ជាដើម។
ការលើកទឹកចិត្តដល់សិស្សពូកែរបស់លោកនាយករដ្ឋមន្ត្រីនេះ ត្រូវបានយុវសិស្ស ទុំ ឆាយ អះអាងថា ជាអាវុធជំនួយដល់សិស្សដែលកំពុងរៀនឲ្យប្រឹងប្រកួតប្រជែងគ្នា ដើម្បីកិត្តិយសក្នុងមូលដ្ឋានផង និងដើម្បីបង្កើនអ្នកចេះកាន់តែច្រើនសម្រាប់ជួយកសាងប្រទេសជាតិផង។
សិស្សប្រឡងជាប់និទ្ទេស អេ ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០១៤-២០១៥ នៅក្នុងខេត្តតាកែវ មានចំនួន ៦នាក់ ក្នុងនោះមានស្រី ២នាក់ និងប្រុស ៤នាក់។ ក្នុងចំណោម ៦នាក់នោះ មាននៅស្រុកសំរោង ម្នាក់ គឺយុវសិស្ស ទុំ ឆាយ។ ក្រៅពីនោះ សិស្សនៅស្រុកត្រាំកក់ ៤នាក់ មានស្រីម្នាក់ និងស្រុកព្រៃកប្បាស គឺជាប់សិស្សស្រីម្នាក់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។