គ្រួសារខ្មែរដែលជនជាតិវៀតណាមព្រួតវាយសម្លាប់នៅព្រៃវែងស្នើឲ្យតុលាការពន្លឿននីតិវិធី
2017.06.09
គ្រួសារខ្មែរដែលជនជាតិវៀតណាម ព្រួតវាយសម្លាប់នៅឃុំអ្នកលឿង ស្រុកពាមរក៍ ខេត្តព្រៃវែង អំពាវនាវឲ្យតុលាការពន្លឿននីតិវិធី ខណៈសំណុំរឿងនេះត្រូវបានអូសបន្លាយជិតមួយឆ្នាំទៅហើយ ដោយមិនមានដំណើរការទៅមុខសោះ។ ភរិយាជនរងគ្រោះស្នើឲ្យតុលាការផ្ដន្ទាទោសជនល្មើសតាមច្បាប់ និងទាមទារសំណង ៣០លានរៀល។ រីឯមន្ត្រីសាលាដំបូងខេត្តព្រៃវែង ថា តុលាការកំពុងបន្តនីតិវិធីលើករណីនេះដោយយកចិត្តទុកដាក់។
សំណុំរឿងជនជាតិវៀតណាម ព្រួតគ្នាវាយសម្លាប់បុរសជាជនជាតិខ្មែរម្នាក់ នៅភូមិអ្នកលឿងក្រោម ឃុំអ្នកលឿង ជាប់នឹងភូមិ៦ ឃុំព្រែកខ្សាយ (ខ) ស្រុកពាមរក៍ ខេត្តព្រៃវែង នោះ បានអូសបន្លាយពេលជាង ១០ខែទៅហើយ។ គ្រួសារជនរងគ្រោះអះអាងថា តុលាការហាក់ទុកសំណុំរឿងនេះចោល ដោយមិនចាត់ការឲ្យលឿនទៅមុខសោះ ខណៈពួកគាត់កំពុងរស់រងទុក្ខវេទនា និងទន្ទឹងចាំយុត្តិធម៌។
ភរិយាជនរងគ្រោះ អ្នកស្រី ចាន់ ស៊ីណា រៀបរាប់ថា សំណុំរឿងឃាតកម្មដ៏ឃោរឃៅដែលប្រព្រឹត្តដោយជនជាតិវៀតណាម លើប្ដីអ្នកស្រីនេះ គឺតុលាការបានកោះហៅអ្នកស្រីអោយទៅជួបតែម្ដងគត់ ក្រោយពេលប្ដីស្លាប់បាន ៦ខែ ប៉ុន្តែតាំងពីពេលនោះមក គឺគ្មានការកោះហៅ ឬសួរនាំអ្វីទៀតឡើយ៖ «ខ្ញុំថា មិនដឹងដែរ ព្រោះគាត់មិនដែលទំនាក់ទំនងអីទេ។ សំណុំរឿងនេះដូចគេមិនហៅយើងឡើងម៉េចទេ។ មើលទៅដូចរបៀបយើងអត់លុយ ឬយើងមិនដែលទៅសួរគេ អ៊ីចឹងក៏គេមិនដែលមកហៅយើងដែរ។ ខ្ញុំលុយណាជិះម៉ូតូឌុបទៅសួរទៅម្ដង ១០ដុល្លារណោះ ហើយមានលុយឯណារកតែលុយហូបខ្លួនឯងគ្មានផង»។
សព្វថ្ងៃស្ត្រីមេម៉ាយ វ័យ ៣១ឆ្នាំរូបនេះ កំពុងរស់នៅចិញ្ចឹមកូន ៦នាក់ ប្រុស ៣ ស្រី ៣ ដោយកូនពៅអាយុទើប ៩ខែ ហើយកូនច្បងអាយុ ១៤ឆ្នាំ។ ជីវភាពអ្នកស្រីកាន់តែធ្លាក់ដុនដាបបន្ទាប់ពីស្វាមីស្លាប់ ហើយអ្នកស្រីក៏ចាប់ផ្ដើមធ្លាក់ខ្លួនឈឺក្អកធ្លាក់ឈាម និងវង្វេងស្មារតីម្ដងម្កាល ក្រោយរងរបួសដោយសារជនជាតិវៀតណាម វាយ ក្នុងពេលជួយប្ដី។
អ្នកស្រី ចាន់ ស៊ីណា ប្ដឹងទាមទារឲ្យអាជ្ញាធរ និងតុលាការបន្តចាប់ខ្លួនអ្នកពាក់ព័ន្ធដទៃទៀត និងស្នើឲ្យពន្លឿននីតិវិធីលើសំណុំរឿងនេះ។ អ្នកស្រីប្ដឹងទាមទារសំណងចំនួន ៣០លានរៀល និងឲ្យតុលាការផ្ដន្ទាទោសជនល្មើសតាមច្បាប់៖ «សូមអោយគេកាត់ទោសឲ្យលឿនៗទៅ ដើម្បីបានសំណងខ្លះចិញ្ចឹមកូននិងព្យាបាលខ្លួនឯង»។
ជនរងគ្រោះដែលជនជាតិវៀតណាម ព្រួតវាយសម្លាប់មានឈ្មោះ រ័ត្ន ធី អាយុ ៣៣ឆ្នាំ រស់នៅភូមិអ្នកលឿងក្រោម ឃុំអ្នកលឿង ជាប់នឹងភូមិ៦ ឃុំព្រែកខ្សាយ (ខ) ស្រុកពាមរក៍ ខេត្តព្រៃវែង។ ភរិយាជនរងគ្រោះរៀបរាប់ថា កាលពីយប់ថ្ងៃទី៧ ខែសីហា ប្ដីអ្នកស្រីបានដើរទៅទិញបារីនៅតូបលក់ដូរក្បែរផ្ទះ។ ពេលនោះជនជាតិវៀតណាម ម្នាក់ បានសម្លុតទារបារីជក់ តែប្ដីអ្នកស្រីមិនឲ្យ ព្រោះថា បារីនោះគាត់ទិញឲ្យអ្នកដទៃ រួចក៏កើតជាទំនាស់ពាក្យសម្ដីរហូតឈានដល់ផ្ទុះហិង្សាកាន់តែធំ ដោយ មានជនជាតិវៀតណាម លើសពី ២០នាក់ ប្រដាប់ដោយដំបងឈើមូល ឈើជ្រុង ដែកគាស់ និងកាំបិត ចូលរួមព្រួតវាយប្តីអ្នកស្រីរហូតដល់ស្លាប់ និងមានបំណងសម្លាប់អ្នកស្រី និងពលរដ្ឋខ្មែរណាដែលហ៊ានចូលជួយទៀតផង។
ក្រោយហេតុការណ៍នោះ អាជ្ញាធរស្រុកពាមរក៍ បានចាប់ខ្លួនជនសង្ស័យជនជាតិវៀតណាម ៦នាក់ បញ្ជូនទៅតុលាការ។ អាជ្ញាធរបានសន្យាថា នឹងបន្តការស៊ើបអង្កេតដោយយកចិត្តទុកដាក់ដើម្បីរកចាប់ខ្លួនជនសង្ស័យបន្តទៀត តាមបណ្ដឹងរបស់គ្រួសារជនរងគ្រោះ ប៉ុន្តែជិតមួយឆ្នាំមកនេះ អាជ្ញាធរពុំបានចាប់ខ្លួនជនសង្ស័យណាម្នាក់បន្ថែមទៀតនោះទេ។ ទោះយ៉ាងណា ក្នុងចំណោមជនសង្ស័យទាំង ៦នាក់នោះ មកដល់ពេលនេះគឺមានម្នាក់ត្រូវបានដោះលែងវិញ តាមការស្នើសុំរបស់គ្រួសារជនរងគ្រោះ ដោយអះអាងថា ជនម្នាក់នោះមិនបានចូលរួមវាយដំឡើយ ហើយគ្រួសារគេក៏លំបាកលំបិនខ្លាំងណាស់ដែរ។
ឆ្លើយតបបញ្ហានេះ ប្រធានលេខាធិការដ្ឋានរដ្ឋបាលនៃសាលាដំបូងខេត្តព្រៃវែង លោក ញ៉ឹក វ៉ាន្នី មានប្រសាសន៍ថា សំណុំរឿងនេះគឺបានឆ្លងផុតចៅក្រមស៊ើបសួររួចហើយ នឹងកំពុងបញ្ជូនសំណុំរឿងទៅជំនុំជម្រះ។ លោកបញ្ជាក់ថា ក្នុងសំណុំរឿងនេះ ចៅក្រមស៊ើបសួរបានចោទប្រកាន់ចំនួនពីរបទល្មើសលើមនុស្ស ៧នាក់ តាមមាត្រា ២២៤ ក្នុងបទចោទស្ថានទម្ងន់ទោសដោយសារមរណភាពនៃជនរងគ្រោះ និងមាត្រា ២៩ ពីបទចូលក្នុងប្រទេសកម្ពុជា ដោយគ្មានការអនុញ្ញាត។
លោកបន្តថា ក្នុងចំណោមជនជាប់ចោទទាំង ៧នាក់នោះ មានម្នាក់ឈ្មោះ វៀន យ៉ាងស៊ុយ ជាជនជាតិវៀតណាម គឺតុលាការកំពុងតាមចាប់ខ្លួន ហើយម្នាក់ឈ្មោះតូយ៉ាងហុក ត្រូវបានដោះលែងវិញ។ បច្ចុប្បន្ននេះ នៅមានជនជាប់ចោទ ៥នាក់ទៀត កំពុងឃុំខ្លួនក្នុងពន្ធនាការដើម្បីរង់ចាំបញ្ជូនទៅជំនុំជម្រះ រួមមានទី១ ឈ្មោះ វៀន យ៉ាងកង ទី២ ឈ្មោះ វៀន យ៉ាងងឿ ទី៣ ឈ្មោះ ឡាំ យ៉ាងសៀង ទី៤ ឈ្មោះ វីរៈ ដែន និងទី៥ ឈ្មោះ ជិន បារាំង៖ «សំណុំរឿងនេះនៅក្នុងលេខាធិការដ្ឋាន ហើយកំពុងរៀបចំដាក់ទៅប្រធាន ដើម្បីចាត់ចៅក្រមជំនុំជម្រះ»។
ពលរដ្ឋកម្ពុជា អះអាងថា នៅភូមិលេខ៦ ជិតផ្សារអ្នកលឿង នោះ មានជនជាតិវៀតណាម ជាច្រើនរស់នៅយ៉ាងអនាធិបតេយ្យ ហើយអាជ្ញាធរហាក់មិនសូវហ៊ានតតាំងជាមួយជនជាតិវៀតណាម ទាំងនោះទេ។ ចាប់ពីខែមេសា ឆ្នាំ២០១៤ ដល់ដំណាច់ឆ្នាំ២០១៦ កម្ពុជាបានបណ្ដេញជនបរទេសដែលរស់នៅខុសច្បាប់នៅកម្ពុជា ចំនួន ១៨.២៣០នាក់ ស្មើនឹង ៧៩សញ្ជាតិ ភាគច្រើនជាជនជាតិវៀតណាម។ តែថ្មីៗនេះ រដ្ឋាភិបាលវៀតណាម តែងតែអំពាវនាវដល់រដ្ឋាភិបាលកម្ពុជា ឲ្យយកចិត្តទុកដាក់ដល់ជនជាតិរបស់ខ្លួនដែលកំពុងរស់នៅក្នុងប្រទេសកម្ពុជា ដោយធានានូវសិទ្ធិស្របច្បាប់របស់ពួកគេ។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ករណីជនជាតិវៀតណាម ព្រួតវាយលើពលរដ្ឋកម្ពុជានេះ គឺបទឧក្រិដ្ឋធ្ងន់ធ្ងរដែលទាមទារឲ្យអាជ្ញាធរក៏ដូចជាតុលាការ ត្រូវតែចាត់វិធានការឲ្យម៉ឺងម៉ាត់ និងបន្ទាន់ ដើម្បីស្វែងរកយុត្តិធម៌ជូនជនរងគ្រោះ៖ «កាលណាដែលយើងមិនបានចាត់វិធានការឲ្យបានទាន់ពេលវេលា ឬវិធានការនេះ មានការយឺតយ៉ាវគឺធ្វើអោយប្រជាពលរដ្ឋ ឬក៏ជនរងគ្រោះគាត់បាត់បង់ទំនុកចិត្តទៅលើផ្លូវច្បាប់»។
អ្នកជិតខាងផ្ទះជនរងគ្រោះសុទ្ធតែបង្ហាញក្ដីអាណិតអាសូរចំពោះស្ត្រីមេម៉ាយម្នាក់នេះ។ ពួកគេថា គាត់ជាស្ត្រីម្នាក់ដែលខំប្រឹងតស៊ូសម្បើមណាស់ ដើម្បីរកលុយចិញ្ចឹមកូនតូចៗ។ គ្រួសារជនរងគ្រោះ និងពលរដ្ឋខ្មែរថា ពួកគេមិនចង់រងគ្រោះម្ដងហើយម្ដងទៀតនោះទេ ដោយស្នើសុំឲ្យតុលាការចាត់វិធានការឲ្យបានលឿន និងមានយុត្តិធម៌ពេញលេញដើម្បីបន្សាបការឈឺចាប់ផ្លូវចិត្ត៕