អង្គភាពប្រឆាំងអំពើពុករលួយព្រមានដាក់វិន័យដល់អ្នកសង្កេតការណ៍ប្រឡងបាក់ឌុប
2014.07.24
សិស្សប្រឡងបាក់ឌុប ចេញពីប្រឡងនៅថ្ងៃចុងក្រោយ នាមណ្ឌលប្រឡងនៃអនុវិទ្យាល័យ កំពត ក្រុង ខេត្តកំពត កាលពីថ្ងៃទី៧ ខែសីហា ឆ្នាំ២០១៣។
ក្នុងការសហការជាមួយក្រសួងអប់រំ យុវជន និងកីឡា ដើម្បីធ្វើកំណែទម្រង់ប្រព័ន្ធអប់រំ មន្ត្រីអង្គភាពប្រឆាំងអំពើពុករលួយ និងអ្នកស្ម័គ្រចិត្តមកពីអង្គការសង្គមស៊ីវិល និងបុគ្គលឯកជននានាជាង ២ពាន់នាក់ គ្រោងធ្វើជាអ្នកសង្កេតការណ៍ប្រឡងបាក់ឌុប ដែលនឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី៤ ដល់ថ្ងៃទី៥ សីហា ខាងមុខ។
អង្គភាពប្រឆាំងអំពើពុករលួយ (Anti-Corruption Unit = ACU) ក៏បានចេញសេចក្តីណែនាំកំណត់ភារកិច្ច សិទ្ធិ កាតព្វកិច្ចដល់អ្នកសង្កេតការណ៍ទាំងនោះ ព្រមទាំងបានកំណត់កម្រិតវិន័យទោស ដល់អ្នកសង្កេតការណ៍ថែមទៀត ក្នុងករណីមានកំហុសឆ្គងពេលបំពេញភារកិច្ច។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានក្រើនរំលឹកដល់អ្នកសង្កេតការណ៍ប្រឡងសញ្ញាបត្របាក់ឌុប ទាំងអស់ ឲ្យគោរព និងបំពេញតួនាទីរបស់ខ្លួនឲ្យបានត្រឹមត្រូវ បើមិនដូច្នោះទេ អាចប្រឈមនឹងការដាក់វិន័យ ឬបើករណីធ្ងន់ធ្ងរ នឹងត្រូវទទួលទោសតាមច្បាប់។
ក្នុងសេចក្តីណែនាំរបស់ លោក ឱម យ៉ិនទៀង ចេញផ្សាយកាលពីថ្ងៃទី២៣ កក្កដា គឺមុន២សប្ដាហ៍ប៉ុណ្ណោះនៃកាលបរិច្ឆេទប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប។ លោក ឱម យ៉ិនទៀង បញ្ជាក់ក្នុងលិខិតណែនាំថា ក្នុងករណីឃើញអ្នកសង្កេតការណ៍ប្រព្រឹត្តខុសបទប្បញ្ញត្តិរបស់ក្រសួងអប់រំ យុវជន និងកីឡា ឬធ្វើផ្ទុយពីច្បាប់ ត្រូវផ្អាកសកម្មភាព និងអនុវត្តតាមនីតិវិធី ព្រមទាំងត្រូវវិន័យទៅតាមកំហុសជាក់ស្តែងដែលមាន ៣កម្រិត។
កម្រិតទី១ បើមិនគោរពពេលវេលា មិនពាក់ប័ណ្ណសម្គាល់ខ្លួន បង្កសំឡេង ឬភាពអ៊ូអរចេញក្រៅដែនរង្វង់សមត្ថកិច្ចរបស់ខ្លួនអំឡុងពេលបំពេញការងារ និងឃើញមានសកម្មភាពមិនប្រក្រតី ហើយមិនរាយការណ៍នោះ កំហុសលើកទី១ អ្នកសង្កេតការណ៍នឹងត្រូវទទួលការព្រមានពីមន្ត្រីអង្គភាពប្រឆាំងអំពើពុករលួយប្រចាំមណ្ឌល។ កំហុសលើកទី២ ត្រូវទទួលការព្រមានពីមន្ត្រីអង្គភាពប្រឆាំងអំពើពុករលួយប្រចាំខេត្ត ហើយកំហុសលើកទី៣ ត្រូវបញ្ឈប់ពីតួនាទីអ្នកសង្កេតការណ៍។
កម្រិតទី២ ក្នុងករណីអ្នកសង្កេតការណ៍ទាមទារ ឬទទូចមើលវិញ្ញាសាពីអនុរក្ស ឬបេក្ខជន ឬក៏ថតវិញ្ញាសាពីលើក្រដាស ឬពីលើក្ដារខៀនដែលខ្លួនបានឃើញ ឬក៏សម្លុតគំរាមបង្កជម្លោះជាមួយបេក្ខជន មន្ត្រីអប់រំ ឬមន្ត្រីពាក់ព័ន្ធនានានោះ គឺអំពើទាំងនេះត្រូវចាត់ទុកថា ជាការប៉ុនប៉ងធ្វើឲ្យបែកធ្លាយវិញ្ញាសា ហើយកំហុសនេះត្រូវបញ្ឈប់ភ្លាមពីតួនាទីជាអ្នកសង្កេតការណ៍។
កម្រិតវិន័យទី៣ ក្នុងករណីអ្នកសង្កេតការណ៍ធ្វើឲ្យបែកធ្លាយវិញ្ញាសាដែលខ្លួនបានដឹង ឬនាំយកសំណៅវិញ្ញាសាឲ្យបេក្ខជន ឬស្វែងរកផលប្រយោជន៍ ឬបង្កើតបណ្ដាញដើម្បីស្វែងរកផលប្រយោជន៍ពីការងារសង្កេតការណ៍។ អំពើនោះ ត្រូវចាត់ទុកថា ជាការធ្វើឲ្យបែកធ្លាយវិញ្ញាសា ហើយត្រូវបញ្ឈប់តួនាទីអ្នកសង្កេតការណ៍ភ្លាមៗ និងត្រូវទទួលទណ្ឌកម្មតាមច្បាប់ជាធរមាន។
អង្គភាពប្រឆាំងអំពើពុករលួយ បានគាំទ្រចំពោះការកែទម្រង់លើការប្រឡងគ្រប់ប្រភេទរបស់ក្រសួងអប់រំ ដែលរដ្ឋមន្ត្រីទើបឡើងកាន់តំណែងថ្មី លោក ហង់ ជួនណារ៉ុន កំណត់ទិសស្លោកថា "អ្នកចេះគឺជាប់"។
អ្នកនាំពាក្យក្រសួងអប់រំ យុវជន និងកីឡា លោក រស់ សាលីន បញ្ជាក់ថា ការប្រឡងបាក់ឌុប នៅឆ្នាំ២០១៣-២០១៤ នេះមានតួអង្គ ៣សំខាន់ គឺទី១ បេក្ខជនប្រឡង ទី២ ខាងក្រសួងអប់រំ មេប្រយោគ និងគណៈកម្មការផ្សេងៗ និងទី៣ មន្ត្រីមកពីអង្គភាពប្រឆាំងអំពើពុករលួយ និងអ្នកសង្កេតការណ៍។ លោកបន្តថា ក្រសួងអប់រំ ក៏សង្ឃឹមថាការចូលរួមសហការរបស់អ្នកពាក់ព័ន្ធទាំងនោះ នឹងជំរុញឲ្យការប្រឡងប្រព្រឹត្តបានយ៉ាងរលូន៖ «ក្រសួងសង្ឃឹមយ៉ាងមុតមាំថា ដំណើរការប្រឡងនេះពិតជារហូត និងដំណើរការទៅបានលទ្ធផលដូចអ្វីដែលក្រសួងសង្ឃឹម គឺថាការប្រឡងប្រកបទៅដោយការគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន»។
កាលបរិច្ឆេទនៃការប្រឡងសញ្ញាបត្របាក់ឌុប គ្រោងធ្វើនៅថ្ងៃទី៤ និងទី៥ សីហា ដោយមានបេក្ខជនប្រឡងសរុបទូទាំងប្រទេសចំនួន ៩៣.៤៥៦នាក់។ ក្រៅពីដាក់វិន័យទៅដល់អ្នកសង្កេតការណ៍ អង្គភាពប្រឆាំងអំពើពុករលួយ ក៏បានព្រមានដាក់វិន័យចំពោះបេក្ខជនប្រឡង ដែលប្រព្រឹត្តខុសឆ្គងនៅពេលប្រឡងដែរ។ វិន័យទាំងនោះ មានទាំងការកំណត់ឱ្យធ្លាក់ ការបណ្ដេញពីបន្ទប់ប្រឡង ការផ្អាកមិនឱ្យប្រឡងពីរឆ្នាំបន្តបន្ទាប់។ ករណីខ្លះ ត្រូវលុបឈ្មោះចេញពីគ្រឹះស្ថានសិក្សា រួចត្រូវបញ្ជូនទៅដោះស្រាយតាមផ្លូវច្បាប់ទៀតផង។
ការកែទម្រង់ប្រព័ន្ធអប់រំនេះ ត្រូវបានអនុប្រធានសមាគមន៍គ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី គិតថា ការរឹតត្បិតនៅពេលប្រឡង មិនប្រាកដថាអាចទប់ស្កាត់ការប្រព្រឹត្តអំពើពុករលួយនោះទេ៖ «ខ្ញុំគិតថា ការពុករលួយនៅតែពុករលួយ ព្រោះអីយើងឃើញថា ការប្រឡងឌីប្លូមកន្លងទៅ ការសូកប៉ាន់ គឺនៅតែមាន ចុះទម្រាំប្រឡងបាក់ឌុប។ ខ្ញុំនៅតែគិតថា មិនអាចកែទម្រង់អំពើពុករលួយទេ ព្រោះអំពើពុករលួយនេះក្លាយជាប្រព័ន្ធរួចទៅហើយ»។
តាមគំនិតលោកស្រី ការកែទម្រង់ប្រព័ន្ធអប់រំតក់ក្រហល់ពេក គឺមិនអាចធ្វើឲ្យវិស័យអប់រំនៅកម្ពុជា ល្អប្រសើរបានទេ។ លោកស្រីបន្តថា ប្រសិនបើក្រសួងអប់រំ មានឆន្ទៈស្ដារវិស័យអប់រំមែននោះ លុះត្រាណាដំឡើងប្រាក់ខែឲ្យគ្រូបង្រៀនឲ្យបានគ្រប់គ្រាន់ជាមុនសិន ទើបគ្រូបង្រៀនមានទឹកចិត្ត និងយកចិត្តទុកដាក់បង្រៀន ហើយសិស្សទើបចេះពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត