រដ្ឋបាល​ក្រុង​ព្រះសីហនុ​ព្រមាន​ចាប់​សត្វ​ពាហនៈ​ដែល​ដើរ​ពាសពេញ​ក្រុង​ប្រគល់​ឲ្យ​កងទ័ព

ដោយ ដែន អយុធ្យា
2017-07-30
អ៊ីម៉ែល
មតិ
Share
បោះពុម្ព
សត្វ​គោ​របស់​ពលរដ្ឋ​ដើរ​លើ​ដង​ផ្លូវ​ក្នុង​ក្រុង​ព្រះសីហនុ ខេត្ត​ព្រះសីហនុ កាល​ពី​ថ្ងៃ​ទី​៩ ខែ​កក្កដា ឆ្នាំ​២០១៦។ RFA/Den Ayuthyea
សត្វ​គោ​របស់​ពលរដ្ឋ​ដើរ​លើ​ដង​ផ្លូវ​ក្នុង​ក្រុង​ព្រះសីហនុ ខេត្ត​ព្រះសីហនុ កាល​ពី​ថ្ងៃ​ទី​៩ ខែ​កក្កដា ឆ្នាំ​២០១៦។ RFA/Den Ayuthyea
RFA/Den Ayuthyea

រដ្ឋបាល​ក្រុង​ព្រះសីហនុ ព្រមាន​ម្ចាស់​សត្វ​ចិញ្ចឹម​គោ​ក្របី និង​សត្វ​ពពែ ជាដើម ថា​នឹង​ចាប់​សត្វ​ចិញ្ចឹម​ដែល​ម្ចាស់​លែង​ឲ្យ​ដើរ​ពាសពេញ​ក្រុង​នាំ​ឲ្យ​បាត់បង់​សណ្ដាប់ធ្នាប់​សាធារណៈ ប្រគល់​ជូន​កងទ័ព​ប្រចាំ​ការ​នៅ​តាម​ព្រំដែន ដើម្បី​ធ្វើ​ម្ហូប​ក្នុង​ពេល​ឆាប់ៗ​នេះ។

អភិបាល​ក្រុង​ព្រះសីហនុ លោក អ៊ី សុខឡេង បាន​ឲ្យ​អាស៊ីសេរី​ដឹង​នៅ​ថ្ងៃ​សៅរ៍ ទី​២៩ ខែ​កក្កដា ថា រដ្ឋបាល​ក្រុង​បាន​ចេញ​សេចក្តី​ជូន​ដំណឹង​ចុង​ក្រោយ​ដល់​ម្ចាស់​សត្វ​ចិញ្ចឹម​រួម​មាន សត្វ​គោ ក្របី និង​ពពែ ជាដើម មិន​ត្រូវ​លែង​ឲ្យ​ដើរ​តាម​ផ្លូវ​ពាសពេញ​ក្រុង​ទេសចរណ៍ នាំ​ឲ្យ​បាត់បង់​សណ្ដាប់ធ្នាប់ និង​បង្កើត​ឲ្យ​មាន​គ្រោះថ្នាក់​ចរាចរណ៍​ទៀត​ទេ។

លោក​បន្ត​ថា បើ​មិន​ស្តាប់​តាម​ការ​ណែនាំ ឬ​មិន​សហការ​ជាមួយ​រដ្ឋបាល​ក្រុង​ទេ អាជ្ញាធរ​មាន​គម្រោង​ចាប់​សត្វ​ទាំងនោះ​យក​ទៅ​ប្រគល់​ជូន​កងទ័ព​ប្រចាំ​ការ​នៅ​តាម​ព្រំដែន ព្រោះ​ពេល​នេះ រដ្ឋបាល​ក្រុង​មិន​ផាក​ពិន័យ​ទៀត​ទេ៖ «យើង​គិត​ថា បើ​សិន​ជា​ក្រុង​នៅ​បន្ត​ឲ្យ​ពួក​គាត់​លែង​សត្វ​ចិញ្ចឹម​មាន​គោ​ក្របី និង​ពពែ ជាដើម ឲ្យ​ដើរ​អនាធិបតេយ្យ​តាម​ផ្លូវ​សាធារណៈ​អ៊ីចឹង​ទៀត វា​នឹង​ប៉ះពាល់​ដល់​សណ្ដាប់ធ្នាប់ ប៉ះពាល់​ដល់​បរិស្ថាន និង​ប៉ះពាល់​បង្កើត​ឲ្យ​មាន​គ្រោះថ្នាក់​ចរាចរណ៍​ជា​យថាហេតុ។ អ៊ីចឹង​ហើយ​បាន​ជា​ក្រុង​គិត​ថា បើ​សិន​ជា​យើង​ចាប់​សត្វ​ចិញ្ចឹម​ទាំងនោះ ហើយ​ហៅ​ម្ចាស់​មក​អប់រំ និង​ពិន័យ​ត្រឹម​ប្រាក់​ប៉ុណ្ណឹង គឺ​ពួក​គាត់​មិន​ខ្លាច​ទេ ដូច្នេះ​ដំណាក់កាល​នេះ យើង​គិត​ថា​ការ​អប់រំ​យើង​នៅ​តែ​ធ្វើ ប៉ុន្តែ​ការ​ពិន័យ​ជា​ប្រាក់ គឺ​យើង​លែង​ពិន័យ​ទៀត​ហើយ ដោយ​រដ្ឋបាល​ក្រុង​ចាប់​សត្វ​ចិញ្ចឹម​ទាំងនោះ​បាន​ហើយ យើង​នឹង​ប្រគល់​សត្វ​គោ​ក្របី និង​ពពែ ដែល​ចាប់​បាន​នោះ ប្រគល់​ជូន​ទៅ​កងទ័ព​ប្រចាំ​ការ​នៅ​តាម​ព្រំដែន​ហើយ»

កាល​ពី​ថ្ងៃ​ទី​២៨ ខែ​កក្កដា លោក អ៊ី សុខឡេង អភិបាល​ក្រុង​ព្រះសីហនុ បាន​ចេញ​សេចក្តី​ជូន​ដំណឹង​ស្ដីពី​ការ​ចាត់​វិធានការ​ចំពោះ​ករណី​សត្វ​ចិញ្ចឹម​ដើរ ឬ​ដេក​តាម​ផ្លូវ​សាធារណៈ នាំ​ឲ្យ​មាន​មតិ​រិះគន់​ពី​ប្រជាពលរដ្ឋ ភ្ញៀវ​ជាតិ​អន្តរជាតិ ជាពិសេស​បង្ក​ឲ្យ​មាន​គ្រោះថ្នាក់​ចរាចរណ៍។

រដ្ឋបាល​ក្រុង​ព្រះសីហនុ ឲ្យ​ដឹង​ថា ក្នុង​រយៈពេល​ជិត ២​ឆ្នាំ​មក​នេះ អាជ្ញាធរ​បាន​ចាប់​សត្វ​ចិញ្ចឹម​ដែល​ដើរ​គ្មាន​សណ្ដាប់ធ្នាប់​ក្នុង​ក្រុង​បាន​ជាង ២០០​ក្បាល ដើម្បី​ផាក​ពិន័យ​ប្រាក់ ប៉ុន្តែ​ម្ចាស់​សត្វ​ចិញ្ចឹម​ទាំងនោះ​មិន​រាងចាល​ទេ ឬ​មិន​សហការ​ជាមួយ​អាជ្ញាធរ​ទេ។

អ្នក​រស់នៅ​ខេត្ត​ព្រះសីហនុ គាំទ្រ​ចំពោះ​ការ​ព្រមាន​ចាប់​សត្វ​ចិញ្ចឹម​មាន​គោ ក្របី និង​ពពែ ជាដើម របស់​រដ្ឋបាល​ក្រុង​ព្រះសីហនុ យក​ទៅ​ប្រគល់​ជូន​កងទ័ព​ប្រចាំ​ការ​នៅ​តាម​ព្រំដែន​នេះ៖ «ខ្ញុំ​ជា​ប្រជាពលរដ្ឋ​រស់នៅ​ក្រុង​ព្រះសីហនុ យើង​មាន​ការ​ខ្មាសអៀន​ដល់​ភ្ញៀវ​ទេសចរ​ជាតិ​អន្តរជាតិ​ជា​ខ្លាំង ដោយសារ​តែ​មនុស្ស​មួយ​ចំនួន​តូច​ចិញ្ចឹម​សត្វ​ជា​លក្ខណៈ​គ្រួសារ​ហើយ តែ​បែរ​ជា​ធ្វើ​ឲ្យ​ប៉ះពាល់​ដល់​ប្រយោជន៍​របស់​ប្រជាពលរដ្ឋ​ទូទាំង​ក្រុង​ព្រះសីហនុ ក៏ដូចជា​ប៉ះពាល់​ដល់​កិត្តិយស​របស់​ប្រទេស​កម្ពុជា យើង​ទាំងមូល​ផង​ដែរ»

រដ្ឋបាល​ក្រុង​ព្រះសីហនុ បាន​ដាក់​ចេញ​ការ​ណែនាំ​ថ្មី​ចំនួន ២​ចំណុច និង​ចាត់​វិធានការ ១​ចំណុច ជា​លើក​ចុង​ក្រោយ​ដល់​ម្ចាស់​សត្វ​ចិញ្ចឹម​ទាំងនោះ​រួម​មាន មិន​ត្រូវ​លែង​គោ ក្របី និង​ពពែ របស់​ខ្លួន​ឲ្យ​ដើរ​ដេក​តាម​ចិញ្ចើម​ផ្លូវ ទ្រូង​ផ្លូវ សួនច្បារ និង​ទី​សាធារណៈ​ទៀត​ទេ តម្រូវ​ឲ្យ​សត្វ​ចិញ្ចឹម​ទាំងអស់ ត្រូវ​មាន​កន្លុះ មាន​ចង​ខ្សែ និង​ត្រូវ​រៀបចំ​ក្រោល មាន​មនុស្ស​ឃ្វាល ឬ​មើល​ថែ​ឲ្យ​បាន​ត្រឹមត្រូវ និង​វិធានការ​ក្តៅ​ចុង​ក្រោយ​ក្នុង​ករណី​ម្ចាស់​សត្វ​ចិញ្ចឹម​ទាំងឡាយ​ណា​ដែល​មិន​គោរព​តាម​ការ​ណែនាំ​នេះ​ទេ សត្វ​ចិញ្ចឹម​ទាំងនោះ​នឹង​ត្រូវ​ចាប់​ប្រគល់​ជូន​ទាហាន​ការពារ​ព្រំដែន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល