អាជ្ញាធរខេត្តព្រះសីហនុ ឃាត់ខ្លួនជនជាតិចិនចំនួន ៤នាក់ ដែលបានប្រើដំបងវាយរថយន្តរបស់មន្ត្រីនគរបាលខេត្តព្រះសីហនុ ស្ថិតនៅមុខកន្លែងលេងល្បែងស៊ីសង កាស៊ីណូយ៉ាឌូលី។ គេហទំព័រស្នងការដ្ឋាននគរបាល ឱ្យដឹងនៅថ្ងៃទី២៥ ខែតុលា ថាជនជាតិចិនទាំងនេះត្រូវបានឃាត់ខ្លួន និងបញ្ជូនខ្លួនទៅកាន់ស្នងការដ្ឋាននគរបាល ខេត្តព្រះសីហនុ ដើម្បីចាត់ការតាមផ្លូវច្បាប់។
នគរបាលខេត្តព្រះសីហនុក៏បានដកហូតវត្ថុតាងពីជនជាតិចិនទាំងនោះ រួមមាន កាំបិតប៉័ងតោ ចំនួនពីរដើម ដំបងដែក ចំនួន ៥ដើម និងរថយន្តមួយគ្រឿងផងដែរ។
គេហទំព័ររបស់នគរបាលជាតិមិនបានបញ្ជាក់អំពីមូលហេតុដែលនាំឱ្យកើតមានអំពើហិង្សានេះ នោះទេ។
ទោះយ៉ាងណា ជនសង្ស័យជាជនជាតិចិនទាំងបួននាក់ ត្រូវបានកម្លាំងជំនាញនៃការិយាល័យនគរបាលព្រហ្មទណ្ឌកម្រិតស្រាល កំពុងចាត់ការតាមនីតិវិធី។
វត្តមានជនជាតិចិន នៅលើទឹកដីខេត្តព្រះសីហនុនេះ បានធ្វើឱ្យពលរដ្ឋ និងភ្ញៀវទេសចរមានការព្រួយបារម្ភចំពោះសុវត្ថិភាពរបស់ខ្លួន ដោយសារតែបទល្មើសហិង្សាដែលបង្កដោយជនជាតិចិន កើតមានជាបន្តបន្ទាប់ស្ទើររាល់ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។