អាជ្ញាធរ​ខេត្ត​បាត់ដំបង​បង្ខំ​ឱ្យ​អាជីវករ​លក់ដូរ​នៅ​ផ្សា​របាយ​ដំរាំ ជិត ១​រយ​នាក់ រើ​តូប ដើម្បី​យក​ដី​ធ្វើ​សាលា​ឆទាន

ដោយ សុជីវី
2024.01.12
អាជ្ញាធរ​ខេត្ត​បាត់ដំបង​បង្ខំ​ឱ្យ​អាជីវករ​លក់ដូរ​នៅ​ផ្សា​របាយ​ដំរាំ ជិត ១​រយ​នាក់ រើ​តូប ដើម្បី​យក​ដី​ធ្វើ​សាលា​ឆទាន រូបភាពអាជ្ញាធរបង្ខំឱ្យអាជីវករលក់ដូរនៅផ្សារបាយដំំរាំ ស្រុកបាណន់ ខេត្តបាត់ដំបង រើតូប ដើម្បី​យក​ដី​កសាង​សួនច្បារ កាល​ពី​ថ្ងៃ​ទី១១ ខែមករា ឆ្នាំ២០២៤។
រូបពីពលរដ្ឋ

អាជ្ញាធរ​ស្រុក​បាណន់ ខេត្ត​បាត់ដំបង កំពុង​អនុវត្ត​វិធានការ​ក្ដៅ ដោយ​បង្ខំ​ឱ្យ​អាជីវករ​ជាង ១​រយ​នាក់ នៅ​ផ្សារ​បាយ​ដំរាំ រុះរើ​តូប​លក់ដូរ​របស់​ខ្លួន​ទាំង​ប្រញាប់ប្រញាល់ ដើម្បី​យក​ដី​ធ្វើ​សាលាឆទាន និង​សួន​នៅ​មាត់​ស្ទឹង​សង្កែ​។ មន្ត្រី​សង្គម​ស៊ីវិល ចាត់ទុក​ការ​បង្ខំ​ពលរដ្ឋ​បែប​នេះ ជា​ការ​បន្ថែម​បន្ទុក​ជីវភាព​ឱ្យ​ពួកគាត់​ថែម​ទៀត។

អាជីវករ​លក់ដូរ​នៅ​ផ្សារ​បាយ​ដំរាំ ឱ្យ​ដឹង​ថា នៅ​រសៀល​ថ្ងៃទី​១១ មករា អាជ្ញាធរ​ស្រុក​បាណន់ មាន​គ្នា​ជាង​៣០​នាក់ បាន​ជិះឡាន និង​ម៉ូតូ ចុះ​មក​បង្គាប់​ឱ្យ​ពួកគាត់ រុះរើ​រោង​តូប និង​ទូ​តាំង​លក់​អីវ៉ាន់ យ៉ាង​តក់ក្រហល់ ដោយ​ពួកគាត់​មិន​បាន​ត្រៀមខ្លួន​ឡើយ។

អាជីវករ​លក់​ទឹកអំពៅ​នៅ​ផ្សារ​បាយ​ដំរាំ លោកស្រី ចែ រ៉ន ប្រាប់​វិទ្យុ​អាស៊ីសេរី ថា អាជ្ញាធរ​ចុះ​មក​បង្ខំ​ឱ្យ​លោកស្រី និង​អាជីវករ​ដទៃទៀត​ប្រញាប់​រុះរើ​តូប​លក់ដូរ ដោយ​គំរាម​ថា បើ​រើ​មិនទាន់​អាជ្ញាធរ​នឹង​ដឹក​អីវ៉ាន់​ទាំងនោះ​យក​ទៅ​សាលាស្រុក​ជា​មិនខាន​។ លោកស្រី​បន្ត​ថា នេះ​គឺជា​ទង្វើ​ដ៏​ហួសហេតុ​របស់​អាជ្ញាធរ ទាំង​ដែល​ពលរដ្ឋ​គ្រាន់តែ​លក់ដូរ​បន្តិចបន្តួច​គ្រាន់​ចិញ្ចឹមជីវិត ដោយ​មិន​បាន​ធ្វើ​អ្វី​ឱ្យ​ប៉ះពាល់​សណ្ដាប់ធ្នាប់​សាធារណៈ​នោះ​ឡើយ។

លោកស្រី ចែ រ៉ន៖ «ចង់​និយាយ​ថា អាជីវករ​លក់​ពី​ណា ពី​ណី​តាំងពី​ចាប់ផ្ដើម​ធ្វើ​ផ្សារ​។ ដល់​ពេល​គេ​និយាយ​ពី​លក្ខខណ្ឌ​កុងត្រា​ជាមួយ​ថ្នាក់​លើ​ទៅ ថា​រុះរើ​ផ្សារ​ហ្នឹង​រញ៉េរញ៉ៃ​ពេញ​ហ្នឹង​។ និយាយ​ទៅ​វា​អត់​មាន​ផ្លូវ​ណា​ប៉ះពាល់​ឡាន ប៉ះពាល់​ឡាន​ធំ​អី​ផង​។ មាន​តែ​ផ្លូវ​ច្រកចូល​ផ្ទះ​ប្រជាជន​។ គាត់​ធ្វើ​អ៊ីចឹង​។ គេ​គំរាម​យើង​ឱ្យ​រើ​ផង គេ​រើ​ខ្លួនឯង​ផង»

សកម្មភាព​របស់​អាជ្ញា​ធរ​ទាំងនេះ ធ្វើឡើង​ក្រោយ​ពេលដែល រដ្ឋបាល​ស្រុក​បាណន់ បាន​ហៅ​អាជីវករ​លក់ដូរ​នៅ​ផ្សា​របាយ​ដំរាំ មក​ប្រជុំ​កាលពី​ថ្ងៃទី​១១ ខែធ្នូ ឆ្នាំ​២០២៣ ដោយ​បង្ខំ​ឱ្យ​ពួកគាត់​រុះរើ​តូប​លក់ដូរ​ចេញពី​បរិវេណ​របង​វត្ត​បាយ​ដំរាំ ឱ្យ​បាន​មុន​ដើមឆ្នាំ​២០២៤ និង​ឱ្យ​ពួកគាត់​ទៅ​ជួល​តូប​នៅ​ផ្សារ​ថ្មី​ទើប​បង្កើត ដែល​មាន​ចម្ងាយ​ពី​ផ្សារ​ចាស់​ប្រហែល​មួយ​គីឡូម៉ែត្រ​។ តែ​អាជីវករ​ភាគច្រើន​មិន​សុខ​ចិត្តនឹង​ការផ្លាស់ប្ដូរ​នេះ​ឡើយ ព្រោះ​ផ្សារ​ថ្មី​ត្រូវ​ចំណាយ​ជួល​តូប​ថ្លៃ និង​មិន​សូវ​មាន​មនុស្ស​ដូច​នៅ​ផ្សារ​ចាស់​ឡើយ ទើប​ពួកគាត់​សម្រេចចិត្ត​បន្ត​លក់ដូរ​នៅ​ទីតាំង​ដដែល​រហូត​មក​ដល់​ពេល​នេះ។

អ្នកលក់​កាហ្វេ​នៅ​ផ្សារ​បាយ​ដំរាំ កញ្ញា រ៉េត សុខលីន រៀបរាប់​ថា ខណៈ​ដែល​កញ្ញា​កំពុង​លក់ដូរ អាជ្ញាធរ​បាន​ប្រាប់​ឱ្យ​កញ្ញា​រើ​ទូ​កាហ្វេ​ភ្លាមៗ ដែល​ធ្វើ​ឱ្យ​កញ្ញា​រើ​កញ្ជើ និង​ប្រមូល​របស់របរ​សឹង​មិនទាន់​។ កញ្ញា​លើកឡើង​ថា បន្ទាប់ពី​អាជ្ញាធរ បិទ​ផ្សារ​បាយ​ដំរាំ លែងឱ្យ​លក់ដូរ​ហើយ កញ្ញា​ត្រូវ​ផ្អាក ឬ​ឈប់​លក់​កាហ្វេ​នេះ ទាំងស្រុង​តែម្ដង ព្រោះ​កញ្ញា ប្រាប់​ថា មិន​មាន​លទ្ធភាព​ទៅ​ជួល​កន្លែង​លក់ នៅ​ទីតាំង​ផ្សារ​ថ្មី ដែល​អាជ្ញាធរ​ណែនាំ​ឱ្យ​ប្ដូរ​ទៅនោះ​ឡើយ។

កញ្ញា រ៉េត សុខលីន៖ «ខ្ញុំ​ប្រហែលជា​ផ្អាក​លក់​សិន​ហើយ ប្រសិនបើ​ប្ដូរ​ទៅ​ផ្សារ​ថ្មី លក់​មិន​រួចខ្លួន​ឱ្យ​ថ្លៃ​តូប​ទេ​។ លក់​មិន​ចំណេញ​ច្រើន​ទេ បានតែ​ទិញ​ម្ហូប ល្មម​មួយ​ហូប​រាល់ថ្ងៃ​ហ្នឹងឯង និយាយ​ឱ្យ​ងាយ​ស្ដាប់ គឺថា​បានតែ​គ្រប់​ស៊ី​ហ្នឹងឯង។ លក់​តូប​តូច​មួយ​ហ្នឹង ហើយ​អ្នក​ផ្សេង​វិញ ព្រឹក​ឡើង​គាត់​បេះ​បន្លែ​នៅផ្ទះ​គាត់​យក​មក​លក់ បាន​បន្តិចបន្តួច បាន​មួយ​គ្រប់​ទិញ​ម្ហូប យក​ទៅ​ហូប​នៅផ្ទះ ហើយ​ឥឡូវ​គេ​ឱ្យ​រើ​ផ្សារ​ហ្នឹង​ទៀត»

ការ​បង្ខំ​ឱ្យ​ពលរដ្ឋ​រុះរើ​យ៉ាង​ប្រញាប់ប្រញាល់​នៅ​ពេល​នេះ គឺ​ក្រោម​ហេតុផល​របស់​រដ្ឋបាល​ស្រុក ដែល​អះអាង​ថា នឹង​យក​ទីតាំង​ផ្សារ​បាយ​ដំរាំ អភិវឌ្ឍ​ធ្វើ​សួនច្បារ សាលាឆទាន និង​ជណ្ដើរ​ចុះ​ស្ទឹង សម្រាប់​បម្រើ​ឱ្យ​ភ្ញៀវ​ទេសចរណ៍​ទៅ​ទស្សនា សត្វ​ជ្រឹង ដែល​មាន​សំបុក​លើ​ដើមឈើ​ក្បែរ​នោះ​។ លើស​ពី​នេះ រដ្ឋបាល​ស្រុក​បាណន់ បាន​ចោទ​ទៅលើ​អាជីវក​រថា ទន្ទ្រាន​យក​ដី​ចំណី​ផ្លូវ​ស្ទឹង​សង្កែ សាងសង់​ផ្ទះ តូប​លក់ដូរ ដែល​បណ្ដាល​ឱ្យ​បាត់បង់​សណ្ដាប់ធ្នាប់ កកស្ទះ​ចរាចរណ៍។

តែ​ក្រុម​អាជីវករ​ថា ផ្សារ​ប្រពៃណី​បាយ​ដំរាំ នេះ កកើត​តាំងពី​ឆ្នាំ​១៩៩០ មក​ម្ល៉េះ ដោយសារ​មាន​អ្នកភូមិ​ដែល​បេះ​បន្លែ និង​នេសាទ​ត្រី​យក​មក​លក់​កាន់តែ​ច្រើន ប៉ុន្តែ​មិន​បណ្ដាល​ឱ្យ​កកស្ទះ​ចរាចរណ៍ និង​បំពុល​បរិស្ថាន​ស្ទឹង​នោះ​ទេ ចំណែកឯ​ផ្ទះ​ដែល​សង់​រំលោភ​យក​ដី​ស្ទឹង​នោះ គឺជា​ផ្ទះ​របស់​មេឃុំ​បាយ​ដំរាំ គឺ​លោក ង៉ុង ឆាន់លី ប៉ុន្តែ​អាជ្ញាធរ មិន​ដែល​ចាត់​វិធានការ​ឡើយ។

វិទ្យុ​អាស៊ីសេរី មិន​អាច​ទាក់ទង​អភិបាលស្រុក​បាណន់ លោក ស្រេង សុខា និង​មេឃុំ​បាយ​ដំរាំ លោក ង៉ុង ឆាន់លី ដើម្បី​សុំ​ការ​បកស្រាយ​ជុំវិញ​រឿង​នេះ​បានទេ នៅ​ថ្ងៃទី​១១ ខែ​មករា។

ជុំវិញ​រឿង​នេះ អ្នកគ្រប់គ្រង​ប្រចាំ​ការិយាល័យ​អង្គការ​លីកាដូ ខេត្ត​បន្ទាយមានជ័យ និង​បាត់ដំបង លោក អ៊ិន គង់ជិត លើកឡើង​ថា ការ​បណ្ដេញ​អាជីវករ​មិន​ឱ្យ​លក់ដូរ​នៅ​ផ្សារ​បាយ​ដំរាំ នៅ​ពេល​នេះ គឺជា​ការ​ដាក់​សម្ពាធ​សេដ្ឋកិច្ច​បន្ថែម​ទៅលើ​ពួកគាត់​ឱ្យ​កាន់តែ​លំបាក ខណៈ​អាជីវករ​មួយ​ចំនួន ដែល​លក់​បន្លែ ផ្លែឈើ​នៅ​តាម​កញ្ច្រែង ល្អី គឺ​លក់​មួយថ្ងៃ សម្រាប់​រស់​មួយថ្ងៃ​តែប៉ុណ្ណោះ និង​ខ្លះ​ទៀត ជាប់​បំណុល​ធនាគារ​។ លោក​យល់​ឃើញ​ថា ផ្សារ​បាយ​ដំរាំ គឺជា​ផ្សារ​ប្រពៃណី ដែល​បង្ហាញ​ពី​ភាព​សាមញ្ញ​បែប​ជនបទ​ម្យ៉ាង ដូច្នេះ​អាជ្ញាធរ គួរតែ​រៀបចំ​ផ្សារ​មួយ​នេះ ឱ្យ​មាន​អនាម័យ និង​សម្បូរ​បែប ដើម្បី​ទាក់ទាញ​ភ្ញៀវ​ទេសចរណ៍​បាន​ដើរ​ទិញ​ទំនិញ ដែល​បង្កើត​មុខ​របរ​ដល់​ប្រជាពលរដ្ឋ ជា​ជាង​បង្ខំ​ឱ្យ​បិទ​ផ្សារ​បែប​នេះ។

លោក អ៊ិន គង់ជិត៖ «រឿង​នេះ អាជ្ញាធរ​ត្រូវ​គិត​ទាំងអស់ ទាំង​ជីវភាព ប្រាក់ចំណូល​របស់​ប្រជាពលរដ្ឋ​នៅ​តំបន់​ហ្នឹង ហើយ​ទាំង​ទេសចរ​។ ប្រសិនបើជា​ទេសចរ​រក​ចំណូល​បាន​ច្រើន នោះ​មិន​អី​ទេ ប៉ុន្តែ​ប្រសិនបើ​ទេសចរ​មិន​បាន​ផ្ដល់​ចំណូល​អ្វី​ផង ហើយ​យើង​ទៅ​ផ្ដាច់ផ្ដិល​ប្រាក់ចំណូល​របស់​ប្រជាពលរដ្ឋ ដែល​ធ្វើ​ឱ្យ​គ្មាន​តុល្យភាព​គ្នា គឺ​ស្មើនឹង​ទៅ​កម្ទេច​ឆ្នាំង​បាយ​របស់​ពួកគាត់​អ៊ីចឹង»

ផ្សារ​បាយ​ដំរាំ មាន​ទីតាំង​នៅមុខ​វត្ត និង​ក្បែរ​របង​វត្ត ស្ថិត​នៅ​តាម​បណ្ដោយ​ផ្លូវលំ​គ្រួស​ក្រហម និង​មាន​ដើមឈើ​ដុះ​ត្រឈឹងត្រឈៃ ដែល​ជា​ជម្រក​សត្វ​ជ្រឹង​រាប់​ម៉ឺន​ក្បាល​។ កាល​ពីមុន​ធ្លាប់​មាន​ភ្ញៀវ​ទេសចរណ៍​ទៅ​ទស្សនា​កម្សាន្ត ដែល​បាន​ផ្ដល់​ចំណូល​បន្តិចបន្តួច​ដល់​ពលរដ្ឋ​ដែរ​។ តែ​ក្រោយពេល​វិបត្តិ​កូ​វីដ​១៩ ប្រជាពលរដ្ឋ​បាន​ផ្លាស់ប្ដូរ​ពី​ការ​លក់ដូរ​បែប​ទេសចរណ៍ មក​លក់​បន្លែ​ត្រី​សាច់ សំលៀកបំពាក់ ដោយ​ដាក់​ក្រាល​នឹង​ដី ខ្លះ​មាន​តូប​សង់​ផុត​ពី​ដី និង​ព្យួរ​តាម​ឆត្រ​ជាដើម​។ អាជីវករ​លក់ដូរ​នៅ​ផ្សារ​នេះ តែ​ពេល​ព្រឹក​ប៉ុណ្ណោះ ដោយ​រើ​ទៅវិញ​នៅពេល​ថ្ងៃត្រង់។

ក្រុម​អាជីវករ​ទាំងអស់ ស្នើ​ឱ្យ​រដ្ឋបាល​ស្រុក និង​ខេត្ត ពិចារណា​ឡើងវិញ​ទៅលើ​បញ្ហា​នេះ ដោយ​រៀបចំ​ឱ្យ​ពួកគាត់​លក់ដូរ​ឱ្យ​មាន​របៀប​នៅ​លើ​ទីតាំង​ចាស់ ជាជាង​ផ្លាស់​ពួកគាត់​ទៅ​ទីតាំង​ថ្មី ដែល​មាន​តម្លៃ​ជួល​តូប​ថ្លៃ ប្រៀប​បាន​ទៅ​នឹង​ការ​បំបែក​ឆ្នាំងបាយ​ដ៏​តូច​របស់​ពួកគាត់​ដូច្នោះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។