នៅក្នុងដីកាកោះចំនួន ៥សន្លឹកដាច់ដោយឡែកពីគ្នា ចុះថ្ងៃទី២៥ ខែមេសា ឆ្នាំ២០១៣ ដែលវិទ្យុអាស៊ីសេរី ទទួលបាននោះ តុលាការខេត្តបាត់ដំបង បានឲ្យមន្ត្រីទាំង ៥រូបនោះត្រូវចូលខ្លួនទៅបំភ្លឺនៅខែមិថុនា ខាងមុខនេះ។
សំណុំរឿងព្រហ្មទណ្ឌនេះ គេពុំទាន់បានដឹងច្បាស់ថាមន្ត្រីប៉ូលិស និងមន្ត្រីសាលាស្រុកបាណន់ នោះជាប់ចោទពីបទលួចអ្វីនោះទេ ព្រោះក្នុងដីកាកោះនោះពុំបានបញ្ជាក់ច្បាស់លាស់នៅឡើយ។ មន្ត្រីស្រុកបាណន់ ទាំង ៥នាក់នោះ មានលោក អ៊ុង ប៊ុនជយ ជាអភិបាលស្រុកបាណន់ លោក គុយ វណ្ណូ និងអ្នកស្រី អ៊ុយ មួយ ជាអភិបាលរងស្រុកបាណន់ រួមទាំងមន្ត្រីនគរបាលស្រុកបាណន់ ពីរនាក់ទៀត ក្នុងនោះមានឈ្មោះ រៀម រាំង ជាអធិការរង និងឈ្មោះ ម៉ែន សារិទ្ធ ជាមន្ត្រីនគរបាលស្រុកបាណន់។
អភិបាលស្រុកបាណន់ លោក អ៊ុង ប៊ុនជយ ប្រតិកម្មថា តំណាងអយ្យកាចេញដីកាកោះដោយសរសេរដាក់ពីបទលួចនេះ គឺជារឿងពុំត្រឹមត្រូវ។ ការចោទមន្ត្រីសាលាស្រុក និងមន្ត្រីនគរបាល ថាជាក្រុមចោរនោះ គឺការប្រមាថមើលងាយដល់មន្ត្រីរដ្ឋបាលសាធារណៈរបស់រដ្ឋ ដែលខិតខំបម្រើប្រជាពលរដ្ឋ។
លោក អ៊ុង ប៊ុនជយ៖ «ព្រះរាជអាជ្ញារងនិយាយមកដូចជាមិនត្រូវ។ ទី១ អភិបាលស្រុក ទី២ អភិបាលរងស្រុក ទី៣ មន្ត្រីប៉ូលិសអធិការរងស្រុក សុទ្ធតែជាក្រុមជំនាញកំណត់ហេតុប្រគល់ស្រូវឲ្យប្រជាពលរដ្ឋ ក៏មានដីកាចេញដោយអភិបាលខេត្ត ក៏មានលោក តូច សុភក្តី មិនត្រឹមត្រូវ ព្រះរាជអាជ្ញារងមិនត្រឹមត្រូវមានបានគិតមើលទេ អភិបាលស្រុក អភិបាលរងស្រុក អធិការរងហើយមន្ត្រីប៉ូលិស»។
នៅក្នុងដីកាកោះ បញ្ជាក់ថា អភិបាល អភិបាលរងស្រុកទាំងបីនាក់ និងមន្ត្រីប៉ូលិសស្រុកបាណន់ ពីរនាក់ នឹងត្រូវចូលខ្លួនទៅបំភ្លឺនៅខែមិថុនា ឆ្នាំ២០១៣។
លោក អ៊ុង ប៊ុនជយ បញ្ជាក់ថា រូបលោក និងអភិបាលរងស្រុក មិនអាចចូលខ្លួនទៅបំភ្លឺតាមការកំណត់របស់តុលាការបានទេ ដោយសារជាប់រវល់ការងារឃោសនាបោះឆ្នោត ប៉ុន្តែអាជ្ញាធរស្រុកនឹងសរសេរលិខិតមួយផ្ញើជូនទៅតុលាការឲ្យបានជ្រាបពីបញ្ហានេះ។
អធិការនគរបាលស្រុកបាណន់ លោក ប៊ុត សំបូរ ប្រតិកម្មថា មន្ត្រីប៉ូលិសពីរនាក់ជាចុងចម្លើយ ក៏ត្រូវគេចោទថាជាចោរដូចគ្នាដែរ។ ប៉ុន្តែ បទលួចដែលគេចោទនោះពុំបានបញ្ជាក់ច្បាស់លាស់ថានរណាជាដើមបណ្ដឹង ហើយប្ដឹងថាលួចអ្វីនោះទេ៖ «អ៊ីចឹងទៅ ពួកខ្ញុំវាមិនខូចឈ្មោះ ហើយពួកខ្ញុំលួចអី ហើយបើពួកខ្ញុំធ្វើប៉ូលិសលួច អ៊ីចឹងប្រជាជនបាត់បង់ជំនឿ ហើយពួកខ្ញុំជាមេចោរ ហើយមិនដឹងលួចអី ខ្ញុំអត់យល់។ អ៊ីចឹង រាល់ដីកាត្រូវដាក់ឲ្យច្បាស់មកពីបទលួច លួចអី អ្នកណាប្ដឹង។ អភិបាលស្រុក អភិបាលរងស្រុក ជាមន្ត្រីនគរបាលយុត្តិធម៌ ជាសមត្ថកិច្ចសាធារណៈ បើអ៊ីចឹង ពួកខ្ញុំគិតថា មន្ត្រីសាធារណៈដែលជាមន្ត្រីរបស់រដ្ឋាភិបាលមន្ត្រីអនុវត្តច្បាប់ វាមិនគួរមន្ត្រីទាំងឡាយនេះទៅលួច»។
ទោះយ៉ាងនេះក្ដី សំណុំរឿងព្រហ្មទណ្ឌលេខ២៣១ ចុះថ្ងៃទី១ ខែមេសា ឆ្នាំ២០១៣ គឺជារឿងថ្មី។ ប៉ុន្តែគេសង្ស័យថា សំណុំរឿងព្រហ្មទណ្ឌនេះទំនងមានជាប់ពាក់ព័ន្ធទៅនឹងក្ដីក្ដាំគ្នារវាងប្រជាពលរដ្ឋជាង ១០គ្រួសារ និងមន្ត្រីយោធាមួយរូបឈ្មោះ ឌឿ សាវិន។ មន្ត្រីយោធាឈ្មោះ ឌឿ សាវិន ជាដើមបណ្ដឹងក្នុងសំណុំរឿងនេះ ហើយបានប្ដឹងមន្ត្រីសាលាស្រុក និងមន្ត្រីនគរបាលស្រុកបាណន់ ពីបទលួចស្រូវយកទៅចែកជូនប្រជាពលរដ្ឋដែលជាអ្នកមានទំនាស់។
វិទ្យុអាស៊ីសេរី នៅពុំអាចសុំសេចក្ដីបញ្ជាក់ពីលោក ឌឿ សាវិន ជុំវិញការប្ដឹងផ្ដល់គ្នានេះបានទេ។ ប៉ុន្តែ ព្រះរាជអាជ្ញាតុលាការខេត្តបាត់ដំបង លោក នួន សាន បានមានប្រសាសន៍ថា សំណុំរឿងព្រហ្មទណ្ឌនេះមានលោក ឌឿ សាវិន ជាអ្នកដើមបណ្ដឹង។
ឆ្លើយតបជុំវិញមតិប្រតិកម្មរបស់អាជ្ញាធរស្រុក និងមន្ត្រីនគរបាលស្រុកបាណន់ លោក នួន សាន ពន្យល់ថា ការចេញដីកាកោះឲ្យចូលបំភ្លឺពីបទលួច ដោយសារតែតុលាការទទួលបានពាក្យបណ្ដឹងពីដើមចោទ៖ «គាត់ប្រតិកម្មជាការគិតរបស់គាត់ ប៉ុន្តែចំពោះខ្ញុំវិញ ជាតំណាងអយ្យកា ខ្ញុំគិតថា ការអញ្ជើញអ្នកណាមួយដើម្បីបំភ្លឺការពិត វាអត់មានបញ្ហាអីទេ ព្រោះថាគេដាក់បណ្ដឹងមកថា ពូ "ក" ពូ "ខ" រួមគ្នាលួចទ្រព្យគេ អ៊ីចឹងបើយើងមិនអញ្ជើញគាត់មកបំភ្លឺការពិត យើងណាទៅដឹង»។
មន្ត្រីសម្របសម្រួល សមាគមអាដហុក (Adhoc) ការពារសិទ្ធិមនុស្ស ប្រចាំខេត្តបាត់ដំបង លោក យិន ម៉េងលី ថ្លែងថា ទំនាស់នេះបង្កឡើងដោយសារសាលក្រមមួយដែលមានន័យទូលំទូលាយមិនច្បាស់លាស់របស់តុលាការខេត្តបាត់ដំបង។ លោកថា សាលក្រមនោះបានសម្រេចទៅពារលើដីប្រជាពលរដ្ឋដែលគណៈកម្មការសុរិយោដីថ្នាក់ខេត្ត បានសម្រេចរួចហើយ៖ «សាលក្រមបានសម្រេចពារទៅលើដីដែលគណៈកម្មការសុរិយោដីខេត្ត ហើយមានចំណាររបស់ឯកឧត្ដម ស ខេង ចារអោយគណៈកម្មការថ្នាក់ខេត្តធ្វើការសម្របសម្រួល។ អ៊ីចឹងបានធ្វើការសម្របសម្រួលគ្នាចប់ ស្រាប់តែលេចសាលក្រមហ្នឹងយកទៅគ្រប ហើយសាលក្រមហ្នឹងវាមានន័យទូលំទូលាយពេក។ នៅចំណុចបឹងខ្ចាស់ បឹងវែង អីហ្នឹង ទំហំបឹងហ្នឹងធំណាស់រាប់គីឡូ។ អ៊ីចឹងបានសាលក្រមរបៀបនេះយកទៅអនុវត្តមិនបាន អាហ្នឹងបង្កឲ្យមានបញ្ហាកើតឡើងហ្នឹង»។
កាលពីដើមឆ្នាំ២០១០ អាជ្ញាធរខេត្តបាត់ដំបង បានចុះទៅប្រមូលស្រូវប្រមាណ ៣០០បាវ យកទៅរក្សាទុកនៅសាលាស្រុកបាណន់ ដើម្បីទប់ស្កាត់ការដណ្ដើមគ្នារវាងអ្នកភូមិ ១២គ្រួសារ និងមន្ត្រីយោធាឈ្មោះ ឌឿ សាវិន។ ស្រូវនោះ ត្រូវបានគេដាំនៅលើដីមានទំនាស់ទំហំ ៣២ហិកតារ នៅចំណុចបឹងខ្ចាស់ ក្នុងឃុំកន្ទឺ១ ស្រុកបាណន់ ខេត្តបាត់ដំបង។ ក្រោយមក អាជ្ញាធរស្រុកបាណន់ បានសម្រេចប្រគល់ស្រូវនោះឲ្យទៅប្រជាពលរដ្ឋ ១២គ្រួសារ យកទៅទ្រទ្រង់ជីវភាពជាបណ្ដោះអាសន្ន។
អាជ្ញាធរចម្រុះខេត្តបាត់ដំបង បានប្រមូលស្រូវនៅលើផ្ទៃដីទំហំ ៣២ហិកតារ នៅចំណុចបឹងខ្ចាស់ ឃុំកន្ទឺ១ ស្រុកបាណន់ ខេត្តបាត់ដំបង ក្រោយពីអ្នកភូមិ ១២គ្រួសារចោទថា លោក ឌឿ សាវិន ជាមន្ត្រីយោធាខេត្តបាត់ដំបង បាននាំកម្មករ ២៥នាក់ ចុះច្រូតយកស្រូវលើដីទំនាស់នោះ។ លោក ប្រាជ្ញ ច័ន្ទ អភិបាលខេត្តបាត់ដំបង ធ្លាប់បានបញ្ជាក់ថា អាជ្ញាធរខេត្តបានសម្រេចផ្ដល់ស្រូវនោះទៅអ្នកភូមិជាបណ្ដោះអាសន្នដើម្បីបញ្ចៀសការខូចខាត។
ជម្លោះដីធ្លីនេះ គឺកើតចេញពីការជំពាក់លុយគ្នារវាង ឌឿ សាវិន និង ចាយ សាវេន ជាមន្ត្រីយោធាដូចគ្នា រហូតមានការប្ដឹងផ្ដល់នៅតុលាការ។ ក្រោយមក តុលាការបានកាត់សេចក្តីដោយពុំបានធ្វើការស្រាវជ្រាវច្បាស់លាស់ ហើយពុំដឹងថាភាគីលោក ចាយ សាវេន មានដីនៅកន្លែងណាផង ទើបបណ្ដាលឲ្យប៉ះពាល់លើដីរបស់អ្នកភូមិ ១២គ្រួសារ។
អភិបាលខេត្តបាត់ដំបង លោក ប្រាជ្ញ ច័ន្ទ ធ្លាប់បញ្ជាក់ថា តុលាការត្រូវពិនិត្យមើលសេចក្តីសម្រេចរបស់ខ្លួនកន្លងមកឡើងវិញ៖ «យើងបានពិនិត្យមើលដើម្បីដោះស្រាយឲ្យជ្រះស្រឡះ ហើយទាក់ទងនីតិវិធីរបស់តុលាការ ក៏ឲ្យតុលាការពិនិត្យឡើងវិញ។ ការកាត់ក្តីកន្លងមក វាមិនជាក់ស្ដែងព្រោះដីនោះ តាមយើងសិក្សាទៅជាដីរបស់ប្រជាពលរដ្ឋទេ»។
កាលពីឆ្នាំ២០០១ គណៈកម្មការដោះស្រាយវិវាទដីធ្លីខេត្តបាត់ដំបង បានសម្រេចប្រគល់ដីទំហំ ៣២ហិកតារ នៅចំណុចបឹងខ្ចាស់ ឃុំកន្ទឺ១ ស្រុកបាណន់ ខេត្តបាត់ដំបង ឲ្យទៅអ្នកភូមិចំនួន ៦គ្រួសារ។ អ្នកភូមិចំនួន ៦គ្រួសារ បានចែកដីនោះបន្តជា ១២គ្រួសារ ហើយបានបង្កបង្កើនផលលើដីនោះតាំងពីឆ្នាំ២០០១ រហូតមក ប៉ុន្តែរហូតមកដល់ពេលនេះ ដីនោះនៅពុំទាន់ដោះស្រាយចប់ ហើយនៅមានការប្ដឹងផ្ដល់គ្នានៅស្ថាប័នតុលាការនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។