អាជ្ញាធរមូលដ្ឋានឃុំវ៉ារិន ចម្ងាយជិត ៩០គីឡូម៉ែត្រ ភាគឧត្តរពីទីរួមខេត្តសៀមរាប នៅតែអះអាងថា ការដែលគេទៅសុំពិនិត្យសៀវភៅគ្រួសារ ហើយកត់យកឈ្មោះ និងប្រវត្តិរបស់ព្រះតេជព្រះគុណ ប៊ុត ប៊ុនតិញ ជាប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គមនោះ គឺគ្មានបំណងអ្វីផ្សេងក្រៅពីធ្វើរបាយការណ៍ជូននគរបាលប៉ុស្តិ៍សម្រាប់បញ្ជាក់ពីប្រជាពលរដ្ឋណាដែលមិនទាន់បានធ្វើអត្តសញ្ញាណប័ណ្ណនោះទេ។
បើទោះបីជាអាជ្ញាធរអះអាងយ៉ាងនេះក្ដី ក៏ព្រះសង្ឃ ប៊ុត ប៊ុនតិញ ដែលមួយរយៈមកនេះបានសកម្មក្នុងការដឹកនាំធ្វើពិធីបុណ្យសពរបស់លោកបណ្ឌិត កែម ឡី កំពុងមានការព្រួយបារម្ភអំពីសុវត្ថិភាព ហើយបានលាក់ព្រះកាយជាបណ្ដោះអាសន្ន។
ក្រុមគ្រួសាររបស់ប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គម ប៊ុត ប៊ុនតិញ ដែលរស់នៅភូមិគោកក្រួស ឃុំវ៉ារិន ស្រុកវ៉ារិន បានសំដែងការព្រួយបារម្ភចំពោះសន្តិសុខសម្រាប់ក្រុមគ្រួសារទាំងមូល ហើយអំពាវនាវឱ្យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សជួយឃ្លាំមើលសន្តិសុខចំពោះក្រុមគ្រួសាររបស់គាត់ទាំងមូលផង។
ការព្រួយបារម្ភនេះ បានកើតឡើងបន្ទាប់ពីមេភូមិគោកក្រួស បានទៅសុំពិនិត្យសៀវភៅគ្រួសារ ហើយបានកត់យកប្រវត្តិរបស់ព្រះសង្ឃអង្គនេះមក។
ម្ដាយរបស់ព្រះសង្ឃ ប៊ុត ប៊ុនតិញ គឺអ្នកស្រី ឃ្លាំ ហឿត អាយុ ៥៧ឆ្នាំ។ អ្នកស្រីមានប្រសាសន៍កាលពីព្រឹកថ្ងៃពុធ ទី២៧ ខែកក្កដា ថា កាលពីថ្ងៃទី២៥ ខែកក្កដា កន្លងទៅ មេភូមិគោកក្រួស ឈ្មោះ អន សែម បានទៅផ្ទះរបស់គាត់។ ដំបូងមេភូមិបានសុំលុយពីគាត់ដើម្បីយកទៅធ្វើបាយឱ្យសិស្សសាលាបឋមសិក្សា ហើយគាត់ក៏បានជូនលុយ ៥ពាន់រៀល។ បន្ទាប់មកមេភូមិក៏សុំពិនិត្យមើលសៀវភៅគ្រួសាររបស់គាត់ ដោយប្រាប់ថា ជំរឿនឈ្មោះអ្នកដែលមិនទាន់បានធ្វើអត្តសញ្ញាណប័ណ្ណ។
អ្នកស្រី ឃ្លាំ ហឿត បញ្ជាក់ទៀតថា គ្រួសាររបស់គាត់គឺនៅកូនចំនួន ៣នាក់ មិនទាន់បានធ្វើអត្តសញ្ញាណប័ណ្ណនៅឡើយ ប៉ុន្តែនៅពេលដែលមេភូមិបើកសៀវភៅគ្រួសារ គឺកត់យកតែឈ្មោះ និងប្រវត្តិរបស់ព្រះសង្ឃ ប៊ុត ប៊ុនតិញ ១ប៉ុណ្ណោះ ហើយក៏ចាកចេញទៅ។ អ្នកស្រី ឃ្លាំ ហឿត មានការសង្ស័យថា អាជ្ញាធរអាចមិនកត់យកឈ្មោះកូនរបស់គាត់ទៅធ្វើអត្តសញ្ញាណប័ណ្ណដូចការអះអាងនោះឡើយ៖ «យកទៅធ្វើអត្តសញ្ញាណប័ណ្ណ ខ្ញុំមិនជឿ ធ្វើយ៉ាងណាបើមនុស្សមិនមកថតរូបផង។ ខ្ញុំបារម្ភពីព្រោះការដើរយកឈ្មោះ ធ្វើអត្តសញ្ញាណប័ណ្ណនេះ មិនបានដើរស្រង់ឈ្មោះទូទៅទេ»។
ឪពុករបស់ព្រះសង្ឃ ប៊ុត ប៊ុនតិញ លោក ប៊ុត ស្ដើង មានប្រសាសន៍ថា មួយរយៈមកនេះ បន្ទាប់ពីលោកបណ្ឌិត កែម ឡី ត្រូវគេបាញ់សម្លាប់ គឺគាត់តែងតែឮអ្នកស្រុកនិយាយរិះគន់អំពីកូនរបស់គាត់ដែលសកម្មក្នុងការរៀបចំបុណ្យសពលោក កែម ឡី។
លោក ប៊ុត ស្ដើង សំដែងការព្រួយបារម្ភចំពោះសុវត្ថិភាពព្រះសង្ឃ ប៊ុត ប៊ុនតិញ ផង និងសុវត្ថិភាពក្រុមគ្រួសារទាំងមូលដែលនៅឯឃុំវ៉ារិន ផង៖ «ព្រួយបារម្ភខ្លាចគេធ្វើបាប ធ្វើទោសលោកកូន ដូចលោកបណ្ឌិត កែម ឡី ដែរ។ ខ្ញុំចេះតែភ័យព្រួយរឿងនេះ ហើយចង់ឱ្យអង្គការសហប្រជាជាតិទទួលបន្ទុកសិទ្ធិមនុស្ស ធ្វើម៉េចឱ្យគ្រួសារខ្ញុំមានសុវត្ថិភាពទាំងអស់គ្នា»។
ទោះជាយ៉ាងណា អាជ្ញាធរមូលដ្ឋាន ឃុំវ៉ារិន បានអះអាងថា គេនឹងធានាសុវត្ថិភាពចំពោះគ្រួសារព្រះសង្ឃ ប៊ុត ប៊ុនតិញ ទាំងស្រុង ដោយមិនមានអ្វីគួរឱ្យភ័យខ្លាចទេ។
មេភូមិគោកក្រួស លោក អន សែម អះអាងតាមទូរស័ព្ទថា ការដែលលោកទៅសុំពិនិត្យសៀវភៅគ្រួសារ ហើយកត់ឈ្មោះព្រះសង្ឃ ប៊ុត ប៊ុនតិញ នោះ គឺមិនមានបំណងអ្វីក្រៅតែពីជំរឿនអ្នកមិនទាន់បានធ្វើអត្តសញ្ញាណប័ណ្ណនោះទេ៖ «ខាងប៉ុស្តិ៍នគរបាលគេឱ្យសម្ភាសន៍គ្រប់តែគ្រួសារអ៊ីចេះ អត់ទាន់ធ្វើអត្តសញ្ញាណប័ណ្ណគឺនឹងត្រូវរៀបចំធ្វើឱ្យ»។
ព្រះតេជព្រះគុណ ប៊ុត ប៊ុនតិញ ដែលមាននាមដើម ស្ដើង ប៊ុនតិញ គឺជាប្រធានបណ្ដាញព្រះសង្ឃឯករាជ្យ ដើម្បីយុត្តិធម៌សង្គម បានធ្វើសកម្មភាពយ៉ាងសកម្មជុំវិញយុទ្ធនាការការពារតំបន់ព្រៃឡង់ ហើយសកម្មភាពចុងក្រោយ គឺព្រះអង្គជាអ្នករៀបចំពិធីបុណ្យសពរបស់លោកបណ្ឌិត កែម ឡី ដែលឃាតកបាញ់សម្លាប់។
ព្រះសង្ឃ ប៊ុត ប៊ុនតិញ បានសម្ងំលាក់ព្រះកាយមួយរយៈខ្លី ដោយសារព្រួយបារម្ភពីសុវត្ថិភាព បន្ទាប់ពីដឹងថា អាជ្ញាធរបានទៅឆែករកប្រវត្តិរូបរបស់ព្រះអង្គពីឪពុកម្ដាយនៅឯស្រុកកំណើត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។