កម្ពុជា-ចិនពង្រឹងកិច្ចសហប្រតិបត្តិការប្រយុទ្ធប្រឆាំងបទល្មើសឆបោកតាមទូរគមនាគមន៍
2019.04.01
រដ្ឋមន្ត្រីក្រសួងមហាផ្ទៃ លោក ស ខេង (ឆ្វេង) និងមន្ត្រីជាន់ខ្ពស់ចិន ក្នុងដំណើរទស្សនកិច្ចប្រទេសចិន ពីចុងខែមីនា ២០១៩។
រូបពីហ្វេសប៊ុកលោក ស ខេង
លោក ស ខេង អះអាងថា ក្រសួងមហាផ្ទៃ និងក្រសួងក្រសួងសន្តិសុខចិនព្រមព្រៀងគ្នាពង្រឹងកិច្ចសហប្រតិបត្តិការប្រយុទ្ធប្រឆាំងបទល្មើសឆបោក តាមទូរគមនាគមន៍នៅលើទឹកដីកម្ពុជា។ សង្គមស៊ីវិលយល់ថា បញ្ហានេះ បើអាជ្ញាធរកម្ពុជាមិនអនុវត្តឱ្យម៉ឺងម៉ាត់នោះទេ កម្ពុជានៅតែជាទីកន្លែងដ៏កក់ក្ដៅសម្រាប់ឧក្រិដ្ឋជនអន្តរជាតិ ជាពិសេសជនជាតិចិនអាចមានឱកាសសម្ងំប្រព្រឹត្តិឧក្រិដ្ឋនៅកម្ពុជា។
ក្រសួងមហាផ្ទៃ និងក្រសួងសន្តិសុខចិន បានផ្លាស់ប្ដូរប្រតិភូ ដើម្បីដកបទពិសោធន៍ការងារការបណ្ដុះបណ្ដាលជំនាញបច្ចេកទេសដល់កងកម្លាំងអនុវត្តច្បាប់។
លោក ស ខេង រដ្ឋមន្ត្រីក្រសួងមហាផ្ទៃ បានឱ្យដឹងតាមបណ្ដាញសង្គម ហ្វេសប៊ុក (Facebook) របស់លោក នៅថ្ងៃទី៣១ ខែមីនា ថា ក្រៅពីការពង្រឹងកិច្ចសហប្រតិបត្តិការប្រយុទ្ធប្រឆាំងនឹងបទល្មើសឆបោកតាមមធ្យោបាយទូរគមនាគមន៍ភាគីទាំងពីរក៏បានព្រមព្រៀងគ្នាលើផែនការសកម្មភាពសម្រាប់អនុស្សរណៈនៃការយោគយល់គ្នាចាប់ពីឆ្នាំ២០១៩ ដល់ឆ្នាំ២០២៤ និងផែនការនៃការអនុវត្ត ច្បាប់ឆ្នាំ២០១៩។
ការចុះតាមបណ្ដាញសង្គមនេះ ធ្វើឡើងក្នុងឱកាសដែលលោកវិលត្រឡប់ពីប្រទេសចិន មកដល់ប្រទេសកម្ពុជាវិញ ក្រោយពេលបំពេញទស្សនកិច្ចនៅប្រទេសចិនរយៈពេល៤ថ្ងៃកន្លងទៅ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា សមត្ថកិច្ចមូលដ្ឋានកម្ពុជាមួយចំនួនមិនទាន់មានលទ្ធភាពគ្រប់គ្រងជនបរទេសនៅឡើយទេ។ មន្ត្រីសង្គមស៊ីវិលរូបនេះយល់ថា ភាគីរដ្ឋាភិបាលកម្ពុជាគួរមានមានវិធានការម៉ឺងម៉ាត់លើជនបរទេសណាដែលប្រព្រឹត្តិល្មើសនៅកម្ពុជា គួរតែត្រូវដាក់ទោសឱ្យពន្ធនាគារនៅប្រទេសកម្ពុជាឱ្យ អស់សិនមុនត្រូវបញ្ជូនទៅប្រទេសកំណើតវិញ៖ «អនុស្សរណៈនៃយោគយល់រវាងកម្ពុជា-ចិនចំពោះការបញ្ជូនអ្នកទោសចិនយកទៅអនុវត្តទោសនៅចិនវិញគួរតែត្រូវបានភាគីទាំងពីរពិនិត្យមើលលទ្ធភាពហ្នឹងសម្រាប់ចិនគួរតែឱ្យអនុវត្តទោសនៅក្នុងទឹកដីកម្ពុជា»។
លោក ស ខេង រដ្ឋមន្ត្រីក្រសួងមហាផ្ទៃបានចេញដំណើរទៅបំពេញទស្សនកិច្ចផ្លូវការនៅរដ្ឋធានី ប៉េកាំង ប្រទេសចិន កាលពីថ្ងៃទី២៧ ដល់ថ្ងៃទី៣០ ខែមីនា តាមការអញ្ជើញរបស់ភាគីចិន។ ក្នុងដំណើរទស្សនកិច្ចនោះ លោកបានជួបប្រជុំពិភាក្សាជាមួយសមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងសន្តិសុខចិន លោក ចាវ ឃើជឺ និងមន្ត្រីជាន់ខ្ពស់ចិនមួយចំនួនទៀត។
អ្នកវិភាគនយោបាយដែលកំពុងនិរទេសខ្លួននៅក្រៅប្រទេស លោក គឹម សុខ យល់ថា នេះគ្រាន់តែជាការបង្កើតព្រឹត្តិការណ៍ធ្វើឱ្យលោក ស ខេង ដែលជាមេដឹកនាំទី២ របស់កម្ពុជាអាចបានទៅជួបមេដឹកនាំចិនដើម្បីធ្វើយ៉ាងណាឱ្យរបបនេះអាចគ្រប់គ្រងអំណាចបន្តទៀតបាន ប៉ុណ្ណោះ ដូច្នេះលោកយល់ថាការប្រយុទ្ធប្រឆាំងបទល្មើសឆបោកតាមមទូរគមនាគមន៍គ្មាន ប្រសិទ្ធភាពទេ។ លោក គឹម សុខ ថា ការបង្ក្រាបឧក្រិដ្ឋចិនកន្លងមកនេះគឺរបបក្រុងភ្នំពេញ គ្រាន់តែធ្វើឡើងដើម្បីបន្លំភ្នែករាស្ត្រប៉ុណ្ណោះ៖ «រូបភាពនៃការបង្ក្រាបនេះគ្រាន់តែជាការបន្លំភ្នែក និងសម្រួលអារម្មណ៍ខ្លះរបស់ពលរដ្ឋកម្ពុជាដែលកំពុងតែបារម្ភប៉ុណ្ណោះទេ ប៉ុន្តែអ្វីដែលគេអនុវត្តបន្ត (របបក្រុងភ្នំពេញ) គឺផែនការក្នុងការសហការចំពោះជនជាតិចិនទាំងឡាយណា ដែលមានលុយចាយធ្វើឱ្យមានចរន្តលុយនៅកម្ពុជាគឺគេសហការដើម្បីពង្រឹងមុខមាត់ អំណាច ផលប្រយោជន៍របស់គេ តាមរយៈជនជាតិចិនទាំងអស់នោះហើយ»។
កាលពីឆ្នាំ២០១៨ អាជ្ញាធរនៃរបបក្រុងភ្នំពេញបានបណ្ដេញជនជាតិចិនជាង ៧រយនាក់ ចេញពីកម្ពុជា ក្នុងចំណោមជនបរទេសដែលត្រូវបណ្ដេញចេញជិត ១ម៉ឺន ៥ពាន់ (១៤.៩៦៥នាក់) មានចំនួន៩១សញ្ជាតិ។
ក្រសួងមហាផ្ទៃឱ្យដឹងថា ពេលនេះមានជនជាតិចិនជាង ២០ម៉ឺននាក់ កំពុងរស់នៅនិងធ្វើការនៅប្រទេសកម្ពុជា។ ទន្ទឹមវត្តមានដ៏ច្រើននេះពួកគេកំពុងបង្កជាបញ្ហាមួយចំនួនរួមមាន៖ អំពើហិង្សា ចោរកម្មលួច ឆក់ ប្លន់ គ្រោះថ្នាក់ចរាចរណ៍ ដណ្ដើមការងារតូចតាចរបស់ពលរដ្ឋខ្មែរ និងឧក្រិដ្ឋតាមប្រព័ន្ធអ៊ីនធឺណិតជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីធនាគារបង្ខំឲ្យកូនបំណុលលក់ទ្រព្យសម្បត្តិសងលុយទៅធនាគារខ្លួន
- កម្ពុជាគួរបង្ហាញតម្លាភាពនៅកំពង់ផែរាមជាជាងប្រកាសប្រាប់អន្តរជាតិថា កម្ពុជាគ្មានវត្តមានមូលដ្ឋានយោធាបរទេស
- តំណាងរាស្ត្រនិងទីប្រឹក្សាបក្សប្រជាជនប្រតិកម្មលើការប្រមូលពន្ធថា គាបសង្កត់ពលរដ្ឋក្នុងគ្រាលំបាក
- អាជ្ញាធរបញ្ជូនកញ្ញា សេង ធារី ទៅឃុំខ្លួននៅពន្ធនាគារព្រៃសវិញ ក្រោយពេលមន្ត្រីអាមេរិកជួបលោក ហ៊ុន ម៉ាណែត ផ្ទួនៗ គ្នា
- អ្នកវិភាគថា គណបក្សភ្លើងទៀនអាចពិបាករកដៃគូនយោបាយ
