អាជ្ញាធរកម្ពុជាបណ្ដេញជនជាតិថៃ ចំនួន ១១៩នាក់ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ដោយអាជ្ញាធរអះអាងថា ពួកគេលួចចូលធ្វើការងារ និងស្នាក់នៅ ខុសច្បាប់ក្នុងទឹកដីកម្ពុជា។ អាជ្ញាធរបញ្ជាក់ថា ជនជាតិថៃទាំងនោះ មានជាប់ពាក់ព័ន្ធនឹងសកម្មភាពអនឡាញខុសច្បាប់។
បន្ទាប់ពីអនុវត្តនីតិវិធីសាកសួរអស់រយៈពេលមួយសប្ដាហ៍ ពេលនេះអាជ្ញាធរកម្ពុជា បានសម្រេចបណ្ដេញជនជាតិថៃ ចំនួន ១១៩នាក់ ឱ្យត្រឡប់ទៅវិញហើយ។
សេចក្ដីប្រកាសព័ត៌មានរបស់ក្រសួងមហាផ្ទៃ នៅថ្ងៃទី១ ខែមីនា ឱ្យដឹងថា អគ្គនាយក នៃអគ្គនាយកដ្ឋានអន្តោប្រវេសន៍ បានបណ្ដេញជនជាតិថៃចំនួន ១១៩នាក់ ក្នុងនោះមានស្រី ៥៨នាក់ ចេញពីប្រទេសកម្ពុជា តាមច្រកទ្វារព្រំដែនអន្តរជាតិប៉ោយប៉ែត បន្ទាប់ពីពួកគេបានលួចចូលធ្វើការងារ និងស្នាក់នៅ ខុសច្បាប់ក្នុងប្រទេសកម្ពុជា។
នៅក្នុងនីតិវិធីបញ្ជូនខ្លួនជនជាតិថៃទាំង ១១៩នាក់នេះ មានការចូលរួមពីមន្រ្តីពាក់ព័ន្ធរបស់កម្ពុជា និងថៃ។ ជនជាតិថៃទាំង ១១៩នាក់នេះ ត្រូវអាជ្ញាធរថៃបញ្ជូនទៅកាន់មជ្ឈមណ្ឌលត្រួតពិនិត្យ «ការបញ្ជូនថ្នាក់ជាតិ (National Referral Mechanism)» នៅខេត្តស្រះកែវ ដើម្បីត្រួតពិនិត្យរាងកាយ និងសុខភាព មុននឹងបញ្ជូនទៅឱ្យមន្ត្រីជំនាញបន្តនីតិវិធីស៊ើបសួរ ដើម្បីកំណត់អត្តសញ្ញាណជនរងគ្រោះ ដែលត្រូវគេឆបោក និងទទួលការធ្វើទារុណកម្ម និងប្រតិបត្តិករ ដែលស្ម័គ្រចិត្តធ្វើការងារឆបោកដើម្បីទទួលបានផលប្រយោជន៍។
Opens in new windowទោះជាយ៉ាងណាក៏ដោយ តាមលទ្ធផលបឋមរបស់ប៉ូលិសប្រឆាំងឧក្រិដ្ឋកម្មបច្ចេកវិទ្យារបស់ថៃ រកឃើញថា ក្នុងចំណោមជនជាតិថៃទាំង ១១៩នាក់នេះ មាន ៨នាក់មានដីកាចាប់ខ្លួនពីតុលាការថៃ ខណៈ ១០នាក់ទៀតជាប់ពាក់ព័ន្ធនឹងឧក្រិដ្ឋកម្មឆបោកតាមអ៊ីនធឺណិត ចំនួន ៤៦ករណី។
ជនជាតិថៃ (Thai) ចំនួន ១១៩នាក់នេះ ត្រូវបានអាជ្ញាធរកម្ពុជាចាប់ខ្លួនជាមួយជនបរទេសផ្សេងទៀត សរុបចំនួន ២៣០នាក់ នៅក្នុងប្រតិបត្តិការចុះបង្ក្រាបទីតាំងឆបោកតាមអនឡាញចំនួន ២ទីតាំង ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ដែលចំណាយពេល ២ថ្ងៃ គឺនៅថ្ងៃទី២២ និង២៣ ខែកុម្ភៈ ខណៈពួកគេកំពុងសំងំធ្វើប្រតិបត្តិការឆបោកតាមអនឡាញខុសច្បាប់ ដោយមានមេខ្លោងជាជនជាតិចិនស្ថិតក្នុងស្ថានភាពរស់នៅធម្មតា។ អាជ្ញាធររកឃើញថា ជនបរទេសទាំងនោះ បានធ្វើដំណើរចូលមក កម្ពុជា មានទាំងស្របច្បាប់ និងខុសច្បាប់ ក្នុងគោលបំណងរកការងារ ដែលមានចំណូលខ្ពស់ ដោយសកម្មភាពទាំងនេះពាក់ព័ន្ធនឹងប្រតិបត្តិការអនឡាញខុសច្បាប់។
វិទ្យុអាស៊ីសេរី មិនអាចទាក់ទងអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ លោក សុខ វាសនា និងអ្នកនាំពាក្យរង នៃក្រសួងមហាផ្ទៃ លោក ទូច សុឃៈ ដើម្បីសាកសួរអំពីនីតិវិធី ចំពោះជនបរទេសផ្សេងទៀត បាននោះទេ នៅថ្ងៃទី១ ខែមីនា។
អនុប្រធានអចិន្ត្រៃយ៍ នៃគណៈកម្មាធិការជាតិ ប្រយុទ្ធប្រឆាំងនឹងអំពើជួញដូរមនុស្ស អ្នកស្រី ជូ ប៊ុនអេង ធ្លាប់វិទ្យុអាស៊ីសេរី ថា កន្លងមកអាជ្ញាធរ បានសហការគ្នាជាមួយប្រទេសជិតខាង និងបានបង្ក្រាបឧក្រិដ្ឋកម្មឆបោកតាមអនឡាញ និងជួញដូរមនុស្ស បានរាប់ពាន់ករណីមកហើយ ក៏ប៉ុន្តែកម្ពុជាគ្មានបំណងផ្សព្វផ្សាយករណីទាំងនោះឡើយ ដោយសារកម្ពុជាចង់រក្សាទំនាក់ទំនងផ្នែកការទូត និងបង្កើនកិច្ចសហប្រតិបត្តិការជាមួយប្រទេសជាដៃគូ។
ជុំវិញរឿងនេះ អ្នកគ្រប់គ្រងប្រចាំការិយាល័យអង្គការលីកាដូ (LICADHO) នៅខេត្តបន្ទាយមានជ័យ លោក អ៊ិន គង់ជិត សាទរចំពោះអាជ្ញាធរកម្ពុជា ដែលមានស្នាដៃបង្ក្រាបឧក្រិដ្ឋកម្មឆបោកតាមអ៊ីនធឺណិត និងបណ្ដេញជនសង្ស័យទៅវិញ។ ក៏ប៉ុន្តែ លោក អ៊ិន គង់ជិត លើកឡើងថា លទ្ធផលនេះ មិនមានលក្ខណៈធំដុំនោះឡើយ បើប្រៀបធៀបទៅនឹងការចង្អុលបង្ហាញរបស់ប្រទេសជិតខាង ពីទីតាំងឆបោកធំៗជាច្រើនកន្លែង ខណៈអាជ្ញាធរ មិនទាន់ចាប់ខ្លួនមេខ្លោងឧក្រិដ្ឋជន បាននៅឡើយ។
លោក អ៊ិន គង់ជិត៖«បើសិនជាយើង ចាប់បញ្ជូនទៅវិញ ហើយមិនបានចាប់មេខ្លោង ឬក៏ម្ចាស់ទីតាំងយកទៅផ្ដន្ទាទោសតាមច្បាប់ វានៅតែអត់បាត់ដដែល ហើយសកម្មភាពទាំងនោះគ្រាន់តែផ្អាកមួយរយៈហ្នឹងឯង។ តើពួកគេបានចូលមកស្រុកខ្មែរតាមច្រកណា ខណៈមានមន្ត្រីអន្តោប្រវេសន៍ បានត្រួតពិនិត្យយ៉ាងតឹងរ៉ឹងចំពោះជនបរទេសទាំងឡាយ ដែលចូលមកប្រទេសកម្ពុជា ប្រកបមុខរបរ»។
ពាក់ព័ន្ធនឹងករណីឆបោកតាមអនឡាញនេះដែរ នៅច្រកព្រំដែន ឆងចម (Chongchom) ខេត្តសុរិន្ទ (Surin) ជាប់ច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ អាជ្ញាធរថៃ បានបើកប្រតិបត្តិការរឹតបន្តឹងការចេញចូល ដើម្បីទប់ស្កាត់ឧក្រិដ្ឋកម្មឆបោកតាមអនឡាញ។ ការរឹតបន្តឹងនេះ ធ្វើឡើងបន្ទាប់ពីអាជ្ញាធរថៃរកឃើញថា ក្រុមឧក្រិដ្ឋជនឆបោកនៅតំបន់ព្រំដែនប្រទេសមីយ៉ាន់ម៉ា (Myanmar) និងក្រុងប៉ោយប៉ែត បានប្ដូរទីតាំងទៅកាន់កាស៊ីណូអូរស្មាច់ (O'Smach Resort and Casino) ជាបន្តបន្ទាប់ ខណៈកាស៊ីណូនេះ កំពុងសាងសង់អាគារជាច្រើនកន្លែងបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។