ពលករ និងជនភៀសខ្លួនខ្មែរនៅប្រទេសថៃនាំគ្នាធ្វើបុណ្យកាន់បិណ្ឌឧទ្ទិសកុសលជូនបុព្វការី
2024.09.23
ទិដ្ឋភាពពលករខ្មែរ និងជនភៀសខ្លួនខ្មែរនៅប្រទេសថៃ រួមគ្នាប្រារព្វពិធីបុណ្យកាន់បិណ្ឌ នៅវត្តក្នុងទីក្រុងបាងកក កាលពីថ្ងៃទី២២ កញ្ញា ២០២៤។
រូប៖ ពលរដ្ឋផ្ដល់ឱ្យ
ពលករ និងជនភៀសខ្លួនខ្មែរនៅប្រទេសថៃ នៅថ្ងៃកាន់បិណ្ឌទី៥នេះ ប្រារព្ធពិធីបុណ្យភ្ជុំបិណ្ឌដើម្បីឧទ្ទិសកុសលដល់បុព្វការីជន និងបង្ហាញសាមគ្គីភាព។
ក្រុមពលករខ្មែរ និងជនភៀសខ្លួនបក្សប្រឆាំង និងជនភៀសខ្លួនខ្មែរក្រោមរាប់រយនាក់នៅថ្ងៃទី២២ ខែកញ្ញា បានជួបជុំគ្នាប្រារព្ធពិធីបុណ្យកាន់បិណ្ឌ និងភ្ជុំបិណ្ឌនៅតាមបណ្តាវត្តអារាមមួយចំនួនក្នុងទីក្រុងបាងកក (Bangkok) ខេត្តឈុនបុរី (Chon Buri) ខេត្តសាមុតប្រាកាន (Samut Prakan) និងខេត្តមួយចំនួនទៀត។
ទិដ្ឋភាពទូទៅក្នុងពិធីកាន់បិណ្ឌទី៥ ឬហៅថាវេនទី៥ នៅចំថ្ងៃអាទិត្យ ដែលជាថ្ងៃឈប់សម្រាកនេះ គឺពលរដ្ឋខ្មែរទាំងក្មេងចាស់ច្រើនកុះករ ស្លៀកសម្លៀកបំពាក់ប្រពៃណីចម្រុះពណ៌ ដៃកាន់ ចានស្រាក់ដាក់ម្អូបដែលសម្រិតសម្រាងផ្ទាល់ដៃ រាប់បាត្រឧទ្ទិសកុសលជូនជីដូនជីតា និងបុព្វការីជន។
តំណាងពលករ និងជាអ្នកផ្ដួចផ្ដើមរៀបចំកម្មវិធីបុណ្យលោក សុះ សល់ ប្រាប់វិទ្យុអាស៊ីសេរីថាពលករនៅតំបន់ជ័យព្រឹក ក្នុងខេត្តឈុនបុរី (Chon Buri) បានមូលមតិគ្នានិមន្តព្រះសង្ឃខ្មែរគង់នៅប្រទេសថៃ១០អង្គ សូត្រមន្តបង្សុកូលក្នុងកម្មពិធីបុណ្យភ្ជុំបិណ្ឌឆ្នាំនេះទៅតាមទំនៀមទំលាប់ដូនតាខ្មែរ។ លោកឱ្យដឹងថា ការរៀបចំពិធីបុណ្យនេះឡើងក្នុងគោលបំណងឲ្យពលរដ្ឋខ្មែរធ្វើការនៅទីនោះដែលមិនមានលទ្ធភាពទៅចូលរួមពិធីបុណ្យជួបជុំគ្រួសារនៅស្រុកកំណើតមានឱកាសជួបជុំធ្វើបុណ្យបួងសួងឧទ្ទិសកុសលរួមគ្នា។
លោក សុះ សល់៖ «ពិធីបុណ្យភ្ជុំបិណ្ឌនេះ ពួកគាត់ប្រកាន់ខ្ជាប់ខ្ជួនតាមអ្វីដែលគាត់ធ្វើនៅប្រទេសកម្ពុជា គឺគាត់នៅថៃនេះធ្វើដូចគ្នាមិនឱ្យខុសទេ អ្វីដែលពួកគាត់យកចង្ហាន់ប្រគេនព្រះសង្ឃឧទ្ទិសដល់ជីដូនជីតា ឬឪពុកម្តាយដែលបានស្លាប់ទៅហ្នឹង។ ពួកគាត់សប្បាយរីករាយចង់ស្រក់ទឹកភ្នែកហើយ»។
ស្រដៀងគ្នានេះដែរ តំណងពលករ និងជាអ្នករៀបចំកម្មវិធីបុណ្យម្នាក់ទៀតនៅខេត្តសាមុតប្រាកាន លោក ង៉ា រឿន ប្រាប់ថាពិធីបុណ្យភ្ជុំបិណ្ឌឆ្នាំនេះពលករខ្មែរនៅតំបន់លោកធ្វើការប្រមាណ១០០នាក់ ក៏បានធ្វើចង្ហាន់យកទៅប្រគេនព្រះសង្ឃនៅវត្តក្នុងទឹកមុខរីករាយដើម្បីបួងសួងសុំសេចក្ដីសុខ រំលឹកដឹងគុណ និងឧទ្ទិសកុសលដល់បុព្វការីជនទាំងឡាយដែលស្លាប់បាត់បង់ជីវិតដូចពលរដ្ឋខ្មែរកន្លែងផ្សេងដែរ។ លោកបញ្ជាក់ថា ពលករខ្មែរធ្វើការនៅទីនោះមិនដែលភ្លេចអត្តសញ្ញាណប្រពៃណី ទំនៀមទំលាប់ទេ ទោះជាពួកគាត់ចាកចេញពីស្រុកកំណើតមកធ្វើការនៅប្រទេសថៃក៏ដោយ។ ប៉ុន្តែលោក ង៉ា រឿន ឱ្យដឹងថាពួកលោកភាគច្រើននឹងមិនត្រឡប់ទៅស្រុកកំណើតក្នុងឱកាសភ្ជុំបិណ្ឌនៅពេលខាងមុខទេ ដោយសារបញ្ហាប្រាក់ចំណូល និងជីវភាពគ្រួសារប្រាំថ្ងៃ។
លោក ង៉ា រឿន៖ «ពួកគាត់មកនេះនាំមកនូវទេយ្យទានមានបាយ ម្ហូបអាហារ និងអាមិសទានគឺបច្ច័យ គាត់បានចូលរួមដើម្បីបង្សុកូលឧទ្ទិសដល់ញាតិកា៧សន្តាន ដែលបានចែកឋានទៅកាន់លោកខាងមុខ។ ទឹកមុខរបស់បងប្អូនពលករខ្មែរយើងគឺមានស្នាមញញឹម រីករាយ ត្រេកអរក្នុងការធ្វើបុណ្យទានដោយសារពួកគាត់មិនបានវិលត្រឡប់ទៅស្រុកកំណើតវិញ»។
របាយការណ៍របស់ក្រសួងការងារកម្ពុជា ឱ្យដឹងថា បច្ចុប្បន្នមានពលករខ្មែរជាង ១លាន ២សែននាក់ ធ្វើការនៅប្រទេសថៃ។ ប៉ុន្តែរបាយការណ៍របស់អង្គការសង់ត្រាល់ បង្ហាញថាមានពលករខ្មែរ ធ្វើការដោយស្របច្បាប់ និងមិនស្របច្បាប់នៅប្រទេសថៃ ជាង២លាននាក់ ដោយមួយចំនួនពួកគាត់ទទួលរងការរំលោភបំពានសិទ្ធិការងារ និងបាត់បង់ផលប្រយោជន៍ដែលប៉ះពាល់ដល់បញ្ហាផ្នែកសេដ្ឋកិច្ចគ្រួសារ។
ចំណែកសកម្មជនបក្សប្រឆាំង និងជនភៀសខ្មែរក្រោមដែលបង្ខំចិត្តនិរទេសខ្លួននៅក្រៅប្រទេស ដើម្បីគេចពីការធ្វើទុក្ខបុកម្នេញ និងតាមចាប់ខ្លួនរបស់អាជ្ញាធរកម្ពុជា និងវៀតណាម ប្រមាណ៣០០នាក់ ក៏បានរៀបចំពិធីបុណ្យភ្ជុំបិណ្ឌ និងសែនដូនតា នៅវត្តប្រាយួនធម្មារាម ខេត្តបាធុមថានី (Pathumthani) ជាប់ទីក្រុងបាងកកដែរ។
តំណាងជនភៀសខ្លួនខ្មែរកម្ពុជាក្រោមលោក លី ឈួន ប្រាប់វិទ្យុអាស៊ីសេរីថា ពលរដ្ឋខ្មែរក្រោម និងសកម្មជននយោបាយដែលកំពុងភៀសខ្លួន និងធ្វើការក្នុងប្រទេសថៃ ពួកគាត់តែងតែរំលឹកពិធីបុណ្យនេះជារៀងរាល់ឆ្នាំ ដើម្បីឧទ្ទិសបុណ្យកុសលដល់ជីដូនជីតា ជាពិសេសដើម្បីបង្ហាញពីទំនៀមទម្លាប់ប្រពៃណីខ្មែរ។ លោក លី ឈួន ប្រាប់ថា លោកសប្បាយរីករាយពេលឃើញពលរដ្ឋខ្មែរចេះរួបរួមសាមគ្គីគ្នា ជាពិសេសឱកាសបុណ្យទាននេះតែម្តង។
លោក លី ឈួន៖ «មានជនភៀសខ្លួនខ្មែរក្រោម ជនភៀសខ្លួននៅទីនេះរួមគ្នាធ្វើនៅវត្តប្រាយួនធម្មារាម ដើម្បីរំលឹកប្រពៃណីដូនតាផង ឧទ្ទិសកុសលបុព្វការីជនផងបាទ។ ប្រពៃណីភ្ជុំបិណ្ឌ ឬសែនដូនតានេះ ជាប្រពៃណីរបស់ខ្មែរយើងមិនអាចចោលបានទេ បើទោះបីទៅដល់ទីណាក៏ដោយ ខ្មែរមិនបោះបង់ទេ ដើម្បីថែរក្សាអត្តសញ្ញាណរបស់ខ្លួនថា យើងជាខ្មែរ ទោះអត់ឃ្លានទុក្ខលំបាកយ៉ាងណាធ្វើដែរ»។
ជាមួយគ្នានេះដែរ ជនភៀសខ្លួននយោបាយកញ្ញា ស៊ុន សុភា ដែលចូលរួមពិធីភ្ជុំបិណ្ឌជាមួយជនភៀសខ្លួនខ្មែរកម្ពុជាក្រោមបានរៀបរាប់ថា កញ្ញានឹករលឹកគ្រួសារជាខ្លាំង ដែលមិនអាចវិលចូលប្រទេសកម្ពុជា ខណៈបងប្រុសបង្កើតគឺលោក ស៊ុន ពិសិដ្ឋ ត្រូវជាប់ពន្ធនាការទាំងអយុត្តិធម៌។ កញ្ញាឱ្យដឹងថា រដូវបុណ្យភ្ជុំបិណ្ឌនេះ ជនភៀសខ្លួនមិនសូវចេញពីបន្ទប់ជួលទៅធ្វើបុណ្យដូចឆ្នាំមុនៗទេ ដោយសារខ្លាចអាជ្ញាធរថៃចាប់ខ្លួន។ កញ្ញាស្នើឲ្យរដ្ឋាភិបាលកម្ពុជាបញ្ឈប់ការធ្វើទុក្ខបុកម្នេញលើអ្នកដែលមាននិន្នាការផ្ទុយ និងបើកឱកាសឱ្យវិលត្រឡប់ទៅរស់នៅជួបជុំក្រុមគ្រួសារវិញ។
កញ្ញា ស៊ុន សុភា៖ «ជនភៀសខ្លួនសម្រាប់អ្នកនយោបាយផ្ទាល់ពួកគាត់ចង់ធ្វើកម្មវិធីបុណ្យភ្ជុំបិណ្ឌ ជួបជុំដូចគ្នា ប៉ុន្តែយើងអត់មានសុវត្ថិភាពទាក់ទងការគំរាមកំហែងពីសំណាក់ស្ថានទូតខ្មែរនៅប្រទេសថៃ អ៊ីចឹងយើងចូលរួមកម្មវិធីរៀងៗខ្លួននៅកន្លែងណាដែលមានពលរដ្ឋខ្មែររៀបចំកម្មវិធីបុណ្យឡើង»។
ដោយឡែក ស្ថានទូតខ្មែរប្រចាំប្រទេសថៃ ក្រុមឧកញ៉ាវិញ បានរៀបចំពិធីបុណ្យកាន់បិណ្ឌ និងភ្ជុំបិណ្ឌដែលត្រូវនឹងបិណ្ឌទី៥ នៅតាមវត្តមួយចំនួននៅខេត្តសាមុតប្រាកាន និងខេត្តបធុមថានីដែលមានពលរដ្ឋខ្មែរចូលរួមរាប់ពាន់នាក់។
វិទ្យុអាស៊ីសេរីមិនអាចទាក់ទងមន្ត្រីអនុព័ន្ធការងារអមស្ថានទូតកម្ពុជាប្រចាំប្រទេសថៃលោក ឈឹម វិបុល ដើម្បីបញ្ជាក់ជុំវិញរឿងនេះបានទេ នៅថ្ងៃទី២២ ខែកញ្ញា។
ពិធីកាន់បិណ្ឌមានរយៈពេល ១៥ថ្ងៃ ចាប់ពីថ្ងៃទី១៧ ខែកញ្ញា ដល់ថ្ងៃទី២ ខែតុលា ជាថ្ងៃបុណ្យភ្ជុំធំ ទៅតាមទំនៀមទម្លាប់របស់ពលរដ្ឋខ្មែរ និងកាលកំណត់ជាទៀងទាត់ពីបុរាណមក។ បុណ្យនេះធ្វើឡើងដើម្បីឧទ្ទិសកុសលដល់វិញ្ញាណក្ខន្ធនៃអ្នកមានគុណទាំងឡាយ ដែលបានលាចាកលោកនេះ ទៅកាន់លោកខាងមុខ។ ម្យ៉ាងទៀត វាជាឱកាសល្អសម្រាប់ការជួបជុំក្រុមគ្រួសារដែលមានជីវិតអាចឈ្វេងយល់អំពីសុខទុក្ខ ការគោរពស្រឡាញ់គ្នា ការដឹងគុណ ព្រមទាំងបង្កើននូវសាមគ្គីភាពថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
