ប្រធានសហជីពសេរីកម្មករ ដែលទទួលភារកិច្ចបន្តពីបងប្រុសរបស់ខ្លួន គឺលោក ជា មុនី និយាយថា បើទោះជារូបសំណាករបស់លោក ជា វិជ្ជា ត្រូវបានរដ្ឋាភិបាលបើកភ្លើងខៀវអនុញ្ញាតឲ្យសាងសង់ទៅតាមការទាមទាររបស់ក្រុមគ្រួសារ និងសហជីពក្ដី តែថាការទទួលបានយុត្តិធម៌ដ៏ពិតប្រាកដពីអំពើឃាតកម្មនេះ នៅមិនទាន់បានឆ្លើយតបនៅឡើយទេ។
ការថ្លែងរបស់លោក ជា មុនី នៅថ្ងៃទី៣ ឧសភា ធ្វើឡើងបន្ទាប់ពីរូបសំណាករបស់អតីតប្រធានសហជីពសេរីកម្មករដ៏ល្បីល្បាញ ធ្វើអំពីថ្មភក់ដោយមានជើងទម្រមួយម៉ែត្រ និងកម្ពស់ ១,៦៨ម៉ែត្រ ត្រូវបានសម្ពោធជាផ្លូវការ។ រូបសំណាកនេះ ត្រូវតម្កល់លើសួនច្បារប៉ែកខាងលិចវិមានឯករាជ្យ ជិតតូបលក់កាសែតជាប់របងវត្តលង្កា មុខបែរទៅទិសខាងលិច អមដោយដៃស្ដាប់លើកឡើងលើ ដៃឆ្វេងកាន់ក្បាលមីក្រូហ្វូន។ បន្ថែមលើនេះ ជើងទម្រដែលកម្ពស់មួយម៉ែត្រ មានឆ្លាក់រចនាបថជារូបដង្ហែសពរបស់លោក ជា វិជ្ជា និងមួយផ្នែកទៀតពីខាងមុខ លោក ជា វិជ្ជា ឈរដោយមានកម្មករអមសងខាង។
លោក ជា មុនី ដែលបន្តវេនមរតកពីបងប្រុសរបស់ខ្លួន និយាយថា លោកសាទរចំពោះការសម្រេចរបស់រដ្ឋាភិបាល ដែលផ្ដល់លុយ ៥ពាន់ដុល្លារ តាមរយៈសាលារាជធានីភ្នំពេញ និងទីតាំងសម្រាប់តម្កល់រូបសំណាកនេះ។ ទោះយ៉ាងនេះក្ដី លោកគិតថា នេះពុំមែនជាមធ្យោបាយដែលជាផ្នែកមួយក្នុងការផ្ដល់យុត្តិធម៌ដល់ក្រុមគ្រួសារលោកនៅឡើយទេ ដរាបណាឃាតកពិតប្រាកដនៅមិនទាន់ត្រូវបានវែកមុខនោះ។
លោក ជា មុនី នៅតែបន្តទាមទារឲ្យតុលាការដោះលែងលោក ប៊ន សំណាង និងលោក សុខ សំអឿន ដែលគេជឿថាជាឃាតកសិប្បនិមិត្ត មានសេរីភាពឡើងវិញ និងបន្តស្វែងរកអ្នកនៅពីក្រោយខ្នង ព្រមទាំងឃាតកពិត ដើម្បីផ្ដន្ទាទោសតាមផ្លូវច្បាប់៖ «រូបខ្ញុំដែលជាប្អូនដែលជាសាច់សាលោហិត នៅពេលដែលបាត់បង់មនុស្សម្នាក់ ហើយដែលមនុស្សហ្នឹងមិនមានកំហុសអ្វីទៅក្បត់ជាតិ ទៅធ្វើអី ហើយត្រូវបានគេបាញ់សម្លាប់។ អ៊ីចឹងហើយ ឃាតកអត់ទាន់ចាប់បាន អ៊ីចឹងក្នុងនាមខ្ញុំជាប្អូន ហើយជាៗអ្នកយល់ដឹងមួយ។ ខ្ញុំតែងតែគិតថា ជនដៃដល់ អ្នកណាជាអ្នកដៃដល់ ហើយអ្នកណាគេដែលជាអ្នកនៅពីក្រោយខ្នងជាអ្នកសម្លាប់»។
ក្រៅពីមានពិធីប្រោះព្រំ និងសូត្រមន្តបង្សុកូលចំនួន ៤៨អង្គ ក្នុងនោះក៏មានក្រុមសហជីពកម្មករប្រមាណ ១០០នាក់ ចូលរួមដែរ នៅព្រឹកថ្ងៃទី៣ ឧសភា ដែលជាពិធីសម្ពោធជាផ្លូវការរូបសំណាករបស់លោក ជា វិជ្ជា នេះ។
លោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ក្រសួងមហាផ្ទៃ បានបិទបញ្ចប់ការស៊ើបអង្កេតលើសំណុំរឿងរបស់ខ្លួនក្នុងករណីលោក ជា វិជ្ជា នេះរួចរាល់ហើយ ក្រោយពីមានសេចក្ដីសម្រេចរបស់តុលាការទៅលើលោក ប៊ន សំណាង និងលោក សុខ សំអឿន មកម្ល៉េះ។ លោកបញ្ជាក់ថា បើសិនតម្រូវឲ្យមានការស៊ើបអង្កេតជាថ្មីឡើងវិញ លុះត្រាណាមានគោលការណ៍ពីតុលាការម្តងទៀត៖ «សមត្ថកិច្ចយើងមានអីទៀត បើតុលាការលោកទទួលយកអាដែងនែកការស៊ើបអង្កេតរបស់ក្រសួងហើយបាទ។ មានចៅក្រមស៊ើបសួរមានស្អីៗ លោកដាក់បន្ទុកផ្លូវច្បាប់ហើយបាទ។ លើកលែងតែមានការណែនាំអីពីតុលាការថ្មី អាហ្នឹងថាទេ អាហ្នឹងមិនត្រូវទេ ក្រសួងធ្វើទៀត»។
លោក ជា វិជ្ជា អតីតប្រធានសហជីពសេរីកម្មករ ត្រូវឃាតកមិនស្គាល់មុខបាញ់សម្លាប់ ខណៈលោកកំពុងអានកាសែតនៅក្បែររបងវត្តលង្កា កាលពីព្រឹកថ្ងៃទី២២ មករា ឆ្នាំ២០០៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។