ប្រជាពលរដ្ឋ និងមន្ត្រីសង្គមស៊ីវិលរិះគន់អាជ្ញាធរខេត្តព្រះសីហនុថា ព្យាយាមបិទបាំងព័ត៌មានលើមន្ត្រីយោធាម្នាក់រងការចោទប្រកាន់ថា បានជួយអន្តរាគមន៍លើជនជាតិចិន និងជនជាតិវៀតណាមសរុប ១២នាក់ ឱ្យរួចផុតពីសំណាញ់ច្បាប់ក្រោយពួកគេជាប់សង្ស័យបទល្មើសគ្រឿងញៀន។ ពលរដ្ឋ និងសង្គមស៊ីវិលលើកឡើងថា ការណ៍ដែលសមត្ថកិច្ចចាប់បានជនល្មើស ឬឧក្រិដ្ឋជនគ្មានការអនុវត្តច្បាប់ត្រឹមត្រូវនោះ គឺជារឿងគួរឱ្យព្រួយបារម្ភសម្រាប់ប្រជាជាតិខ្មែរ ខណៈអ្នកអនុវត្តច្បាប់មួយចំនួនប្រព្រឹត្តអំពើពុករលួយជាប្រព័ន្ធ។
ប្រជាពលរដ្ឋ និងមន្ត្រីសង្គមស៊ីវិល ស្នើដល់អាជ្ញាធរខេត្តព្រះសីហនុ និងស្ថាប័នតុលាការខេត្តនេះបង្ហាញតម្លាភាព និងព័ត៌មានឱ្យបានទូលំទូលាយ និងស៊ើបអង្កេតមន្ត្រីយោធាម្នាក់ដែលរងការចោទប្រកាន់ថា បានជួយអន្តរាគមន៍ជនជាតិចិន ៧នាក់ និងវៀតណាម ៥នាក់ក្រោយសមត្ថកិច្ចបានចាប់ខ្លួនពួកគេកាលពីថ្ងៃទី១០ ខែមេសា ពាក់ព័ន្ធការជួញដូរគ្រឿងញៀន។
ពលរដ្ឋម្នាក់រស់នៅក្រុងព្រះសីហនុ លោក សម សុផាត លើកឡើងថា ប្រសិនបើមន្ត្រីយោធារូបនោះអន្តរាគមន៍ជនល្មើសឱ្យរួចផុតពីផ្លូវច្បាប់ដោយគ្មានការបកស្រាយហេតុផលសមស្របណាមួយ ហើយអាជ្ញាធរនៅតែបន្តបិទបាំងព័ត៌មានទាំងនេះ គឺបង្ហាញឱ្យថា កម្ពុជាគ្មានទេការអនុវត្តច្បាប់ ប៉ុន្តែសម្បូរដោយជនអ្នកមានអំណាចប្រព្រឹត្តអំពើពុករលួយ។ លោក ព្រួយបារម្ភថា ការណ៍ដែលមានមន្ត្រីអាជ្ញាធរ ឬអ្នកមានអំណាចណាម្នាក់ចេញមុខជួយអន្តរាគមន៍ឱ្យជនល្មើស ឬឧក្រិដ្ឋជនឱ្យរួចទោស នោះសង្គមកម្ពុជានឹងកាន់តែអសន្តិសុខ និងហាក់លើកទឹកចិត្តដល់ជនដែលធ្លាប់ប្រព្រឹត្តបទល្មើសបន្តសកម្មភាពខុសច្បាប់នៅកម្ពុជា។
លោក សម សុផាត៖« ជនដែលប្រព្រឹត្តខុស តុលាការក៏ទទួលដឹងឮ អ៊ីចឹងជនដែលធ្វើឱ្យមានបញ្ហាហ្នឹងត្រូវទទួលខុសត្រូវចំពោះមុខច្បាប់ បើមានការអន្តរាគមន៍ចំពោះការលើកលែងណាមួយ វាធ្វើឱ្យច្បាប់យើងអត់មានប្រសិទ្ធភាពសម្រាប់ខ្មែរយើង។ បើកាលណាមានជនបរទេស ដែលប្រព្រឹត្តបទល្មើស ហើយអត់ដាក់ទោសទណ្ឌ ជនដែលប្រព្រឹត្តបទល្មើសហ្នឹង គាត់នឹងបន្តធ្វើទៀត គេអត់ខ្លាចសមត្ថកិច្ចទេ ហើយក៏អត់ខ្លាចច្បាប់ស្រុកខ្មែរដែរ »។
ជុំវិញរឿងនេះ អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា ការណ៍ដែលអាជ្ញាធរពុំបានបង្ហាញព័ត៌មានឱ្យទូលំទូលាយ និងស៊ីជម្រៅលើករណីមន្ត្រីយោធាម្នាក់ជួយអន្តរាគមន៍ដោះលែងជនសង្ស័យទាំង ១២នាក់ដែលជាប់ពាក់ព័ន្ធគ្រឿងញៀន នោះមហាជននឹងមានមន្ទិលថា ជនប្រព្រឹត្តគ្មានការទទួលទោសដោយសារតែអ្នកអនុវត្តច្បាប់ទទួលសំណូក។ អ្នកស្រីពន្យល់ថា បើទោះបីមានអ្នកធានាជនសង្ស័យ ហើយសមត្ថកិច្ចពុំមានភស្តុតាងសម្រាប់ដាក់បន្ទុកក្ដី សមត្ថកិច្ច ឬអ្នកធានាត្រូវបកស្រាយឱ្យបានច្បាស់លាស់ និងមានការធ្វើលិខិតកិច្ចសន្យានានា រួមទាំងបង្ហាញព័ត៌មានឱ្យបានទូលំទូលាយ។
អ្នកស្រី ជៀប សុធារី៖ « សូមឱ្យមានការពង្រឹងការអនុវត្ត ព្រោះពួកគាត់ជាជនបរទេស។ ក្នុងប្រទេសកម្ពុជាជនទាំងឡាយណាចូលមករកស៊ី ឬស្នាក់នៅក្នុងប្រទេសកម្ពុជាត្រូវតែស្ថិតក្រោមច្បាប់កម្ពុជាទាំងអស់។ ខ្ញុំព្រួយបារម្ភ គួរណាតែរឹតបន្តឹងទោះបីជាជនបរទេសក៏ដោយ ខ្មែរក៏ដោយសូមឱ្យមានវិធានការឱ្យបានតឹងរ៉ឹងជាទីបំផុត គ្រឿងញៀនវាប៉ះពាល់សេដ្ឋកិច្ច ជីវភាពគ្រួសារ សេចក្ដីសុខសុភមង្គលក្នុងគ្រួសារ »។
ប្រតិកម្មរបស់ពលរដ្ឋ និងមន្ត្រីសង្គមស៊ីវិលនេះ ធ្វើឡើងមន្ត្រីយោធាម្នាក់ រងការចោទប្រកាន់ថា បានជួយអន្តរាគមន៍លើជនសង្ស័យជនជាតិចិន និងវៀតណាមសរុប ១២នាក់។ កាលពីថ្ងៃទី១០ ខែមេសា កន្លងទៅ ក្រុមកម្លាំងកងរាជអាវុធហត្ថខេត្តព្រះសីហនុ បង្ក្រាបបានជនជាតិចិនជនសង្ស័យចំនួន ៧នាក់ និងវៀតណាមចំនួន ៥នាក់ ក្នុងកាស៊ីណូ គ័ងហ្វា កាឡាក់ស៊ី (Kung Fu Galaxy) ស្ថិតទល់មុខសាលាកម្មករ ក្នុងក្រុងព្រះសីហនុ និងរឹបអូសបានគ្រឿងញៀនជាង ១គីឡូក្រាម ថ្នាំជាប្រភេទគ្រាប់ពណ៌លឿង ពណ៌ផ្កាឈូក (WY) ជិត ១ពាន់គ្រាប់ រួមទាំងគ្រឿងញៀនជាប្រភេទម្សៅច្រើនកញ្ចប់។ ក្រោយមកទៀត មន្ត្រីសមត្ថកិច្ចម្នាក់ប្រាប់ក្រុមសារព័ត៌មានក្នុងស្រុកថា មន្ត្រីយោធាម្នាក់ឈ្មោះ ហុន ឆរ័ត្ន ហៅតេឡា ឬឡៅហ៊ុង ដែលជាអ្នកមើលការណ៍ខុសត្រូវក្នុងកាស៊ីណូ គ័ងហ្វា កាឡាក់ស៊ី អន្តរាគមន៍ដោះលែងជនសង្ស័យទាំង ១២នាក់។
វិទ្យុអាស៊ីសេរីបានព្យាយាមទាក់ទងមេបញ្ជាការកងរាជអាវុធហត្ថខេត្តព្រះសីហនុលោក ហេង ប៊ុនទី ស្នងការនគរបាលខេត្តព្រះសីហនុ លោក ជួន ណារិន្ទ និងអ្នកនាំពាក្យសាលាខេត្តនេះគឺ លោក ឃាង ភារម្យ ដើម្បីសាកសួរបន្ថែមអំពីរឿងនេះ ប៉ុន្តែពុំមានការឆ្លើយនោះទេនៅថ្ងៃទី១៤ ខែមេសា។
ចំណែក ព្រះរាជអាជ្ញារង និងអ្នកនាំពាក្យសាលាដំបូងខេត្តព្រះសីហនុ លោក ធុច បញ្ចសន្តិភាព ប្រាប់វិទ្យុអាស៊ីសេរីតាមបណ្ដាញសង្គមតេឡេក្រាម (Telegram) ថា ពុំមានមន្ត្រីយោធាឈ្មោះ ហុន ឆរ័ត្ន ជួយអន្តរាគមន៍លើជនសង្ស័យជនជាតិចិន និងវៀតណាមទាំង ១២នាក់នោះទេ។ ថ្វីបើអ្នកនាំពាក្យសាលាដំបូងរូបនេះអះអាងបែបនេះក្ដី ប៉ុន្តែលោក មិនបានបញ្ជាក់អំពីសវនាការលើជនសង្ស័យ និងបង្ហាញអំពីសាលក្រមសម្រេចរបស់តុលាការលើជនល្មើសទាំង ១២នាក់នោះទេ។
កម្ពុជាក្រោមការដឹកនាំដោយលោក ហ៊ុន សែន បន្តជាប់ឈ្មោះជាប្រទេសមានអំពើពុករលួយ និងគ្មាននីតិរដ្ឋត្រឹមត្រូវ ដោយសារតែអាជ្ញាធរ និងអ្នកអនុវត្តច្បាប់មួយចំនួនត្រូវបានទទួលលុយក្រោមតុពីជនល្មើស ដើម្បីជាថ្នូរដោះលែងពួកគេមានសេរីភាព។ ក្រៅពីនេះ ក្រុមអ្នកមានលុយ មានអំណាចមួយចំនួន បើទោះបីជាពួកគេប្រព្រឹត្តនូវបទឧក្រិដ្ឋ និងមានការសម្រេចពីតុលាការឱ្យពួកគេជាប់គុកតាមច្បាប់កំណត់ក្ដី លោក ហ៊ុន សែន ចេញមុខអន្តរាគមន៍ជួយឱ្យពួកគេរួចផុតទោសទណ្ឌដែរ។ ជាក់ស្ដែង លោក ហ៊ុន សែន ថ្មីៗនេះ បានអន្តរាគមន៍ស្នើទៅព្រះមហាក្សត្រ ដើម្បីផ្ដល់សេរីភាពលើកលែងទោសអតីតអភិបាលខេត្តតាកែវគឺលោក ឡាយ វណ្ណៈ ក្នុងរឿងក្ដីឃាតកម្មកាលពីឆ្នាំ២០១៨ ដែលកាលនោះតុលាការកំពូលសម្រេចឱ្យលោកជាប់គុក ១៣ ឆ្នាំពីបទ «ឃាតកម្ម» លើស្ត្រីកំណាន់ឈ្មោះ ចេវ សុវឌ្ឍនា។
អ្នកឃ្លាំមើលរិះគន់ថា ទង្វើរបស់មេដឹកនាំឯកបក្សនេះ គឺជាការជាន់ឈ្លីច្បាប់ និងធ្វើឱ្យច្បាប់នៅកម្ពុជាទន់ខ្សោយ ដោយសារតែបក្ខពួកនិយម និងជាទង្វើលើកទឹកចិត្តឱ្យឧក្រិដ្ឋជនបន្តប្រព្រឹត្តឧក្រិដ្ឋកម្មក្នុងសង្គមកម្ពុជាបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។