អតីតគ្រូបង្រៀន និងសង្គមស៊ីវិល ព្រួយបារម្ភចំពោះការជ្រើសរើសគ្រូបង្រៀន ដោយស្វ័យប្រវត្តិអាស្រ័យលើនិទ្ទេសល្អ និងលំដាប់ពិន្ទុ នៃការប្រឡង ។ ការព្រួយបារម្ភនេះ ក្រោយពីក្រសួងអប់រំ យុវជន និងកីឡា បានកំណត់យកសិស្សនិទ្ទេស A B C ចូលធ្វើជាគ្រូបង្រៀនដោយមិនឆ្លងកាត់ការប្រឡង។
អតីតគ្រូបង្រៀន និងមន្ត្រីសង្គមស៊ីវិល បារម្ភដល់ការជ្រើសរើសគ្រូគ្មានតម្លាភាព ដោយផ្ដល់អាទិភាព ចំពោះសិស្ស ដែលប្រឡងបានពិន្ទុខ្ពស់ ជាងការបើកឱកាស ឲ្យសិស្សទូទៅដាក់ពាក្យប្រឡងជ្រើសរើសជំនាញ និងមណ្ឌល ដោយស្មើភាពគ្នា ដើម្បីអាចឲ្យពួកគេបានបំពេញតួនាទីនៅមូលដ្ឋាន ដែលពួកគេរស់នៅ។
អតីតគ្រូបង្រៀននៅវិទ្យាល័យសេរីសោភ័ណខេត្តបន្ទាយមានជ័យ លោក ស៊ិន វុត្ថា ដែលត្រូវបានក្រសួងអប់រំ លុបឈ្មោះចេញពីក្របខណ្ឌគ្រូបង្រៀនកាលពីខែមិថុនាកន្លងទៅ បារម្ភថា ការជ្រើសរើសគ្រូបង្រៀននេះ អាចបង្កភាពងាយស្រួលប្រព្រឹត្តអំពើពុករលួយ ដល់អ្នកមានលុយ ដាក់ឈ្មោះកូនចៅ ដើម្បីបានក្របខណ្ឌរដ្ឋ ដែលអយុត្តិធម៌សម្រាប់សិស្សទូទៅ។ លោកស្នើដល់ក្រសួងអប់រំគួរតែរឹតបន្តឹងការជ្រើសរើសគ្រូបង្រៀននេះ ដោយគ្មានអំពើពុករលួយជាប្រព័ន្ធ។
លោក ស៊ិន វុត្ថា៖ «គឺខ្ញុំនិយាយនេះ គឺខ្ញុំមិនមែនរិះគន់ ដើម្បីបង្អាប់ឬបំបាក់ស្មារតីទេ គឺខ្ញុំចង់ទិតៀនឲ្យភ្ញាក់រឭកនៅក្នុងការអនុវត្តការងារ ព្រោះវាជាប្រព័ន្ធមួយ ដែលស្រោចស្រង់ជាតិមួយ បាទ ខ្លាចតែគេមិនចង់ស្រោចស្រង់»។
ការព្រួយបារម្ភនេះ គឺបន្ទាប់ពីសារព័ត៌មានស្និទ្ធនឹងរដ្ឋាភិបាលហ្វ្រេសញូវ (Fresh News)បានចុះផ្សាយកាលពីថ្ងៃទី៣០ សីហា ថា ការកំណត់កូតាជ្រើសរើសសិស្ស ដែលប្រឡងជាប់សញ្ញាបត្រមធ្យមសិក្សាទុតិយភូមិ ឬប្រឡងបាក់ឌុប បាននិទ្ទេស A B C ឲ្យចូលធ្វើជាគ្រូបង្រៀន។ ការកំណត់នេះ ត្រូវឆ្លងកាត់ការវាយតម្លៃ ដោយផ្អែកលើលំដាប់ពិន្ទុនៃការប្រឡង ហើយកូតាគ្រូបង្រៀន ដែលនៅសល់ ត្រូវឆ្លងកាត់ការប្រឡងជាធម្មតា ដែលដឹកនាំដោយក្រុមការងារថ្នាក់ជាតិ។ មួយវិញទៀតការផ្សព្វផ្សាយនេះ មិនបានបង្ហាញ ពីការកំណត់គោលដៅជ្រើសរើសគ្រូបង្រៀនទៅតំបន់ណានោះទេ ជាហេតុមានការព្រួយបារម្ភថា តំបន់ដាច់ស្រយាល នៅតែខ្វះគ្រូបង្រៀន។
វិទ្យុអាស៊ីសេរីពុំទាន់អាចទាក់ទងអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី៣១ សីហា។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បារម្ភដល់ការជ្រើសរើសគ្រូបង្រៀននេះ នឹងមិនអាចបំពេញតម្រូវការគ្រូនៅតាមមូលដ្ឋានដាច់ស្រយាលនោះទេ។ អ្នកស្រីបន្តថា ក្រសួងអប់រំគួរតែ ឲ្យសិស្សទាំងអស់ដាក់ពាក្យប្រឡងជ្រើសរើសមណ្ឌលបង្រៀន ដែលនៅមូលដ្ឋានជាអាទិភាព ដើម្បីអាចបំពេញតម្រូវការខ្វះខាតគ្រូបង្រៀននៅមូលដ្ឋាន។
អ្នកស្រី អ៊ុក ឆាយ៉ាវី៖ «ឧបមាគាត់ចង់វិស័យអប់រំហ្នឹងទាំងអស់ តើក្រសួងមានបានគិតទុកទេ ថាតើពួកគាត់ទៅជ្រើសរើសគ្រូហ្នឹងនៅតាមបណ្ដាលខេត្តណាខ្លះ បើសព្វថ្ងៃនេះនៅទីប្រជុំជន នៅភ្នំពេញ នៅអីហ្នឹងគឺសល់គ្រូចា៎ គឺសល់គ្រូមិនមែនខ្វះគ្រូទេ គ្រូពេលខ្លះមកបង្រៀនសិស្សតែពីរថ្ងៃ ឬមួយថ្ងៃអីចឹងទេ»។
ក្រសួងអប់រំ បានជ្រើសរើសគ្រូបង្រៀនកម្រិតមូលដ្ឋាននៅអនុវិទ្យាល័យ តាមប្រព័ន្ធបណ្ដុះបណ្ដាល ១២+២ និង ១២+៤ ចំនួន ៥០០នាក់ សម្រាប់ឆ្នាំ២០២១-២០២២។ ចំពោះសំណុំលិខិត បេក្ខជនទាំងអស់ត្រូវយកសំណុំលិខិតដាក់ពាក្យ សុំចុះឈ្មោះប្រឡងទៅសាលារៀន ដែលខ្លួនជ្រើសរើសដើម្បីសុំការឯកភាពពីនាយកសាលា។ ចំណែកការប្រឡងវិញ តម្រូវឲ្យបេក្ខជនទាំងអស់ ប្រឡងតាមប្រព័ន្ធអនឡាញ(Online)ដែលរៀបចំនៅតាមអនុវិទ្យាល័យ ដែលមានតម្រូវការ។
ទោះជាយ៉ាងនេះក្ដី មន្ត្រីសង្គមស៊ីវិល នៅតែទទូចឲ្យក្រសួងអប់រំជ្រើសរើសគ្រូបង្រៀនដោយគ្មានអំពើពុករលួយ គ្មានការរើសអើង និងមានតម្លាភាព ដើម្បីអាចឲ្យសិស្ស ដែលមានឆន្ទៈជាគ្រូបង្រៀនពិតប្រាកដ បានបំពេញតួនាទីជាគ្រូបង្រៀន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។