ក្រសួង​ការពារ​ជាតិ​ថា សេនាធិការ​ប្រឆាំង​គ្រឿងញៀន​របស់​ខ្លួន មិន​ជាន់​តួនាទី​អង្គភាព​ផ្សេង​ទេ

ដោយ ស្ងួន អមរា
2019.05.31
Share on WhatsApp
Share on WhatsApp
ឈុំ សុជាត ៦២២ មន្ត្រី​អ្នក​នាំ​ពាក្យ​ក្រសួង​ការពារ​ជាតិ លោក ឈុំ សុជាត។
RFA

ក្រសួង​ការពារជាតិ​អះអាង​ថា គណៈកម្មាធិការ​ប្រយុទ្ធ​ប្រឆាំង​គ្រឿងញៀន​ដែល​ក្រសួង​ទើបតែ​បង្កើត​ឡើង​កាល​ពី​ពេល​ថ្មីៗ​នេះ នឹង​មិន​ជាន់​តួនាទី​គ្នា​ជាមួយ​បណ្ដា​អង្គភាព​ប្រឆាំង​គ្រឿងញៀន​ដទៃ​ទៀត​ឡើយ​។ អង្គការ​សង្គម​ស៊ីវិល​យល់ថា ទន្ទឹម​នឹង​ការ​បង្កើត​សេនាធិការ​បន្ថែម​ទៀត​នេះ រដ្ឋាភិបាល​ត្រូវតែ​អនុវត្ត​ឱ្យ​មាន​ប្រសិទ្ធភាព​ចំពោះ​យន្តការ​ប្រឆាំង​គ្រឿងញៀន ដែល​ធ្លាប់​បាន​ដាក់​ចេញ នា​ពេល​កន្លងមក។

អ្នកនាំពាក្យ​ក្រសួង​ការពារ​ជាតិ លោក ឈុំ សុជាត អះអាង​ប្រាប់​អាស៊ីសេរី​ថា ការ​បង្កើត​គណៈកម្មាធិការ​ប្រយុទ្ធ​ប្រឆាំង​គ្រឿងញៀន​នេះ គឺជា​ការ​អនុវត្ត​តាម​គោលការណ៍​ណែនាំ​របស់​រដ្ឋាភិបាល ដែល​តម្រូវ​ឱ្យ​មាន​យន្តការ​គ្រប់គ្រង និង​ត្រួតពិនិត្យ​គ្រឿងញៀន​នៅ​តាម​ស្ថាប័នរដ្ឋ​សំខាន់ៗ​។ លោក​បញ្ជាក់​ថា ភារកិច្ច​ចម្បង​របស់​គណៈកម្មាធិការ​ថ្មី​នេះ គឺ​ការ​អប់រំ​ផ្សព្វផ្សាយ​ដល់​កង​យោធពល​ខេមរភូមិន្ទ ឱ្យ​ចៀស​ឆ្ងាយ​ពី​ការប្រើប្រាស់ និង​ជួញដូរ​គ្រឿងញៀន​។ លោក​បន្ត​ថា គណៈកម្មាធិការ​នេះ​មិន​ធ្វើ​ការងារ​ផ្នែក​ចាប់ចង​អ្នក​ពាក់ព័ន្ធ​នឹង​បទល្មើស​គ្រឿង​ឡើយ ព្រោះ​នេះ​ជា​ភារកិច្ច​របស់​មន្ត្រី​នគរបាល​យុត្តិធម៌៖ «យន្តការ​នេះ យើង​បង្កើត​ឡើង​ដើម្បី​គាំទ្រ​ដល់​យុទ្ធនាការ​ភូមិ​ស​គ្មាន​គ្រឿងញៀន​ផង ហើយ​ទន្ទឹម​នឹង​នេះ យើង​ក៏​គាំទ្រ​លើ​ការ​ប្រយុទ្ធ​ប្រឆាំង​គ្រឿងញៀន មិន​ឱ្យ​មាន​គ្រឿងញៀន​នៅ​ក្នុង​កងទ័ព​។ បើ​កងទ័ព​យើង​ប៉ះពាល់​គ្រឿងញៀន ឬ​សេពគប់​គ្រឿងញៀន​អី​ទៅ វា​ធ្វើ​ឱ្យ​មាន​មហន្តរាយ​ដល់​ប្រទេសជាតិ ព្រោះ​យើង​សុទ្ធតែ​អ្នកកាន់​កាំភ្លើង កាន់​អាវុធ​។ យើង​មាន​តួនាទី​សំខាន់​ណាស់​ក្នុង​ការ​ការពារ​ទឹកដី ការពារ​ប្រជាពលរដ្ឋ ដូច្នេះ​យើង​ដាច់ខាត មិន​ឱ្យ​កងទ័ព​យើង​ពាក់ព័ន្ធ​គ្រឿងញៀន​ទេ»

គណៈកម្មាធិការ​ប្រយុទ្ធ​ប្រឆាំង​គ្រឿងញៀន​របស់​ក្រសួងការពារជាតិ​នេះ ត្រូវ​បាន​បង្កើត​ឡើង​តាម​ប្រកាស​របស់​ក្រសួងការពារជាតិ កាលពី​ចុងខែ​មេសា ក៏ប៉ុន្តែ​ទើបតែ​បាន​ចាប់ផ្តើម​ដំណើរការ​ជា​ផ្លូវការ កាលពី​ថ្ងៃ​ទី​២៨ ឧសភា ថ្មីៗ​នេះ​ប៉ុណ្ណោះ​។ គណៈកម្មាធិការ​ថ្មី​នេះ មាន​សមាសភាព​សរុប​៩ រូប ក្នុង​នោះ​រដ្ឋលេខាធិការ​ក្រសួងការពារជាតិ លោក ចាយ សាំងយុន គឺជា​ប្រធាន និង​អម​ដោយ​អនុប្រធាន​២ រូប គឺ​នាយសេនាធិការ​ចម្រុះ​នៃ​កង​យោធពល​ខេមរភូមិន្ទ លោក ឥត សារ៉ាត់ និង​អនុរដ្ឋលេខាធិការ​ក្រសួង​ការពារជាតិ លោក ឈុំ សុជាត។

លោក ឈុំ សុជាត បញ្ជាក់​បន្ថែម​ថា គណៈកម្មាធិការ​នេះ បំពេញការងារ​តែ​នៅ​ក្នុង​រង្វង់​ជួរ​កងទ័ព​ប៉ុណ្ណោះ ដូច្នេះ​នឹង​មិន​មានការ​ជាន់​តួនាទី​គ្នា​ជាមួយ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន ដែល​ជា​យន្តការ​ថ្នាក់​ជាតិ​របស់​រដ្ឋាភិបាល​ឡើយ ហើយក៏​មិន​ជាន់​តួនាទី​គ្នា​ជាមួយ​បណ្ដា​អង្គភាព​ចំណុះ​របស់​ក្រសួង​មហាផ្ទៃ​ដែរ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត យល់ថា ប្រសិនបើ​យន្តការ​ថ្មី​នេះ​អនុវត្ត​ការងារ​តែ​ក្នុង​រង្វង់​កងយោធពល​ខេមរភូមិន្ទ​មែន នេះ​ជា​រឿង​ល្អ ពីព្រោះ​ដើម្បី​ធានា​ថា កងទ័ព​មិន​មាន​ជាប់​ពាក់ព័ន្ធ​នឹង​បញ្ហា​គ្រឿងញៀន​។ ក៏ប៉ុន្តែ លោក​ថា បើ​មានការ​ពន្លាត​សកម្មភាព​ការងារ​ក្រៅពី​រង្វង់​កងទ័ព នោះ​នឹង​ធ្វើ​ឱ្យ​ប៉ះពាល់​ដល់​ស្ថាប័ន​មាន​សមត្ថកិច្ច​ដទៃ​ទៀត។

អ្នកការពារ​សិទ្ធិមនុស្ស​រូប​នេះ សង្កត់ធ្ងន់​ថា ការ​បង្កើត​យន្តការ​ប្រយុទ្ធ​ប្រឆាំង​គ្រឿងញៀន​ឱ្យ​បាន​កាន់តែ​ច្រើន គឺជា​រឿង​ចាំបាច់ ក៏ប៉ុន្តែ​ទន្ទឹម​នឹង​នេះ រដ្ឋាភិបាល​ត្រូវតែ​ធានា​ថា សេនាធិការ​ទាំងនោះ​ពិតជា​អាច​អនុវត្ត​ការងារ​បាន​ដោយមាន​ប្រសិទ្ធភាព៖ «ការ​បង្កើត​ទាំងអស់​ហ្នឹង វា​ជា​រឿង​មួយ​ហើយ ប៉ុន្តែ​ដើម្បី​ឱ្យ​ដំណើរការ​ទៅ​បាន ទាល់តែ​ទីមួយ គឺ​យើង​ពង្រឹង​ជាពិសេស រឿង​មន្ត្រី​ណា​ក៏​ដោយ ឱ្យ​តែ​ពាក់ព័ន្ធ​នឹង​បញ្ហា​គ្រឿងញៀន​នេះ ត្រូវតែ​អនុវត្ត​តាម​ផ្លូវច្បាប់ ទោះបីជា​អ្នកណា​ក៏ដោយ​។ បញ្ហា​ទី​ពីរ យើង​ទាល់តែ​បំផុស និង​អប់រំ​ឱ្យ​ប្រជាពលរដ្ឋ​ហ្នឹង មានការ​ចូលរួម​ដើម្បី​ទប់ស្កាត់​ទាំងអស់​គ្នា»

កាលពី​ឆ្នាំ​២០១៨ កន្លងទៅ អាជ្ញាធរ​បង្ក្រាប​បទល្មើស​គ្រឿងញៀន​បាន​ជាង​៨ ពាន់​ករណី (.០១៨) ឃាត់ខ្លួន​ជនសង្ស័យ​បាន​ជាង ១ ម៉ឺន ៦ ពាន់​នាក់ (១៦.២៣២) និង​រឹបអូស​សារធាតុ​ញៀន​បាន​ជាង ៥០០ គីឡូក្រាម ពោល​គឺ​កើន​ឡើង​ជាង ៣០០ គីឡូក្រាម បើ​ធៀប​នឹង​ឆ្នាំ​២០១៧។

របប​លោក ហ៊ុន សែន បាន​ទទួលស្គាល់​ថា បញ្ហា​គ្រឿងញៀន នៅតែ​ជា​ក្តី​ព្រួយបារម្ភ​របស់​អាជ្ញាធរ​នៅឡើយ បើ​ទោះបី​ការ​ការ​បង្ក្រាប​ត្រូវ​បាន​ធ្វើឡើង​ដោយ​ឥត​ឈប់ឈរ​ក៏ដោយ​។ អាជ្ញាធរ​បាន​អះអាង​ថា ការ​កើន​ឡើង​ខ្លាំង​នៃ​បទល្មើស​គ្រឿងញៀន​នេះ គឺ​បណ្ដាល​មក​ពី​ក្រុម​ឧក្រិដ្ឋជន​នៅតែ​ប្រើប្រាស់​ទឹកដី​កម្ពុជា​ជាទី​តាំង​នៃ​ការផលិត កែច្នៃ និង​ចរាចរណ៍​គ្រឿងញៀន​តាម​គ្រប់​រូបភាព។

ទោះជា​យ៉ាងណា ក្រុម​អង្គការ​សង្គម​ស៊ីវិល និង​អ្នក​តាមដាន​សង្គម មើល​ឃើញ​ថា អំពើពុករលួយ ការអនុវត្ត​ច្បាប់​ធូររលុង និង​កង្វះ​សមត្ថភាព​របស់​សមត្ថ​កិច្ច គឺជា​ឧបសគ្គ​ចម្បង​ដែល​រារាំង​មិន​ឱ្យ​យុទ្ធនាការ​បង្ក្រាប​គ្រឿងញៀន អាច​សម្រេច​បាន​ដោយ​ជោគជ័យ​។ ជាពិសេស ការ​បង្ក្រាប​របស់​សមត្ថកិច្ច​ហាក់​មាន​ប្រសិទ្ធភាព​តែ​ទៅលើ​ជនល្មើស​តូចតាច ចំណែក​ឧក្រិដ្ឋជន​ធំៗ ដែល​ជា​អ្នក​នាំចូល និង​ចែកចាយ​គ្រឿងញៀន​វិញ នៅតែ​អាច​រួច​ផុត​ពី​សំណាញ់​ច្បាប់​ដដែល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។