ជនពិការ ​ជួបបញ្ហា​លំបាកច្រើន​អំឡុង​វិបត្តិកូវីដ-១៩

ដោយ ខែ សុណង
2021-04-10
Share
ជនពិការ ​ជួបបញ្ហា​លំបាកច្រើន​អំឡុង​វិបត្តិកូវីដ-១៩ ជន​ពិការ​ភ្នែក​ម៉ាស្សា​ជូន​ភ្ញៀវ​នៅ​ហាង​ម៉ាស្សា​មួយ​កន្លែង​ទល់​មុខ​សាលា​មត្តេយ្យ ៨ មីនា ផ្លូវ​ប៉ាស្ទ័រ ឬ​ផ្លូវ​លេខ​៥១ រាជធានី​ភ្នំពេញ កាល​ពី​ថ្ងៃ​ទី​២៤ ខែ​កក្កដា ឆ្នាំ​២០១៥។
រូប៖ RFA

ជនពិការ​មួយចំនួន​មាន​ជំនាញផ្នែក​ម៉ាស្សា​ចាប់សរសៃ​ និង​សិល្បៈ​តន្ត្រី​នោះ ​កំពុង​បាត់​បង់​ចំណូលទាំងស្រុង ​និងកំពុង​តស៊ូរស់នៅ​ក្នុងស្ថាន​ភាពលំបាក ​ដោយ សារ​ការ​ងារ​​របស់​ពួកគាត់​ ត្រូវបានផ្អាក​ក្នុងអំឡុង​ពេលមាន​វិបត្តិជំងឺកូវីដ-១៩។

យុវជនពិការភ្នែក​ទាំងសងខាង​ ​និង​​ជាប្រធាន​ក្រុមតន្ត្រីបុរាណ​កេរ្តិ៍លោក វិន វិចិត្រ​ រៀប​រាប់ថា​ ​ជន​ពិការភ្នែក​ប្រមាណ ​៨០ ​ទៅ ៩០ ​ភាគរយ​រៀន​ជំនាញម៉ាស្សានិង​​សិល្បៈតន្ត្រី​ ប៉ុន្តែ​ដោយសារ​ការ​រាតត្បាត​ជំងឺកូវីដ-១៩ រយៈពេល​ជាង ១ ​ឆ្នាំមកនេះ ​ពួកគាត់​បាត់បង់​ការ​ងារ ​និង​ប្រាក់ចំណូល​ទាំងស្រុង ​​ដែល​ប៉ះពាល់​ធ្ងន់ធ្ងរ​ដល់​ជីវភាព​​រស់នៅ​។ លោក​ឲ្យដឹងថា ​ជនពិការ​មួយចំនួន ​ត្រូវរស់​នៅ​តាមយថា​កម្ម​ និង​ខ្លះបានវិល​ទៅ​រស់នៅ​ស្រុកកំណើត​តាមជនបទវិញ ដោ​យ​សារ​គ្មាន​​លទ្ធភាព​​ទិញ​​ម្ហូប​អាហារ ​​និង​ជួលថ្លៃ​បន្ទប់​ស្នាក់នៅ​ក្នុងទីក្រុង។ យុវជន វិន វិចិត្រ​ បន្តថា​ ចំពោះ​ការជួយ​ឧបត្ថម្ភសាច់​ប្រាក់​របស់​រដ្ឋាភិបាល​កន្លងមក ​នៅមិនទាន់​គ្រប់​គ្រាន់​ ​និង​មិនទាន់បាន​ដល់ដៃ​ជន​ពិការ​គ្រប់គ្នា​នោះទេ៖ «ទី១ ចង់សុំឲ្យរដ្ឋាភិបាល ជួយសម្រួលរឿងសុខភាពរបស់ជនពិការ  ទី២ រឿងអាហារហូបចុក​ប្រចាំ​ថ្ងៃ​ទាក់ទង​នឹងការ​រស់នៅ​ដែលគាត់នៅទីក្រុងភ្នំពេញ និងជួល​បន្ទប់ស្នាក់នៅ។ នៅពេលពួកគាត់អត់ចំណូលចឹង​ហើយត្រូវបង់ផ្ទះជួលផង​ ត្រូវហូប​រាល់ថ្ងៃផង ដូច្នេះស្ថានភាពរបស់គាត់លំបាកខ្លាំងដែរ។ ទី៣ សុំឲ្យគាត់ប័ណ្ណសមធម៌ ហើយនឹងប្រាក់ឧបត្ថម្ភកូវីដហ្នឹងថា តើបានទៅដល់ជនពិការគ្រប់គ្នានៅ ព្រោះជនពិការខ្លះ ក៏អត់ទាន់ទទួលបានដែរ»។

ស្រដៀងគ្នានេះ​ ​ជន​ពិការភ្នែក​ដែលជា​អ្នកលេង​​ភ្លេង​ពិណពាទ្យ​​គឺលោក ក្លែង វណ្ណឌី​ និយាយថា​ ​ចាប់តាំងពីជំងឺកូវីដផ្ទុះមក​ លោក​​បាត់បង់​ចំណូល​​ទាំងស្រុង​ ​ហើយ​​លោក​​មិនដែល​​ទទួល​បាន​ស្បៀងអាហារ​​ និង​​ប្រាក់​ឧបត្ថម្ភពី​រដ្ឋាភិបាល​នោះទេ។ យុវជន​ពិការភ្នែករូបនេះ​​បន្តថា​ ​​លោក​​មិនអាច​​រកការងារ​​អ្វីផ្សេង​​ធ្វើ​បាន​ទេ​​ ដូច្នេះ​​លោក​រស់​នៅតែ​​ក្នុងបន្ទប់​ជួល​​ជាមួយ​​មិត្តភក្តិ​ ​ហើយ​កំពុង​ខ្វះ​លទ្ធភាព​​ចំណាយ​​លើ​តម្រូវ​ការ​ជាមូលដ្ឋាន​របស់ខ្លួន​​​ដូចជា​ អាហារ ​ថ្លៃទឹក​ ឱសថ ​​និង​​ការ​ទទួល​​បាន​​សេវា​ថែទាំ​សុខ​ភាព​​ជាដើម៖ «ប្រាក់ចំណូល​បាត់បង់ទាំងស្រុង។ ខ្ញុំជាអ្នកពិការ មូលហេតុទី១ មានការរើសអើងពីសង្គម​ស្រាប់ទៅហើយ ​ឧទាហរណ៍ថា ភ្លេងប្រពៃណី គឺគេអត់ទទួលស្គាល់ក្នុងការយកជនពិការទៅលេងភ្លេងទេ ដូច្នេះករណីនេះធ្វើឲ្យបាត់ចំណូលមួយផ្នែក នៅសល់តែវង់ភ្លេងពិណពាទ្យ គឺអាចចូលរួម​ប្រគុំជាមួយជនមិនពិការបាន តែកូវីដមកដល់នេះ  អត់មានកម្មវិធីបុណ្យផ្សេងៗធ្វើឲ្យយើងបាត់បង់ចំណូល។ ខ្ញុំអត់ដែលមានទទួលបានការ​ជួយជ្រោម​ជ្រែង​អី ​ឬអាហាររូបត្ថម្ភអីពី​រដ្ឋា​ភិ​បាលទេ»

ជនពិការភ្នែក​មួយរូបទៀត ​ដែលមាន​ជំនាញ​ម៉ាស្សា​ចាប់សរសៃ​លោក វែង ដៀន ថ្លែងថា ​លោក​បាន​បង្ខំចិត្តនាំ​ប្រពន្ធនិងកូន​តូច​ចាកចេញពីភ្នំពេញ​​ទៅ​រស់​នៅ​​ស្រុក​កំណើត​ក្នុងខេត្តកំពត​បណ្តោះអាសន្ន ​ដោយសារ​ការងារ​ម៉ាស្សា​ត្រូវបាន​ផ្អាក​មួយ​រយៈ។ លោក​ថា បញ្ហានេះ​ធ្វើឲ្យ​លោក​គ្មានប្រាក់ចំណូល​សម្រាប់​ទិញម្ហូប​អាហារ និង​ជួល​បន្ទប់​ស្នាក់​នៅក្នុង​ទីក្រុងភ្នំពេញ​៖ «តាំងពីមានកូវីដមក ពួកខ្ញុំរកអត់បានទេបង ព្រោះមនុស្សខ្លាចគ្នា។ ជីវិតជាអ្នកម៉ាស្សាដូចពួកខ្ញុំនេះពិបាកណាស់បង។ សព្វថ្ងៃនេះ ខ្ញុំនៅស្រុកកំណើត យើងមានអីហូបហ្នឹងទៅ។ ខ្ញុំបានទទួលប្រាក់ឧបត្ថម្ភរបស់រដ្ឋាភិបាលក្នុងមួយខែ ២០ ម៉ឺនដែរ តែបងវិភាគមើលទៅ តើគ្រប់ឬមិនគ្រប់ ព្រោះអី កូនតូចត្រូវការប៉ូវ។ បើជាយើងហ្មង ហូបបាយជាមួយទឹកស៊ីអ៊ីវ ឬអំបិល ប្រហុក ក៏អាចរស់ដែរ ប៉ុន្តែមានកូនតូចពិបាកណាស់ ជូនកាលកូនភ្ញាក់ឡើងទារញាំអី ទារទឹកដោះគោទារអីចឹង ព្រោះគ្នាធ្លាប់ញាំ តែឥឡូវយើងដាច់ចំណូល »។

ក្រុមជន​ពិការទាំងនេះអះអាងដូចៗគ្នាថា​ ពួកគាត់​មិនធ្លាប់​ទទួលបាន​ជំនួយ​ពីកាក​បាទ​ក្រហមកម្ពុជាឡើយ ​ទោះបីជា​អង្គការ​សប្បុរសធម៌​ដ៏ធំ​មួយ​នេះ​​អះអាង​ថា​​ កំពុង​​ផ្តល់​ជំនួយ​ដល់​ជនងាយរងគ្រោះរួម​មាន​ជនពិការ​ក្តី។

ជុំវិញរឿងនេះ រដ្ឋលេខាធិការ​ក្រសួង​សង្គមកិច្ច​អតីតយុទ្ធជន​និង​យុវនីតិសម្បទា​​និងជា​អគ្គលេខា​ធិការ​​ក្រុមប្រឹក្សា​សកម្ម​ភាពជន​ពិការលោក ឯម ច័ន្ទមករា ​ទទួល​ស្គា​ល់​​​ថា​ ​ក្នុងអំឡុង​ពេល​វិបត្តិ​ជំងឺកូវីដ-១៩នេះ ​ជនមាន​ពិការភាព​ប្រឈម​បញ្ហា​​លំបាកច្រើន​រាប់ទាំង​បញ្ហា​ជីវភាពរស់នៅ ​ការប្រាស្រ័យ​ទាក់ទង ​ការចូលរួម​ក្នុងសង្គម ​និង​ការទទួលបាន​ការងារ​ធ្វើ​ជាដើម។ ទោះជាយ៉ាងណា​លោកអះអាងថា ​រដ្ឋាភិបាល​បានដាក់ចេញ​កម្មវិធី​ឧបត្ថម្ភ​សាច់ប្រាក់​សម្រាប់​ជួយ​ជនងាយរងគ្រោះ​ក្នុងនោះ​រួមទាំង​ជនពិការ​ផង​ដែរ។ លោក​បញ្ជាក់ថា មាន​ជនពិការ​រស់នៅ​ក្នុង​ទីក្រុងភ្នំពេញ​មិនតិច​ជាង ១​ ម៉ឺន ​(១០.​០០០) ​នាក់នោះទេ​ ដែល​ទទួល​បាន​​ប្រាក់​ឧបត្ថម្ភ​ពីរដ្ឋា​ភិបាល​ចន្លោះ​ចាប់ពី ៥ ម៉ឺន ទៅ​ ២០ ម៉ឺន​រៀល ក្នុងមួយខែ។ ក្រៅពីនេះលោក ឯម ច័ន្ទមករា ​អះអាងថា​ លោក​ក៏បាន​ស្នើ​សុំ​ទៅស្ថានទូត​ អង្គការ​​ដៃគូ​ កាកបាទក្រហម​កម្ពុជា ​និង​ម្ចាស់​ជំនួយ​នានា​​​ជួយ​ដោះ​ស្រាយ​​បញ្ហា​​ប្រឈម​របស់ជន​ពិការ៖ «អរគុណចំពោះការ​ផ្តល់ព័ត៌មាន​របស់​បងប្អូន​ពិការភាព​អំពី​ភាព​ខ្វះខាត​មក​ដល់យើងខ្ញុំបានដឹង ​ហើយយើង​ខ្ញុំសូមសំណូមពរឲ្យបងប្អូនដែលមានពិការភាពទាំងអស់​ ដែលនៅ​មិនទាន់​ទទួល​បាន​ប្រាក់​របប​គោល​នយោបាយ​ពីរាជរដ្ឋាភិបាលនេះ​ សូមពួកគាត់មក​ចុះឈ្មោះ ​ឬមួយមកជូនដំណឹង​មក​ក្រសួងសង្គមកិច្ច​ដើម្បី​ក្រុមការងារ​យើងខ្ញុំអាចចុះឈ្មោះក្នុង​ប្រព័ន្ធហើយ​ឧបត្ថម្ភពួកគាត់​ឲ្យទទួលបាន​សាច់ប្រាក់ដូច​អ្នកងាយរងគ្រោះផ្សេងៗ។ ទី២ សូមសំណូម​ពរ​​អំពាវនាវដល់បងប្អូន​ដែលមានពិការភាព​សូមមេត្តា​យោគយល់ក្នុង​កាលៈទេសៈនៃ​បញ្ហាកូវីដនេះ ​ព្រោះមិនមែន​តែបងប្អូនមាន​​ពិការភាព​ដែលមាន​បញ្ហាជីវភាព »។

មន្ត្រីជាន់ខ្ពស់​ក្រសួងសង្គមកិច្ចរូបនេះ​​ឲ្យដឹងថា ​ស្ថិតិ​​ជនមានពិការភាព​​​នៅក្នុង​​ប្រទេ​ស​កម្ពុជា​មាន​ជាង ៥ សែន​នាក់ ​ដោយ​រាប់បញ្ចូល​ទាំងកុមារ​អាយុ ១ ឆ្នាំ។ លោក​បញ្ជាក់​ថា ​ក្នុង​ចំណោម​ជនពិការ​ទាំង ៥ សែន​នាក់នេះ​ មានអ្នក​ធ្វើការងារតាម​ក្រសួង​ស្ថា​ប័ន​រដ្ឋ​ប្រមាណ ​៤ ពាន់នាក់ ​អ្នកធ្វើការ​ក្នុងក្រុមហ៊ុន​ឯកជន និង​​អង្គការ​សង្គមស៊ីវិល​​​ប្រមាណ​ជាង ​៣ ​ពាន់​​នាក់ និង​មួយចំនួនទៀត​ធ្វើការ​ផ្នែកសិល្បៈតន្ត្រី ​ម៉ាស្សា​ តម្បាញ ​និង​ធ្វើវត្ថុកែច្នៃដោយ​​ដៃជា​​ដើម​។

នាយិកាអង្គការ​ជនពិការកម្ពុជា ​(CDPO) ​អ្នកស្រី ​ម៉ាក់ ម៉ូលីកា ​មានប្រសាសន៍ថា ​បញ្ហា​ជំងឺ​កូវីដ​១៩នេះបាន​បង្ក​ផល​ប៉ះពាល់​ដល់ប្រជាជន​ទាំងមូល​នៅប្រទេស​កម្ពុជា ប៉ុន្តែជន​មាន​ពិការ​ភាពបាន​រង​ផល​​ប៉ះពាល់ខ្លាំង​ជាងគេ។ អ្នកស្រីថា ​ករណីនេះ​ទាមទារ​ឱ្យរដ្ឋាភិបាលគិតគូរ​បន្ថែម​ទៅដល់​ពួកគាត់​ដើម្បីធ្វើយ៉ាងណា​ឱ្យពួកគាត់​មាន​លទ្ធភាព​បង្កើន​ចំណូ​លឡើងវិញ។ បន្ថែមពីនេះ​ អ្នកស្រី​យល់ថា ​រដ្ឋាភិបាល​ គួរជួយបង្កើន​ប្រាក់ឧបត្ថម្ភ​បន្ថែមទៀត ​និងផ្តល់ឲ្យ​បាន​ដល់ដៃជនពិការ​គ្រប់គ្នា ​ព្រមទាំង​ជួយអន្តរា​គមន៍​ផ្អាក​​បង់សង​ប្រាក់​កម្ចី​ជាដើម៖ «សូមភាគីពាក់ព័ន្ធ ជាពិសេសរដ្ឋាភិបាល គិតគូរសំខាន់ទី១ គឺវ៉ាក់សាំង ទី២ជួយតាមលទ្ធភាពដែលអាចជួយបានសម្រាប់ជនពិការ កំឡុងពេលកូវីដនេះ អាចថា ជាស្បៀងឬជាអីមួយដែលយើងមើលទៅតាមលទ្ធភាពជាក់ស្តែង ហើយមួយទៀត សូមឲ្យនិយោជក រើសយកពួកគាត់ធ្វើការងារវិញ សម្រាប់អ្នកដែលបាត់បង់ការងារអំឡុងពេលនេះ ហើយបើអាចបានគួរតែមានប្រាក់ឧបត្ថម្ភអីមួយសម្រាប់ពួកគាត់ ក្រៅពីប្រាក់ឧបត្ថម្ភសាច់ប្រាក់របស់រដ្ឋាភិបាល »

ជនពិការ​មួយចំនួនត្អូញត្អែរថា ​ដោយសារ​ការជួយ​ឧបត្ថម្ភ​របស់​រដ្ឋាភិបាល​នៅមាន​កម្រិតតិចតួច​នោះ ​ធ្វើឲ្យ​ជនពិការ​ខ្លះ​នៅតែ​បង្ខំចិត្ត​ដើរច្រៀង​ និងលេង​ឧបករណ៍ភ្លេង​តាមទី​សាធារ​ណៈ ​ដើម្បី​សុំប្រាក់​ពី​សប្បុរសជនដោះស្រាយជីវភាពមួយគ្រាៗ ​ទោះបីជា​ប្រថុយប្រថាន​ជាមួយ​នឹង​ជំងឺកូវីដ-១៩​ក្តី។ ពួក​គាត់ ​​ស្នើសុំឲ្យ​ភាគីពាក់ព័ន្ធ​ជួយ​សម្រួល​ឲ្យ​ជនពិការ ​អាចធ្វើការ​ងារនៅ​តាមស្ថាប័នរដ្ឋ ​និងឯកជន ​ដើម្បី​ឲ្យពួកគាត់​មានចំណូល​ជាប្រចាំ ​សម្រាប់ផ្គត់ផ្គង់​ជីវភាពរ​រស់នៅ​ខ្លួនឯង ​ដោយ​មិនចាំបាច់រស់​នៅ​ពឹងផ្អែក​លើក្តីអាណិត ​ឬការដាក់​ទាន​របស់អ្នកដទៃ​នោះទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល