ក្រសួងអប់រំយុវជននិងកីឡា អំពាវនាវឲ្យសាធារណជន មាតាបិតា ឬអាណាព្យាបាល និងសិស្សានុសិស្សទាំងអស់ ប្រុងប្រយ័ត្ន និងកុំឲ្យចាញ់បោកជនខិលខួចមួយចំនួនដែលបន្លំលក់វិញ្ញាសាសម្រាប់ប្រឡងសញ្ញាប័ត្របាក់ឌុប ដែលគ្រោងប្រព្រឹត្តទៅនៅថ្ងៃទី៤ ទី៥ ខែសីហា ខាងមុខ។
ថ្នាក់ដឹកនាំក្រសួងអប់រំយុវជននិងកីឡា ព្រួយបារម្ភពីការបែកធ្លាយវិញ្ញាសាក្លែងក្លាយនៅមុនពេលប្រឡងសញ្ញាប័ត្របាក់ឌុប។
ក្រសួងអប់រំបានចេញសេចក្ដីប្រកាសព័ត៌មានមួយ កាលពីថ្ងៃទី២៥ កក្កដា ថា សព្វថ្ងៃនេះមានជនខិលខូចមួយចំនួនបានធ្វើវិញ្ញាសាគ្រប់មុខវិជ្ជាសម្រាប់ប្រឡងសញ្ញាប័ត្របាក់ឌុប ដោយភូតកុហកថា ជាវិញ្ញាសាបែកធ្លាយមុនពេលប្រឡង ក្នុងបំណងលក់ ឬចែកចាយដើម្បីរកប្រាក់ចំណេញ។
ក្រសួងអប់រំ ក៏បានកត់សម្គាល់ថា មុនការប្រឡងឃើញមានការបើកបង្រៀនត្រៀមប្រឡងសញ្ញាប័ត្របាក់ឌុប ដោយប្រើទម្រង់វិញ្ញាសាដែលមានលក្ខណៈប្រហាក់ប្រហែល ឬដូចគ្នាទៅនឹងវិញ្ញាសាដែលធ្លាប់បានចេញនៅពេលកន្លងមក ដែលទង្វើបែបនេះបង្កឲ្យមានការភាន់ច្រឡំពីគ្រប់មជ្ឈដ្ឋាន និងសាធារណជន ថាមានការបែកធ្លាយវិញ្ញាសា។
អ្នកនាំពាក្យក្រសួងអប់រំយុវជននិងកីឡា លោក រស់ សាលីន បញ្ជាក់ថា វិញ្ញាសាប្រឡងបាក់ឌុបនៅឆ្នាំ២០១៣-២០១៤ នេះ មិនអាចបែកធ្លាយបានទេ ដោយសារតែរដ្ឋមន្ត្រីក្រសួងអប់រំ លោក ហង់ ជួនណារ៉ុន និងរដ្ឋលេខាធិការក្រសួងទទួលបន្ទុកប្រឡង ជាអ្នកទទួលបន្ទុកចេញវិញ្ញាសាប្រឡងលើកនេះ។ លោកពន្យល់ថា ថ្នាក់ដឹកនាំក្រសួងមានការទទួលខុសត្រូវខ្ពស់ និងមានការរៀបចំយ៉ាងប្រយ័ត្នមិនឲ្យបែកធ្លាយវិញ្ញាសាចេញក្រៅឡើយ។
លោក រស់ សាលីន៖ «ថ្នាក់ដឹកនាំនីមួយៗគាត់គ្រប់គ្រងប្រយ័ត្នណាស់ ព្រោះជាការទទួលខុសត្រូវរបស់គាត់ផ្ទាល់ទីមួយ។ ទីពីរ មិនមានភាគីពាក់ព័ន្ធណាដែលចូលរួម ដូច្នេះវិញ្ញាសានៅក្នុងរង្វង់ដៃតែមួយ ដូច្នេះមិនអាចបែកធ្លាយបានទេ»។
កាលបរិច្ឆេទនៃការប្រឡងសញ្ញាប័ត្របាក់ឌុប គ្រោងធ្វើនៅថ្ងៃទី៤ និងទី៥ សីហា ដោយមានបេក្ខជនប្រឡងសរុបទូទាំងប្រទេសចំនួនជាង ៩ម៉ឺននាក់ (៩៣.៤៥៦)។ អ្នកនាំពាក្យក្រសួងអប់រំយុវជននិងកីឡា បញ្ជាក់ថា ក្រសួងបានស្នើសុំឲ្យក្រសួងមហាផ្ទៃ ចុះអន្តរាគមន៍ ហាមមិនឲ្យមានកន្លែងថតចម្លងនៅជុំវិញមណ្ឌលប្រឡងជាដាច់ខាត នៅពេលប្រឡងបាក់ឌុប។ ក្នុងករណីនៅតែមានបើកថតចម្លងនោះ ជនប្រព្រឹត្តនឹងទទួលការពិន័យ ឬទទួលទោសទៅតាមបទល្មើសជាក់ស្ដែង។
ក្រសួងអប់រំធ្វើការកែទម្រង់ប្រព័ន្ធអប់រំលើការប្រឡងគ្រប់ប្រភេទដោយកំណត់ទិសស្លោកថា «អ្នកចេះគឺជាប់»។ ការប្រឡងបាក់ឌុបឆ្នាំនេះ ខាងក្រសួងសង្ឃឹមយ៉ាងមុតមាំថា ដំណើរការប្រឡងនេះ ពិតជារលូននិងដំណើរការទៅបានដូចអ្វីដែលក្រសួងរំពឹងទុក គឺការប្រឡងប្រកបទៅដោយការគោរពតាមគោលការណ៍ច្បាប់ យុត្តិធម៌ តម្លាភាពនិងលទ្ធផលអាចទទួលយកបាន។
អង្គភាពប្រឆាំងអំពើពុករលួយ ក៏បានសហការជាមួយក្រសួងអប់រំយុវជននិងកីឡា ដោយបានដាក់មន្ត្រីអង្គភាព អ្នកស្ម័គ្រចិត្តជាសង្គមស៊ីវិលជាង ២ពាន់នាក់ គ្រោងធ្វើជាអ្នកសង្កេតការណ៍ប្រឡងបាក់ឌុបនេះ។ អង្គភាពប្រឆាំងអំពើពុករលួយ ក៏បានព្រមានចំពោះអ្នកសង្កេតការណ៍ដែលប្រព្រឹត្តផ្ទុយពីការណែនាំក្រសួង និងអង្គភាពប្រឆាំងអំពើពុករលួយ អាចនឹងទទួលវិន័យបញ្ឈប់ពីតួនាទីជាអ្នកសង្កេតការណ៍ ឬបើធ្ងន់ធ្ងរ អាចទទួលពិន័យទោសតាមច្បាប់។
អង្គភាពប្រឆាំងអំពើពុករលួយ ក៏បានព្រមានដាក់វិន័យចំពោះបេក្ខជនប្រឡងដែលប្រព្រឹត្តខុសឆ្គងនៅពេលប្រឡងដែរ។ វិន័យទាំងនោះមានទាំងការកំណត់ឱ្យធ្លាក់ ការបណ្ដេញពីបន្ទប់ប្រឡង ការផ្អាកមិនឱ្យប្រឡងពីរឆ្នាំបន្តបន្ទាប់។ ករណីខ្លះត្រូវលុបឈ្មោះចេញពីគ្រឹះស្ថានសិក្សា រួចត្រូវបញ្ជូនទៅដោះស្រាយតាមផ្លូវច្បាប់ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។