ជនជាតិចាមជាង២០០នាក់រំដោះយកជនសង្ស័យនេសាទខុសច្បាប់
2013.04.05
ប្រជានេសាទចាម ដែលមកតវ៉ាចំពោះការហាមឃាត់ការនេសាទរបស់ពួកគាត់ និងចាប់ពួកគាត់ដាក់ពន្ធនាគារ នៅខេត្តកំពង់ឆ្នាំង កាលពីថ្ងៃទី៥ ខែមេសា ឆ្នាំ២០១៣។
ប្រធានស្នាក់ការសន្តិសុខបេ០៧ (B07) លោក សុខ ស៊ីឡូ បានឲ្យដឹងនៅព្រឹកថ្ងៃទី៥ ខែមេសា ថា ប្រជានេសាទជនជាតិចាម ជាង ២០០នាក់ បានប្រើហិង្សាដោយលើកគ្នាមកឡោមព័ទ្ធស្នាក់ការសន្តិសុខបេ០៧ ព្រមទាំងបានរំដោះយកមនុស្ស ទូក និងឧបករណ៍នេសាទដែលកម្លាំងកងរាជអាវុធហត្ថបានចាប់ និងត្រៀមបញ្ជូនទៅទីបញ្ជាការកងរាជអាវុធហត្ថខេត្ត។
លោក សុខ ស៊ីឡូ៖ «យើងបានអង្វរគាត់ថា ចាំឲ្យថ្នាក់លើសម្រេចឲ្យគាត់។ តែលុះដល់ឡានយើងមកដឹកយកមនុស្សទៅ វាក៏ខ្លាចដូចអ្នកមុនៗ វាក៏នាំគ្នាធ្វើសកម្មភាពរំដោះយកគ្នាវាតែម្ដង។ ខ្ញុំបានរាយការណ៍ទៅមេៗ គាត់ក៏ថាមិនដឹងធ្វើម៉េចទេ បើសភាពក៏ដល់ទៅអ៊ីចឹងហើយនោះ បើយើងមានគ្នាតែ ១០នាក់ ឯអ្នកស្រុកដល់ទៅជិត ៣០០នាក់នោះ បើយើងប៉ះទង្គិចទៅ បញ្ហាវារឹតតែធំ»។
កាលពីព្រលប់ថ្ងៃទី៣ ខែមេសា កងរាជអាវុធហត្ថស្នាក់ការសន្តិសុខបេ០៧ ចាប់បានអ្នកនេសាទជនជាតិចាម ចំនួន ១២នាក់ ដែលកំពុងធ្វើការនេសាទដោយប្រើឧបករណ៍មងបង្ក្រាប នៅចំណុចខាងកើតព្រែកដៃដុល ស្ថិតក្នុងភូមិត្អួររលំ ឃុំកំពង់ហៅ ស្រុកកំពង់លែង។ បន្ទាប់ពីបាននាំអ្នកនេសាទទាំង ១២នាក់ និងទូកនេសាទមកដល់ទីស្នាក់ការត្រៀមបញ្ជូនទៅទីបញ្ជាការកងរាជអាវុធហត្ថខេត្ត ស្រាប់តែមានប្រជាពលរដ្ឋចាមប្រមាណជាង ២០០នាក់ មករំដោះយកទាំងមនុស្ស និងវត្ថុតាងទៅតែម្ដង។
យ៉ាងនេះក្ដី ក្នុងការជួបសម្ភាសន៍នៅព្រឹកថ្ងៃទី៥ មេសា ជាមួយអ្នកយកព័ត៌មានវិទ្យុអាស៊ីសេរី ប្រជានេសាទជនជាតិចាម ទាំងនោះបានបដិសេធន៍ថា ពួកគេពុំបានប្រើឧបករណ៍នេសាទខុសច្បាប់ដូចការចោទប្រកាន់នោះទេ។
បុរសអ្នកនេសាទម្នាក់ឈ្មោះ មិត ប្លាទិន បានឲ្យដឹងថា ការនេសាទរបស់ពួកគាត់ គឺនៅក្រៅដែនអភិរក្ស ម្យ៉ាងទៀត ឧបករណ៍នេសាទ "មងបង្ក្រាប" នេះពុំមានចែងក្នុងច្បាប់ហាមឃាត់ទេនាពេលកន្លងទៅ ដូច្នេះពួកគាត់ប្រើមងបង្ក្រាប គឺពុំមានអ្វីខុសច្បាប់ទេ។ ប៉ុន្តែ កម្លាំងកងរាជអាវុធហត្ថ បានប្រើអំណាចចាប់ពួកគាត់ទាំងបំពាន ទើបពួកគាត់នាំគ្នាមកជួយអ្នកនេសាទទាំង ១២នាក់នោះ៖ «ពួកខ្ញុំឮថាសម្ដេច ហ៊ុន សែន កាត់ឡូត៍នេសាទបើកឲ្យប្រជាជនរក។ ពួកខ្ញុំក៏នាំគ្នាមករកទៅ អត់ដឹងថា មងបង្ក្រាប ខុសច្បាប់ ឬអីទេ ព្រោះអត់ឃើញចែងក្នុងច្បាប់ហាម។ ពួកខ្ញុំរកនៅក្រៅដែនអភិរក្សទេ តែមកចោទថាក្នុងដែនអភិរក្សវិញ។ តាមចាប់ទូកយួន ៤ទូក តែរត់រួចអស់ ២ទូក ស្រាប់តែមកចាប់ពួកខ្ញុំដែលរកខាងក្រៅនេះមកជំនួសវិញ»។
កាលពីដើមខែមីនា កន្លងទៅ ក៏មានការចាប់អ្នកនេសាទជាជនជាតិចាម ជាច្រើននាក់ដែរ។ មន្ត្រីជំនាញផ្នែកជលផល និងមន្ត្រីថ្នាក់ខេត្ត ដែលសុំមិនបញ្ចេញឈ្មោះ បានឲ្យដឹងថា ក្នុងចំណោមអ្នកនេសាទដែលបានចាប់មកនេះ មានខ្លះពុំបានធ្វើការនេសាទខុសច្បាប់ទេ តែក្នុងពេលចុះទៅបង្ក្រាប ក៏ប្រមូលយកមកទាំងអស់។ មន្ត្រីទាំងនោះបន្តថា ដោយនេះជាបញ្ជារបស់ថ្នាក់លើ ដូច្នេះទាល់តែមានបញ្ជាពីថ្នាក់លើ ទើបថ្នាក់ខេត្តហ៊ានធ្វើការពិនិត្យបញ្ហានេះ។
យ៉ាងនេះក្ដី មន្ត្រីសម្របសម្រួលសមាគមអាដហុក (Adhoc) ការពារសិទ្ធិមនុស្សខេត្តកំពង់ឆ្នាំង លោក សំ ច័ន្ទគា មានប្រសាសន៍ថា ការរំដោះយកជនសង្ស័យ គឺជាសកម្មភាពខុសច្បាប់។ ប៉ុន្តែ សកម្មភាពនេះក៏ជាការបង្ហាញថា ប្រជាពលរដ្ឋអស់ជំនឿលើប្រព័ន្ធតុលាការ និងស្ថាប័នរដ្ឋក្នុងការរកយុត្តិធម៌ឲ្យពួកគាត់ ទើបគាត់ប្រព្រឹត្តអំពើបែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត