មន្ត្រីសង្គមស៊ីវិល និងប្រជាសហគមន៍នេសាទបារម្ភជាថ្មីទៀត ពីការថយចុះទិន្នផលត្រីក្នុងតំបន់បឹងទន្លេសាប ក្រោយគេឃើញមានឧបករណ៍នេសាទខុសច្បាប់ទ្រង់ទ្រាយធំក្នុងតំបន់បឹងទន្លេសាបក្នុងខេត្តកំពង់ធំ។
មន្ត្រីសង្គមស៊ីវិលនិងប្រជាសហគមន៍នេសាទ រស់នៅស្រុកស្ទោង ខេត្តកំពង់ធំថា អាជ្ញាធរធូររលុងច្រើនក្នុងការអនុវត្តច្បាប់នេសាទ ធ្វើឱ្យបទល្មើសនេសាទនៅតែកើតមានច្រើន ក្នុងតំបន់បឹងទន្លេសាប។
ប្រជាសហគមន៍រស់នៅស្រុកស្ទោងខេត្តកំពង់ធំ លោក ឆាយ ចែង ប្រាប់វិទ្យុអាស៊ីសេរី នៅថ្ងៃទី ២៧ កុម្ភៈថា ថ្មីៗនេះ អាជ្ញាធរខេត្តកំពង់ធំ បានចាប់បទល្មើសនេសាទទ្រង់ទ្រាយធំក្នុងតំបន់បឹងទន្លេសាប ខេត្តកំពង់ធំ។ ទោះជាយ៉ាងណាលោកថាអាជ្ញាធរគួរតែអនុវត្តច្បាប់ឱ្យស្មើភាពគ្នា ព្រោះកន្លងទៅអាជ្ញាធរតែង លម្អៀងទៅបុគ្គលមានលុយមានអំណាចក្នុងការអនុវត្តច្បាប់ ធ្វើឱ្យជនល្មើសមិនរាងចាល។
លោក ឆាយ ចែង៖ «អាជ្ញាធរគួរតែអនុវត្តស្មើភាពគ្នា កន្លងមកគេតែងតែគេចោទប្រកាន់ថា លម្អៀង។ យើងគួរតែឆ្លុះកញ្ចក់ខ្លួនឯង បើត្រឹមត្រូវអត់ បើត្រឹមត្រូវកែប្រែទៅ។ យើងអនុវត្តស្មើភាពគ្នាចំពោះមុខច្បាប់»។
កាលពីថ្ងៃទី១៦ ខែកុម្ភៈ ឆ្នាំ ២០២៤ មន្ត្រីរដ្ឋបាលជលផល ខេត្តកំពង់ធំបានបង្ក្រាបបទល្មើសជលផល ក្នុងឃុំពាមបាង ស្រុកស្ទោង ដោយរឹបអូស បានរបាំងស្បៃមុងចំនួន ៨ របាំង ប្រវែង ៨០០ម៉ែត្រ លបឡុកចំនួន ១៦ គ្រឿង លបឡូ ចំនួន ៣២មាត់ បង្គោលឈើចំនួន ៦០០ដើម និងឧបករណ៍ឆក់មួយចំនួនទៀត។ រីឯជនសង្ស័យបានរត់គេចខ្លួនបាត់។
ចំណាត់ការរបស់អាជ្ញាធរនេះធ្វើឡើង ក្រោយពីមានការរិះគន់ព្រោងព្រាតតាមបណ្ដាញសង្គម ហ្វេសប៊ុក (Facebook) បង្ហាញពីឧបករណ៍នេសាទ ប្រភេទ លបឡុក ដែលគេដាក់ពង្រាយពាសពេញបឹងទន្លេសាប ក្នុងឃុំពាមបាង ស្រុកស្ទោង ខេត្តកំពង់ធំ។
អ្នកប្រើប្រាស់បណ្តាញសង្គមខ្លះ បានថតបង្ហោះដោយប្រើឧបករណ៍ថតពីលើអាកាស ឬហៅថា ត្រូន (Drone) បង្ហាញភស្តុតាងជារូបភាពជាក់ស្តែង មានទម្រង់ដូចជាសញ្ញាព្រួញ ដែលគេសម្គាល់ថា ជាឧបករណ៍នេសាទប្រភេទ លបឡុក មានលទ្ធភាពចាប់ត្រីតូចធំបានគ្រប់ប្រភេទ នៅរដូវទឹកស្រក។
វិទ្យុអាស៊ីសេរីមិនទាន់អាចទាក់ទងនាយខណ្ឌរដ្ឋបាលជលផលខេត្តកំពង់ធំ លោក ជិន ស៊ីថា និង អភិបាលខេត្តនេះ លោក ងួន រតនៈ ដើម្បីសុំអធិប្បាយបន្ថែមបាននៅឡើយទេ នៅថ្ងៃទី២៧ កុម្ភៈ។
ជុំវិញរឿងនេះនាយកប្រតិបត្តិអង្គការបណ្តាញការពារទន្លេបី លោក លាង ប៊ុនលាភ ពន្យល់ថា ការប្រើឧបករណ៍នេសាទដែលច្បាប់ហាមឃាត់នៅរដូវទឹកស្រកធ្វើឱ្យត្រីមេពូជធំៗប្រឈមនឹងដាច់ពូជ។ លោកស្នើឱ្យអាជ្ញាធរនិងប្រជាសហគមន៍សហការគ្នាផ្តល់ព័ត៌មានពីបទល្មើសនេសាទ និងពង្រឹងការអនុវត្តច្បាប់។
លោក លាង ប៊ុនលាភ៖ «បញ្ហានេះសូមឱ្យអាជ្ញាធរ មន្ត្រីជំនាញនិងប្រជាសហគមន៍សូមមេត្តាចូលរួមយ៉ាងសកម្ម ដើម្បីលុបបំបាត់ការចាប់ត្រីខុសច្បាប់ហ្នឹងបើមិនដូច្នោះទេ ជលផលយើងខ្សោយ បឹងទន្លេសាបកំពុងទឹកទាបស្រាប់»។
កាលពីខែមីនា ឆ្នាំ២០២២ អតីតនាយករដ្ឋមន្ត្រី លោក ហ៊ុន សែន បានព្រមានដកតំណែងអភិបាលខេត្តនៅជុំវិញបឹងទន្លេសាប ប្រសិនបើពួកគេបរាជ័យក្នុងការបង្ក្រាបបទល្មើសនេសាទ។ លោក ហ៊ុន សែន បានស្ដីបន្ទោសអភិបាលខេត្តនៅជុំវិញបឹងទន្លេសាបថា មិនត្រូវមើលស្រាលក្នុងការបង្ក្រាបបទល្មើសនេសាទនោះទេ ត្រូវតែមានការទទួលខុសត្រូវ។
ក៏ប៉ុន្តែប្រជាសហគមន៍សង្កេតឃើញថា អាជ្ញាធរអនុវត្តច្បាប់តឹងរ៉ឹងតាមតែព្រឹត្តិការណ៍ឬតាមបទបញ្ជាម្តងម្កាលរួចក៏ស្ងាត់ទៅវិញ ដែលជាហេតុធ្វើឱ្យបទល្មើសនេសាទនៅតែកើតមានដដែលៗជាច្រើនអាណត្តិមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។