ក្រសួងការបរទេសកម្ពុជា បដិសេធការចោទប្រកាន់ជុំវិញករណីស្រ្តីជនជាតិថៃម្នាក់ប្រឈមគ្រោះថ្នាក់ពីការជួញដូរសរីរាង្គមនុស្សនៅកម្ពុជា ដោយអះអាងថា គ្មានមូលដ្ឋានត្រឹមត្រូវ និងមិនទាន់មានការបញ្ជាក់ណាមួយនៅឡើយ។ ការបដិសេធនេះ គឺបន្ទាប់ពីសារព័ត៌មានថៃ បានចុះផ្សាយអំពីស្រ្តីជនជាតិថៃរូបនោះត្រូវបានជនជាតិចិនមួយក្រុមបូមឈាមលក់ ហើយបំរុងនឹងវះកាត់យកសរីរាង្គនៅខេត្តព្រះសីហនុ។ មន្រ្តីអង្គការសង្គមស៊ីវិលជំរុញដល់អាជ្ញាធរកម្ពុជា បើកការស៊ើបអង្កេតឱ្យបានហ្មត់ចត់ដើម្បីទប់ស្កាត់អំពើឧក្រិដ្ឋទាំងនោះឱ្យមានប្រសិទ្ធភាព។ អាជ្ញាធរកម្ពុជា បដិសេធការចោទប្រកាន់ជុំវិញករណីស្រ្តីជនជាតិថៃម្នាក់ប្រឈមគ្រោះថ្នាក់ពីការជួញដូរសរីរាង្គមនុស្សនៅកម្ពុជា។
អ្នកនាំពាក្យក្រសួងការបរទេសកម្ពុជាលោក ជុំ សុន្ទរី បានបំភ្លឺតាមប្រព័ន្ធតេឡេក្រាមថា ការចុះផ្សាយរបស់សារព័ត៌មានអនឡាញឈ្មោះថៃ អ៊ិចស្សាមីន័រ (Thai Examiner) កាលពីថ្ងៃទី១២ ខែមីនា ទាក់ទងទៅនឹងស្រ្តីជនជាតិថៃម្នាក់អះអាងថា នាងបានប្រឈមនឹងគ្រោះថ្នាក់ពីការជួញដូរសរីរាង្គមនុស្សនៅកម្ពុជានោះ គឺអាជ្ញាធរមានសមត្ថកិច្ចខេត្តព្រះសីហនុបានប្រកាសបដិសេធរួចហើយ ដោយសារការលើកឡើងនោះគ្មានមូលដ្ឋានត្រឹមត្រូវពិតប្រាកដ។ លោកបន្តថា ករណីនេះ ស្ថានទូតខ្មែរប្រចាំប្រទេសថៃ ក៏បានទាក់ទងទៅអាជ្ញាធរថៃ ដើម្បីស្វែងរកការបញ្ជាក់ដែរ ប៉ុន្តែរហូតមកដល់ថ្ងៃទី១៣ ខែមីនា កម្ពុជាពុំទាន់ទទួលបានការបញ្ជាក់ណាមួយថា មានរឿងបែបនេះកើតឡើងនៅកម្ពុជានៅឡើយទេ។
កាលពីថ្ងៃទី១១ ខែមីនា សារព័ត៌មានឌឹក ថៃហ្គរ (The Thaiger) បានចុះផ្សាយដោយដកស្រងសម្តីរបស់ជំនួយការស្នងការនគរបាលជនជាតិថៃលោក សុរាឆាត ហាក់ផន (Surachate Hakpharn) បានបញ្ជាក់ថា ស្រ្តីជនជាតិថៃម្នាក់នោះត្រូវគេល្បួងទៅប្រទេសកម្ពុជាដើម្បីធ្វើការខុសច្បាប់នៅតាមរយៈទូរស័ព្ទដោយជនជាតិចិន តែនាងត្រូវទទួលរងការវាយដំ ចាប់ឃុំខ្លួន និងបង្អត់អាហារ បន្ទាប់ពីបដិសេធមិនព្រមធ្វើការ។ ប្រភពដដែលថា ស្រ្តីរូបនោះត្រូវគេបញ្ជូនពីតំបន់មួយនៅជាប់ព្រំដែនវៀតណាមទៅកន្លែងផ្សេងទៀត ដែលក្នុងបន្ទប់មានឧបករណ៍វះកាត់ជាច្រើន បន្ទាប់មកក្រុមក្មេងទំនើងជនជាតិចិនបានបូមឈាមនាង៣ទៅ៤កំប្លោក ហើយហៀបនឹងយកនាងទៅវះកាត់ដើម្បីយកសរីរាង្គ ប៉ុន្តែនាងរត់គេចខ្លួន បន្ទាប់មកសមត្ថកិច្ចបានជួយសង្គ្រោះ និងបញ្ជូនទៅមន្ទីរពេទ្យមួយនៅក្រុងប៉ោយប៉ែតដើម្បីព្យាបាលរហូតដល់នាងមានកម្លាំងឡើងវិញ។
វិទ្យុអាស៊ីសេរីមិនអាចទាក់ទងស្នងការនគរបាលខេត្តព្រះសីហនុលោក ជួន ណារិន ដើម្បីបញ្ជាក់បន្ថែមបានទេនៅថ្ងៃទី១៣ ខែមីនា ដោយទូរស័ព្ទចូលតែពុំមានអ្នកទទួល។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូលោក អំ សំអាត មានប្រសាសន៍ថា ប្រសិនករណីនេះកើតឡើងមែននោះ គឺជាការរំលោភសិទ្ធិមនុស្សធ្ងន់ធ្ងរ ដែលធ្វើឱ្យពលរដ្ឋបារម្ភអំពីសុវត្ថិភាព ជាពិសេសប៉ះពាល់ដល់មុខមាត់កម្ពុជាលើឆាកអន្តរជាតិ ដូចជាភ្ញៀវទេសចរណ៍ និងអ្នកវិនិយោគជាដើម។ លោកសង្កេតឃើញថា អាជ្ញាធរកម្ពុជាហាក់ឆ្លើយតបដោយបដិសេធឆាប់រហ័សដែលរឿងនេះគួររងចាំការស្រាវជ្រាវស៊ើបអង្កេត និងកិច្ចសហការជាមួយអាជ្ញាធរថៃជាមុនសិន។ លោកស្នើដល់អាជ្ញាធរមានសមត្ថកិច្ចគួរយកចិត្តទុកដាក់ចាត់វិធានការតឹងរ៉ឹង លុបបំបាត់បទល្មើស ព្រមទាំងស៊ើបអង្កេតឱ្យបានច្បាស់លាស់ ដើម្បីបង្ហាញកិច្ចសហប្រតិបត្តិការ និងការអនុវត្តច្បាប់របស់អាជ្ញាធរឱ្យប្រសិទ្ធភាពដល់ពលរដ្ឋ៖ «អង្គការជាតិនិងអន្តរជាតិទទូចឱ្យរដ្ឋាភិបាល ចាត់វិធានការតឹងរ៉ឹង ដើម្បីលុបបំបាត់អំពើទាសភាពរាល់បទល្មើសទាំងឡាយកើតចេញអំពីបរទេសនិងបរទេសក្នុងទឹកដីប្រទេសកម្ពុជា ជាពិសេសនៅតំបន់អភិវឌ្ឍន៍ ធ្វើយ៉ាងមិចលុបបំបាត់កុំឱ្យមានការយកប្រទេសកម្ពុជាប្រព្រឹត្តបទល្មើស»។
ករណីស្ត្រីជនជាតិថៃនេះ គឺជាករណីទីពីរហើយ។ កាលពីថ្មីៗនេះ ក៏មានជនជាតិចិនម្នាក់ឈ្មោះ លី អាយុជាង៣០ឆ្នាំអះអាងថា លោកត្រូវបានគេបោកបញ្ឆោតឱ្យបង្ហូរឈាមរបស់គាត់ជាច្រើនដងនៅកម្ពុជាចាប់តាំងពីខែសីហា ឆ្នាំ២០២១។ លោកបន្តថា គេបានវាយដំជាច្រើនដងនៅអគារ ដែលលោកស្គាល់ឈ្មោះថា ជីនស៊ី ១០ (Jinshui 10) និងកៃបូ (Kaibo) នៅក្នុងបរិវេនឆៃណាថោន (Chinatown) ក្បែរឆ្នេរអូរត្រេះ ក្រុងព្រះសីហនុ និងនៅខេត្តកោះកុងផងដែរ។ លោក លី បញ្ជាក់ថា លោកត្រូវបានគេបូមឈាមក្នុងបរិមាណដ៏ច្រើន រហូតដល់លោកមានបញ្ហាសុខភាពធ្ងន់ធ្ងរអំឡុងពេលនោះ។ ប៉ុន្តែករណីនេះ ក៏ត្រូវបានអាជ្ញាធរបដិសេធចំពោះការលើកឡើងនេះដែរ។
កាលពីថ្ងៃទី១០ ខែមីនា ក្រុមអង្គការសង្គមស៊ីវិលជាតិនិងអន្តរជាតិបានចេញសេចក្តីថ្លែងការណ៍រួមគ្នាមួយដោយពួកគេព្រួយបារម្ភជាខ្លាំងចំពោះការកើនឡើងនៃការជួញដូរមនុស្ស ការចាប់បង្ខំឲ្យធ្វើពលកម្ម អំពើទាសភាព និងទារុណកម្ម នៅតាមបរិវេនអគារនានានៅកម្ពុជា។ ក្រុមអង្គការក្នុងស្រុកនិងអន្តរជាតិ បានចងក្រងការរាយការណ៍តាមប្រព័ន្ធផ្សព្វផ្សាយ និងគណនីបណ្តាញសង្គមរបស់ជនរងគ្រោះរកឃើញថា មានមនុស្សរាប់ពាន់នាក់ ដែលភាគច្រើនជាជនបរទេស ត្រូវបានទទួលរងគ្រោះនៃការរំលោភសិទ្ធិមនុស្សយ៉ាងធ្ងន់ធ្ងរ។ ពួកគេក៏បានបញ្ជាក់ថា ការរំលោភបំពានពាក់ព័ន្ធនឹងជនបរទេស ដែលត្រូវបានចាប់ជំរិត លក់ ជួញដូរ ឬត្រូវបោកបញ្ឆោត ឲ្យទទួលការងារនៅក្នុងខេត្តមួយចំនួន រួមមាន ខេត្តព្រះសីហនុ ភ្នំពេញ ពោធិ៍សាត់ កោះកុង ជាដើម។ បន្ទាប់មកពួកគេត្រូវបានឃុំខ្លួន ក្នុងបរិវេណអគារធំៗ និងត្រូវបង្ខំឲ្យធ្វើការលើសម៉ោង គ្មានពេលសំរាកជាដើម។ ជនរងគ្រោះដែលបានរត់គេចខ្លួនរួច បានរាយការណ៍ថា ពួកគេត្រូវបានធ្វើបាបទាំងរាងកាយ ផ្លូវចិត្ត រងអំពើហិង្សាពីសំណាក់ក្រុមដែលបង្ខាំងពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។