អតីតគ្រូបង្រៀននៅសាលាឯកជនម្នាក់ ស្នើសុំកុំឲ្យសាលាបិទលិខិតបញ្ឈប់ពីការងារនៅមុខសាលា និងនៅមុខសាខាសាលាផ្សេងទៀត ដោយលើកឡើងថា ការចោទរបស់សាលាខុសពីការពិត និងប៉ះពាល់ដល់កិត្តិយសបុគ្គល។ ប៉ុន្តែអ្នកគ្រប់គ្រងសាលា បដិសេធសំណើ និងទាមទារឲ្យអតីតគ្រូរូបនេះ ទៅឆ្លើយបំភ្លឺនៅសាលាជាបន្ទាន់ បើមិនចង់មានរឿងធំជាងនេះ។
ក្រៅពីបញ្ចប់កិច្ចសន្យាការងារដោយមិនផ្តល់សំណង ឬប្រាក់ឈ្នួល ភាគីសាលាអន្តរជាតិកម្ពុជា ព្រមានថានឹងមានវិធានការតាមផ្លូវច្បាប់ ការដែលអ្នកគ្រូហ៊ានបកក្រដាសសេចក្តីជូនដំណឹងរបស់សាលាចេញពីក្តារខៀនព័ត៌មាន។
អង្គុយនៅក្នុងផ្ទះតូចចង្អៀតនៃជាន់ទី៣ ដែលមានសមាជិកគ្រួសារជិត ១០នាក់ នៅម្តុំសាលាបាក់ទូក ក្នុងរាជធានីភ្នំពេញ កញ្ញា សេក សុខុម ជាមនុស្សសំខាន់ម្នាក់ក្នុងចំណោមអ្នករកចំណូលជួយផ្គត់ផ្គង់គ្រួសារ ប៉ុន្តែនៅពេលនេះ សេចក្តីជូនដំណឹងស្ដីពីការបញ្ចប់កិច្ចសន្យាការងារពីសាលាអន្តរជាតិកម្ពុជា ភ្ជាប់ដោយពាក្យថា បុគ្គលរូបនេះមានអាកប្បកិរិយាមិនល្អ ធ្វើឲ្យយុវតីមានវ័យ ២៤ឆ្នាំរូបនេះ ព្រួយបារម្ភថា នឹងប្រឈមបាត់បង់ការងារជាលើកទី២៖ «ខ្ញុំមិនដែលឮថាសាលាណា ឬក្រុមហ៊ុនណានិយាយបុគ្គលិកដែលបញ្ឈប់នោះ មានអាកប្បកិរិយាមិនល្អទេ ព្រោះថា បើអាកប្បកិរិយាមិនល្អ មានសាលាណា ឪពុកម្ដាយកុមារណាឲ្យកូនគេមករៀនជាមួយខ្ញុំ»។
កញ្ញា សេក សុខុម បានចុះកិច្ចសន្យាបំពេញការងារនៅសាលាអន្តរជាតិកម្ពុជា កាលពីថ្ងៃទី១៨ ខែមីនា ឆ្នាំ២០១៥ ជាគ្រូបង្រៀនថ្នាក់មត្តេយ្យ ដោយទទួលបានប្រាក់ឈ្នួលចំនួន ៥៥ដុល្លារក្នុងមួយខែ។ កញ្ញាត្រូវសាលាបញ្ចប់កិច្ចសន្យាភ្លាមៗកាលពីថ្ងៃទី២១ ខែឧសភា ឆ្នាំ២០១៥ ក្រោយពេលដាក់ពាក្យសុំឈប់ ប៉ុន្តែសាលាមិនយល់ព្រមតាមសំណើ បែរជាបញ្ចប់មុនការស្នើសុំ។ ក្រោយការបញ្ឈប់ អតីតអ្នកគ្រូបង្រៀនភាសាអង់គ្លេសរូបនេះ មិនទាន់ទទួលបានប្រាក់ឈ្នួលដែលបង្រៀនអស់រយៈពេលជាង ២ខែនៅឡើយ។
តាមគោលការណ៍សាលាអន្តរជាតិកម្ពុជា បុគ្គលិកដែលចុះកិច្ចសន្យាធ្វើការងារនៅសាលានេះ លុះត្រាធ្វើការបានមួយឆ្នាំសិន ទើបមានសិទ្ធិដាក់ពាក្យឈប់ពីការងារ ដោយផ្តល់ដំណឹងមកសាលាឲ្យដឹងមុនមួយខែ។ ការសុំឈប់មុនកុងត្រានេះ ត្រូវភាគីសាលាចោទប្រកាន់កញ្ញាធ្វើខុសគោលការណ៍ និងច្បាប់របស់សាលា។
នាយកសាលាអន្តរជាតិកម្ពុជា សាខាបាក់ទូក លោក ពុំ ស៊ីនឿន ដែលបញ្ឈប់ការងារ កញ្ញា សេក សុខុម ប្រាប់ឲ្យដឹងថា មូលហេតុសាលាបញ្ឈប់កិច្ចសន្យាការងារអ្នកគ្រូ សេក សុខុម ព្រោះអ្នកគ្រូរូបនេះទាមទារឈប់មុនកិច្ចសន្យា ទោះសាលាមិនយល់ព្រមតាមការស្នើសុំ ក៏កញ្ញានៅតែទាមទារ។ ដូច្នេះ លោកក៏បញ្ឈប់នៅពេលនោះតែម្តង។ លោកប្រាប់ទៀតថា នៅពេលអ្នកគ្រូ សេក សុខុម សុំឈប់នោះ បានប្រើអាកប្បកិរិយាមិនសមរម្យមកថ្នាក់ដឹកនាំសាលា ដែលសាលាយល់ថា បុគ្គលិករូបនេះមានអាកប្បកិរិយាមិនល្អ៖ «គាត់ (អ្នកគ្រូ សេក សុខុម) សុំឈប់ តែសាលាមិនព្រមឲ្យឈប់ គាត់នៅតែចចេសសុំឈប់ដដែល ចឹងយើងបញ្ឈប់គាត់តែម្តងទៅ»។
ចំពោះការទាមទារសុំបញ្ឈប់បិទផ្សាយពាក្យបញ្ឈប់ពីការងារ ឬលិខិតសុំទោស នាយកសាលាអន្តរជាតិកម្ពុជា សាខាបាក់ទូក សុំឲ្យមិនឆ្លើយតប ព្រោះថាមិនមែនជាតួនាទីរបស់លោក។
ស្រាយបំភ្លឺសំណើនេះ នាយកគ្រប់គ្រងសាលាអន្តរជាតិកម្ពុជា លោក គា បូរ៉ាក ឆ្លើយតបថា សាលាមិនអាចធ្វើតាមការស្នើសុំបានទេ។ ជាងនេះទៅទៀត លោកទាមទារឲ្យ កញ្ញា សេក សុខុម មកឆ្លើយបំភ្លឺនៅសាលា។ អ្នកគ្រប់គ្រងសាលារូបនេះ ថានឹងអាចមានវិធានការតាមផ្លូវច្បាប់ ក្នុងករណី កញ្ញា សេក សុខុម បានបកក្រដាសសេចក្តីជូនដំណឹងរបស់សាលាចេញដោយគ្មានការអនុញ្ញាត៖ «ខ្ញុំកំពុងតែចង់ជួបគាត់ផង (អ្នកគ្រូ សេក សុខុម) ព្រោះគាត់បានហែកប្រកាសរបស់សាលាផង បើគាត់មិនព្រមមកជួបទេ យើងនឹងមានវិធានការ»។
ប៉ុន្តែក្នុងករណីនេះ លោក មឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ យល់ថា ការដែលភាគីសាលាបញ្ចប់កិច្ចសន្យាមុនការស្នើសុំរបស់បុគ្គលិក ភាគីសាលាត្រូវផ្តល់សំណង ឬការខូចខាតរបស់បុគ្គលិក។
មាត្រា៧៣ នៃច្បាប់ការងារនៅកថាខណ្ឌទី៣ ចែងថា ការរំលាយកិច្ចសន្យាដោយឆន្ទៈរបស់និយោជកតែឯកឯងមុនកាលកំណត់ ក្រៅពីមូលហេតុកំហុសធ្ងន់ធ្ងរ ឬករណីប្រធានសក្តិ បើកសិទ្ធិឲ្យកម្មករនិយោជិតទទួលជំងឺចិត្តដែលចំនួនយ៉ាងតិច ស្មើនឹងប្រាក់ឈ្នួលដែលកម្មករទទួលរហូតដល់ពេលចប់កិច្ចសន្យា។
ប្រធានការិយាល័យក្រុមអ្នកច្បាប់អមរិន្ទ លោកមេធាវី សុក សំអឿន មានប្រសាសន៍ថា ក្នុងករណីនេះ ប្រសិនបើការចោទប្រកាន់របស់សាលាមិនពិតទេ អ្នកគ្រូ សេក សុខុម អាចប្ដឹងភាគីសាលាពីបទបរិហារកេរ្តិ៍។ លោកមេធាវីបន្តទៀតថា ការដែលភាគីកិច្ចម្ខាងនៃសន្យា សុំឈប់មុនកុងត្រា កើតឡើងដោយសារស្ថានភាពការងារនោះមិនអំណោយផលដល់ភាគីនិយោជិត ហើយករណីនេះក៏មិនមែនជាកំហុសធ្ងន់ធ្ងរដល់ថ្នាក់បិទផ្សាយជាសាធារណៈនោះដែរ៖ «គេធ្វើអត់គ្រប់ឆ្នាំ គេសុំឈប់ថាគេមនុស្សមិនល្អ វាមិនមែនចឹង ព្រោះជួនកាលការងារនោះគេអត់ពេញចិត្ត»។
ស្រដៀងគ្នានេះដែរ ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា និយាយថា ការដែលភាគីសាលាបិទសេចក្តីជូនដំណឹងមានរូបថត ជាការបំពានសិទ្ធិបុគ្គល។ លោកស្នើឲ្យលោកនាយកសាលា ពន្យល់ឲ្យបានច្បាស់ថា តើអ្វីទៅជាអាកប្បកិរិយាមិនសមរម្យ? លោកថា ការទាមទាររបស់ អ្នកគ្រូ សេក សុខុម ឲ្យសាលាបញ្ឈប់បិទប្រកាសជារឿងត្រឹមត្រូវ ហើយសាលាគួរធ្វើលិខិតសុំទោស អ្នកគ្រូ សេក សុខុម៖ «ការដែលបញ្ឈប់គេ ហើយមានបិទរូបផ្សាយមានឥរិយាបថមិនសមរម្យ ជារឿងបរិហារកេរ្តិ៍។ ខាងសាលាគួរតែពិចារណា ប្រសិនអ្នកគ្រូនោះប្ដឹងកាន់តែធ្ងន់ធ្ងរចំពោះផ្លូវច្បាប់»។
ជាញឹកញាប់គេអង្កេតឃើញថា ភាគីក្រុមហ៊ុន ឬម្ចាស់រោងចក្រសហគ្រាសមួយចំនួន តែងតែបិទប្រកាស ឬបង្ហោះរូបភាព ក៏ដូចជាសេចក្តីជូនដំណឹងពីការបញ្ឈប់បុគ្គលិកនៅក្នុងបណ្ដាញសារព័ត៌មាន ឬបណ្ដាញសង្គមជាដើម។ ជុំវិញករណីនេះ ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា ស្នើឲ្យភាគីនិយោជក គួរតែបញ្ឈប់សកម្មភាពទាំងនេះ ព្រោះប៉ះពាល់កិត្តិយសបុគ្គល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។