លោកនាយករដ្ឋមន្ត្រី ហ៊ុន សែន ឲ្យដឹងថា ក្រសួង និងស្ថាប័នពាក់ព័ន្ធរបស់រដ្ឋ បានរៀបចំរួចរាល់ហើយនូវយន្តការដែលមិនបាច់ឲ្យកម្មករកម្មការិនី និងសិស្សនិស្សិត ត្រូវបង់លុយថ្លៃទឹកឲ្យម្ចាស់ផ្ទះជួលដូចមុនទៀតទេ។ សហជីពគាំទ្រវិធានការរបស់ប្រមុខរដ្ឋាភិបាល ប៉ុន្តែមិនសូវជឿជាក់លើការអនុវត្តជាក់ស្តែងរបស់មន្ត្រីថ្នាក់ក្រោម។
យន្តការដែលកម្មកររោងចក្រមិនចាំបាច់បង់លុយថ្លៃទឹកឲ្យម្ចាស់ផ្ទះដូចមុន ជាការបង្ហាញការយកចិត្តទុកដាក់លើបញ្ហារបស់កម្មករកម្មការិនីមួយផ្នែកទៀតរបស់រដ្ឋាភិបាលរបស់លោក ហ៊ុន សែន ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់កាន់តែខិតជិតចូលមកដល់។
ថ្លែងក្នុងពិធីសម្ពោធរោងចក្រទឹកស្អាតនិរោធន៍ ជំហានទី២ នៅរាជធានីភ្នំពេញនៅថ្ងៃទី៥ ខែមេសា លោក ហ៊ុន សែន ឲ្យដឹងថា ក្រសួងឧស្សាហកម្ម និងសិប្បកម្ម និងរដ្ឋាករទឹក បានរៀបចំតភ្ជាប់ប្រព័ន្ធទឹកដល់កម្មករកម្មការិនី សិស្សនិស្សិត ដែលពួកគេអាចបង់លុយថ្លៃទឹកតាមតម្លៃរដ្ឋបានកំណត់ មិនមែនតាមការកំណត់ពីម្ចាស់ផ្ទះជួល៖ «ឥឡូវនេះតម្លៃទឹកត្រូវបានកំណត់ ក្រសួង ស្ថាប័នអ្នកផ្គត់ផ្គង់ទឹកដែលធ្វើឲ្យកម្មកររបស់យើងធូរស្រាលនៅក្នុងការបង់តម្លៃទឹកក៏ដូចជាថ្លៃភ្លើងដែរ»។
តាមការបញ្ជាក់របស់លោក ហ៊ុន សែន រដ្ឋតម្រូវឲ្យបង់លុយថ្លៃទឹកមួយម៉ែត្រគូបតម្លៃ ១.២៥០រៀល ប៉ុន្តែម្ចាស់ផ្ទះជួលទាមទារក្នុងមួយម៉ែត្រគូបចាប់ពី ២.០០០រៀលឡើងទៅ។
ទាក់ទងរឿងនេះ អាស៊ីសេរី មិនទាន់អាចសុំការបំភ្លឺបន្ថែមពីអគ្គនាយករដ្ឋាករទឹកស្វយ័តក្រុងភ្នំពេញ លោក ស៊ឹម ស៊ីថា បាននៅឡើយទេនៅថ្ងៃទី៥ ខែមេសា។
រីឯប្រធានសហភាពការងារកម្ពុជា លោក អាត់ ធន់ ឲ្យដឹងថា កម្មករកម្មការិនីភាគច្រើននៅភ្នំពេញ រស់នៅតាមផ្ទះជួល ទទួលបានការតភ្ជាប់ប្រព័ន្ធភ្លើងដែលមិនចាំបាច់បង់លុយទៅម្ចាស់ផ្ទះជួល ប៉ុន្តែការតភ្ជាប់បណ្ដាញទឹកមិនទាន់មាននៅឡើយទេ។ លោកបន្តទៀត ការតភ្ជាប់បណ្ដាញទឹកមានភាពស្មុគស្មាញជាងភ្លើង ដូច្នេះរដ្ឋាភិបាលត្រូវសិក្សាឲ្យច្បាស់ ដោយមានបច្ចេកទេសត្រឹមត្រូវ ជាពិសេសទាមទារឲ្យម្ចាស់ផ្ទះជួលផ្តល់កិច្ចសហការជាមួយមន្ត្រីជំនាញពិនិត្យ៖ «តើអ្វីដែលគាត់ (លោកនាយករដ្ឋមន្ត្រី) ហើយតើអាជ្ញាធរចាប់ផ្ដើមធ្វើអត់ ហើយពេលធ្វើទៅហើយ កម្មករយើងទទួលបានផល ខ្ញុំគិតថា មានប្រយោជន៍ ប៉ុន្តែខ្ញុំខ្លាចតែអត់បានដូចច្បាប់ជួលផ្ទះអ៊ីចឹង»។
រដ្ឋាភិបាលរបស់លោក ហ៊ុន សែន ដែលរងព្យុះភ្លៀងព្រោះការធ្វើបាតុកម្មរបស់គណបក្សសង្គ្រោះជាតិ ដែលមិនពេញចិត្តលទ្ធផលឆ្នោតឆ្នាំ២០១៣ និងមានការចូលរួមយ៉ាងផុសផុលរបស់ក្រុមកម្មករកម្មការិនី គេសង្កេតឃើញថា រដ្ឋាភិបាលផ្ដើមយកចិត្តទុកដាក់លើកម្មករកម្មការិនីច្រើន ដូចជាការធ្វើច្បាប់ផ្ទះជួលក្នុងបំណងមិនឲ្យម្ចាស់ផ្ទះជួល ដំឡើងថ្លៃតាមចិត្ត តភ្ជាប់បណ្ដាញភ្លើងរដ្ឋដល់បន្ទប់កម្មករ និងចុងក្រោយនេះ គឺការតភ្ជាប់បណ្ដាញទឹកដល់កម្មករ និងសិស្សនិស្សិតថែមទៀត។
ជុំវិញរឿងនេះដែរ អ្នកសិក្សាការអភិវឌ្ឍសង្គម លោកបណ្ឌិត មាស នី យល់ថា ដើម្បីសម្រួលដល់ការបង់លុយដល់កម្មករកម្មការិនីដោយមិនបាច់ឲ្យពួកគេធ្វើដំណើរពីកន្លែងការងារ និងកន្លែងស្នាក់នៅ៖ «ទាល់តែមានវិធានការថាតើឲ្យគ្នាបង់នោះ តើបង់យ៉ាងម៉េចដើម្បីឲ្យជិតបំផុត ព្រោះថា កម្មករ កម្មការិនីគ្មាន មិនមានសោហ៊ុយច្រើនដើម្បីធ្វើដំណើរទេ»។
សព្វថ្ងៃនេះ នៅពេលរដ្ឋបានតភ្ជាប់បណ្ដាញភ្លើងដល់កម្មករកម្មការិនី ពួកគេអាចបង់ប្រាក់នៅទីស្នាក់ការអគ្គិសនីកម្ពុជា បង់លុយតាមក្រុមហ៊ុនឯកជន ប៉ុន្តែគេមិនទាន់ដឹងថា ការបង់ថ្លៃទឹកនឹងធ្វើដូច្នេះ ឬយ៉ាងណានោះទេ។
របាយការណ៍ចុងក្រោយរបស់អគ្គិសនីកម្ពុជា បង្ហាញថា យុទ្ធនាការចុះភ្ជាប់ចរន្តអគ្គិសនីតម្លៃ ៦១០រៀលជូនអ្នកជួលផ្ទះ បានជាង ២៣ម៉ឺនបន្ទប់ហើយ (២៣៤.៤២០បន្ទប់)។ ការជួយសម្រួលជីវភាពរបស់កម្មករកម្មការិនីរបស់រដ្ឋាភិបាលកន្លងទៅ ឃើញការតភ្ជាប់ចរន្តអគ្គិសនីទទួលបានជោគជ័យច្រើន ប៉ុន្តែចំណាត់ការក្រៅពីនេះ មិនទាន់ឃើញចេញលទ្ធផលជាដុំកំភួននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។