លោក ហ៊ុន ម៉ាណែត បញ្ជាឱ្យពង្រឹងការអនុវត្តច្បាប់ប្រឆាំងគ្រឿងញៀន លុបបំបាត់គ្រោះថ្នាក់ចរាចរណ៍ និងបង្ក្រាបល្បែងស៊ីសង។ មន្ត្រីសង្គមស៊ីវិលថា បទល្មើសនឹងមិនធ្លាក់ចុះនោះទេ ប្រសិនបើអាជ្ញាធរមិនបង្ក្រាបឱ្យសកម្ម ម៉ឺងម៉ាត់ និងកាត់ផ្ដាច់ប្រភពនៃការនាំចូលគ្រឿងញៀន និងទីតាំងល្បែងស៊ីសងទាំងនោះ។
ថ្លែងក្នុងពិធីសន្និបាតបូកសរុបការងារឆ្នាំ២០២៣ នៅក្រសួងមហាផ្ទៃ កាលពីថ្ងៃទី២៩ ខែកុម្ភៈ នាយករដ្ឋមន្ត្រី លោក ហ៊ុន ម៉ាណែត បានដាក់បទបញ្ជាឱ្យអាជ្ញាធរពាក់ព័ន្ធអនុវត្តគោលនយោបាយ ភូមិ ឃុំ មានសុវត្ថិភាពឱ្យមានប្រសិទ្ធភាព ដោយផ្ដោតជាសំខាន់ទៅលើការពង្រឹងការអនុវត្តច្បាប់ប្រឆាំងគ្រឿងញៀន លុបបំបាត់គ្រោះថ្នាក់ចរាចរណ៍ និងបង្ក្រាបល្បែងស៊ីសង។
លោក ហ៊ុន ម៉ាណែត បានបញ្ជាឱ្យមន្ត្រី និងអាជ្ញាធរមូលដ្ឋានឱ្យបង្ក្រាបគ្រឿងញៀនខុសច្បាប់នៅតាមមូលដ្ឋាន និងនៅតាមក្រសួងស្ថាប័ន អនុវត្តច្បាប់ចរាចរណ៍ផ្លូវគោកឱ្យបានម៉ឺងម៉ាត់ដើម្បីលុបបំបាត់គ្រោះថ្នាក់ចរាចរណ៍ដែលប៉ះពាល់ដល់អាយុជីវិត និងបង្ក្រាបរាល់ល្បែងស៊ីសងខុសច្បាប់គ្រប់ប្រភេទ។
ការដាក់បញ្ជារបស់ លោក ហ៊ុន ម៉ាណែត ក្នុងពេលបទល្មើសគ្រឿងញៀន ករណីគ្រោះថ្នាក់ចរាចរណ៍និងបទល្មើសល្បែងស៊ីសងកំពុងកើតឡើងច្រើន។
នាយកប្រតិបត្តិសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថា ប្រទេសកម្ពុជាមានច្បាប់គ្រប់គ្រាន់សម្រាប់ការបង្ក្រាបបទល្មើសគ្រឿងញៀន ល្បែងស៊ីសង និងលុបបំបាត់គ្រោះថ្នាក់ចរាចរណ៍ជាដើម។ ទោះជាយ៉ាងណា លោក ហេង គឹមហុង ថា មូលហេតុបទល្មើសទាំងនេះនៅតែមានកើនឡើង គឺដោយសារតែអាជ្ញាធរមិនបានអនុវត្តសកម្ម ម៉ឺងម៉ាត់ និងកាត់ផ្ដាច់ប្រភពនៃការនាំចូលគ្រឿងញៀន និងទីតាំងល្បែងស៊ីសងជាដើម។
លោក ហេង គឹមហុង៖ «វាធ្វើឱ្យយើងខាតបង់សេដ្ឋកិច្ចមូលដ្ឋានដែរ ទីពីរធ្វើឱ្យខាតបង់ធនធាននៅពេលដែលមនុស្សស្លាប់ដោយសារគ្រឿងញៀនច្រើន ស្លាប់ដោយសារគ្រោះថ្នាក់ចរាចរណ៍ច្រើន វាក៏ជាចរន្តមួយដែលធ្វើឱ្យមានការខាតបង់ទៅលើធនធានមនុស្សរបស់យើង ការខូចខាត និងការគ្រោះថ្នាក់ ក៏ប៉ះពាល់ទៅដល់ចរន្តសេដ្ឋកិច្ច និងសណ្ដាប់ធ្នាប់សាធារណៈ និងបង្កឱ្យមានការព្រួយបារម្ភពីសន្តិសុខសណ្ដាប់ធ្នាប់»។
លោក ហេង គឹមហុង បន្ថែមថា រដ្ឋាភិបាលក៏គួរបន្ថែមយន្តការផ្សេងទៀតដូចជាការអប់រំពលរដ្ឋឱ្យយល់ដឹងពីផលប៉ះពាល់នៃគ្រឿងញៀន និងល្បែងស៊ីសង ព្រមទាំងតម្រូវឱ្យពលរដ្ឋគ្រប់រូបយល់ដឹងច្បាប់ចរាចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។