របបក្រុងភ្នំពេញគ្រោងកែច្បាប់ការងារតម្រូវឲ្យម្ចាស់រោងចក្របើកប្រាក់អតីតភាព៦ខែម្ដង
2018.05.30
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ថ្លែងនៅក្នុងសិក្ខាសាលាពិគ្រោះយោបល់ស្ដីពីសេចក្ដីព្រាងច្បាប់ស្ដីពីប្រាក់ឈ្នួលអប្បបរមា នៅថ្ងៃទី២២ ខែសីហា ឆ្នាំ២០១៧។
RFA
លោកនាយករដ្ឋមន្ត្រី ហ៊ុន សែន នៅថ្ងៃពុធ ទី៣០ ឧសភា បានស្ដីបន្ទោសលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលបានដោះស្រាយមិនទាន់ចប់ករណីបញ្ហាកម្មករនិយោជិក ទាមទារប្រាក់អត្ថប្រយោជន៍ និងប្រាក់អតីតភាពការងារ ដោយសារតែថៅកែរោងចក្របានរត់ចោល។
ថ្លែងនៅចំពោះមុខកម្មករនិយោជិតជាង១ម៉ឺន៥ពាន់នាក់ នៅស្រុកស្អាង ខេត្តកណ្ដាល លោក ហ៊ុន សែន បានបញ្ជាឲ្យលោក អ៊ិត សំហេង ប្រញាប់ដោះស្រាយបញ្ហានេះឲ្យបានចប់ និងរាយការណ៍ឲ្យលោក ជៀសវាងករណីកម្មករនិយោជិកបន្តធ្វើបាតុកម្ម ឬដើរដាក់ញត្តិនៅគេហដ្ឋានរបស់លោក។
លោក ហ៊ុន សែន ថ្លែងថា នៅក្នុងខែមិថុនាខាងមុខនេះ របបរបស់លោកនឹងធ្វើវិសោធនកម្មច្បាប់ស្ដីពីការងារពាក់ព័ន្ធនឹងរយៈពេលកំណត់ដោយច្បាប់ នៃការបើកប្រាក់អត្ថប្រយោជន៍ និងប្រាក់អតីតភាពការងារជូនកម្មករនិយោជិក។ លោកថា វិសោធនកម្មថ្មីនេះ នឹងតម្រូវឲ្យថៅកែរោងចក្រ ត្រូវតែបើកប្រាក់អតីតភាពការងារឲ្យកម្មករនិយោជិក រៀងរាល់ ៦ខែម្ដង ជាកំហិត ដើម្បីជៀសវាងបញ្ហាថៅកែរោងចក្ររត់ចោលរោងចក្រ ឬប្រកាសក្ស័យធន ក្នុងគោលបំណងគេចវេះពីការទទួលខុសត្រូវនេះ ហើយបន្ទុកនេះ ត្រូវធ្លាក់ទៅលើរបបរបស់លោកទៅវិញ៖ «ម្ដងនោះខ្ញុំបានបើកឲ្យ នៅរោងចក្រមួយនៅខេត្តកណ្ដាល មានរហូតដល់ទៅ ១២លានដុល្លារអាមេរិក។ ក្នុង ១២លានដុល្លារនោះ យើងពិនិត្យឃើញថា បើនិយាយពីប្រាក់ខែទៅវិញតិចតួចណាស់។ ប៉ុន្តែបែរជាប្រាក់អត្ថប្រយោជន៍វាធំពេក កម្មករកម្មការិនីខ្លះបានរហូតដល់ទៅ ២ម៉ឺនដុល្លារ ខ្លះ ១ម៉ឺនដុល្លារ ខ្លះ៧ ទៅ ៨ពាន់ដុល្លារ។ ដូច្នេះ បានសេចក្ដីថា យើងបណ្ដោយទុកឲ្យជំពាក់កម្មករយូរពេក ដល់ទៅពេលម្ចាស់រោងចក្រដួលរលំ ទម្ងន់អំរែកទាំងប៉ុន្មានធ្លាក់មកលើរាជរដ្ឋាភិបាលទាំងអស់។ អ៊ីចឹងទេ ក្នុងខែ៦ នេះ (ខែមិថុនា) ច្បាប់នឹងត្រូវធ្វើវិសោធនកម្ម ៦ខែ ត្រូវបើកជូនម្ដង មិនត្រូវឲ្យជំពាក់យូរទេ»។
ក្រសួងការងារ និងបណ្ដុះបណ្ដាលវិជ្ជាជីវៈរកឃើញថា មានរោងចក្រចំនួន ៩ ត្រូវថៅកែរត់ចោល ដោយមិនបានបើកប្រាក់ខែ ប្រាក់អត្ថប្រយោជន៍ និងប្រាក់អតីតភាពការងារឲ្យកម្មករនិយោជិក ហើយក្រសួងបានដោះស្រាយរួចបានចំនួន ៤រោងចក្រហើយ នៅសល់ ៥ រោងចក្រទៀត ដែលក្រសួងកំពុងប្រមូលទិន្នន័យ។
ទោះជាយ៉ាងណាក៏ដោយ ក្រុមសហជីព ធ្លាប់ទាមទារម្ដងហើយម្ដងទៀត ឲ្យរបបលោក ហ៊ុន សែន មានវិធានការផ្លូវច្បាប់ ដើម្បីចាត់ការលើក្រុមថៅកែរោងចក្រ ដែលតែងតែរត់ចោលកម្មករនិយោជិក មិនទទួលខុសត្រូវ ចំពោះប្រាក់អត្ថប្រយោជន៍ និងប្រាក់អតីតភាពនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ពិធីមង្គលការរបស់ពលករខ្មែរនៅប្រទេសថៃ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
