លោក ហ៊ុន សែន គាំទ្រការផាកពិន័យធ្ងន់ធ្ងរ លើច្បាប់ចរាចរណ៍ផ្លូវគោក
2020.05.16
លោកនាយករដ្ឋមន្ត្រី ហ៊ុន សែន (ឆ្វេង) ថ្លែងក្នុងសន្និសីទកាសែត នាវិមានរដ្ឋសភា នៅថ្ងៃទី៧ ខែមេសា ឆ្នាំ២០២០។
រូបហ្វេសប៊ុកលោក ហ៊ុន សែន
លោកនាយករដ្ឋមន្ត្រី ហ៊ុន សែន និងលោក ស ខេង ប្រកាសគាំទ្រចំពោះការផាកពិន័យធ្ងន់ធ្ងរ លើច្បាប់ចរាចរណ៍ផ្លូវគោក ទោះបីជាមានប្រតិកម្មពីពលរដ្ឋក្រីក្រ និងមន្ត្រីបក្សប្រឆាំងថា ការផាកពិន័យធ្ងន់ធ្ងរបណ្តាលនេះ ឱ្យប៉ះពាល់ជីវភាពពលរដ្ឋដែលកំពុងរងគ្រោះ ដោយសារតែជំងឺ covid-19 ក៏ដោយ។
ប្រជាពលរដ្ឋ លើកឡើងថា ក្នុងកាលៈទេសៈដែលប្រជាពលរដ្ឋ គ្មានការងារធ្វើ បាត់បង់ប្រាក់ចំណូល ដោយសារការរាលដាលនៃជំងឺកូវីដ១៩ មិនគួរណារដ្ឋាភិបាល បន្ថែមបន្ទុកកាន់តែធ្ងន់ធ្ងរ ដល់ពួកគេនោះឡើយ។
លោក ហ៊ុន សែន លើកហេតុផលថា ប្រការដែលលោកជំរុញឱ្យបន្តអនុវត្តវិធានការរឹតបន្តឹង ច្បាប់ចរាចរណ៍ផ្លូវគោក និងបង្កើនការផាកពិន័យធ្ងន់ធ្ងរនេះ ដោយសារអត្រាគ្រោះថ្នាក់ចរាចរណ៍មានការថយចុះ ក្នុងអំឡុងពេលចាប់ផ្តើមរិតបន្តឹងខ្លាំងរយៈពេល ១៤ថ្ងៃ នៅដើមខែឩសភានេះ។
ថ្លែងក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី១៥ ខែឧសភា លោក ហ៊ុនសែន ត្រូវបានរដ្ឋមន្ត្រីក្រសួងព័ត៌មានលោក ខៀវ កាញារីទ្ធ ដកស្រង់ផ្សព្វផ្សាយក្នុងគណនីហ្វេសប៊ុកថា «កម្ពុជារងគ្រោះពេកហើយ ពីគ្រោះថ្នាក់ចរាចរណ៍។ ប្រទេសកម្ពុជាមានប្រជាជន១៦លាននាក់ តែអ្នកស្លាប់ដោយគ្រោះថ្នាក់ចរាចរណ៍ ចង់ស្មើនឹងវៀតណាម និងថៃ ដែលមានប្រជាជនជិត ៩០លាននាក់ និង ៧០លាននាក់។ ហេតុនេះការអនុវត្តច្បាប់ចរាចរណ៍ គឺមិនដកថយទេ»។
ទោះជាមានការស្នើសុំពន្យាឬក៏ផ្អាកការរឹតបន្តឹងការអនុវត្តច្បាប់ចរាចរណ៍ផ្លូវគោកនេះក៏ដោយ លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បញ្ជាក់ប្រាប់ក្នុងគណនី ហ្វេសប៊ុករបស់លោកថា ការពន្យាឬក៏ផ្អាកការរឹតបន្តឹងការអនុវត្តច្បាប់នេះ គឺប្រៀបបាននឹងការបណ្តែតបណ្តោយឱ្យប្រជាពលរដ្ឋខ្មែ នៅតែបន្ត រងរបួស និងស្លាប់បាត់បង់ជីវិតកាន់តែច្រើនឡើងៗថែមទៀត។
ទោះជាយ៉ាងណា លោក ស ខេង ក៏បានក្រើនរំលឹក ដល់កងកម្លាំងមានសមត្ថកិច្ច និងមន្ត្រីពាក់ព័ន្ធទាំងអស់ ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឱ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួនដើម្បីបម្រើផលប្រយោជន៍ជាតិ និងប្រជាពលរដ្ឋ។
ជុំវិញវិធានការផាកពិន័យនេះ អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានប្រាប់អាស៊ីសេរីតាមទូរស័ព្ទកាលពីយប់មិញថា ចាប់តាំងពីការអនុវត្តច្បាប់ចរាចរណ៍តឹងតែងខ្លាំង ពីថ្ងៃទី១ ដល់ថ្ងៃទី១៤ ឩសភាមក អត្រាគ្រោះថ្នាក់ចរាចរណ៍ថយចុះ ហើយប្រជាពលរដ្ឋងាកមកចិត្តទុកដាក់ខ្លាំងលើច្បាប់ចរាចរណ៍វិញ ដែលនាំឱ្យចំនួនបទល្មើសចរាចរណ៍កាន់តែតិច៖ «ឆ្លុះបញ្ចាំងថា ពលរដ្ឋគោរពច្បាប់ចរាចរណ៍កាន់តែច្រើន គាត់បើកបរគោរពច្បាប់ គោរពភ្លើងសញ្ញា គោរពល្បឿន ពាក់ខ្សែក្រវ៉ាត់ ពាក់មួកសុវត្ថិភាព មិនបើកវ៉ាគ្នា។ បន្ថែមពីនេះគាត់អត់បើកបរមានភាពស្រវឹង គាត់អត់និយាយទូរស័ព្ទពេលបើកបរ។ ទាំងនេះហើយគឺជាហេតុផលដែលបង្កឱ្យមានគ្រោះថ្នាក់»។
របបក្រុងភ្នំពេញ បានសម្រេចយកឆ្នាំ២០២០នេះ ជាឆ្នាំប្រកាសអាសន្នសម្រាប់ទប់ស្កាត់និងកាត់បន្ថយគ្រោះថ្នាក់ចរាចរណ៍។ ចាប់ពីថ្ងៃទី០១ ខែឧសភាមក សមត្ថកិច្ចចរាចរណ៍ បានចាត់ចេញវិធានការរឹតបន្តឹងច្បាប់ចរាចរណ៍ផ្លូវគោកដោយបង្កើនការផាកពិន័យធ្ងន់ធ្ងរជាងមុន លើស ២ ឬ៣ដង បើធៀបនឹងការផាកពិន័យចាស់។ វិធានការនេះ ធ្វើឡើងស្របពេល ពិភពលោកកំពុងទទួលរងវិបត្តិសេដ្ឋកិច្ចធ្ងន់ធ្ងរ និងមានមនុស្សស្លាប់ជាច្រើនម៉ឺននាក់ ដោយសារការរីកដាលសកលនៃជំងឺកូវិត១៩ (Covid-19)។
បញ្ហានេះហើយដែលជាហេតុនាំឱ្យប្រជាពលរដ្ឋក្រីក្រ ដែលបាត់បង់ការងារ គ្មានប្រាក់ចំណូល ទទួលរងសម្ពាធហិរញ្ញវត្ថុ កាន់តែខ្លាំងថែមទៀត។
កម្មករមួយចំនួនប្រាប់អាស៊ីសេរីថា រដ្ឋាភិបាល គួរតែទុកពេលវេលាឱ្យប្រជាពលរដ្ឋ មានពេលវេលាគ្រប់គ្រាន់ ត្រៀមខ្លួនទៅធ្វើប័ណ្ណបើកបរ ដូរប័ណ្ណសំគាល់យានយន្ត និងយកយានយន្តទៅពិនិត្យពីសុវត្ថិភាពបើកបរជាដើម ដើម្បីបញ្ជៀសការបង់ផាកពិន័យធ្ងន់ធ្ងរនេះ។ ក៏ប៉ុន្តែសមត្ថកិច្ចចរាចរណ៍បែរជាធ្វើទាន់ហន់បែបនេះទៅវិញ៖ «ខ្ញុំគ្មានម៉ូតូទេ គឺដើរទៅធ្វើការ ប៉ុន្តែមួយរយៈនេះ ខ្ញុំសង្កេតឃើញថា ធ្វើបាបប្រជាពលរដ្ឋដែលធ្វើដំណើរណាស់ ព្រោះការផាកពិន័យចរាចរណ៍ផ្លូវគោកនេះ គឺតឹងតែងខ្លាំង និងអស់លុយច្រើនខ្លាំងណាស់។ ការងារអត់មានធ្វើទេ ដោយសារកូវីដ១៩ ហើយខ្ញុំអត់ពេញចិត្តទេ ច្បាប់នេះចេញមកទាន់ហន់ពេក ពីព្រោះជីវភាពពលរដ្ឋក្រីក្រ។ សម្លេងមួយទៀត...ខ្ញុំឃើញថា មានផលវិជ្ជមាននិងអវិជ្ជមាន ខ្ញុំលើកទឹកចិត្តឱ្យផាកដែរ ប៉ុន្តែត្រូវតែបង្ហាត់បង្ហាញជាមុន ហើយប្រាប់ពលរដ្ឋថា ច្បាប់នេះបានចេញហើយ គឹទុកពេល ២ ឬ៣ខែ ប៉ុន្តែដល់ចេញភ្លាមធ្វើភ្លាមអ៊ីចឹង គឺតឹងចិត្តណាស់»។
លោក ឆាយ គឹមខឿន ឱ្យដឹងទៀតថា រយៈពេល១៤ថ្ងៃ នៃការរឹតបន្ដឹងការអនុវត្តន៍ច្បាប់ចរាចរណ៍ផ្លូវគោកនេះ នគរបាលចរាចរណ៍ បានផាកពិន័យយានយន្តចំនួនជាង២ម៉ឺន ២ពាន់គ្រឿង (២២,៣៨១) ក្នុងនោះមានម៉ូតូ ជិត ១ម៉ឺន ៧ពាន់គ្រឿង (១៦,៥៧៩)។ ប៉ុន្តែលោកមិនបានប្រាប់ពីចំនួនទឹកប្រាក់ដែលទទួលបានពីការបង់ផាកពិន័យនេះទេ។ ចំណែកគ្រោះថ្នាក់ចរាចរណ៍វិញ ក្នុងអំឡុងពេល ១៤ថ្ងៃនេះគឺកើតឡើងសរុប ៩៣លើក ស្លាប់ ៤៨នាក់ និងរបួស ១២២នាក់ ដែលចំនួននេះថយចុះច្រើន បើធៀបនឹងរយៈពេលដូចគ្នាក្នុងឆ្នាំ២០១៩។ ក៏ប៉ុន្តែអ្នកឃ្លាំមើលសង្គម និងពលរដ្ឋអះអាងថាការថយចុះនៃគ្រោះថ្នាក់ចរាចរណ៍នេះ ដោយសារតែពួកគេមិនហ៊ានធ្វើដំណើរចេញក្រៅ ព្រោះខ្លាចត្រូវប៉ូលិសផាកពិន័យប្រាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
- តំណាងរាស្ត្រសភាអឺរ៉ុប ព្រមានថា នឹងមិនមានការផ្លាស់ប្ដូរឡើយ បើអឺរ៉ុបមិនដាក់សម្ពាធលើរដ្ឋាភិបាលកម្ពុជា
អត្ថបទពេញនិយម
សង្គម
