ប្រជា​នេសាទ​បាត់ដំបង​រិះគន់​អាជ្ញាធរ​ថា​បង្ក្រាប​បទល្មើស​ខុស​គោលដៅ

ប្រជាពលរដ្ឋ ៤​នាក់ តំណាង​ឲ្យ​អ្នក​ភូមិ​ជាង ២០០​គ្រួសារ បាន​នាំ​គ្នា​ធ្វើ​ដំណើរ​ទៅ​ទីស្នាក់ការ​សមាគម​អាដហុក (Adhoc) ក្នុង​ខេត្ត​បាត់ដំបង ដើម្បី​សុំ​ឲ្យ​សមាគម​នេះ​ធ្វើ​កិច្ច​អន្តរាគមន៍​ទៅ​អាជ្ញាធរ និង​មន្ត្រី​ជលផល អនុញ្ញាត​ឲ្យ​អ្នក​ភូមិ​អាច​មាន​លទ្ធភាព​ប្រកប​របរ​នេសាទ​ជា​លក្ខណៈ​គ្រួសារ​ឡើង​វិញ។
ដោយ សួន សុផលមុន្នី
2013.03.02
Share on WhatsApp
Share on WhatsApp
បាត់ដំបង​៣០៣ រូប​សំណាក​តា​ដំបង​គ្រញូង​នៅ​ក្នុង​ទីរួម​ខែត្រ​បាត់ដំបង។
Photo: RFA

ការ​ស្វែង​រក​កិច្ច​អន្តរាគមន៍​របស់​អ្នក​ភូមិ​រស់​នៅ​លើ​ទឹក​នេះ កើត​មាន​ឡើង​ក្រោយ​ពី​ក្រុម​សមត្ថកិច្ច​ចម្រុះ​បាន​ចុះ​ទៅ​ហាម​ឃាត់​អ្នក​ភូមិ​ពាក់កន្ទេល មិន​ឲ្យ​នេសាទ​នៅ​ក្នុង​ឡូត៍​លេខ​១ ដែល​ជា​ដែន​នេសាទ​របស់​រាស្ត្រ។

ប្រជា​នេសាទ​ក្នុង​ស្រុក​ឯកភ្នំ ខេត្ត​បាត់ដំបង បាន​រិះគន់​សមត្ថកិច្ច​ថា បាន​ចុះ​បង្ក្រាប​បទ​ល្មើស​នេសាទ​ខុស​គោលដៅ និង​ផ្ទុយ​ពី​ខ្លឹមសារ​នៃ​បទ​បញ្ជា​របស់​ប្រមុខ​មេ​ដឹកនាំ​រដ្ឋាភិបាល។

លោក វឿន វណ្ណៈ ជា​ពលរដ្ឋ​រស់​នៅ​ឃុំ​កោះជីវាំង បាន​ថ្លែង​ថា សមត្ថកិច្ច​ចម្រុះ​បាន​ចុះ​ទៅ​បង្ក្រាប​បទ​ល្មើស​បរណរ៉ាវ ឬ​ហៅ​ថា​ស្បៃ​មង​ក្រឡា​ល្អិត​របស់​ប្រជាពលរដ្ឋ​ជាច្រើន​ម្ចាស់ នៅ​ឡូត៍​លេខ​១ ប៉ុន្តែ​បទ​ល្មើស​នេសាទ​នេះ​មាន​នៅ​ក្នុង​ឡូត៍​លេខ​២ ដែល​ជា​តំបន់​អភិរក្ស​នោះ ពួក​គេ​ពុំ​បាន​ទៅ​បង្ក្រាប​នោះ​ឡើយ។

លោក វឿន វណ្ណៈ៖ «ក្រុម​សមត្ថកិច្ច មាន​ប៉ូលិស មាន​ជលផល មាន​ប៉េអិម មាន​ទាហាន កាប់​បំផ្លាញ​របស់​ខ្ញុំ​អស់​នៅ​ដី​រាស្ត្រ តែ​ចំពោះ​ដី​អភិរក្ស គេ​ដាក់​បាន ចំពោះ​ខ្ញុំ​ប្រជាពលរដ្ឋ​ទាំង​អស់​ដាក់​ដី​រាស្ត្រ​ដាក់​អត់​បាន ជាង ២០០​គ្រួសារ។ ខ្ញុំ​សុំ​ផ្ដិត​មេដៃ​បាន​តែ​ជាង ៦០​នាក់​ទេ ដែល​យក​ឡើង​មក​នេះ។ អ្នក​នេសាទ​ស្រុក​ទន្លេ អត់​មាន​ស្រែ មាន​ភ្លឺ ខ្ញុំ​បាទ​សុំ​តែ​រស់​ទេ អត់​ចង់​ធ្វើ​បាន​ធ្វើ​មាន​ទេ»

បញ្ហា​នេះ ប្រជាពលរដ្ឋ​ចាត់​ទុក​ជា​ការ​អនុវត្ត​ផ្ទុយ​ពី​យុទ្ធសាស្ត្រ​កែ​ទម្រង់​ធនធាន​មច្ឆា​ជាតិ​របស់​រដ្ឋាភិបាល។ ច្បាប់ និង​បទ​បញ្ជា​លោក​នាយក​រដ្ឋមន្ត្រី ហ៊ុន សែន ដែល​បាន​ប្រកាស​នា​រយៈកាល​កន្លង​មក​នោះ មាន​ពិត​មែន ប៉ុន្តែ​មាន​មន្ត្រី​ក្រោម​ឱវាទ មិន​បាន​អនុវត្ត​ទប់ស្កាត់​រាល់​បទ​ល្មើស​នេសាទ។

អ្នក​ភូមិ​ម្នាក់​ទៀត​ឈ្មោះ សូ សៀង បាន​អះអាង​ថា សមត្ថកិច្ច​ចម្រុះ​បាន​ចុះ​ទៅ​បង្ក្រាប​បទ​ល្មើស​នេសាទ​ខុស​ច្បាប់​មាន​ការ​រើសអើង។ នៅ​ភូមិ​ពាក់កន្ទេល មាន​ប្រជា​នេសាទ​ខ្លះ​បាន​បង់​លុយ​ទៅ​សមត្ថកិច្ច​ម្នាក់​ចំនួន ១លាន​រៀល ប៉ុន្តែ​ក្រោយ​មក ពួក​គេ​បាន​ចុះ​កាប់​បំផ្លាញ​បរណរ៉ាវ នោះ ប៉ុន្តែ​នៅ​ឡូត៍​លេខ​២ មាន​បទ​ល្មើស​នៅ​កើត​មាន​ដដែល៖ «ភូមិ​ពាក់កន្ទេល ជា​ភូមិ​បណ្ដោះ​អាសន្ន​ទេ ប៉ុន្តែ​ខ្ញុំ​មាន​បញ្ហា​រក​ទៅ​រក​មិន​បាន គេ​កាប់ ឲ្យ​ពួក​ខ្ញុំ​អត់​បាន​រក​ផង។ កាល​ពី​ថ្ងៃ​ទី២១ ខ្ញុំ គេ ១​លាន ប៉ុន្តែ​នៅ​តែ​គេ​កាប់​ចោល​ទៀត កាល​ពី​ថ្ងៃ​ទី២១ បួន​នាក់ ម្នាក់ ១​លាន បួន​នាក់​អស់ ៤​លាន»

លោក យិន ម៉េងលី ជា​អ្នក​សម្របសម្រួល​សមាគម​អាដហុក ប្រចាំ​ខេត្ត​បាត់ដំបង បាន​ថ្លែង​ថា សមាគម​អាដហុក នឹង​ធ្វើ​កិច្ច​អន្តរាគមន៍​ជួយ​អ្នក​ភូមិ​ទៅ​អាជ្ញាធរ​ស្រុក​ឯកភ្នំ ដើម្បី​ជំរុញ​ឲ្យ​អាជ្ញាធរ​ពិនិត្យ​មើល​ការ​លំបាក​របស់​អ្នក​ភូមិ​រស់​នៅ​លើ​ទឹក​បឹង​ទន្លេសាប នោះ​ឡើង​វិញ។ លោក​បាន​រិះគន់​ចំពោះ​សមត្ថកិច្ច​ពាក់ព័ន្ធ ដែល​បាន​ចុះ​យក​លុយ​ពី​អ្នក​ភូមិ​ថា ជា​ជំងឺ​រ៉ាំរ៉ៃ​យូរ​ហើយ៖ «ចំណាត់​ការ​បែប​ទឹក​លុយ​នេះ ជា​រឿង​មួយ​ដែល​វា​មាន​យូរ​ហើយ មាន​បទ​បញ្ជា​ស្រែក​ពី​លើ​មក។ ប៉ុន្តែ នៅ​ខាង​ក្រោម​នេះ នៅ​ដដែល នេះ​ជា​បញ្ហា​មួយ​ដែល​លំបាក ហើយ​ក៏​ជា​អំពើ​ពុក​រលួយ​មួយ​ដែរ។ អា​នេះ​ត្រូវ​តែ​ចុះ​ធ្វើ​ការ​អង្កេត​ពី​អាជ្ញាធរ ឬ​ក៏​ស្ថាប័ន​ពាក់ព័ន្ធ ការ​យក​លុយ​នេះ»

ឡូត៍​នេសាទ​ទាំង​អស់​នៅ​ជុំវិញ​បឹង​ទន្លេសាប ត្រូវ​បាន​ដក​ហូត​មក​ដាក់​ជា​សម្បត្តិ​រដ្ឋ​វិញ។ ទន្ទឹម​គ្នា​នេះ រដ្ឋាភិបាល​ហាម​ឃាត់​មិន​ឲ្យ​ប្រជាពលរដ្ឋ​ប្រើប្រាស់​ឧបករណ៍​នេសាទ​ខុស​ច្បាប់ ដើម្បី​ចាប់​ត្រី ហើយ​បាន​អំពាវនាវ​សុំ​ឲ្យ​ប្រជាពលរដ្ឋ​នៅ​ក្នុង​ប្រទេស រួម​គ្នា​ទប់ស្កាត់​បទ​ល្មើស​នេសាទ តែ​អនុញ្ញាត​ឲ្យ​មាន​ការ​នេសាទ​ជា​លក្ខណៈ​គ្រួសារ និង​ត្រូវ​រួម​គ្នា​ការពារ​តំបន់​អភិរក្ស​ត្រី​ក្នុង​បឹង​ទន្លេសាប៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។