អ្នក កែម ឡី និយម​មួយចំនួន​នៅតែ​បន្ត​រំលឹក​ពី​វីរភាព​របស់​លោក​តាមរយៈបទ​ចម្រៀង និង​កំណាព្យ

ដោយ សេក បណ្ឌិត
2023.07.09
អ្នក កែម ឡី និយម​មួយចំនួន​នៅតែ​បន្ត​រំលឹក​ពី​វីរភាព​របស់​លោក​តាមរយៈបទ​ចម្រៀង និង​កំណាព្យ អ្នកសិក្សាការ​អភិវឌ្ឍសង្គម លោក​បណ្ឌិត កែម ឡី ចូលរួមវេទិកា​អ្នកស្ដាប់​វិទ្យុ​អាស៊ីសេរី កាលពីថ្ងៃទី៨ កក្កដា ២០១៦។
RFA File

និស្សិត និង​ប្រជាពលរដ្ឋ​ដែល​ជា​អ្នក កែម ឡី និយម​មួយ​ចំនួន​នៅតែ​បន្ត​រំលឹក​ពី​វីរភាព​របស់​លោក​តាមរយៈ​បទ​ចម្រៀង និង​កំណាព្យ។

អត្ថន័យ​ចម្រៀង និង​កំណាព្យ​ទាំងនោះ​ភាគច្រើន​ផ្តើម​ចេញ​ពី​ទ្រឹស្ដី​ទស្សនៈ និង​បទ​វិភាគ​របស់​បណ្ឌិត កែម ឡី កាលពី​លោក​នៅ​មាន​ជីវិត។

តើ​មូល​ហេតុអ្វី​បាន​ជា​ពួកគាត់​សម្រេច​យក​វិធីសាស្ត្រ​តែង​និពន្ធ​ចម្រៀង​និង​កំណាព្យ​ដើម្បី​ផ្សព្វផ្សាយ​រំលឹក​អំពី​វីរភាព​បណ្ឌិត កែម ឡី ក្នុង​ខួប​ដែល​ឃាតក​បាញ់សម្លាប់​លោក​យ៉ាង​ដូច្នេះ...?

និស្សិត និង​ប្រជាពលរដ្ឋ​ដែល​នៅតែ​គោរព​ស្រលាញ់​បណ្ឌិត កែម ឡី បាន​ចងក្រង​ទស្សនៈ​ពេញនិយម​មួយចំនួន​របស់​លោក​ដូចជា អ្នក​រួត​វាំងនន​សង្គម​ជូត​ទឹកភ្នែក​រួច​បន្តដំណើរ​ទៅ​មុខ​ទៀត និង​ថា ក្នុង​សង្គម​បច្ចុប្បន្ន​ពោ​ពេញ​ដោយ​សត្វ​សាហាវ​ជាដើម​នោះ​មក​ចង់​ក្រង​ជា​អត្ថបទ​កំណាព្យ​ព្រមទាំង​បញ្ចូល​នូវ​សកម្មភាព​របស់​លោក ដើម្បី​ជាតិ​កាល​នៅ​មាន​ជីវិត​ដើម្បី​បញ្ជាក់​ពី​ការ​គោរព​ស្រលាញ់​ក្នុង​ថ្ងៃ គម្រប់​ខួប​៧​ឆ្នាំ​នៃ​មរណភាព​របស់​លោក គឺ​នៅ​ថ្ងៃទី​១០ កក្កដា ២០១៦ -១០ កក្កដា ២០២៣។

កំណាព្យ

«​ថ្ងៃ​១០​កក្កដា​២០២៣ រាស្ត្រ​ខ្មែរ​ប្រុស​ស្រី​ចងចាំ​ថា

ជា​ថ្ងៃ​ខួប​វីរជន​ខេមរា ត្រូវ​មនុស្ស​ឬ​ស្យា​បាញ់​ប្រល័យ។

ថ្ងៃ​១០​កក្កដា ២០១៦ រាស្ត្រ​ខ្មែរ​ទុក្ខព្រួយ​សោក​រីងរៃ

ឃាតក​ប្រហារ​បណ្ឌិត កែម ឡី ២០២៣​ខួប​៧​ឆ្នាំ។

វីរជន កែម ឡី ដ៏​អស្ចារ្យ ខ្មែរ​គ្រប់​អង្គារ​គួរ​ចងចាំ

វីរភាព​ដែល​លោក​បាន​ខិតខំ ព្រោះ​ចង់​ឲ្យ​ខ្មែរ​ថែ​ទឹកដី។

នេះ​ជា​អត្ថបទ​កំណាព្យ​ដែល​មាន ចំណងជើង​ថា «វីរបណ្ឌិត កែម ឡី នៅក្នុង​ចិត្ត​ខ្ញុំ​» ដែល​និពន្ធ​ដោយ យុវជន អ៊ុក ដែន ជា​កសិករ​នៅ​សហគមន៍​រស្មី​សាមគ្គី​ឃុំ​រស្មី​សាមគ្គី ស្រុក​ឱរ៉ាល់ ខេត្ត​កំពង់ស្ពឺ។

អត្ថបទ​កំណាព្យ​មាន​ច្រើន​តទៅ​ទៀត ដែល​និយាយ​ពី​លើក​ពី​កង្វល់​របស់​ពលរដ្ឋ​ប្រាប់​ទៅ​រដ្ឋាភិបាល ឲ្យ​ជួយ​ដោះស្រាយ បញ្ហា​រាស្ត្រ​ក្រីក្រ​តាម​ជា​អនុសាសន៍​បណ្ឌិត កែម ឡី។

«តែ​ជនឧក្រិដ្ឋ​ឥត​មេត្តា មក​ផ្ដាច់​សង្ខារ​ឧត្តម​បុគ្គល​ធនធាន​ដ៏​មាន​សក្ដានុពល ផ្ដាច់​ផ្ដួល​ប្រហារ​ជាតិ​សាសន៍​ឯង»

ខ្ញុំ​នឹក ខ្ញុំ​ស្ដាយ ខ្ញុំ​ស្រណោះ វីរភាព​បណ្ឌិត​គួរ​ស្ញប់ស្ញែង​ព្រោះ​ជាតិ​ប្រជា លោក​ប្រឹងប្រែង ទោះ​បង់​ខ្លួនឯង​លោក​មិន​ខ្លាច​...»

យុវជន អ៊ុក ដែន បាន​សូត្រ​កំណាព្យ​នេះ​ដោយ​ផ្ទាល់​ខ្លួនឯង នៅ​ចំពោះមុខ​ភ្ញៀវ​ជាតិ និង​អន្តរជាតិ​ដែល​ជា​តំណាង​អង្គទូត​ប្រទេស​ប្រទេស​ប្រជាធិបតេយ្យ​ប្រចាំ​ប្រទេស​កម្ពុជា ក្នុង​ពិធី​ប្រារព្ធ​ខួប​៧​ឆ្នាំ នៃ​មរណភាព​បណ្ឌិត កែម ឡី នៅ​មជ្ឈមណ្ឌល​សិទ្ធិមនុស្ស​កម្ពុជា កាល​ពី​ថ្ងៃ​ព្រហស្បតិ៍​ទី៦ កក្កដា។

យុវជន អ៊ុក ដែន បាន​បញ្ជាក់​ពី​មូលហេតុ​ដែល​នាំ​ឲ្យ​លោក​សរសេរ​ជា​កំណាព្យ​នេះ​ឡើង​គឺ​ដោយសារ​ស្រលាញ់​នូវ​វីរភាព​របស់​លោក ដូច​ចំណងជើង​កំណាព្យ​នេះ​អ៊ីចឹង គឺ​លោក​លះបង់​គ្រប់​បែបយ៉ាង​ព្រោះ​ចង់​ឲ្យ​ខ្មែរ​គ្រប់​ប្រាណ បាន​ចេះដឹង​ស្គាល់​តម្លៃ​ខ្លួនឯង ស្រលាញ់​ការពារ​ទឹកដី ​និង​ជាតិ​សាសន៍​របស់​ខ្លួន​ហើយ​ប្រឆាំង​រាល់​អំពើ​អយុត្តិធម៌​ទាំងឡាយ។

យុវជន អ៊ុក ដែន៖ «នេះ​ជា​អ្វី​ដែល​ដក់​ជាប់​ក្នុង​ចិត្ត​របស់ខ្ញុំ ឃើញថា គាត់​បាន​យកចិត្តទុកដាក់​អំពី​បូរណភាព​ទឹកដី ជាពិសេស​លើកទឹកចិត្ត​យុវជន​ឲ្យ​ចូលរួម​លើកកម្ពស់​សិទ្ធិ​ក្នុង​ការ​បញ្ចេញមតិ...»

ចំណែក​យុវជន​ម្នាក់ទៀត​ជា​និស្សិត​កំពុង​សិក្សា​ផ្នែក​សង្គមវិទ្យា គឺ​លោក គីម ជាលីន ក៏​បាន​ចំណាយ​ពេល​ក្រៅពី​ការ​សិក្សា​តាក់តែង​កំណាព្យ​ចូលរួម​លើ​វេទិកា​សូត្រ​កំណាព្យ​ក្នុង​ថ្ងៃ​រំលឹក​ខួប​នេះ​ដែរ។

លោក កើត សារ៉ាយ ប្រធាន​សមាគមនិស្សិត​បញ្ញវន្ត​ខ្មែរ ជា​អ្នក​ជួយ​សូត្រ​ជំនួស​ម្ចាស់​កំណាព្យ​គឺ​លោក គីម ជាលីន៖

«​ថ្ងៃ​ដប់​កក្កដា ស្តារម៉ាត (Star Mart)​បូកគោ កូន​ខ្មែរ​ថ្ងួចថ្ងូរ​ទ្រហោ​ទួញ​យំ

ទ្រហឹង​រំពង​ឮលាន់​រងំ ប្រគំ​រណ្ដំ​ដាស់​លោក​បណ្ឌិត។

ថ្ងៃ​ប្រាំមួយ​កើត​ខែជេស្ឋ​ឆ្នាំវក​ស្នូរ​គ្រាប់​ផ្តាច់​យក​ឆាប​ឆក​ជីវិត​

ដោយ​ដៃ​ខ្មាន់​ខ្មៅ ខ្មាំង​ទោសឧក្រិដ្ឋ នាំ​យក​បណ្ឌិត ចាក​ឆ្ងាយ​ខេមរា។

ខ្មែរ​ជូត​ទឹកភ្នែក អស់​ប្រាំពីរ​ឆ្នាំ បណ្ឌិត​ផ្តែផ្តាំ បន្ត​យាត្រា​ឈប់​អស់​សង្ឃឹម សង្រេង​សោកា​ស្នង​មនសិការ អ្នក​រូត​វាំងនន»

បណ្ឌិត​ស្លាប់​ទៅ​តែ​ព្រលឹង​នៅ​ស្មារតី​ជ្រាប​ជ្រៅ ជម្រៅ​ចិត្ត​កូន​

ឥត​ងាក​រេរា រលាប​សាបសូន្យ​មាគ៌ា​ជា​ក្បូន ធម៌​អហិង្សា...»

លោក គីម ជាលីន ឲ្យ​ដឹង​ថា ការដែល​សរសេរ​កំណាព្យ​នេះ​ឡើង​ដោយ​លោក​សោកស្ដាយ​ការ​បាត់បង់​បណ្ឌិត​ធ្វើ​ឱ្យ​ពលរដ្ឋ​ពេញ​ផ្ទៃ​ប្រទេស​ទួញ​យំ​សោកស្តាយ ធនធាន​មនុស្ស​ដ៏​កម្រ​របស់​ជាតិ។ ពិសេស​ជាង​នេះ​ទៅ​ទៀត​នោះ គឺ​លោក​មិន​ចង់​ឲ្យ​គតិ​អប់រំ​របស់​លោក​អំពី​បញ្ហា​ប្រទេសជាតិ​អំពើពុករលួយ អយុត្តិធម៌​សង្គម​បាត់បង់ ទៅតាម​រូប​កាយ​របស់​លោក​បណ្ឌិត​ឡើយ​។ ទស្សនៈ​របស់​លោក​បណ្ឌិត​ជាច្រើន​បាន​អប់រំ​យុវជន​ឲ្យ​ចេះ​តស៊ូ និង​គិត​អំពី​អនាគត​របស់​ខ្លួន​ឲ្យ​ចេះ​មើល​ឃើញ​ពី​បញ្ហា​សង្គមជាតិ និង​ចូលរួម​ដោះស្រាយ។

«ខ្ញុំ​គោរព​ស្រលាញ់​ពលីកម្ម ​លះបង់​របស់​គាត់ ដើម្បី​ជួយ​ខ្មែរ​ឲ្យ​បាន​ប្រសើរ​ឡើង​...»

មជ្ឈមណ្ឌល​សិទ្ធិមនុស្ស​កម្ពុជា​សិស្ស និស្សិត​និង​ប្រជាពលរដ្ឋ​ជាង ៥០​នាក់ រួមគ្នា​ប្រារព្ធ​ពិធី​រម្លឹក​ខួប​៧​ឆ្នាំ នៃ​មរណភាព​បណ្ឌិត កែម ឡី កាល​ពី​ព្រឹក​ថ្ងៃ​ព្រហស្បតិ៍​ទី​៦ កក្កដា កន្លង​ទៅ។

នាយក​ផ្នែក​តស៊ូ​មតិ​នៃ​មជ្ឈមណ្ឌល​សិទ្ធិមនុស្ស​កម្ពុជា​លោក សួន យុធ្យា ឲ្យ​ដឹង​ថា របៀបវារៈ​សំខាន់ៗ​នៅក្នុង​ពិធី​នេះ​មាន​ដូចជា​ពិធីសូត្រមន្ត​ឧទ្ទិស​ជូន​លោក​បណ្ឌិត កែម ឡី អាន​កំណាព្យ​និង​អត្ថបទ​ខ្លី​ដែល​ត្រូវ​បាន​ជ្រើសរើស​ពី​អ្នក​គោរព​ស្រលាញ់ លោក​បណ្ឌិត កែម ឡី ដែល​បាន​ផ្ញើ​មក​ចូលរួម​ជាមួយ​មជ្ឈមណ្ឌល​សិទ្ធិមនុស្ស​កម្ពុជា​ចូលរួម​ក្នុង​កម្មវិធី​នេះ។

លោក​ថា អត្ថបទ​កំណាព្យ​ដែល​ទទួល​បាន​ពី​មហាជន​មាន​ជាង ៣០​អត្ថបទ ប៉ុន្តែ​ក្រុមការងារ​លោក​ជ្រើសរើស​ចម្រាញ់​យក​តែ​៧​ប៉ុណ្ណោះ​មក​អាន និង​សូត្រ​ជូន​ភ្ញៀវ​ដែល​បាន​ចូលរួម​ផ្ទាល់​នៅ​វេទិកា​ក្នុង​កម្មវិធី​និង​ផ្សាយ​ផ្ទាល់​តាម​បណ្ដាញ​សងុ្គម។

កម្មវិធី​ឆ្នាំនេះ​ប្រារព្ធ​ឡើង​នៅ​ការិយាល័យ​មជ្ឈមណ្ឌល​សិទ្ធិមនុស្ស​កម្ពុជា​ក្រោម​ប្រធានបទ​ថា «ពាក្យពិត​» ហើយ​សារសំខាន់​មួយ​ទៀត​ដែល​បាន​រំលេច​នៅក្នុង​កម្មវិធី​នេះ​ដែរ​នោះ​គឺ​«​ការ​បង្រៀន​ឱ្យ​ខ្មែរ​ចេះ​គិត​គឺ​ជា​ការចាំបាច់​បំផុត។

លោក សួន យុធ្យា ក៏បាន​ឲ្យ​ដឹង​ដែរ​អំពី​អត្ថន័យ​ក្នុង​អត្ថបទ​កំណាព្យ​របស់​ម្ចាស់​ស្នាដៃ​ផ្សេងទៀត​ដែរ​។

លោក សួន យុធ្យា៖ «បាទ​អត្ថបទ​របស់​ពួកគាត់​ផ្ដោត​ទៅ​លើ​វីរភាព​បណ្ឌិត កែម ឡី លោក បណ្ឌិត​វិភាគ​ឲ្យ​ប្រជាពលរដ្ឋ​ដឹង​ការ​ពិត​នៅ​ក្នុង​សង្គម និង​សុវត្ថិភាព​របស់​ដែល​មាន​ភាព​ក្លាហាន​យក​ជីវិត​ទៅ​ប្តូរ ដើម្បី​ឲ្យ​ពលរដ្ឋ​បាន​ដឹង​ព័ត៌មាន​មួយ​ចំនួន​ធំ​...»

ទាក់ទង​នឹង​រឿង​នេះ​ដែរ សាស្ត្រាចារ្យ​ផ្នែក​ធុរកិច្ច និង​ជា​ម្ចាស់​ប្លក់​(Blog)​មួយ​ដែល​ចូលរួម​លើកស្ទួយ​អំពី​សីលធម៌​សង្គម និង​សិល្បៈ​តែង​កំណាព្យ​មើល​ឃើញ​ថា ការ​ចូលរួម​តែង​និពន្ធ​អត្ថបទ​កំណាព្យ​ស្ដីពី​បណ្ឌិត​កែម ឡី ពួកគាត់​ពិតជា​អ្នក​ដែល​មាន​ឆន្ទៈ​ខ្ពស់​ស្រលាញ់​សេរីភាព និង​យុត្តិធម៌​សង្គម​ហើយ មិន​ចង់​ឲ្យ​កេរ្តិ៍ឈ្មោះ​អ្នក​ដែល​បូជាជីវិត​ក្នុង​បុព្វហេតុ​ជាតិ​បាត់បង់​ទៅតាម​រូប​កាយ​នោះ​ឡើយ។

«យើង​មើល​ក្នុង​ព្រឹត្តិការណ៍​មរណភាព​បណ្ឌិត កែម ឡី ភ្នែក​ពិភពលោក ក៏បាន​មើលឃើញ​ដូចគ្នា​អ៊ីចឹង​ដែរ​ថា ការ​ស្លាប់​របស់​គាត់​កក្រើក កម្រិត​ណា ក្នុង​ស្រទាប​មហាជន​ដែល​ស្រលាញ់​សេរីភាព និង យុត្តិធម៌ អ៊ីចឹង​វា​ច្បាស់​ណាស់​ថា អ្នក​ដែល​ពុះកញ្ជ្រោល​ចង់​តែង​កំណាព្យ ឬ​ចម្រៀង​ស្ដីពី​វីរភាព​បណ្ឌិត កែម ឡី មិន​អាច​ជា​មនុស្ស ប្រមឹក ប៉ោឡែ ពុករលួយ​ក្នុង​សង្គម​នឹង​ទេ ដែល​ទៅ​សរសេរ​កើត ប្រាកដ​ជា​អ្នក​សិក្សា​រៀនសូត្រ ដែល​ស្ថិត​នៅ​ឆ្ងាយ​ពី​ក្រុម​អ្នក​ជិះជាន់​និយម​ហ្នឹង​...»

សាស្ត្រាចារ្យ​រូប​នេះ​មើលឃើញ​ទៀត​ថា ការចូលរួម​របស់​ពួកគាត់​និង​អ្នក​ពាក់ព័ន្ធ​ដទៃទៀត​នេះ​ហើយ​ដែល​ធ្វើ​ឲ្យ​កេរ្តិ៍ឈ្មោះ និង​វីរភាព របស់​បណ្ឌិត កែម ឡី មិនអាច​សាបសូន្យ​បាន​រហូត​មក​ដល់​ពេល​នេះ។

«ក្រោយ​ព្រឹត្តិការណ៍ បាញ់សម្លាប់ កែម ឡី រួច នៅក្នុង​ប្រទេសជាតិ​យើង​ទាំងមូល ឬ​ពិភពលោក យើង​ទាំងមូល បើសិន​អត់​មាន​អ្នកណា​រំលឹក ឬក៏​គ្មាន​សៀវភៅបោះពុម្ព គ្មាន​កំណាព្យ គ្មាន​ចម្រៀង គ្មាន​រូបថត គ្មាន​ខ្សែអាត់​វីដេអូ គ្មាន​ការ​ផ្សព្វផ្សាយ​នោះ​មិនបាច់​ទៅដល់​៧​ឆ្នាំ​ទេ តែ​២​ឬ​៣​ឆ្នាំ​ទេ គេ​ភ្លេច​វិញ​អស់ហើយ​...​អ៊ីចឹង​ឥឡូវ​ឆ្នាំ​២០២៣​ហើយ ប៉ុន្តែ​យើង​នៅតែ​អត់​ភ្លេច ដូចជា​នៅ​ថ្មីៗ ដោយសារ មាន​កំណាព្យ ចម្រៀង ទាំងអស់​ហ្នឹង​ហើយ​ធ្វើ​ឲ្យ​ព្រឹត្តិការណ៍​នេះ​នៅតែ​ផ្សារភ្ជាប់​ជាមួយ​យើង​ដដែល​...»

ចំណែក​អ្នកនិពន្ធ​អាជីព​មួយ​រូប​ទៀត គឺ​លោក សូយ ឡូត ក៏​មើលឃើញ​ដែរ​ថា វិស័យ​សិល្បៈ​តែង​និពន្ធ​មាន​កំណាព្យ និង​ចម្រៀង​ជាដើម​នេះ​ពិតជា​សំខាន់​ណាស់​ដែល​ធ្វើ​ឲ្យ​គ្រប់គ្នា​ងាយ​នឹង​ចងចាំ​នូវ​ព្រឹត្តិការណ៍​អ្វីមួយ​សម្រាប់​ជាតិ​មាតុភូមិ ព្រមទាំង​បាន​បញ្ជ្រាប​នូវ​ខ្លឹមសារ​អប់រំ​យ៉ាង​មាន​ប្រសិទ្ធភាព។

លោក សូយ ឡូត៖ «វា​ពិតជា​មានតម្លៃ​ខាង​សីលធម៌​ដោយសារ​គាត់​ជា​មនុស្ស​ម្នាក់​មាន​សីលធម៌​ហ្នឹងហើយ​បានជា​គេ​គោរព​ស្រលាញ់ ហើយ​គេ​សរសេរ​ស្នាដៃ​ដើម្បី​រម្លឹក​ពី​គុណ​របស់​គាត់​...»

រយៈពេល​៧​ឆ្នាំ​មក​ហើយ ដែល​ឃាតក​បាញ់សម្លាប់​បណ្ឌិត កែម ឡី ។ ប៉ុន្តែ​ពលរដ្ឋ​ខ្មែរ​ជាច្រើន​នៅតែ​នឹក​នៅតែ​ស្រឡាញ់​នៅតែ​រំលឹក​ពី​វីរភាព​របស់​លោក។

ក្នុង​នោះ​សិល្បករ​អាជីព​មួយ​រូប​ដែល​គោរព​ស្រឡាញ់ និង​នឹករលឹក​លោក បណ្ឌិត កែម ឡី តែងតែ​ផលិត​ចម្រៀង​ផ្ញើ​មក​ឱ្យ​អាស៊ីសេរី​ដើម្បី​ចាក់​ផ្សាយ​រម្លឹក​ខួប​នៃ​មរណភាព​របស់​លោក បណ្ឌិត។

ក្នុង​នោះ​មាន​បទ​«​វាចារ​បុត្រា​បណ្ឌិត កែម ឡី បទ «​កែម ឡី នៅក្នុង​បេះដូង » បទ​«​បាន​សុខ​តែ​នៅ​រឭក​»​និង​បទ​«​សូម​កើត ជា​ខ្មែរ​រហូត​» ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។