អាជ្ញាធរខេត្តកំពង់ធំ បានរៀបចំព្រះរាជពិធីបុណ្យច្រត់ព្រះនង្គ័ល នៅព្រឹក ទី៨ ឧសភា ក្នុងពហុកីឡាដ្ឋានខេត្តកំពង់ធំ ក្រោមព្រះរាជាធិបតីព្រះមហាក្សត្រ នរោត្ដម សីហមុនី។
ក្នុងពិធីនេះ អាជ្ញាធរបានរៀបចំចំណី ៧មុខ រួមមាន ស្រូវ ពោត ល្ង សណ្តែក ទឹក ស្រា និងស្មៅ ដែលជាអាហារសម្រាប់ «គោឧសភរាជ» បរិភោគ ដើម្បីផ្សងមើលប្រផ្នូលរបស់ស្រុកទេស តាមរយៈការបរិភោគរបស់ គោទាំងនេះ។
តាមការទស្សន៍ទាយរបស់ព្រាហ្មណ៍ព្រះរាជគ្រូ ក្នុងពិធីនេះ ផ្អែកលើ លទ្ធផលនៃការបរិភោគអាហាររបស់ «គោឧសភរាជ» រួមមាន ពោត សណ្តែក និងស្រូវ បង្ហាញថា ទិន្នផលកសិកម្ម នៅរដូវវស្សាឆ្នាំនេះ នឹងទទួលបានផលល្អប្រសើរ។
ព្រះរាជពិធីបុណ្យនេះ ជាទំនៀមទម្លាប់ខ្មែរ ដើម្បីដាស់ស្មារតី ឲ្យប្រជាកសិករត្រៀមខ្លួនបង្កបង្កើនផលកសិកម្ម នៅរដូវវស្សាខាងមុខនេះ។ ក៏ប៉ុន្តែបច្ចុប្បន្ន កសិករត្អូញត្អែរ ពីការប្រែប្រួលអាកាសធាតុ ដោយសារអាកាសធាតុឡើងកម្ដៅខ្លាំង ប៉ះពាល់ខ្លាំងដល់សមត្ថភាពផលិតស្បៀងរបស់កសិករ។
ពួកគាត់បន្តអំពាវនាវដល់រដ្ឋាភិបាលរកមធ្យោបាយដោះស្រាយបញ្ហានេះ តាមរយ ថែរក្សាព្រៃឈើឲ្យគង់ កសាងហេដ្ឋារចនាសម្ព័ន្ធគ្រប់ច្រកល្ហក និងថែរក្សាបឹងបួ ព្រែក អូរ ទន្លេ និង ស្ទឹង ឲ្យគង់វង្ស ដើម្បីរំដោះទឹកស្រោចស្រព៕