កម្មករនិយោជិតពីរោងចក្រ និងវិស័យផ្សេងៗ រាប់ពាន់នាក់ នាំគ្នាប្រារព្ធទិវាពលកម្មអន្តរជាតិលើកទី១៣០ នៅរាជធានីភ្នំពេញ។ ទន្ទឹមគ្នានឹងការរំឭកទិវាពលកម្មអន្តរជាតិ ក្រុមសហជីពកម្មករក៏ផ្ញើសារដល់រាជរដ្ឋាភិបាល និងរដ្ឋសភា ឲ្យជួយដោះស្រាយបញ្ហាប្រាក់ឈ្នួលពួកគេបន្ថែមទៀត។
សហជីព និងកម្មករនិយោជិតចំនួន ២ពាន់នាក់ប្រារព្ធទិវាពលកម្មអន្តរជាតិនៅទីតាំងរង្វង់មូលសម្ដេចព្រះសង្ឃរាជ ជួន ណាត រាជធានីភ្នំពេញ នៅព្រឹកថ្ងៃទី១ ឧសភា។
«សំឡេងស្រែក»
ក្នុងទិវានេះ សហជីព និងកម្មករនិយោជិតសុំឲ្យរាជរដ្ឋាភិបាល និងរដ្ឋសភា ឲ្យជួយកំណត់ប្រាក់ឈ្នួលគោលសម្រាប់កម្មករឲ្យបាន ២០៧ដុល្លារ។
ប្រធានសហភាពការងារកម្ពុជា (CLC)លោក អាត់ ធន់ ថ្លែងថា សំណើសុំនេះ គឺជាសំណូមពរមួយក្នុងសំណូមពរ ១៤ចំណុចរបស់សហជីព និងកម្មករនិយោជិត៖ «ឲ្យរដ្ឋសភា និងរដ្ឋាភិបាលពិនិត្យការកំណត់ប្រាក់ឈ្នួលអប្បបរមាជូនកម្មករផ្នែកវិស័យកាត់ដេរឲ្យបាន ២០៧ដុល្លារ មន្ត្រីរាជការឲ្យបាន ២៥០ដុល្លារ និងកំណត់ ប្រាក់ឈ្នួល សម្រាប់វិស័យមួយចំនួនទៀត ហើយក៏ស្នើឲ្យរដ្ឋាភិបាលពិនិត្យសុខភាពសុវត្ថិភាពនៅកន្លែងការងារ ដូចជាការបង្កើតច្បាប់បង្កើតប្រកាសអី ដើម្បីការពារពួកគេ ដូចជាកម្មករសំណង់អីជាដើម ហើយប្រព័ន្ធសន្តិសុខសង្គមត្រូវធានាថា សេវាកម្មដែលមានបច្ចុប្បន្នឲ្យវាដំណើរការល្អ ដូចជាការទូទាត់សំណង ដូចជាការប្រើប្រាស់មន្ទីរពេទ្យ ដូចជាការព្យាបាលផ្សេងៗឲ្យបានលឿន ជាពិសេស គឺចុះឈ្មោះកម្មករនិយោជិតដែលធ្វើការនៅក្រុមហ៊ុនតូចៗ ចាប់ពីម្នាក់ទៅដល់ ៨នាក់ » ។
កម្មការិនីមួយរូបឈ្មោះ ចន្ទ្រា ថ្លែងថា នាងគាំទ្រការទាមទារឲ្យដំឡើងប្រាក់ឈ្នួលគោលបន្ថែមទៀត ដើម្បីទប់ទល់នឹងការចំណាយបច្ចុប្បន្ន៖ « ព្រោះអីរាល់ថ្ងៃ ប្រាក់ខែខ្ញុំចាយអត់គ្រប់គ្រាន់ អ៊ីចឹងខ្ញុំ ត្រូវទាមទារ ប្រាក់ខែ ថែម។ អ៊ីចឹងមានប្រយោជន៍សម្រាប់ខ្ញុំ ហើយប្រយោជន៍សម្រាប់បងប្អូនទាំងអស់គ្នាដែរ » ។
ទន្ទឹមគ្នានេះ មានកម្មករជាង ១ពាន់នាក់ផ្សេងទៀត ប្រមូលផ្ដុំគ្នានៅពហុកីឡដ្ឋានជាតិអូឡាំពិក ទាមទារលក្ខខណ្ឌការងារប្រហែលគ្នាដែរ។ កម្មការិនី ហួត សុភ័ណ ថ្លែងថា កម្មករដូចជារូបនាងមានការលំបាកព្រោះប្រាក់ខែនៅតិច៖ «លំបាកដូចជាប្រាក់ខែនៅរាងតិចតួចពេក អត់ ទាន់ដោះស្រាយ ជីវភាពគ្រួសារបានល្អប្រសើរ។ ចង់មកតវ៉ាជួយគាំទ្រគេឲ្យប្រាក់ខែឡើងថ្លៃខ្ពស់ជាងហ្នឹង ។ ចង់ឲ្យជួយដំឡើងប្រាក់ខែគោលឲ្យឡើងខ្ពស់បន្តិចមក ។ យើងធ្វើការរោងចក្រ ចំណុចដែលលំបាកជាងគេ គឺប្រាក់ខែតិចតួចហ្នឹងតែម្ដង ព្រោះអី ប្រាក់ខែ ឡើង ថ្លៃផ្ទះក៏ឡើង។ ដល់ អ៊ីចឹងប្រាក់ខែ ឡើង ៥រៀល ថ្លៃផ្ទះឡើង ៥រៀលដែរ។ អ៊ីចឹងមកឲ្យគាត់ជួយដោះស្រាយបញ្ហាថ្លៃផ្ទះផង បញ្ហាប្រាក់ខែ គោលផង»។
ការទាមទារឲ្យកំណត់ប្រាក់ឈ្នួលអប្បបរមា ឬប្រាក់ឈ្នួលគោលសម្រាប់កម្មករកាត់ដេរសម្លៀកបំពាក់ និងស្បែកជើងនៅពេលនេះ គឺបន្ទាប់ពីប្រាក់ខែគោលត្រូវបានរាជរដ្ឋាភិបាលកំណត់អនុវត្តចំនួន ១៤០ដុល្លារចាប់តាំងពីខែមករា។
មន្ត្រីនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ គឺលោក ហេង សួរ ឆ្លើយតបការទាមទាររបស់កម្មករនៅព្រឹកថ្ងៃទី១ ឧសភា ថា ការកំណត់ប្រាក់ឈ្នួលអប្បបរមា គឺខាងលោកមានរូបមន្ត លក្ខណៈវិនិច្ឆ័យ កាលវិភាគ និងយន្តការច្បាស់លាស់ ដែលគណៈកម្មការត្រីភាគីសម្រេចកាលពីឆ្នាំ២០១៤។ ដូច្នេះ ការលើកតួលេខណាមួយ ត្រូវផ្អែកលើរូបមន្ត និងលក្ខណៈវិនិច្ឆ័យនោះ។ លោកឱ្យដឹងថា ការចរចាអំពីប្រាក់ឈ្នួលសម្រាប់ឆ្នាំ ២០១៧ នឹងចាប់ផ្ដើម នៅខែកក្កដាខាងមុខនេះ។ លោកស្វាគមន៍ញត្តិរបស់កម្មករ និងអំពាវនាវឱ្យភាគីអនុវត្តន៍រូបមន្ត និងលក្ខណៈវិនិច្ឆ័យដែលមានហើយ។
ប្រធានសហភាពការងារកម្ពុជា (CLC)លោក អាត់ ធន់ មានប្រសាសន៍ថា ការទាមទាររបស់កម្មករចាប់តាំងពីឆ្នាំ២០០៥ មក ធ្វើឲ្យប្រាក់ឈ្នួល និងសិទ្ធិមួយចំនួនប្រែប្រួល ប៉ុន្តែបញ្ហាខ្លះនៅមិនទាន់ដោះស្រាយនៅឡើយ ដូចជាការធ្វើការច្រើនម៉ោង ការធ្វើការដោយគ្រោះថ្នាក់ ការប្រើកិច្ចសន្យាខ្លី និងការរើសអើងធ្វើបាបសហជីព ដែលជាហេតុធ្វើឲ្យកម្មករនៅបន្តការទាមទារ។
ក្រុមសហជីពកម្មករខកចិត្ត ព្រោះមិនអាចប្រារព្ធពិធីទិវាពលកម្មអន្តរជាតិតាមទិសដៅនៅខាងមុខរដ្ឋសភា ដែលខ្លួនចង់បានឲ្យដូចឆ្នាំមុនៗ។ កម្មករមួយរូបឈ្មោះ សម សារ៉ុន ថ្លែងថា លោកចង់ឲ្យការប្រារព្ធទិវាពលកម្មអន្តរជាតិបានប្រសើរជាងនេះ៖ « បានត្រឹមតែហែក្បួន តែអត់បានដាក់ ញត្តិចូល ទៅរដ្ឋសភា។ ចង់ធ្វើឲ្យដូចរាល់ឆ្នាំ ដែលខាងតំណាងកម្មករ ខាងសហជីពបានដាក់ញត្តិ ចូលទៅ ក្នុងរដ្ឋសភា គាត់ទទួលញត្តិតាមច្បាប់កម្មករ។ បើធ្វើអ៊ីចឹង ខ្ញុំនៅតែអត់បានចូលរួមដដែល »។
ទោះបីជាយ៉ាងនេះក្ដី លោក អាត់ ធន់ ចាត់ទុកថា ជាការប្រសើរដែលអាជ្ញាធរសម្រួលដល់ការហែក្បួនប្រារព្ធទិវាពលកម្មអន្តរជាតិ ពីស្ថានទូតរុស្ស៊ី មកជិតរដ្ឋសភា ដោយមិនមានការប៉ះទង្គិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។