កម្មករទាមទារប្រាក់ឈ្នួលយ៉ាងតិចបំផុត២០៧ដុល្លារក្នុង១ខែ
2018.05.03
កម្មករនិយោជិតនាំគ្នាប្រារព្ធទិវាពលកម្មអន្តរជាតិ ១ ឧសភា លើកទី១៣០ នៅរាជធានីភ្នំពេញ។
Photo: RFA
កម្មកររោងចក្រជាង២ពាន់នាក់ ដែលបានចូលរួមប្រារព្ធ ទិវាពលកម្មអន្តរជាតិ ១ឧសភា លើកទី១៣៧ កាលពីថ្ងៃទី១ ឧសភា បានទាមទារប្រាក់ឈ្នួលអប្បបរមា ចំនួន ២០៧ដុល្លារ ក្នុងមួយខែ។ ពេលនោះ កម្មករ ក៏បានសំណូមពរឲ្យរបបលោក ហ៊ុន សែន ទប់ស្កាត់ទំនិញសព្វសារពើដែលចេះតែឡើងថ្លៃឥតឈប់ឈរ រួមមានម្ហូបអាហារ និងសាំងជាដើម។
ប្រធានសហភាពការងារកម្ពុជាលោក អាត់ ធន់ លើកឡើងថា ការទាមទារចង់បានប្រាក់ឈ្នួល ២០៧ដុល្លារ ក្នុងមួយខែនេះ គឺមិនមែនចំពោះតែកម្មកររោងចក្រនោះទេ គឺចង់ឲ្យរបបលោក ហ៊ុន សែន ធានាប្រាក់អប្បបរមានេះ ដល់កម្មករ ក្នុងគ្រប់វិស័យការងារទាំងអស់ រួមមាន ផ្នែកសំណង់ ដឹកជញ្ជូន និងសេវាកម្មនានា ជាដើម។ លោក អាត់ ធុន ថា តំណាងរាស្ត្រ៤រូប នៃគណៈកម្មាធិការសភា បានមកទទួលញត្តិដោយផ្ទាល់ ពីកម្មករនៅកន្លែងប្រារព្ធពិធីនេះ នៅសួនច្បារខាងមុខក្រុមប្រឹក្សាអភិវឌ្ឍន៍កម្ពុជា។ លោកបន្តថា ក្នុងញត្តិនោះកម្មករបានសំណូមពរ១៩ ចំណុច ក្នុងនោះមាន៤ចំណុចសំខាន់ៗ ពាក់ព័ន្ធនឹងប្រាក់ឈ្នួលអប្បបរមា បញ្ហាថៅកែរោងចក្ររត់ចោល បញ្ហាលំបាករបស់សហជីព និងច្បាប់សហជីព៖ «ពាក់ព័ន្ធទី១ គឺស្នើរដ្ឋាភិបាលកំណត់ប្រាក់ឈ្នួលគោលអប្បបរមាដល់កម្មករនិយោជិក រោងចក្រ សំណង់ការដ្ឋាន ២០៧ដុល្លារ។ ទី២ ស្នើឲ្យរដ្ឋាភិបាលគិតគូរ ពិនិត្យមើល ក្រុមហ៊ុន សហគ្រាសដែលបិទទ្វារកន្លងមក មិនបានគិតគូរលុយដល់កម្មករតាមច្បាប់ទេ។ ទី៣ បញ្ហាច្បាប់សហជីព ពីមុនកម្មករមានបញ្ហាយើងតំណាងឲ្យកម្មករ ប៉ុន្តែឥឡូវនេះ យើងមិនអាចតំណាងឲ្យកម្មករបានទេ...»។
អគ្គលេខាធិការសម្ព័ន្ធសហជីពសេរីស្ត្រីកាត់ដេរ កញ្ញា អ៊ុំ ឌីណា ទទួលស្គាល់ថា កម្មករពិតជាត្រូវការយ៉ាងតិច ២០៧ដុល្លារ ក្នុងមួយខែ ដើម្បីអាចរស់នៅសមរម្យបាន។ កញ្ញាបន្តថា អាជ្ញាធរក្រុងភ្នំពេញ ត្រូវចុះពិនិត្យមើលផ្ទាល់ ពីស្ថានភាពរស់នៅរបស់កម្មករ នៅកន្លែងផ្ទះជួល និងធ្វើយ៉ាងណាជួយ ទប់ស្កាត់នៃទំនិញសព្វសារពើក្នុងផ្សារ ដែលបានឡើងថ្លៃ ក្រោយដែលកម្មករ បច្ចុប្បន្ន បានទទួលប្រាក់ខែអប្បបរមា ១៧០ដុល្លារក្នុងមួយខែ៖ «ប្រាក់ឈ្នួលគាត់ឡើងដល់១៧០ដុល្លារមែន ប៉ុន្តែទំនិញទីផ្សារឡើងថ្លៃ ថ្លៃឈ្នួលផ្ទះដូចជាថ្លៃអគ្គិសនី។ ឈ្នួលផ្ទះដោយឡែកនៅទីកន្លែងមួយចំនួន ឡើងថ្លៃជាលំដាប់។ ជាទូទៅទំនិញប្រើប្រាស់ប្រចាំថ្ងៃ គឺឡើងថ្លៃ អ៊ីចឹងប្រាក់ហ្នឹង មិនអាចចាយវាយគ្រប់គ្រាន់ទេ។ ពួកខ្ញុំធ្វើការស្រាវជ្រាវរកឃើញដល់ទៅ២៥០ដុល្លារឯណោះ ដែលត្រូវការចំណាយ។ ប៉ុន្តែយើងបែងចែកទៅ គឺ២០៧ដុល្លារហ្នឹង គឺបូករួមនឹងធ្វើការថែមម៉ោងរបស់ពួកគាត់»។
ប្រធានសហភាពការងារកម្ពុជាលោក អាត់ ធន់ ឲ្យដឹងផងដែរ ថា តំណាងរាស្ត្រគណបក្សប្រជាជនកម្ពុជា អ្នកស្រី ឡោក ខេង ដែលបានមកទទួលញត្តិនោះ សន្យាថា គណៈកម្មាធិការទី១នៃរដ្ឋសភា នឹងជជែកពិភាក្សាពីសំណូមពរនិងក្ដីបារម្ភរបស់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត