Opens in new windowលទ្ធផលស្រាវជ្រាវរបស់ក្រុមអ្នកស្រាវជ្រាវឯករាជ្យ បង្ហាញថា ការចំណាយប្រចាំខែរបស់កម្មករក្នុងវិស័យកាត់ដេរ បានកើនឡើងបន្ថែមទៀតហើយសម្រាប់ឆ្នាំ២០១៥ នេះ បើប្រៀបធៀបនឹងកម្រិតអតិផរណានៃទំនិញលើទីផ្សារ និងការចំណាយចាំបាច់ក្នុងសង្គម។
ក្នុងនោះបានបង្ហាញដែរថា តួលេខថ្មីនៃទំហំចំណាយអាចឈានដល់ ២០៧ដុល្លារក្នុងមួយខែ។ តំណាងសហជីព ឲ្យដឹងថា តួលេខនេះនឹងអាចយកជាមូលដ្ឋានដាក់បញ្ចូលក្នុងការចរចាប្រាក់ឈ្នួលអប្បបរមាជូនកម្មករ ដើម្បីជជែកជាមួយភាគីនិយោជក និងក្រសួងការងារ នៅចុងខែកញ្ញា ខាងមុខនេះ។
តំណាងសហជីពកម្ពុជា អះអាងថា តួលេខជាង ២០៧ដុល្លារ (២០៧,៥ដុល្លារ) អាចជាតួលេខថ្មីជាមូលដ្ឋានក្នុងការពិភាក្សាប្រាក់ឈ្នួលអប្បបរមាជូនកម្មករនៅកម្ពុជា។
ការលើកឡើងនេះ ត្រូវបានធ្វើឡើងបន្ទាប់ពីក្រុមអ្នកស្រាវជ្រាវឯករាជ្យ បានបង្ហាញលទ្ធផលសិក្សាស្រាវជ្រាវលើការចំណាយរបស់កម្មករនៅក្នុងកិច្ចប្រជុំរបស់ក្រុមសហជីព ទាំងជាតិ និងអន្តរជាតិ កាលពីថ្ងៃទី១១ ខែកញ្ញា។
តំណាងសហជីពកម្ពុជា លោក អាត់ ធន់ បានប្រាប់វិទ្យុអាស៊ីសេរី កាលពីថ្ងៃទី១២ កញ្ញា ថា ក្រោយពេលដែលក្រុមអ្នកស្រាវជ្រាវឯករាជ្យ បានបង្ហាញតួលេខ ២០៧ដុល្លារដែលជាតួលេខមួយរបស់កម្មកររោងចក្រកាត់ដេរម្នាក់ៗ បានចំណាយក្នុង ១ខែៗរួចមក ក្រុមសហជីពភាគច្រើនបានឯកភាពគ្នា ថានឹងយកតួលេខនេះទៅដាក់បញ្ចូលនៅក្នុងកិច្ចពិភាក្សារវាងក្រុមសហជីព និយោជក និងភាគីក្រសួងនៅចុងខែកញ្ញា ខាងមុខ។
លោក អាត់ ធន់ បានឲ្យដឹងទៀតថា លទ្ធផលសិក្សាស្រាវជ្រាវរបស់គណៈកម្មការស្រាវជ្រាវឯករាជ្យ បានសិក្សាស្រាវជ្រាវលើកម្មករជាង ៦០០នាក់មកពីរោងចក្រជាង៤០ បានរកឃើញចំណាយប្រចាំខែរបស់កម្មករបានកើនឡើងច្រើន មិនមែន ១៧៧ដុល្លារដូចការស្រាវជ្រាវកាលពីឆ្នាំ២០១៣ នោះទេ។ លោកថា ការស្រាវជ្រាវនេះផ្ដោតលើកត្តាពីរ គឺការចំណាយលើម្ហូបអាហារ និងការចំណាយក្រៅពីអាហារ៖ «អាហារគេរកឃើញកម្មករចំណាយតិចមែនទែន ជាមធ្យមចំណាយអាហារពេលព្រឹកអស់តែ ២ពាន់រៀលប៉ុណ្ណោះ ពេលថ្ងៃ ២.៥០០រៀល និងពេលយប់ ៣ពាន់រៀលក្នុង ១ថ្ងៃៗ ហើយទៅលើក្រៅពីអាហារដូចជា សម្លៀកបំពាក់ សម្ភារៈថ្នាំពេទ្យ ផ្ទះជួល ដែលច្រើនជាង ១០ចំណុចនោះ គេរកឃើញកម្មករចំណាយអស់ជាង ១០០ដុល្លារ ចឹងវាសបញ្ជាក់ថា ចំនួននេះមានចំនួនតិចនៅឡើយ»។
វិទ្យុអាស៊ីសេរី មិនអាចទាក់ទងតំណាងនិយោជក លោក វ៉ាន់ ស៊ូអៀង និងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានឡើយនៅថ្ងៃទី១២ ខែកញ្ញា។
ប៉ុន្តែនៅក្នុងសិក្ខាសាលាត្រីភាគីថ្នាក់ជាតិ ស្ដីពីប្រាក់ឈ្នួលអប្បបរមានៅកម្ពុជា ដែលត្រូវបានរៀបចំឡើងកាលពីថ្ងៃទី៨ ខែកញ្ញា ប្រធានសហព័ន្ធនិយោជក និងពាណិជ្ជកម្មកម្ពុជា (CAMFBA) លោក វ៉ាន់ ស៊ូអៀង ធ្លាប់ឲ្យដឹងថា ប្រសិនបើមានការដំឡើងប្រាក់ឈ្នួលក្នុងវិស័យកាត់ដេរ និងវាយនភណ្ឌនៅកម្ពុជា នឹងធ្វើឲ្យផលប៉ះពាល់ដល់អ្នកវិនិយោគដែលភាគច្រើនជាអ្នកវិនិយោគបរទេស។
កាលពីឆ្នាំ២០១៥ កន្លងទៅ រដ្ឋាភិបាលបានដំឡើងប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើងពី ១០០ដុល្លារ ទៅ ១២៨ដុល្លារក្នុងមួយខែ ហើយបើគិតរួមទាំងអត្ថប្រយោជន៍ផ្សេងៗដែលមានស្រាប់ ជាមធ្យមកម្មករនិយោជិតម្នាក់ៗទទួលបានប្រាក់ចំណូលយ៉ាងតិចពី ១៤៧ដុល្លារដល់ ១៥៦ដុល្លារក្នុងមួយខែ។
សម្រាប់ឆ្នាំ២០១៦ កិច្ចចរចាប្រាក់ឈ្នួលមិនទាន់ចេញជាតួលេខច្បាស់នៅឡើយ ប៉ុន្តែនៅខែតុលា ខាងមុខនេះ ភាគីទាំងបី គឺរាជរដ្ឋាភិបាលតំណាងដោយក្រសួងការងារ ភាគីថៅកែរោងចក្រ និងភាគីសហជីពកម្មករ នឹងជួបប្រជុំគ្នាជាថ្មីទៀត ដើម្បីសម្រេចលើការកំណត់ដំឡើងប្រាក់ខែអប្បបរមាសម្រាប់កម្មកររោងចក្រកាត់ដេរឆ្នាំ២០១៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។