ក្រសួងអនុញ្ញាតឲ្យក្រុមហ៊ុនទូរស័ព្ទមានកម្មវិធីពិសេសឡើងវិញ
2013.05.06
ការសម្រេចផ្អាកនេះ ធ្វើឡើងបន្ទាប់ពីមានការរិះគន់ជាច្រើនចំពោះលោក សូរ ឃុន រដ្ឋមន្ត្រីក្រសួងប្រៃសណីយ៍ ដែលប្រកាសហាមមិនឲ្យក្រុមហ៊ុនទូរស័ព្ទដៃទាំងអស់យកអត្រាហៅចេញក្នុងប្រព័ន្ធទាបជាង ៤,៥សេនក្នុងមួយនាទី និងមិនឲ្យក្រុមហ៊ុនទូរស័ព្ទគិតលុយនាទីអតិថិជនហៅចេញជាដើម។
ក្រសួងប្រៃសណីយ៍និងទូរគមនាគមន៍ បានអនុញ្ញាតឲ្យក្រុមហ៊ុនទូរស័ព្ទចល័តទាំងអស់ មានសិទ្ធិផ្សព្វផ្សាយឃោសនាពាណិជ្ជកម្មរបស់ខ្លួនឡើងវិញ តាមតម្លៃសេវាដែលកំណត់ដោយក្រុមហ៊ុន និងបានលុបចោលការអនុវត្តលើការកំណត់ថ្លៃអប្បបរមា ដែលចេញដោយក្រសួងប្រៃសណីយ៍និងទូរគមនាគមន៍។
ក្នុងលិខិតរបស់លោក សូរ ឃុន រដ្ឋមន្ត្រីក្រសួងប្រៃសណីយ៍និងទូរគមនាគមន៍ ចេញផ្សាយជាសាធារណៈកាលពីយប់ថ្ងៃទី៥ ខែមេសា បានបង្ហាញថា ក្រសួងប្រៃសណីយ៍និងទូរគមនាគមន៍ សម្រេចផ្អាកការអនុវត្តសេចក្ដីសម្រេចរបស់អង្គប្រជុំរវាងបញ្ញត្តិករទូរគមនាគមន៍កម្ពុជា ជាមួយបណ្ដាប្រតិបត្តិករទូរស័ព្ទ កាលពីថ្ងៃទី២២ ខែមេសា ស្ដីពីការឯកភាពគ្នាក្នុងការបញ្ឈប់ជាស្ថាពរនៃការអនុវត្តការផ្សាយឃោសនាពាណិជ្ជកម្មរបស់ប្រតិបត្តិករទូរស័ព្ទ ដែលផ្ទុយនឹងបទបញ្ជារបស់រាជរដ្ឋាភិបាល ស្ដីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្ដាញ ដែលមានថ្លៃទាបជាងថ្លៃដើម ធ្វើឲ្យប៉ះពាល់ដល់ការដួលរលំនៃទីផ្សារទូរគមនាគមន៍ និងធ្វើឲ្យបាត់ចំណូលថវិកាជាតិ។
ប្រធានបញ្ញត្តិករទូរគមនាគមន៍កម្ពុជា លោក ម៉ូវ ចរិយា ឲ្យដឹងនៅថ្ងៃទី៦ ខែមេសា បញ្ជាក់ថា ក្រុមហ៊ុនទូរស័ព្ទចល័តទាំងអស់អាចកំណត់អត្រាហៅចេញក្នុងតម្លៃថោក និងមានកម្មវិធីបន្ថែមទឹកប្រាក់សម្រាប់ការហៅចេញពិសេស (Promotion) សំបូរបែបក្នុងប្រព័ន្ធបានដូចមុន។ លោកពន្យល់ថា ការបើកទូលាយឲ្យក្រុមហ៊ុនទូរស័ព្ទបន្តធ្វើដូចនេះ ក៏ព្រោះតែក្រសួងប្រៃសណីយ៍ត្រូវការពេលវេលាបន្ថែមទៀត សម្រាប់សិក្សាលើគោលការណ៍នៃតម្លៃជាមូលដ្ឋានទូទៅជាមុនសិន មុននឹងមានកិច្ចពិភាក្សាជាមួយបណ្ដាប្រតិបត្តិករទូរស័ព្ទពីរឿងកំណត់តម្លៃឲ្យបានច្បាស់។
ក្រសួងប្រៃសណីយ៍និងទូរគមនាគមន៍ធ្លាប់ព្រមានដល់ម្ចាស់ក្រុមហ៊ុនចល័តទាំងអស់ រួមទាំងក្រុមហ៊ុនទូរស័ព្ទស្មាត (Smart) ថាធ្វើអាជីវកម្មមិនស្មោះត្រង់ ហើយប្រសិនមិនគោរពតាមសេចក្ដីប្រកាសលេខ ២៣២ ទេនោះ នឹងត្រូវបញ្ចប់អាជ្ញាប័ណ្ណមិនអនុញ្ញាតឲ្យធ្វើអាជីវកម្មថែមទៀត។
សេចក្ដីប្រកាស ២៣២ គឺមិនអនុញ្ញាតអោយក្រុមហ៊ុនគិតលុយ ឬក៏ផ្ដល់លុយបន្ថែមដែលបណ្ដាលអោយអត្រាតម្លៃហៅចេញក្នុងប្រព័ន្ធក្រោម ៤,៥សេនក្នុងមួយនាទី ដោយកំណត់តម្លៃហៅចេញឲ្យស្មើៗគ្នា ៥សេនក្នុងមួយនាទី។
ការប្រកាសរបស់ក្រសួងប្រៃសណីយ៍និងទូរគមនាគមន៍នេះ ត្រូវបានអ្នកប្រើប្រាស់ទូរស័ព្ទចល័តជេរ និងចំអកពីគោលការណ៍របស់ក្រសួងនៅតាមបណ្ដាញសង្គមហ្វេសប៊ុក (Facebook)។ ការជជែកគ្នាជាសាធារណៈលើបណ្ដាញសង្គមមួយនេះ មានអ្នកខ្លះរិះគន់ថា ពេលសាំងឡើងថ្លៃសុំឲ្យជួយ ក្រសួងបញ្ជាក់ថា ជារបបទីផ្សារសេរី រដ្ឋគ្មានសិទ្ធិលូកដៃទេបងប្អូន។ លុះពេលអត្រាហៅចេញទូរស័ព្ទទាប ក្រសួងបែរជាថាអត្រាហៅចេញក្នុងប្រព័ន្ធមិនអាចទាបបានទេ ហាម Free លុយក្នុងប្រព័ន្ធ ដែលធ្វើឲ្យអ្នកលេងហ្វេសប៊ុកចោទជាសំណួរទៅក្រសួងវិញថា ក្រែងនេះជាទីផ្សារសេរីនោះអី?
អ្នកលេងហ្វេសប៊ុកខ្លះបានដាក់រូបផ្ទាំងក្រុមហ៊ុនស្មាត និងក្រុមហ៊ុនទូរស័ព្ទម៉ូប៊ីថែល (Mobitel) បង្ហោះទន្ទឹមគ្នា និងបានជជែកពីការច្រណែនឈ្នានីសរបស់ក្រុមហ៊ុនម៉ូប៊ីថែល ដែលឈានទៅប្ដឹងផ្ដល់ឲ្យក្រសួងប្រៃសណីយ៍ គាស់កកាយរឿងអត្រាហៅចេញទាប និងបន្ថែមលុយច្រើនរបស់ក្រុមហ៊ុនស្មាត។
ក្រុមហ៊ុនស្មាត ក្លាយជាក្រុមហ៊ុនទូរគមនាគមន៍ធំជាងគេទី២ នៅប្រទេសកម្ពុជា បន្ទាប់ពីក្រុមហ៊ុនម៉ូប៊ីថែល ក្រោយពីច្របាច់បញ្ចូលគ្នាជាមួយក្រុមហ៊ុនហេឡូ (Hello) ដែលសរុបមានអតិថិជនជាង ៥លាននាក់។ អ្នកលេងហ្វេសប៊ុកខ្លះដាក់បង្ហាញរូបកាច់បំបាក់ស៊ីមកាតទូរស័ព្ទម៉ូប៊ីថែល ថែមទៀត ដោយខឹងនឹងក្រុមហ៊ុនមួយនេះ។
វិទ្យុអាស៊ីសេរីមិនអាចសុំការបំភ្លឺពីលោក គិត ម៉េង ប្រធានក្រុមហ៊ុនទូរស័ព្ទចល័តម៉ូប៊ីថែល បានទេនៅថ្ងៃទី៦ ខែមេសា ដោយលោកប្រាប់ថា កំពុងជាប់ប្រជុំ៖ «ខ្ញុំជាប់ប្រជុំសូមទោស!»។
ជុំវិញបញ្ហានេះដែរ លោក តាំង សុគន្ធីសិទ្ធ ប្រធានទីផ្សារក្រុមហ៊ុនស្មាត មិនបានឆ្លើយតបចំពោះសំណួររបស់វិទ្យុអាស៊ីសេរី តាមសារអេឡិចត្រូនិកទេ។ ប៉ុន្តែតាមបណ្ដាញហ្វេសប៊ុក បានបង្ហោះផ្ទាំងរូបក្រុមហ៊ុន ដោយដាក់ថា ៧ថ្ងៃទៀតស្មាត នឹងមកជួបអ្នកទាំងអស់គ្នាវិញ និងមួយផ្ទាំងទៀតសរសេរថា អ្វីៗដែលស្មាត មានមកពីមុន នឹងវិលមកដូចដើមវិញ។
យ៉ាងណា តាមគេហទំព័ររបស់ក្រុមហ៊ុនស្មាត នៅមិនទាន់បង្ហាញពីតារាងតម្លៃសេវាបម្រើដល់អតិថិជនថ្មីនៅឡើយ គឺមានតែតារាងសេវាចាស់ តាមការកំណត់ពីក្រសួងប្រៃសណីយ៍។ ក្នុងគេហទំព័ររបស់ក្រុមហ៊ុននេះបញ្ជាក់ថា ការកំណត់តម្លៃរបស់ក្រសួងប្រៃសណីយ៍ មិនឲ្យគិតលុយ ឬក៏ផ្ដល់លុយបន្ថែមក្នុងអត្រាតម្លៃហៅចេញទាបជាង ៤,៥សេនក្នុងមួយនាទី ជាផលវិបាកមួយដែលតម្រូវឲ្យក្រុមហ៊ុនត្រូវតែធ្វើការផ្លាស់ប្ដូរអត្រាតម្លៃហៅចេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។