សមាជិកក្រុមប្រឹក្សាក្រុង ស្រុក នៅខេត្តភាគពាយ័ព្យ បានអំពាវនាវសុំឲ្យរដ្ឋាភិបាលពន្លឿនការបើកប្រាក់ឧបត្ថម្ភប្រចាំខែមករា និងខែកុម្ភៈ ឲ្យបានឆាប់ ដើម្បីឲ្យពួកគាត់អាចយកថវិកាទាំងនោះទៅផ្គត់ផ្គង់ជីវភាពប្រចាំថ្ងៃ និងការចំណាយផ្សេងៗទៅលើការបំពេញកាតព្វកិច្ចបម្រើប្រជាពលរដ្ឋ។
សមាជិកក្រុមប្រឹក្សាគណបក្ស សម រង្ស៊ី និងគណបក្សប្រជាជនកម្ពុជា បញ្ជាក់កាលពីថ្ងៃទី២១ ខែមីនា ថា ចាប់តាំងពីខែមករា រហូតខែមីនា ឆ្នាំ២០១៣។ ពួកគាត់នៅពុំទាន់ទទួលបានប្រាក់ខែទាំងអស់គ្នា។ ការយឺតយ៉ាវនេះ បង្កឲ្យមានផលប៉ះពាល់លើជីវភាពគ្រួសារ និងបង្កើតឲ្យមានសតិអារម្មណ៍នៅពេលពួកគាត់បំពេញការងារថែមទៀត។
សមាជិកក្រុមប្រឹក្សាក្រុងប៉ៃលិន មកពីគណបក្ស សម រង្ស៊ី លោក ឃឹម ប៉ុន ថ្លែងថា សមាជិកក្រុមប្រឹក្សាស្រុក និងក្រុង ទាំងគណបក្ស សម រង្ស៊ី និងគណបក្សប្រជាជនកម្ពុជា ពុំអាចរកប្រាក់ចំណូលផ្សេងបានទេ គឺពឹងលើប្រាក់ឧបត្ថម្ភប្រចាំខែ៖ «ហើយដល់ពេលឥឡូវហ្នឹង គ្នាអត់មានប្រាក់ឧបត្ថម្ភគ្នាជួបការលំបាក អ៊ីចឹងការបំពេញការងារក៏មិនបានបំពេញលេញដែរ។ ម្យ៉ាង ក្រុមប្រឹក្សាតាំងពីកកើតមកហ្នឹង មិនបានបំពេញតួនាទីអីផងទៅប្រជុំ ១ខែម្ដង មើលទៅការចូលរួមដោះស្រាយអីគ្មានប្រាក់ឧបត្ថម្ភហ្នឹងទេ ការងាររបស់ក្រុមប្រឹក្សាហ្នឹង ក៏មិនបានពេញលេញដែរ»។
សមាជិកក្រុមប្រឹក្សាក្រុង ស្រុក នៅខេត្តប៉ៃលិន ខេត្តបាត់ដំបង និងនៅខេត្តបន្ទាយមានជ័យ ពួកគាត់នៅពុំទទួលប្រាក់ខែដូចគ្នា។ លោក មាន សារិទ្ធិ សមាជិកក្រុមប្រឹក្សាក្រុងប៉ោយប៉ែត មកពីគណបក្ស សម រង្ស៊ី បានត្អូញត្អែរថា សមាជិកក្រុមប្រឹក្សាដែលមន្ត្រីនយោបាយទទួលបានប្រាក់ខែតិចតួច ហើយមានភាពយឺតយ៉ាវថែមទៀត។ បញ្ហានេះ បានបង្កឲ្យមានផលប៉ះពាល់លើការអនុវត្តការងារបម្រើប្រជាពលរដ្ឋ និងប៉ះពាល់ដល់សេដ្ឋកិច្ចក្នុងគ្រួសារថែមទៀត។
លោក ជា ជីវ សមាជិកក្រុមប្រឹក្សាខេត្តបាត់ដំបង មកពីគណបក្ស សម រង្ស៊ី ដែរនោះ បានបញ្ជាក់ថា នៅខេត្តបាត់ដំបង សមាជិកក្រុមប្រឹក្សាខេត្តបានទទួលប្រាក់ខែគ្រប់គ្នាអស់ហើយ នៅឡើយតែសមាជិកក្រុមប្រឹក្សាក្រុង និងសមាជិកក្រុមប្រឹក្សានៅតាមបណ្ដាស្រុកពុំទាន់ទទួលបានប្រាក់ឧបត្ថម្ភនោះទេ។
លោកសង្កត់ធ្ងន់ថា បញ្ហានេះបានបង្កឲ្យសមាជិកក្រុមប្រឹក្សានៅតាមស្រុក និងក្រុងទាំងនោះអាចមានសតិអារម្មណ៍មិនល្អ៖ «ព្រោះក្រុមប្រឹក្សាភាគច្រើន គាត់បានប្រាក់ឧបត្ថម្ភដើម្បីបំពេញជីវភាពរបស់គាត់ បើអត់ទទួលបានប្រាក់ឧបត្ថម្ភ នឹងជួបបញ្ហាជីវភាព និងធ្វើឲ្យពួកគាត់មានភាពស្រពិចស្រពិល។ រដ្ឋគិតយ៉ាងណាអំពីប្រាក់ឧបត្ថម្ភរបស់គាត់ ព្រោះតាំងពីដើមឆ្នាំខែមករា ហ្នឹង គឺប្រាក់ឧបត្ថម្ភខេត្ត ហេតុអីក៏បើក ប៉ុន្តែសម្រាប់ស្រុក ក្រុង មូលហេតុអីបានអត់បើក នេះប៉ះពាល់លើសតិអារម្មណ៍របស់គាត់ដែរ»។
ប្រធានទីចាត់ការហិរញ្ញវត្ថុសាលាខេត្តបាត់ដំបង លោក នុត ប៊ុនណា បានបញ្ជាក់ថា ថវិកាសម្រាប់ឧបត្ថម្ភសមាជិកក្រុមប្រឹក្សាស្រុក ក្រុង មានកញ្ចប់ថវិការៀងខ្លួន ដែលត្រូវបើកចេញពីរតនាគារខេត្ត។ លោកបញ្ជាក់ថា ប្រាក់ឧបត្ថម្ភសម្រាប់សមាជិកក្រុមប្រឹក្សាស្រុក ក្រុង នឹងអាចទទួលបានចាប់ពីថ្ងៃទី២១ ខែមីនា ឆ្នាំ២០១៣ ហើយថា ភាពយឺតយ៉ាវទំនងមកពីកំហុសថ្នាក់លើ ប៉ុន្តែកំហុសយ៉ាងនោះលោកពុំបានដឹងច្បាស់ទេ។
មន្ត្រីសម្របសម្រួល សមាគមការពារសិទ្ធិមនុស្សអាដហុក (Adhoc) ប្រចាំខេត្តបាត់ដំបង លោក យិន ម៉េងលី បានចាត់ទុកសមាជិកក្រុមប្រឹក្សាស្រុក ក្រុង ជាសភាជាន់ទាបមួយ ដោយសារពួកគេត្រូវបានបោះឆ្នោតជ្រើសរើស ទោះបីការបោះឆ្នោតនោះតាមប្រព័ន្ធអសកលក៏ដោយ។ ភាពយឺតយ៉ាវក្នុងការបើកប្រាក់ឧបត្ថម្ភរបស់រដ្ឋាភិបាល បានធ្វើឲ្យប៉ះពាល់ទាំងការងារ និងជីវភាពក្នុងក្រុមគ្រួសារ៖ «អានេះរដ្ឋាភិបាលត្រូវពិនិត្យមើលឡើងវិញ ពាក់ព័ន្ធនឹងការរៀបចំប្រាក់បៀវត្សនេះ ព្រោះនៅបំណាច់ឆ្នាំនីមួយៗ ខាងក្រសួងតែងតែផ្ញើ និងរៀបចំថវិកានេះដើម្បីឲ្យសភាជាតិធ្វើការអនុម័តឲ្យទាន់ពេលវេលា ចុះហេតុអីឥឡូវ ដល់ចុងខែបីហើយ ពួកគាត់នៅពុំទាន់បានបើកប្រាក់បៀវត្ស។ អានេះប៉ះពាល់ដែរ អារម្មណ៍ និងអាជីពពួកគាត់ ហើយត្រូវពិនិត្យធ្វើការ តើវារាំងស្ទះមកពីកត្តា ឬក៏អ្នកណាទៅធ្វើអីយ៉ាងម៉េច ដើម្បីធ្វើការកែទម្រង់ឲ្យកាន់តែប្រសើរឡើងថែមទៀត»។
អ្នកស្រី មូរ សុខហួរ ជាអ្នកតំណាងរាស្ត្រមកពីគណបក្ស សម រង្ស៊ី ថ្លែងថា អ្នកស្រីបានធ្វើដំណើរចុះទៅតាមមូលដ្ឋាននៅស្រុកសំឡូត ខេត្តបាត់ដំបង។ អ្នកស្រីបានជួបបញ្ហាជាច្រើនជាមួយសមាជិកក្រុមប្រឹក្សាស្រុក ដោយសារតែពួកគាត់ពុំទាន់ទទួលបានប្រាក់ឧបត្ថម្ភទាន់ពេលវេលា។ នៅពេលចុះបំពេញបេសកកម្មនៅតាមមូលដ្ឋាននោះ អ្នកស្រីត្រូវការសហការជាមួយមន្ត្រីមូលដ្ឋានស្រុក ឃុំ ទាំងអស់ ទាំងមន្ត្រីមកពីគណបក្ស សម រង្ស៊ី និងមន្ត្រីរបស់គណបក្សប្រជាជនកម្ពុជា ដើម្បីចុះជួយប្រជាពលរដ្ឋ ក៏ប៉ុន្តែ ពួកគាត់បញ្ជាក់ថា ប្រាក់ខែរបស់ពួកគាត់មិនគ្រប់គ្រាន់ ហើយបើកមិនទាន់ពេលវេលាទៀត ធ្វើឲ្យពួកគាត់មិនអាចចុះជួយប្រជាពលរដ្ឋបាន។
អ្នកស្រី មូរ សុខហួរ៖ «ដូច្នេះ យើងជាអ្នកតំណាងរាស្ត្រ យើងដឹងហើយ យើងបានអនុម័តថវិកាសម្រាប់ឆ្នាំ២០១៣ ហើយចាំបានមួយខែ ប៉ុន្តែដល់ពីរខែ ដល់បីខែ ខ្ញុំយល់ឃើញថា នេះជាការដាក់បន្ទុកលើមន្ត្រីរាជការដែលកំពុងតែវេទនាដោយសារប្រាក់បៀវត្សរបស់គាត់មិនគ្រប់គ្រាន់ ហើយបើកយឺតទៀត ខ្ញុំសុំឲ្យរដ្ឋាភិបាលជំរុញ ព្រោះរឿងនេះបង្អាក់ការងារដែលជាមន្ត្រីរាជការ គាត់ចង់បម្រើប្រជាពលរដ្ឋ តែបម្រើមិនកើត»។
អ្នកស្រីបន្តថា នៅឆ្នាំ២០១៣ នេះ រដ្ឋសភាបានអនុម័តថវិកាសម្រាប់ចំណាយប្រចាំឆ្នាំបានចំនួនជាង ៣ពាន់លានដុល្លារ។ ក្នុងនោះ ថវិកាសម្រាប់បើកឲ្យមន្ត្រីរាជការទាំងអស់មានចំនួនជាង ៥០០លានដុល្លារ។ ក្នុងនាមអ្នកស្រីជាអ្នកតំណាងរាស្ត្រ អ្នកស្រីនឹងធ្វើលិខិតជាផ្លូវការដាក់ជូនប្រធានរដ្ឋសភា ដើម្បីពិចារណារឿងនេះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។