សាច់ញាតិបុរសដែលស្លាប់ពេលប៉ូលិសឃុំខ្លួនសួរចម្លើយនៅអធិការដ្ឋាននគរបាលស្រុកសង្កែ ខេត្តបាត់ដំបង ឱ្យដឹងថា មន្ត្រីគណៈកម្មាធិការជាតិប្រឆាំងទារុណកម្មនៃក្រសួងមហាផ្ទៃ បានសន្យានឹងបង្ហាញលទ្ធផលស៊ើបអង្កេត និងចេញសេចក្តីសន្និដ្ឋានចុងក្រោយឆាប់ៗខាងមុខនេះ។ ប៉ុន្តែមន្ត្រីសង្គមស៊ីវិល បញ្ជាក់ថា របាយការណ៍នៃលទ្ធផលស៊ើបអង្កេតនោះត្រូវផ្អែកលើនីតិវិធីដោយបញ្ជាក់មូលហេតុឱ្យបានត្រឹមត្រូវ ដើម្បីផ្តល់យុត្តិធម៌ដល់ជនរងគ្រោះ។
ក្រោយភាពស្ងៀមស្ងាត់អស់ជាច្រើនខែទាក់ទងនឹងការស៊ើបអង្កេតស្វែងរកមូលហេតុពិតប្រាកដជុំវិញការស្លាប់របស់ជនរងគ្រោះឈ្មោះ ពេជ្រ ធារ៉េត អំឡុងពេលប៉ូលិសឃុំខ្លួននៅអធិការដ្ឋាននគរបាលស្រុកសង្កែ ខេត្តបាត់ដំបងកន្លងមកនោះ សាច់ញាតិជនរងគ្រោះ រំពឹងថា ប៉ូលិសដែលប្រព្រឹត្តនោះ នឹងត្រូវយកមកផ្ដន្ទាទោសតាមច្បាប់ បន្ទាប់ពីគណៈកម្មាធិការជាតិប្រឆាំងទារុណកម្ម បានប្រាប់ថា នឹងបង្ហាញលទ្ធផលស្រាវជ្រាវចុងក្រោយនាពេលខាងមុខនេះ។
បងស្រីបង្កើតរបស់ជនរងគ្រោះគឺលោកស្រី ពេជ្រ លីណា ប្រាប់អាស៊ីសេរីថា កាលពីថ្ងៃទី១៤ ខែមិថុនា លោកស្រីបានទៅជួបមន្ត្រីគណៈកម្មាធិការជាតិប្រឆាំងទារុណកម្មដើម្បីសាកសួរជុំវិញដំណើរការស៊ើបអង្កេតរបស់សមត្ថកិច្ច ដោយមន្ត្រីនៅទីនោះ ប្រាប់ថា មន្ត្រីជំនាញនៃអគ្គស្នងការដ្ឋាននគរបាលជាតិកំពុងស៊ើបអង្កេតហើយ។ ម្យ៉ាងទៀតបងស្រីរងគ្រោះរូបនេះ បន្តថាប្រធានផ្នែកនីតិកម្ម និងជំនួយផ្នែកច្បាប់នៃគណៈកម្មាធិការជាតិប្រឆាំងទារុណកម្ម លោក តុប សំភី បានប្រាប់លោកស្រីឱ្យរង់ចាំរយៈពេល១៥ថ្ងៃទៀត ដើម្បីដឹងពីលទ្ធផលនោះ បន្ទាប់មក គណៈកម្មាធិការជាតិនឹងចេញរបាយការណ៍ស្រាវជ្រាវរបស់ខ្លួនដោយសន្និដ្ឋានចុងក្រោយ ហើយជនប្រព្រឹត្តនឹងត្រូវដាក់ពិន័យ ឬដាក់ទោសទណ្ឌតាមច្បាប់៖ «ខ្ញុំឮនៅសល់តែរយៈពេលកន្លះខែទៀត គឺខ្ញុំមានអារម្មណ៍ត្រេកអរខ្លាំងណាស់ ថានឹងទទួលបានយុត្តិធម៌ ទោះបីប្អូនប្រុសខ្ញុំមិនអាចរស់ឡើងវិញក៏ដោយ ក៏ខ្ញុំត្រូវរកខុសត្រូវឱ្យប្អូនរបស់ខ្ញុំ ព្រោះប្អូនខ្ញុំស្លាប់ដោយអយុត្តិធម៌ ស្លាប់ទាំងវេទនា ស្លាប់ពុំទាន់កាត់ទោសពីតុលាការ ដូច្នេះខ្ញុំត្រូវរកយុត្តិធម៌ឱ្យប្អូនខ្ញុំ»។
មកទល់ពេលនេះ សំណុំរឿងនៃការស្លាប់របស់បុរសឈ្មោះ ពេជ្រ ធារ៉េត ដែលសង្ស័យថា ប៉ូលិសស្រុកសង្កែជាអ្នកធ្វើទារុណកម្មនោះ បានអូសបន្លាយពេលជាង១ឆ្នាំមក ហើយ ប៉ុន្តែមិនទាន់មានយុត្តិធម៌សម្រាប់គ្រួសារជនរងគ្រោះនោះទេ បើទោះបីជាគណៈកម្មាធិការជាតិប្រឆាំងទារុណកម្ម បានរកឃើញជាជំហានដំបូងថា ប៉ូលិសពិតជាពាក់ព័ន្ធនឹងការធ្វើទារុណកម្មពិតមែនក្តី។
វិទ្យុអាស៊ីសេរី មិនអាចទាក់ទងប្រធានការិយាល័យព្រហ្មទណ្ឌកម្រិតធ្ងន់នៃក្រសួងមហាផ្ទៃ លោក ហែម ប៊ុនណា ដើម្បីបញ្ជាក់ជុំវិញរឿងនេះបានទេ នៅថ្ងៃទី១៧ ខែមិថុនា។
ចំណែកប្រធានគណៈកម្មាធិការជាតិប្រឆាំងទារុណកម្ម លោក នុត សាអាន ប្រាប់វិទ្យុអាស៊ីសេរីដោយខ្លីថា មន្ត្រីជំនាញរបស់លោកបានបញ្ជាក់ជុំវិញរឿងនេះទៅសាច់ញាតិ លោក ពេជ្រ ធារ៉េត រួចហើយ៖ «គ្រួសារគាត់បានជួបជាមួយមន្ត្រីជំនាញរបស់ខ្ញុំហើយ អ៊ីចឹងគាត់ដឹងហើយ មិចៗសួរទៅគាត់ទៅ»។
កាលពីថ្ងៃទី១៦ ខែមិថុនា ឆ្នាំ២០២១ កន្លងទៅគណៈកម្មាធិការជាតិប្រឆាំងទារុណកម្ម ចេញរបាយការណ៍ស្រាវជ្រាវរបស់ខ្លួន ដោយសន្និដ្ឋានថា ជនរងគ្រោះឈ្មោះ ពេជ្រ ធារ៉េត អាចស្លាប់បណ្ដាលមកពីការវាយធ្វើទារុណកម្មស្រាលឬធ្ងន់ ក្នុងពេលប៉ូលិសឃុំខ្លួននៅអធិការនគរបាលស្រុកសង្កែ ប៉ុន្តែសមត្ថកិច្ច មិនបានចាប់ជនល្មើសផ្ដន្ទាទោសតាមច្បាប់ឡើយ។ គណៈកម្មាធិការជាតិប្រឆាំងទារុណកម្ម បានរុញសំណុំរឿងនេះទៅអគ្គស្នងការនគរបាលជាតិ ដើម្បីស៊ើបអង្កេតបន្ថែមទៀត ក្រោមហេតុផលថា មន្ត្រីប៉ូលិសពាក់ព័ន្ធនៅក្នុងខេត្តបាត់ដំបងផ្តល់ចម្លើយផ្សេងៗគ្នា។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំ ខេត្តបាត់ដំបង និងប៉ៃលិន លោក យិន ម៉េងលី មានប្រសាសន៍ថា កន្លងមកករណីបែបនេះជនរងគ្រោះកម្រទទួលបានយុត្តិធម៌ណាស់ បើសិនគ្មានកិច្ចអន្តរាគមន៍រាជរដ្ឋាភិបាលនោះ ដូច្នេះការអូសបន្លាយនៃការស៊ើបអង្កេតស្វែងរកការពិតនឹងធ្វើប្រជាពលរដ្ឋជាពិសេសគ្រួសារជនរងគ្រោះអស់ជំនឿលើស្ថាប័នអនុវត្តច្បាប់ ហើយបើកដៃឱ្យជនល្មើសប្រព្រឹត្តអំពើខុសឆ្គងតទៅទៀត។ ទោះយ៉ាងណាលោកថា សង្គមស៊ីវិលទទូចឱ្យស្ថាប័នពាក់ព័ន្ធបង្ហាញរាយការណ៍ស៊ើបអង្កេតឱ្យបានឆាប់ ដោយផ្អែកលើនីតិវិធី និងទឡ្ហីករណ៍ ឬហេតុផលត្រឹមត្រូវ៖ «ខ្ញុំបានទទូចច្រើនហើយថាបើទោះបីរបាយការណ៍នោះ វិជ្ជមានក្តី ឬអវិជ្ជមានក្តីត្រូវបង្ហាញពីទឡ្ហីករណ៍ផង បើសិនយើងបង្ហាញថាមិនមែនអំពើទារុណកម្មត្រូវបង្ហាញហេតុផលមកដោយសារអី ហើយបើសិនវាជាអំពើទារុណកម្មបង្ហាញទឡ្ហីករណ៍មកដោយសារអី ហើយយើងត្រូវធ្វើម៉េចទៀត»។
កាលពីថ្ងៃទី៣ ខែមេសា ឆ្នាំ២០២១ បុរសម្នាក់ឈ្មោះ ពេជ្រ ធារ៉េត អាយុ៣១ឆ្នាំ មានមុខរបរជាជាងផ្សារដែក រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ បានស្លាប់បាត់បង់ជីវិត ក្នុងពេលប៉ូលិសចាប់ឃុំខ្លួនសួរចម្លើយនៅក្នុងអធិការដ្ឋាននគរបាលស្រុកសង្កែ អស់រយៈពេលជាង៣ម៉ោង ពាក់ព័ន្ធនឹងការ សង្ស័យថា គាត់រាយខ្សែភ្លើងអគ្គិសនី ដើម្បីឆក់សម្លាប់ប្រពន្ធនៅក្នុងផ្ទះដោយសារភ្លើងប្រច័ណ្ឌ ប៉ុន្តែសាក្សីអះអាងថា ក្នុងពេលកើតហេតុ គឺបុរសជាប្តីរូបនេះ មិនបាននៅផ្ទះឡើយ។ប៉ូលិសខេត្តបាត់ដំបង បកស្រាយថា លោក ពេជ្រ ធារ៉េត ស្លាប់ដោយសារគាំងបេះដូង ព្រោះប្រើថ្នាំញៀនហួសកម្រិត។ ប៉ុន្តែនៅពេលសាច់ញាតិ ពិនិត្យសាកសពឃើញមានស្នាមរបួស និងជាំពេញខ្លួនចាប់តាំងពីជើងរហូតដល់ក្បាល និងមានហូរឈាមតាមច្រមុះ និងត្រចៀក ព្រមទាំងស្នាមខូងនៅកន្លែងដាក់ខ្នោះ និងស្នាមជាំខ្លាំងនៅកជើងទាំងពីរ។ លើសពីនេះ សម្លៀកបំពាក់របស់ជនរងគ្រោះ ត្រូវបានផ្លាស់ប្ដូរ ហើយសាច់ញាតិ អះអាងថា សមត្ថកិច្ច បានព្យាយាមរារាំងមិនឲ្យសាច់ញាតិ និងអ្នកកាសែត ពិនិត្យសាកសពទៀតផង។ អ្នកជំនាញ និងគ្រួសារជនរងគ្រោះសន្និដ្ឋានថា ស្នាមជាំ និងរបួសនៅលើដងខ្លួនសាកសពលោក ពេជ្រ ធារ៉េត ជាស្នាមរងទារុណកម្មដោយការវាយដំ និងឆក់ខ្សែភ្លើង ។ ខាងគណៈកម្មាធិការជាតិប្រឆាំងទារុណកម្ម ក៏បានចុះស៊ើបអង្កេតរកឃើញថា ការស្លាប់របស់ជនរងគ្រោះ ជាប់ពាក់ព័ន្ធនឹងការធ្វើទារុណកម្មរបស់នគរបាលស្រុកសង្កែដែរ ។ ទោះជាយ៉ាងណា មកទល់ពេលនេះ ក្រុមនគរបាលស្រុកសង្កែ ដែលជាប់សង្ស័យក្នុងករណីនេះ នៅតែមានសេរីភាពដដែល។
បងស្រីរបស់ជនគ្រោះដែលសកម្មក្នុងការស្វែងរកយុត្តិធម៌ជូនប្អូនប្រុសនេះ អះអាងថា លោកស្រី នឹងនៅតែតស៊ូដល់ទីបញ្ចប់ដោយមិនរាថយនោះទេ រហូតទាល់តែប្អូនប្រុសរបស់លោកស្រី និងក្រុមគ្រួសារទទួលបានយុត្តិធម៌ពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។