មន្ត្រីសង្គមស៊ីវិល និងអ្នកជំនាញផ្នែកច្បាប់រិះគន់មេនគរបាលថ្នាក់ជាតិថា យឺតយ៉ាវក្នុងដំណើរការស្រាវជ្រាវតាមចាប់ខ្លួនជនសង្ស័យមួយចំនួន ដែលកំពុងរត់គេចខ្លួនពាក់ព័ន្ធនឹងការចូលរួមធ្វើសកម្មភាពរំដោះអ្នកទោសនៅខេត្តសៀមរាប កាលពីដើមខែសីហា។
ជនសង្ស័យជនជាតិតួកគី (Türkiye) ៦នាក់ និងជនជាតិខ្មែរ ២នាក់ដែលជាអ្នករៀបចំអាវុធឱ្យក្រុមឧក្រិដ្ឋជនចេញប្រតិបត្តិការរំដោះអ្នកទោសគ្រឿងញៀនជនជាតិតៃវ៉ាន់ (Taiwan) នៅខេត្តសៀមរាបកាលពីដើមខែសីហានោះ មកទល់នឹងពេលនេះសមត្ថកិច្ចមិនទាន់ចាប់ពួកគេបាននោះទេ ខណៈរបាយការណ៍នៃដំណើរការលទ្ធផលស៊ើបអង្កេតចុងក្រោយក៏សមត្ថកិច្ចមិនទាន់បង្ហាញឱ្យមហាជនបានដឹងនៅឡើយ។
ប្រធានអង្គការសម្ពន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា ទទួលស្គាល់អំពីនីតិវិធីស៊ើបអង្កេតតាមចាប់ក្រុមឧក្រិដ្ឋជនជារឿងស្មុគស្មាញ។ ទោះជាយ៉ាងណា លោក រស់ សុដ្ឋា ប្រាប់វិទ្យុអាស៊ីសេរី នៅថ្ងៃទី១១ ខែកញ្ញាថា ប្រសិនបើប្រទេសមួយមានក្រុមបក្ខពួកនិយម រួមទាំងមានអំពើពុករលួយចាក់ស្រែះក្នុងស្ថាប័នរដ្ឋ នោះដំណើរការស៊ើបអង្កេតតាមចាប់ខ្លួនក្រុមឧក្រិដ្ឋជននឹងប្រព្រឹត្តទៅគ្មានតម្លាភាពនោះទេ។ លោកជំរុញដល់មន្ត្រីប៉ូលិសថ្នាក់ជាតិឱ្យបង្ហាញលទ្ធផលនៃការស៊ើបអង្កេតរឿងនេះ។
លោក រស់ សុដ្ឋា៖ « ទោះបីយ៉ាងណាក៏ដោយរឿងនេះ ក៏មិនមែនជារឿងអីដែរ លាក់ទាំងអស់ទេព្រោះក្នុងច្បាប់អន្តរជាតិអត់មានអីត្រូវលាក់ផង លើកលែងតែព័ត៌មានពាក់ព័ន្ធនឹងសន្តិសុខជាតិ បើបញ្ហាសាធារណៈអ៊ីចឹង អាជ្ញាធរត្រូវតែមានគណនេយ្យភាព (Accountability) ចំពោះអ្នកពាក់ព័ន្ធ និងប្រជារាស្ត្ររបស់ខ្លួនដែលមានការព្រួយបារម្ភ។ គួរមានការធ្វើបច្ចុប្បន្នភាព ឬធ្វើសន្និសីទសារព័ត៌មានឱ្យអ្នកសារព័ត៌មានបានជ្រាបអំពីស្ថានភាព និងដំណើរការនៃការរីកចម្រើនការស៊ើបអង្កេតខ្ញុំគិតថា ល្អបំផុត »។
អគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀនលោក ម៉ក់ ជីតូ ប្រាប់វិទ្យុអាស៊ីសេរីកាលពីចុងខែសីហាថា បេសកកម្មតាមចាប់ក្រុមចូលរួមធ្វើសកម្មភាពរំដោះអ្នកទោសនៅខេត្តសៀមរាបនោះនៅមិនបញ្ចប់នោះទេ។ លោកបញ្ជាក់ថា កម្ពុជាក៏បានសហការជាមួយប្រទេសក្នុងតំបន់ និងប៉ូលិសអន្តរជាតិអាំងទែប៉ូល (Interpol) ដើម្បីតាមចាប់មុខសញ្ញាចំនួន ៨នាក់ទៀត ដែលធ្វើសកម្មភាពរៀបចំអាវុធឱ្យក្រុមឧក្រិដ្ឋជនធ្វើសកម្មភាពរំដោះអ្នកទោសកន្លងទៅ។ ទោះបីជាបែបនេះក្ដី មកទល់នឹងពេលនេះ មន្ត្រីនគរបាលជាតិមិនទាន់បង្ហាញរបាយការណ៍នៃលទ្ធផលស៊ើបអង្កេតចុងក្រោយនោះទេ។
វិទ្យុអាស៊ីសេរីមិនទាន់អាចទាក់ទងអគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀនលោក ម៉ក់ ជីតូ ដើម្បីសាកសួរបន្ថែមជុំវិញរឿងនេះបានទេនៅថ្ងៃទី១១ ខែកញ្ញា។
នគរបាលថ្នាក់ជាតិ បានចាប់ខ្លួនមេខ្លោងគ្រឿងញៀនជនជាតិតៃវ៉ាន់ និងបក្ខពួកខ្លួន ១១នាក់នៅទីតាំងផ្សេងៗគ្នា បន្ទាប់ពីពួកគេបានធ្វើសកម្មភាពរំដោះអ្នកទោសគ្រឿងញៀនជនជាតិតៃវ៉ាន់នៅគ្លីនិកធ្មេញ ជុំ ចិន្តា ក្នុងខេត្តសៀមរាប កាលពីថ្ងៃទី១៧ ខែសីហា។ តុលាការក្រុងភ្នំពេញកាលពីថ្ងៃទី៣០ ខែសីហា សម្រេចឃុំខ្លួនអ្នកទោសគ្រឿងញៀនជនជាតិតៃវ៉ាន់ និងបក្ខពួកខ្លួននៅពន្ធនាគារព្រៃស ក្រោមបទចោទប្រកាន់ជាច្រើនដូចជា បទលាងលុយកខ្វក់ ប្លន់មានស្ថានទម្ងន់ បង្ខាំងមានស្ថានទម្ងន់ និងកាន់កាប់អាវុធគ្មានការអនុញ្ញាតជាដើម។
ជុំវិញរឿងនេះ អ្នកសិក្សាផ្នែកច្បាប់ លោក វ៉ន ចាន់ឡូត សោកស្ដាយចំពោះសកម្មភាពក្រុមប្រដាប់អាវុធធ្វើសកម្មភាពរំដោះអ្នកទោសលើទឹកដីខ្មែរយ៉ាងអនាធិបតេយ្យ។ លោកយល់ឃើញថា មូលហេតុក្រុមឧក្រិដ្ឋជនទាំងនោះហ៊ានធ្វើសកម្មភាពបែបនេះ ដោយសារតែកម្ពុជាគ្មានការគោរពនីតិរដ្ឋត្រឹមត្រូវ និងមានអំពើពុករលួយជាប្រព័ន្ធ។
លោក វ៉ន ចាន់ឡូត៖ « ពួកឧក្រិដ្ឋជនបែបនេះសុទ្ធតែមានបណ្ដាញភ្នាក់ងារខ្លាំងដែរ អ៊ីចឹងការគេចវេះអំពីប៉ូលិសអីហ្នឹងពួកហ្នឹងវាមានជំនាញជាក់ស្ដែងប្រទេសកម្ពុជាខ្សោយនូវប្រព័ន្ធច្បាប់ យើងខ្សោយទាំងការគ្រប់គ្រង ខ្សោយប្រព័ន្ធច្បាប់អាហ្នឹង គឺជាជង្រុកនៃឧក្រិដ្ឋជនដែលងាយប្រើប្រាស់ប្រទេសកម្ពុជា ដើម្បីប្រព្រឹត្តឧក្រិដ្ឋកម្មហ្នឹងហើយ »។
ប្រធានអង្គការសម្ពន្ធភាពការពារសិទ្ធិមនុស្សកម្ពុជាលោក រស់ សុដ្ឋា លើកឡើងថា ដំណើរការនៃការស៊ើបអង្កេតស្វែងរកជនល្មើសទាំងនោះអាចនឹងគ្មានប្រសិទ្ធភាព ប្រសិនបើអាចមានមន្ត្រីអាជ្ញាធររដ្ឋមានជាប់ពាក់ព័ន្ធ និងមានការប្រព្រឹត្តអំពើពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។