ប្រជាពលរដ្ឋជិត៣០នាក់ បន្តទាមទារឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់
2022.12.25
ប្រជាពលរដ្ឋខ្មែរលើកបដាទាមទារឱ្យក្រសួងអប់រំបញ្ឈប់ផែនការដាក់បញ្ចូលភាសាវៀតណាមឱ្យកូនខ្មែរសិក្សានៅសកលវិទ្យាល័យភូមិន្ទភ្នំពេញ។
រូប៖ ពលរដ្ឋផ្ដល់ឲ្យ
ប្រជាពលរដ្ឋ និងយុវជនសកម្មជិត៣០នាក់ បន្ត ទាមទារឱ្យរដ្ឋាភិបាលបញ្ឈប់ផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់ និងមិនត្រូវបង្រៀនអក្សរសាស្ត្រវៀតណាមនៅសាកលវិទ្យាល័យភូមិន្ទភ្នំពេញ។ មន្ត្រីអង្គការសង្គមស៊ីវិលយល់ថា ការទាមទាររបស់ក្រុមប្រជាពលរដ្ឋទាំងនេះ មិនមែនជាការរើសអើងជាតិសាសន៍នោះទេ ក៏ប៉ុន្តែជាការជំរុញឱ្យមានការអនុវត្តច្បាប់។
ក្រុមប្រជាពលរដ្ឋសកម្មជិត៣០នាក់ បន្តទាមទារនៅទីលានប្រជាធិបតេយ្យ ក្នុងក្រុងភ្នំពេញនៅថ្ងៃទី២៥ ខែធ្នូ ឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់ និងកុំឱ្យក្រសួងអប់រំបង្រៀនអក្សរសាស្ត្រវៀតណាម នៅតាមសកលវិទ្យាល័យ។ កងសន្តិសុខប្រមាណ១០នាក់ ក៏ត្រូវបានដាក់ពង្រាយឱ្យឃ្លាំមើលការតវ៉ានៅថ្ងៃទី២នេះ។ ទោះជាយ៉ាងណា ការប្រមូលផ្ដុំនៅថ្ងៃនេះមិនមានការរារាំងពីសំណាក់អាជ្ញាធរឡើយ។
ស្ថិតក្នុងវ័យ៨០ឆ្នាំ និងបានពាក់អាវរងាដើម្បីទប់ទល់នឹងអាកាសធាតុត្រជាក់ នៅកណ្ដាលវាលទីលានប្រជាធិបតេយ្យ លោកស្រី ឆាង គីមថុល បា្រប់វិទ្យុអាស៊ីសេរីថា ប្រជាពលរដ្ឋខ្មែរគួរចូលរួមទាមទារឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ខុសច្បាប់ ជាពិសេសជនជាតិវៀតណាម ពីព្រោះក្រុមជនអន្តោប្រវេសន៍ទាំងនេះមិនបានមករស់នៅក្នុងប្រទេសកម្ពុជា ដោយមូលហេតុរងការគំរាមកំហែងនយោបាយអ្វីឡើយ។ លោកស្រីបន្តថា រដ្ឋាភិបាលគួររឹតបន្តឹងការគ្រប់គ្រងជនអន្តោប្រវេសន៍ខុសច្បាប់ទាំងនោះ ជាជាងទទួលស្គាល់ពួកគេឱ្យនៅកម្ពុជាដោយស្របច្បាប់ ហើយដណ្ដើមមុខរបរប្រជាពលរដ្ឋម្ចាស់ស្រុក។ លោកស្រី ឆាង គីមថុល បន្ថែមថា ការតវ៉ានេះមិនមែនធ្វើឡើងដោយសារការរើសអើងនោះទេ ព្រោះក្នុងនាមជាប្រជាពលរដ្ឋម្ចាស់ស្រុក គឺដើម្បីការពារអត្ថប្រយោជន៍ ប្រជាពលរដ្ឋរបស់ខ្លួនតែប៉ុណ្ណោះ៖
«ចំពោះខ្មែរយើងដែលទៅប្រទេសគេ គោរពសិទ្ធិនៅប្រទេសគេណាស់ គេ គេចូលមកនេះ គេអត់គោរពសិទ្ធិយើងទេ បើអញ្ចឹងយើងការពារទឹកដី ការពារកុំឱ្យនិគមជនយួនចេះតែហូរចូលមកជារៀងរាល់ថ្ងៃយ៉ាងនេះ។ ខ្ញុំសំណូមពរឱ្យបងប្អូន ឱ្យយុវជនទាំងអស់តាមដាន បញ្ហាសង្គមយើងនេះឱ្យជាប់ជារៀងរហូត ទប់ទល់សង្គមយើងឱ្យបានល្អប្រសើរ កុំឱ្យបរទេសចូលមក គាត់អុកឡុកក្នុងសង្គមយើង កុំឱ្យគេឆាឆៅ កុំឱ្យគេធ្វើតាមតែអំពើចិត្តរបស់គេនោះ»។
យុវជនម្នាក់ដែលស្ម័គ្រចិត្តចូលរួមការតវ៉ានេះគឺលោក សាក់ លីហួ យល់ឃើញថា ការតវ៉ារបស់ក្រុមប្រជាពលរដ្ឋនេះ មិនមាននិន្នាការរើសអើងជាតិសាសន៍ណាមួយនោះឡើយ ប៉ុន្តែគឺជាការប្រុងប្រយ័ត្ន បង្កាកុំឱ្យមានជម្លោះជាតិសាសន៍ទៅវិញទេ។ លោកបន្ថែមថា លោកមិនគាំទ្រឱ្យរដ្ឋាភិបាលផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់ឡើយ ព្រោះការធ្វើដូច្នេះគឺប្រៀបដូចជាលើកទឹកចិត្តឱ្យជនអន្តោប្រវេសន៍ទាំងនោះ មករស់នៅក្នុងប្រទេសកម្ពុជាដោយខុសច្បាប់បន្ថែមទៀត ហើយអាចនាំឱ្យមានការរើសអើងជាតិសាសន៍កាន់តែខ្លាំងឡើង។ លោកថា ក្នុងប្រវត្តិសាស្រ្ត ប្រទេសវៀតណាមបានយកទឹកដីកម្ពុជាក្រោមតាមរយៈការដាក់ប្រជាពលរដ្ឋមករស់លើទឹកដីខ្មែរនេះឯង។ លោក សាក់ លីហួ បន្ថែមថា រដ្ឋាភិបាលគួររឹតបន្តឹងការអនុវត្តច្បាប់អន្តោប្រវេសន៍ចំពោះជនបរទេសចូលមករស់នៅក្នុងប្រទេសកម្ពុជាដោយខុសច្បាប់ ដើម្បីរក្សាសន្តិសុខជាតិ ជាជាងបន្តផ្ដល់ភាពស្របច្បាប់ដល់ពួកគេ៖
«កាលណាកំណើនជនជាតិវៀតណាមកាន់តែច្រើន យើងអាចមើលឃើញប៉ះពាល់ទៅដល់ប្រជាពលរដ្ឋ ទាំងផ្នែកសេដ្ឋកិច្ចរបស់គាត់ ទាំងពីសន្តិសុខរបស់គាត់ ព្រោះអីមើលឃើញផ្ទាល់ទៅ ជនជាតិវៀតណាមមួយចំនួន មិនមែនថាទាំងអស់ទេ គឺមួយចំនួន ភាគច្រើនបង្កនូវភាព ហៅថាចលាចលនៅក្នុងតំបន់ដែលគាត់រស់នៅអញ្ចឹងទៅ ដល់ពេលអញ្ចឹងហើយ នៅពេលដែលយើងមានបញ្ហា មានអីអញ្ចឹង ពួកវៀតណាមគេស្រុះដៃស្រុះជើងគ្នា ក្នុងការធ្វើបាបប្រជាពលរដ្ឋខ្មែរយើង»។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីបកស្រាយជុំវិញរឿងនេះបាននៅឡើយទេនៅថ្ងៃទី២៥ ខែធ្នូ ដោយទូរស័ព្ទចូលតែពុំមានអ្នកទទួល។
ជុំវិញរឿងនេះដែរ អ្នកនាំពាក្យសមាគមការពារសិទ្ធិមនុស្ស លោក ស៊ឹង សែនករុណា គាំទ្រការស្នើឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់ ព្រោះលោកថាការទាមទារទាំងនេះធ្វើឡើងក្នុងន័យស្នេហាជាតិតែប៉ុណ្ណោះ។ លោកបន្ថែមថា រដ្ឋាភិបាលនៃប្រទេសនីមួយៗ តែងបង្កើតគោលនយោបាយ ការពារអត្ថប្រយោជន៍ពលរដ្ឋម្ចាស់ប្រទេសរៀងៗខ្លួន កុំឱ្យជនបរទេសមកដណ្ដើមមុខរបររកស៊ីឬទាញយកធនធានធម្មជាតិរបស់ជាតិ ហើយការធ្វើបែបនេះមិនមែនជាការរើសអើងពូជសាសន៍នោះឡើយ។ លោក ស៊ឹង សែនករុណា បន្ថែមថា ការអនុវត្តច្បាប់អន្តោប្រវេសន៍ឱ្យបានតឹងរឹងមិនមែនជាការរំលោភសិទ្ធិមនុស្សនោះទេ ក៏ប៉ុន្តែផ្ទុយទៅវិញ វាគឺជាការលើកកម្ពស់ការគោរពសិទ្ធិមនុស្ស ព្រោះនៅពេលរដ្ឋាភិបាលអាចគ្រប់គ្រងជនអន្តោប្រវេសន៍ខុសច្បាប់បាន នោះការនេះអាចនឹងកាត់បន្ថយអំពើពុករលួយ និងបទល្មើសជួញដូរមនុស្ស ឬបទល្មើសផ្សេងៗបានទៅវិញទេ៖
«មិនមែនតែប្រទេសយើងទេ ប្រទេសណាក៏ដោយឱ្យតែគេមានដែនអធិបតេយ្យភាព មានឯករាជ្យភាពប្រទេសគេត្រឹមត្រូវ គេមានការប្រុងប្រយ័ត្នណាស់អំពីការហូរចូលនៃជនអន្តោប្រវេសន៍នេះ។ ប៉ុន្តែបើហូរចូលដោយភាពស្របច្បាប់មិនមានបញ្ហាអ្វីនោះទេ ប៉ុន្តែត្រូវការពារគេ ឱ្យគេមាននូវសុវត្ថិភាព»។
ការប្រមូលផ្ដុំប្រជាពលរដ្ឋទាមទារឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍នេះ ត្រូវបានអាក់ខានទៅវិញ មិនបានធ្វើកាលពីថ្ងៃទី៧ ខែតុលា ដោយយុវជន ធែល ធីលែន ដែលជាអ្នកដឹកនាំការប្រមូលផ្ដុំតវ៉ានេះ ត្រូវបានសមត្ថកិច្ចកម្ពុជាបានចាប់ខ្លួន កាលពីថ្ងៃទី៤ តុលា ហើយតុលាការខេត្តកណ្ដាលបានឃុំខ្លួនលោកបណ្ដោះអាសន្ននៅពន្ធនាគារខេត្តនេះ។ ក្រុមប្រជាពលរដ្ឋដែលបានចូលរួមតវ៉ាលើកនេះ លើកឡើងថា ពួកគេនឹងបន្តការតវ៉ានៅពេលខាងមុខទៀត រហូតដល់រដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- លោក ហ៊ុន សែន ស្នើចៅហ្វាយចាស់វៀតណាមឱ្យចាប់លោក សម រង្ស៊ី បើមេបក្សប្រឆាំងរូបនេះប្រើទឹកដីវៀតណាមចូលមកកម្ពុជា
- ពលរដ្ឋខ្មែរកម្ពុជាក្រោមនៅវៀតណាមរងការហាមឃាត់ និងប្រើហិង្សាពេលប្រារព្ធពិធីរំឭកការបាត់បង់ទឹកដី
