អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ អំពាវនាវដល់ប្រជាពលរដ្ឋខ្មែរ ដែលកំពុងប្រើប្រាស់អត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់ និងពលរដ្ឋដែលគ្រប់អាយុ ១៥ឆ្នាំឡើងទៅ ដែលពុំទាន់មានអត្តសញ្ញាណប័ណ្ណសញ្ជាតិខ្មែរគំរូថ្មី ឱ្យប្រញាប់រួសរាន់ទៅបំពេញបែបបទស្នើសុំផ្ដល់អត្តសញ្ញាណប័ណ្ណសញ្ជាតិខ្មែរគំរូថ្មី។ ទីតាំងដែលត្រូវធ្វើអត្តសញ្ញាណប័ណ្ណគំរូថ្មីនេះ រួមមាន ប៉ុស្តិ៍នគរបាលរដ្ឋបាលឃុំសង្កាត់ អធិការដ្ឋាននគរបាលក្រុង ស្រុក ខណ្ឌ ឬស្នងការដ្ឋាននគរបាលរាជធានី ខេត្ត ដែលពលរដ្ឋរស់នៅ ឬក៏នៅទីស្នាក់ការផ្ដល់អត្តសញ្ញាណប័ណ្ណសញ្ជាតិខ្មែរនៅផ្សារទំនើបអ៊ីអនម៉ល២ (Aeon Mall 2) នៅខណ្ឌសែនសុខ រាជធានីភ្នំពេញ។
ឯកសារដែលត្រូវភ្ជាប់ទៅជាមួយដើម្បីធ្វើអត្តសញ្ញាណប័ណ្ណនេះ មានដូចជា សំបុត្រកំណើត ឬសំបុត្របញ្ជាក់កំណើត សៀវភៅគ្រួសារ ឬសៀវភៅស្នាក់នៅ ឬលិខិតបញ្ជាក់ទីលំនៅ និងអត្តសញ្ញាណប័ណ្ណខ្មែរគំរូចាស់។
សេចក្ដីអំពាវនាវរបស់អគ្គនាយកដ្ឋានអត្តសញ្ញាណកម្ម កាលពីថ្ងៃទី៥ វិច្ឆិកា បញ្ជាក់ថា អត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់ នឹងត្រូវអស់សុពលភាពប្រើប្រាស់ នៅត្រឹមថ្ងៃច័ន្ទ ទី៣១ ខែធ្នូ ឆ្នាំ២០១៨ ខាងមុខនេះ។ អគ្គនាយកដ្ឋានអត្តសញ្ញាណកម្មជំរុញឱ្យពលរដ្ឋដែលមិនទាន់មានអត្តសញ្ញាណប័ណ្ណគំរូថ្មី ប្រញាប់ទៅធ្វើឱ្យបានគ្រប់ៗគ្នា ដើម្បីធានានូវសិទ្ធិសេរីភាព និងផលប្រយោជន៍ស្របច្បាប់ផ្ទាល់ខ្លួន៕