សង្គមស៊ីវិលព្រួយបារម្ភពីករណីឃាតកម្មកើនឡើងក្នុងសង្គម
2023.04.22
មន្ត្រីសង្គមស៊ីវិលព្រួយបារម្ភពីអំពើឃាតកម្មកើនឡើងក្នុងសង្គមជាបន្តបន្ទាប់ បើទោះបីជារដ្ឋាភិបាលដាក់ចេញគោលនយោបាយភូមិ-ឃុំមានសុវត្ថិភាពក្ដី។ ពួកគាត់យល់ថា ដើម្បីលុបបំបាត់បទល្មើសទាំងនេះ ឱ្យមានប្រសិទ្ធភាពបានឡើយ លុះត្រាតែសង្គមកម្ពុជាបង្កើនការអប់រំសីលធម៌ អនុវត្តច្បាប់ឱ្យបានស្មើភាព និងទប់ស្កាត់ការចរាចរគ្រឿងញៀន ព្រមទាំងគ្រឿងស្រវឹងជាដើម។
អំពើឃាតកម្ម និងហិង្សាគ្រប់រូបភាពបានកើតឡើងជាច្រើនករណីស្ទើររាល់ថ្ងៃនៅក្នុងសង្គមក្នុងរយៈពេលចុងក្រោយនេះ។
ប្រធានសមាគមនិស្សិតបញ្ញវន្តខ្មែរ លោក កើត សារ៉ាយ យល់ឃើញថា ការកាប់សម្លាប់ និងអំពើហិង្សាកើតឡើងជាបន្តបន្ទាប់ បណ្ដាលមកពីការធ្លាក់ចុះសីលធម៌សង្គម និងការសេពគ្រឿងស្រវឹង គ្រឿងញៀន ជាពិសេសការយកអ្នកមានអំណាចមកធ្វើជាខ្នងបង្អែកដោយមិនខ្លាចច្បាប់។ លោកបន្តថា បញ្ហានេះអាចលុបបំបាត់បាន លុះត្រាតែពលរដ្ឋ ឬអ្នកនយោបាយឱ្យតម្លៃសីលធម៌ គោរពច្បាប់ និងរឹតបន្តឹងការអនុវត្តន៍ច្បាប់ឱ្យបានល្អ។
លោក កើត សារ៉ាយ៖ «ទោះជារឿងនេះវាកើតឡើងមួយៗក៏ដោយ យើងចាំមិនភ្លេចទេ គឺព្រះមហាក្សត្រទ្រង់ក៏ធ្លាប់ចេញលិខិតអំពាវនាវឱ្យបងប្អូនប្រជាពលរដ្ឋខ្មែរខិតខំកសាងសីលធម៌ លើកកម្ពស់សីលធម៌សង្គមដើម្បីប្រព្រឹត្តអំពើហិង្សារហូតដល់មានការកាបសម្លាប់គ្នាដោយប្រើប្រាស់សកម្មភាពកាចសាហាវ»។
ការលើកឡើងរបស់មន្ត្រីអង្គការសង្គមស៊ីវិលនេះ គឺដោយសាររយៈពេលចុងក្រោយនេះ អំពើហិង្សា និងឃាតកម្មកើតមានស្ទើររៀងរាល់ថ្ងៃ។ ក្នុងនោះមានករណីឃាតកម្មដ៏សាហាវមួយនៅខេត្តស្វាយរៀង កាលពីថ្ងៃទី២០ មេសា ដោយនារីបុគ្គលិកកាស៊ីណូម្នាក់ត្រូវបានឃាតកកាត់ក ចេញពីដងខ្លួន។ សមត្ថកិច្ចចាប់បានឃាតករូបនោះនៅស្រុកឆែប ខេត្តព្រះវិហារ នៅថ្ងៃទី២០ មេសា ដោយជនល្មើសព្យាយាមលេបថ្នាំកណ្ដុរដើម្បីសម្លាប់ខ្លួន តែមិនបានសម្រេច មូលហេតុសមត្ថកិច្ចកំពុងធ្វើការស្រាវជ្រាវ។ ធ្ងន់ធ្ងរជាងនេះ ក៏មានករណីកូនបង្កើតដែលជាមនុស្សប្រើប្រាស់ថ្នាំញៀនហើយបែកថ្នាំបានប្រើប្រាស់អំពើហិង្សាបានវាយទៅលើឪពុករបស់ខ្លួនឈ្មោះយ៉ុន ឆៃឡេង អាយុ៥២ឆ្នាំ ដោយចាប់បោកក្បាលទៅនឹងធុងហ្គាស កាលពីថ្ងៃទី២០ មេសា នៅស្រុក កំចាយមារ ខេត្តព្រៃវែង។ ដោយឡែក នៅថ្ងៃទី៥ មេសា មានករណីឃាតកម្មនៅរាជធានីភ្នំពេញ ករណីប្ដីសម្លាប់ប្រពន្ធ ដោយសារប្រចណ្ឌ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា យល់ឃើញថា កត្តាដែលធ្វើឱ្យមានករណីឃាតកម្មកាន់តែកើនឡើងនោះ គឺបណ្ដាលមកពីការប្រើប្រាស់គ្រឿងញៀន គ្រឿងស្រវឹង និងការអនុវត្តច្បាប់ធូររលុង ដែលបង្កើតឱ្យមាននិទ្ទណ្ឌភាព ឬឱ្យជនប្រព្រឹត្តខុសរួចផុតពីសំណាញ់ច្បាប់។
លោក នី សុខា៖ «ប្រសិនបើអំពើហ្នឹងវាចេះតែកើតមាន ហើយអ្នកដែលប្រព្រឹត្តខុសហ្នឹងចេះតែរួចផុតពីសំណាញ់ច្បាប់ យើងមានការព្រួយបារម្ភចំពោះបញ្ហាប្រជាពលរដ្ឋអស់ជំនឿទៅលើសមត្ថកិច្ច អស់ជំនឿទៅលើអាជ្ញាធរ អាចបណ្ដាលឱ្យប្រជាពលរដ្ឋបង្កើតតុលាការដោយខ្លួនឯង អាចធ្វើឱ្យសង្គមមានបញ្ហាអសន្តិសុខសង្គមកាន់តែខ្លាំង»។
ការប្រើប្រាស់អំពើហិង្សា និងសម្លាប់ក៏បានកើតឡើងទៅលើមន្ត្រីបក្សប្រឆាំង និងសកម្មជនផងដែរ ដូចជាការលួចវាយនឹងដំបងដែក ការព្រួតគ្នាវាយ និងកាប់ដោយកាំបិត ដែលធ្វើឱ្យជនរងគ្រោះពិការ និងខ្លះទៀតបាត់បង់ជីវិត។ ទោះជាយ៉ាងណា ក្នុងករណីហិង្សានយោបាយនេះ អាជ្ញាធរមិនបានចាប់អ្នកប្រព្រឹត្តឱ្យមកទទួលទោសចំពោះមុខច្បាប់នោះទេ។
មន្ត្រីសង្គមស៊ីវិល រួមទាំងប្រជាពលរដ្ឋ ព្រួយបារម្ភថា ប្រសិនបើករណីឃាតកម្មនៅតែកើតមានក្នុងសង្គមកម្ពុជាទៀត នោះវានឹងប៉ះពាល់ដល់សន្តិសុខសង្គម ហើយវានឹងកែប្រែប្រទេសកម្ពុជាទៅជាប្រទេសដែលគ្មានសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីធនាគារបង្ខំឲ្យកូនបំណុលលក់ទ្រព្យសម្បត្តិសងលុយទៅធនាគារខ្លួន
- តំណាងរាស្ត្រនិងទីប្រឹក្សាបក្សប្រជាជនប្រតិកម្មលើការប្រមូលពន្ធថា គាបសង្កត់ពលរដ្ឋក្នុងគ្រាលំបាក
- អាជ្ញាធរបញ្ជូនកញ្ញា សេង ធារី ទៅឃុំខ្លួននៅពន្ធនាគារព្រៃសវិញ ក្រោយពេលមន្ត្រីអាមេរិកជួបលោក ហ៊ុន ម៉ាណែត ផ្ទួនៗ គ្នា
- អាមេរិកផ្ដល់ជំនួយ ១៨លានដុល្លារមកកម្ពុជាវិញ តែមិនបានទទួលស្គាល់ថា ការបោះឆ្នោតត្រឹមត្រូវទេ
- អ្នកវិភាគថា អាមេរិកផ្ដល់ជំនួយឲ្យកម្ពុជាឡើងវិញ ដើម្បីទប់ទល់នឹងឥទ្ធិពលចិន