អ្នកឃ្លាំមើលថា បទបញ្ជារុះរើស្លាកស្រាបៀតាមសាធារណៈរបស់លោក ស សុខា គឺគ្មានប្រសិទ្ធភាព
2024.09.22
រដ្ឋមន្ត្រីក្រសួងមហាផ្ទៃ លោក ស សុខា ថ្លែងក្នុងពិធីប្រកាសទទួលស្គាល់សមាសភាពបំពេញបន្ថែមក្រុមការងារសហភាពសហព័ន្ធយុវជនកម្ពុជា (ស.ស.យ.ក.) វិស័យមហាផ្ទៃ នៅសាលប្រជុំអគារ S នៃទីស្តីការក្រសួងមហាផ្ទៃ កាលពីថ្ងៃទី២១ កញ្ញា ២០២៤។
រូប៖ ហ្វេសប៊ុកលោក ស សុខា
អ្នកឃ្លាំមើល ថា បទបញ្ជាក្នុងការរុះរើការផ្សព្វផ្សាយពាណិជ្ជកម្មស្រាបៀនៅតាមទីសាធារណៈរបស់រដ្ឋមន្ត្រីក្រសួងមហាផ្ទៃ លោក ស សុខា គឺគ្មានប្រសិទ្ធភាពឡើយ ក្រោយលោកបានដាក់បទបញ្ជានេះ អស់រយៈពេលជាង ២ខែ។ ពួកគាត់ស្នើដល់រដ្ឋាភិបាលបង្កើតច្បាប់ស្ដីពីការគ្រប់គ្រងផលិតផលគ្រឿងស្រវឹង។
អ្នកឃ្លាំមើលសង្កេតឃើញថា ១ឆ្នាំកន្លងមកនេះក្រោមការដឹកនាំដោយរដ្ឋាភិបាលអាណត្តិទី៧ នៅតាមទីសាធារណៈ និងតាមដងផ្លូវមួយចំនួនក្នុងរាជធានីភ្នំពេញ នៅតែមានផ្ទាំងប៉ាណូផ្សព្វផ្សាយពាណិជ្ជកម្មគ្រឿងស្រវឹង ជាពិសេស គឺការផ្សព្វផ្សាយពាណិជ្ជកម្មស្រាបៀនៅលើបណ្ដាញសង្គមនានា រួមមានតិកតុក (TikTok) និងហ្វេសប៊ុក (Facebook) ជាដើម។
អ្នកសិក្សាផ្នែកសង្គម និងនយោបាយ លោក ប៉ោ មករា ប្រាប់វិទ្យុអាស៊ីសេរី នៅថ្ងៃទី២១ ខែកញ្ញាថា ក្រោយពេល១ឆ្នាំ នៃការដឹកនាំរបស់រដ្ឋាភិបាលនីតិកាលទី៧ នៅពុំទាន់អាចគ្រប់គ្រងការផ្សព្វផ្សាយពាណិជ្ជកម្មគ្រឿងស្រវឹងឲ្យបានល្អប្រសើរនៅឡើយទេ។ លោកសង្កេតឃើញថា អាជ្ញាធរជារឿយៗបានចាត់វិធានការរឹតបន្តឹងលើការផ្សព្វផ្សាយពាណិជ្ជកម្មគ្រឿងស្រវឹង ក្រោយមានការប្រតិកម្មពីពលរដ្ឋ។ លោក ចាត់ទុកការបណ្ដែតបណ្ដោយឲ្យការផ្សព្វផ្សាយពាណិជ្ជកម្មហួសហេតុបែបនេះ ជាបរាជ័យក្នុងការគ្រប់គ្រងការផ្សព្វផ្សាយផលិតផលគ្រឿងស្រវឹងរបស់រដ្ឋាភិបាល។
លោក ប៉ោ មករា៖ «ការណ៍ ដែលមានច្បាប់គ្រប់គ្រងផលិតផលគ្រឿងស្រវឹង ទី១គឺខ្ទប់មិនឲ្យបណ្ដាលក្រុមហ៊ុនផលិតគ្រឿងស្រវឹងចេះតែផ្សព្វផ្សាយរហូតដល់បច្ចុប្បន្នយើងឃើញថា មានរង្វាន់ជាប្រចាំខែ រង្វាន់ជាឡាន និងរង្វាន់ផ្សេងៗទៀត ដែលលើកទឹកចិត្តឲ្យប្រជាជនខ្លួនឯងសេពគ្រឿងស្រវឹងកាន់តែកើនឡើង»។
ការលើកឡើងនេះ ធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃ លោក ស សុខា បានដាក់បទបញ្ជាឲ្យអភិបាលរាជធានីខេត្ត ឲ្យពិនិត្យឡើងវិញនូវការផ្សព្វផ្សាយពាណិជ្ជកម្មគ្រឿងស្រវឹងនៅទីសាធារណៈ អស់រយៈពេលជាង២ខែ ។ ទាក់ទងនឹងបញ្ហានេះ កាលពីខែកុម្ភៈ លោក នាយករដ្ឋមន្ត្រី ហ៊ុន ម៉ាណែត ក៏ធ្លាប់បញ្ជាឲ្យអាជ្ញាធរពាក់ព័ន្ធពិនិត្យឡើងវិញ នូវការផ្សព្វផ្សាយពាណិជ្ជកម្មគ្រឿងស្រវឹងតាមទីសាធារណៈដែរ។ ប៉ុន្តែការផ្សព្វផ្សាយពីគ្រឿងស្រវឹងនៅតែសកម្មដដែលទាំងនៅតាមទីសាធារណៈ និងនៅលើបណ្ដាញសង្គមនានា ជាពិសេស គឺការផ្ដល់រង្វាន់លើក្រវិលកំប៉ុង ដោយឲ្យអ្នកផឹកដេញតាមរង្វាន់ជាដើម។
អ្នកឃ្លាំមើលលើកឡើងថា មូលហេតុ ដែលរដ្ឋាភិបាលមិនអាចទប់ស្កាត់ការផ្សព្វផ្សាយពាណិជ្ជកម្មគ្រឿងស្រវឹង គឺដោយសារតែម្ចាស់ក្រុមហ៊ុនស្រាបៀទាំងនោះ ភាគច្រើនជាប់សែស្រឡាយជាមួយនឹងមន្ត្រីជាន់ខ្ពស់ក្នុងជួររដ្ឋាភិបាល និងគ្រួសារលោកនាយករដ្ឋមន្ត្រី។
ជាក់ស្ដែង ក្រុមហ៊ុនស្រាបៀហនុមាន ដែលជារបស់អ្នកស្រី ខៀវ សស៊ីលៀប ដែលជាដៃគូជំនួញជាមួយនឹងកូនស្រីរបស់លោក ហ៊ុន សែន គឺអ្នកស្រី ហ៊ុន ម៉ាណា និងស្វាមី គឺលោក ម៉ឹង ពន្លក ដែលជាឧត្តមសេនីយ៍ពាក់ផ្កាយពីរ កាន់តួនាទីជាអគ្គនាយក នៃអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ។ ក្រៅពីនេះក្រុមហ៊ុនស្រាបៀផ្សេងទៀត ដូចជាក្រុមហ៊ុនស្រាបៀវឌ្ឍនៈ (Vattanac Beer) ស្រាបៀកម្ពុជា (Cambodia Beer)របស់ក្រុមហ៊ុនជីបម៉ុង ជាដើម មានម្ចាស់ក្រុមហ៊ុនជាឧកញ៉ា មានទាំងលុយ និងអំណាច។
វិទ្យុអាស៊ីសេរីនៅមិនទាន់អាចទាក់ទងអ្នកនាំពាក្យក្រសួងមហាផ្ទៃ លោក ទូច សុឃៈ និងអ្នកនាំពាក្យក្រសួងព័ត៌មាន លោក ទេព អស្នារិទ្ធ ដើម្បីសុំការឆ្លើយតបជុំវិញបញ្ហានេះបាននៅឡើយទេ កាលពីថ្ងៃទី ២១ ខែកញ្ញា។
ក្រសួងព័ត៌មានបានចេញសេចក្ដីប្រកាសកាលពីថ្ងៃទី៣០ ខែកក្កដាថា ការផ្សព្វផ្សាយផលិតផលគ្រឿងស្រវឹង ត្រូវមានការអនុញ្ញាតពីក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង ហើយការផ្សព្វផ្សាយនោះត្រូវគោរពគោលការណ៍ដូចជា មិនផ្សព្វផ្សាយពាណិជ្ជកម្មមានលក្ខណៈអូសទាញ មិនត្រូវផ្សាយពាណិជ្ជកម្មដោយឲ្យអ្នកទទួលទានឡើងផឹកគ្រឿងស្រវឹងលើឆាតកម្មវិធីនានា និងហាមផ្សព្វផ្សាយផលិតផលគ្រឿងស្រវឹងគ្រប់រូបភាពនៅចម្ងាយ២រយម៉ែត្រ ជុំវិញសាលារៀន និងមន្ទីរពេទ្យជាដើម។ សេចក្ដីប្រកាសថ្មីរបស់ក្រសួងព័ត៌មាននេះ បានដកចេញនូវបំរាមមួយចំនួន ដូចជា ហាមផ្សាយពាណិជ្ជកម្មគ្រឿងស្រវឹងផ្ដល់រង្វាន់ ហាមយកស្ត្រី និងអនីតិជនក្រោម១៨ឆ្នាំមកផ្សាយពាណិជ្ជកម្មជាដើម។
អ្នកជំនាញចរាចរណ៍ និងជាគ្រូបង្រៀនបើកបរ លោក អៀង សីហា មានប្រសាសន៍ថា ការផ្សព្វផ្សាយពាណិជ្ជកម្មគ្រឿងស្រវឹង ផ្ដល់រង្វាន់នៅរយៈពេលចុងក្រោយនេះ កំពុងអូសទាញឲ្យពលរដ្ឋទទួលទានគ្រឿងស្រវឹង។ លោកថា អ្នកទទួលទានគ្រឿងស្រវឹងហើយបើកបរ ងាយនឹងជួបបញ្ហាគ្រោះថ្នាក់ចរាចរណ៍ បណ្ដាលឲ្យគ្រោះថ្នាក់ដល់ខ្លួនឯង អ្នករួមដំណើរ ទ្រព្យសម្បត្តិឯកជន និងរដ្ឋជាដើម។
លោក អៀង សីហា៖ «បញ្ហាគ្រប់គ្រងគ្រឿងស្រវឹង និងការលក់ដូរគ្រឿងស្រវឹង និងការរឹតបន្តឹងការផ្សព្វផ្សាយគ្រឿងស្រវឹង គឺមិនងាយនឹងកាត់បន្ថយគ្រោះថ្នាក់ចរាចរណ៍បានទេ ដោយសារតែរដ្ឋាភិបាល បានប្រកាសហើយថា ការផលិតស្រា គឺបានផ្ដល់ចំណូលដល់ជាតិ ហើយជាពិសេសគាត់យកសុទ្ធតែអាយដល (Idol) របស់ពួកយើងធ្វើជា ប៊ី អេ (Brand Ambassador) លំដាប់ជាតិដល់ពេលអីចឹងទៅប្រជាពលរដ្ឋគឺគាត់ចូលចិត្តណាស់»។
បច្ចុប្បន្នរដ្ឋាភិបាលមិនទាន់បានរុញសេចក្ដីព្រាងច្បាប់ស្ដីពីការត្រួតពិនិត្យផលិតផលគ្រឿងស្រវឹង ឆ្នាំ២០១៥ ទៅរដ្ឋសភានៅឡើយទេ។សេចក្ដីព្រាងច្បាប់នេះ មានចំនួន ១៥ ជំពូក និង៣៩ មាត្រា។ មាត្រា ២ នៃសេចក្ដីព្រាងច្បាប់នេះ ចែងថា ច្បាប់នេះមានគោលដៅ ចំនួនបី គឺចាត់វិធានការក្នុងការគ្រប់គ្រង និងត្រួតពិនិត្យផលិតផលគ្រឿងស្រវឹង លើកកម្ពស់ការយល់ដឹង និងការចូលរួមកាត់បន្ថយគ្រោះថ្នាក់ នៃការប្រើប្រាស់ផលិតផលគ្រឿងស្រវឹង និងសហការជាមួយដៃគូរពាក់ព័ន្ធ ដើម្បីជំរុញការអប់រំ និងកាត់បន្ថយការប្រើប្រាស់ផលិតផលគ្រឿងស្រវឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
