បុគ្គលិកធ្វើការនៅក្នុងកាស៊ីណូក្រោន(Crown Casino) របស់ឧកញ៉ា កុក អាន នៅក្រុងប៉ោយប៉ែត ខេត្តបន្ទាយមានជ័យ បានអះអាងថា ក្រុមឧក្រិដ្ឋជនបានបញ្ជូនមនុស្សមួយចំនួន ចេញពីអាគារកាស៊ីណូ ទៅកាន់កន្លែងផ្សេង និងបញ្ជូនមនុស្សថ្មីជាច្រើននាក់មកជំនួស បន្ទាប់ពីលេចឮព័ត៌មានពីឧក្រិដ្ឋកម្មឆបោកនៅក្នុងអាគារ។ ប្រភពអះអាងថា មូលហេតុដែលក្រុមឧក្រិដ្ឋជន ផ្លាស់ប្ដូរមនុស្សតាមអំពើចិត្តបែបនេះ គឺដោយសារអាជ្ញាធរទទួលសំណូកពីក្រុមឧក្រិដ្ឋជន។
អគារកាស៊ីណូរបស់ក្រុមហ៊ុន ក្រោន រីស្ស៊ត ឬកាស៊ីណូក្រោន ជាកម្មសិទ្ធិឧកញ៉ា កុក អាន គឺជាសមាជិកព្រឹទ្ធសភាគណបក្សប្រជាជនកម្ពុជា និងជាអនុប្រធានសមាគមឧកញ៉ាកម្ពុជា ដែលក្រុមប៉ូលិសស៊ើបអង្កេតរបស់ថៃ រកឃើញថា ជាទីតាំងឧស្សាហកម្មឆបោកតាមអនឡាញនោះ ពេលនេះនៅតែដំណើរការធម្មតា និងហាក់មានសភាពរលូនជាងមុនថែមទៀតផង។
បុគ្គលិកធ្វើការនៅក្នុង កាស៊ីណូក្រោន ម្នាក់ថ្លែងក្នុងលក្ខខ័ណ្ឌមិនបញ្ចេញឈ្មោះ ដោយបារម្ភពីបញ្ហាសុវត្ថិភាព រៀបរាប់ប្រាប់វិទ្យុអាស៊ីសេរី នៅថ្ងៃទី២៥ ខែមករា ថា កន្លងទៅថ្មីៗនេះ ក្រុមមេខ្លោងជនជាតិចិន បានជម្លៀសមនុស្សមួយចំនួន ដែលជាបុគ្គលិកធ្វើការហៅទូរស័ព្ទឆ្លងប្រទេស ឬខលសេនធ័រ (Call center) ទៅកាន់ កាស៊ីណូមួយកន្លែងនៅច្រកព្រំដែនអន្តរជាតិ អូរស្មាច់ ខេត្តឧត្តរមានជ័យ និងបានដឹកមនុស្សពីខាងក្រៅមួយចំនួនចូលមកជំនួសវិញ។ បុគ្គលិកដដែលអះអាងថា បច្ចុប្បន្ននេះឧក្រិដ្ឋកម្មឆបោកនៅអាគារ ២៥ជាន់ក្នុង កាស៊ីណូក្រោន នៅតែបើកដំណើរការធម្មតា ដោយពុំមានអាជ្ញាធរចុះមកឆ្មក់ឆែកឆេរនោះឡើយ។
បុគ្គលិកកាស៊ីណូ៖«ឱ្យគេដឹងខ្លួនមុន ឥឡូវគេជម្លៀសចេញអស់ហើយ។ ដល់ពេលប៉ូលិសគេមកឆែកឆេរ ឃើញតែអាគារទទេប៉ុណ្ណោះ។ មានន័យអ្វី ករណីហ្នឹងកើតឡើងច្រើនដងច្រើនសាររាប់ឆ្នាំហើយ លោក កុក អាន គាត់ធ្វើតែអ៊ីចឹង។ មើលតែគេប្ដឹង គឺគាត់ជម្លៀសចេញអស់ហើយ បាន៥ថ្ងៃ យកចូលវិញ។ ដដែលៗ ដូចចាក់ទឹកលើក្បាលទា អត់ប្រយោជន៍ បង្ហិនតែលុយ»។
ការបញ្ជូនមនុស្សពីកាស៊ីណូក្រោន ក្រុងប៉ោយប៉ែត ទៅកាន់កាស៊ីណូ នៅច្រកព្រំដែនអន្តរជាតិអូរស្មាច់ នេះ ធ្វើឡើងក្រោយពីមានករណីជនបរទេសចំនួន ៥៧នាក់ ដែលភាគច្រើនជាជនជាតិប៉ាគីស្ថាន(Pakistan) បានសម្រុកចេញពីក្នុងអគារកាស៊ីណូមួយនៅចំណុចច្រកទ្វារព្រំដែនអន្តរជាតិអូរស្មាច់ ក្រុងសំរោង ខេត្តឧត្តរមានជ័យ ដោយរត់ប្រសេចប្រសាចតាមផ្លូវសាធារណ: កាលពីថ្ងៃទី៥ ខែមករា កន្លងទៅ។
ងាកមករឿងកាស៊ីណូក្រោនវិញ កាលពីថ្ងៃទី២៤ ខែធ្នូ ឆ្នាំ២០២៤ អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) បានចង្អុលបង្ហាញពីទីតាំងក្រុមឆបោក និងចាប់ជំរិតដែលមានមូលដ្ឋាននៅអាគារ ២៥ជាន់ក្នុងក្រុងប៉ោយប៉ែត ខេត្តបន្ទាយមានជ័យ និងក្រុងមីយ៉ាវ៉ាឌី(Myawaddy) ក្នុងប្រទេសមីយ៉ាន់ម៉ា(Myanmar)
ក៏ប៉ុន្តែ កន្លងទៅអស់រយៈពេលជាង ១ខែមកហើយ អាជ្ញាធរក្រុងប៉ោយប៉ែត មិនបានចុះឆ្មក់ឆែកឆេរនោះឡើយ ដោយទុកឱ្យឧក្រិដ្ឋជនឆបោកតាមអនឡាញ នៅក្នុងអាគារ ២៥ជាន់នោះ បន្តដំណើរការជាធម្មតា។ ជាងនេះទៅទៀត កាលពីថ្ងៃទី៨ ខែមករា មានជនជាតិថៃម្នាក់ បានធ្លាក់ពីលើអគារ ហ្គោលឌិន (Golden Casino) ក្នុងបរិវេណកាស៊ីណូក្រោន ជាន់ទី១៤។ កាសែតថៃរាយការណ៍ថា ជនរងគ្រោះដែលបានស្លាប់នោះ គឺជាអ្នកបម្រើការហៅទូរស័ព្ទឆ្លងប្រទេស ដែលឧក្រិដ្ឋជន ជាជនជាតិចិន បង្ខំឱ្យធ្វើការឆបោកតាមប្រព័ន្ធអនឡាញ។
វិទ្យុអាស៊ីសេរីមិនអាចទាក់ទងស្នងការនគរបាលខេត្តបន្ទាយមានជ័យ លោក សិទ្ធិ ឡោះ និងសមាជិកព្រឹទ្ធសភាគណបក្សប្រជាជនកម្ពុជា និងជាអនុប្រធានសមាគមឧកញ៉ាកម្ពុជា លោក កុក អាន ដើម្បីសុំការបកស្រាយជុំវិញរឿងនេះបានទេ នៅថ្ងៃទី២៥ ខែមករា។
ទាក់ទិនរឿងនេះ នគរបាលក្រុងប៉ោយប៉ែត ម្នាក់ ប្រាប់វិទ្យុអាស៊ីសេរី ថា ករណីឆបោកនៅអគារ២៥ជាន់ របស់ក្រុមហ៊ុន ក្រោន រីស្ស៊ត គឺជាពាក្យចចាមអារ៉ាម ព្រោះសមត្ថកិច្ចធ្លាប់ចុះត្រួតពិនិត្យអគារនោះជាច្រើនដងរួចមកហើយ ប៉ុន្តែរកមិនឃើញអ្វីឡើយ។ ទោះជាយ៉ាងណា នគរបាលរូបនេះ មិនបានប្រាប់ឈ្មោះ និងតួនាទីឡើយ។
ទោះជាបែបនេះក្ដី បុគ្គលិកធ្វើការនៅក្នុងកាស៊ីណូក្រោន អះអាងថា មូលហេតុដែលកងកម្លាំងសមត្ថកិច្ចរកមិនឃើញឧក្រិដ្ឋកម្មឆបោកនេះ មិនមែនដោយសារក្រុមឧក្រិដ្ឋជនចេះបំបាំងកាយនោះទេ ក៏ប៉ុន្តែគឺដោយសារ មន្ត្រីគ្រាក់ៗនៅក្នុងក្រុងប៉ោយប៉ែត បានរាយការណ៍ទៅកាន់មេឧក្រិដ្ឋជន ឱ្យដឹងខ្លួនមុន ដោយពួកគេបានលាក់ទុក និងជម្លៀសមនុស្សចេញពីអាគារ នៅមុនពេលសមត្ថកិច្ចចុះទៅដល់។ ប្រភពអះអាងទៀតថា ប្រការនេះ គឺដោយសារតែមន្ត្រីទាំងនោះ បានទទួលសំណូកពីម្ចាស់អគារកាស៊ីណូ គឺលោក កុក អាន និងក្រុមឧក្រិដ្ឋជន ដែលជាជនជាតិចិន តាមរយៈការបង់ប្រាក់ចិញ្ចឹមមន្ត្រីទាំងនោះជាប្រចាំខែ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា យល់ឃើញថា ការប្រយុទ្ធប្រឆាំងនឹងឧក្រិដ្ឋជនឆបោកតាមអ៊ីនធឺណិតនេះ ទាមទារឱ្យមានភាពសុក្រឹត និងការប្ដេជ្ញាមុតមាំ ជាពិសេសឧក្រិដ្ឋកម្ម ដែលមានអ្នកមានអំណាចនៅពីក្រោយ។
លោក នី សុខា៖«អ៊ីចឹង ចង់ឬមិនចង់ គឺនៅតែប៉ះពាល់ដល់កិត្តិយស ទៅដល់តម្លៃរបស់ប្រទេសកម្ពុជាយើងដដែល។ អ៊ីចឹងហើយ ជារឿយៗ តែងតែមានរបាយការណ៍អំពី បណ្ដាប្រទេសអន្តរជាតិមួយចំនួន ដែលបានចេញមករកឃើញអំពីទីតាំងលាក់ទុក ពីបញ្ហារឿងរកស៊ីមិនត្រឹមត្រូវនេះ»។
ពាក់ព័ន្ធនឹងឧក្រិដ្ឋកម្មឆបោកតាមអនឡាញនេះ កាលពីថ្ងៃទី២១ ខែមករា មជ្ឈមណ្ឌលសម្របសម្រួលកិច្ចសហប្រតិបត្តិការអនុវត្តច្បាប់ មេគង្គ ឡានឆាង (Mekong- Lancang) បានបើកកិច្ចប្រជុំបូកសរុបលទ្ធផលនៃប្រតិបត្តិការដែលមានឈ្មោះថា «សត្វសមុទ្រ» នៅទីក្រុងគុនមិញ(Kunming) ខេត្តយូណាន(Yunnan) ប្រទេសចិន(China)។ កិច្ចប្រជុំបានបង្ហាញលទ្ធផលនៃការចាប់ខ្លួនឧក្រិដ្ឋជននៅចន្លោះខែសីហា ដល់ខែធ្នូ ឆ្នាំ២០២៤ នៅក្នុងប្រទេសតាមដងទន្លេមេគង្គចំនួន៦ រួមមានកម្ពុជាចិន (China) ឡាវ (Laos) មីយ៉ាន់ម៉ា(Myanmar) ថៃ (Thai) និងវៀតណាម (Vietnam) សរុបចំនួនជាង ៧ម៉ឺននាក់(៧០.០០០)។ នៅក្នុងចំណោមឧក្រិដ្ឋជនទាំងនោះ ត្រូវបានកាត់ទោសចំនួនជាង ១៦០នាក់ និងជួយសង្គ្រោះជនរងគ្រោះបានចំនួនជាង ១៦០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។