អ្នកឃ្លាំមើលផែនការអភិវឌ្ឍសង្គម ទទូចដល់ថ្នាក់ដឹកនាំក្រសួងស្ថាប័នជំនាញ នៃរាជរដ្ឋាភិបាល ឲ្យមានចំណាត់ការតាមផ្លូវច្បាប់ឲ្យបានធ្ងន់ធ្ងរ ទៅលើសកម្មភាពសាងសង់អាគារខុនដូកម្ពស់ ១៩ជាន់ របស់ អតីតអភិបាលរាជធានីភ្នំពេញ ដែលសង់ប៉ះពាល់លំនៅឋានពលរដ្ឋជិតខាង ហើយគេចមិនទទួលខុសត្រូវ។
មន្ត្រីអង្គការក្រៅរដ្ឋាភិបាលមួយចំនួន បានស្នើដល់ លោក ជា សុផារ៉ា រដ្ឋមន្ត្រីក្រសួងរៀបចំដែនដី និងស្ថាប័នតុលាការ ជាពិសេសប្រមុខដឹកនាំរដ្ឋាភិបាល ឲ្យជួយពិនិត្យទៅលើសំណង់អាគារខុនដូកម្ពស់ ១៩ជាន់ ដែលមានម្ចាស់ឈ្មោះ លោក ប៉ា សុជាតិវង្ស អតីតអភិបាលរាជធានីភ្នំពេញ និងភរិយាឈ្មោះ អ៊ួន សុណ្ណារិន្ទ មានទីតាំងនៅផ្លូវលេខ១០៧ សង្កាត់បឹងព្រលឹត ខណ្ឌ៧មករា រាជធានីភ្នំពេញ ដែលបានសង់នាំឲ្យបាក់ស្រុតផ្ទះ របស់ប្រជាពលរដ្ឋជិតខាងជាមួយគ្នា។
មន្ត្រីស៊ើបអង្កេតជាន់ខ្ពស់ នៃសមាគមអាដហុក (Adhoc) លោក ស៊ឹង សែនករុណា ស្នើឲ្យរដ្ឋាភិបាល ពិសេសក្រសួងជំនាញពាក់ព័ន្ធ ត្រូវចាត់វិធានការតាមផ្លូវច្បាប់ឲ្យបានធ្ងន់ធ្ងរ ចំពោះទង្វើខុសឆ្គង របស់អតីតអភិបាលរាជធានីភ្នំពេញ លោក ប៉ា សុជាតិវង្ស និងភរិយា អ្នកស្រី អ៊ួន សុវណ្ណារិន្ទ ដែលសង់សំណង់អាគារខុនដូប៉ះពាល់ដល់ផ្ទះពលរដ្ឋជិតខាង ហើយគេចមិនទទួលខុសត្រូវ។
លោក ករុណា ផ្ដល់មតិថា មន្ត្រីក្នុងជួររដ្ឋាភិបាល ដែលមានតួនាទីខ្ពស់ គួរធ្វើជាគំរូល្អ សម្រាប់ប្រជាពលរដ្ឋទូទៅ មិនមែនអាងខ្លួនជាមន្ត្រីជាន់ខ្ពស់ ក្នុងជួររដ្ឋាភិបាល បែរជាទៅប្រើអំណាចបុណ្យស័ក្ដិ ដើម្បីគំរាមកំហែងប្រជាពលរដ្ឋគ្មានឋានៈបុណ្យស័ក្ដិនោះទេ។ លោកថា ឥរិយាបថរបៀបនេះ បានប៉ះពាល់ដល់កិត្តិយស របស់ប្រមុខដឹកនាំរដ្ឋាភិបាលធ្ងន់ធ្ងរ ជាពិសេសនាំឲ្យប្រជាពលរដ្ឋអស់ជំនឿទៅលើការដឹកនាំរបស់ប្រមុខរដ្ឋាភិបាលទៅវិញទេ។
បន្ថែមលើនេះ លោក ស៊ឹង សែនករុណា មន្ត្រីឃ្លាំមើលសិទ្ធិមនុស្ស បានកត់សម្គាល់ថា កន្លងមក សង្កេតឃើញ ឈ្មួញមានទ្រព្យ និងមន្ត្រីមានអំណាចភាគច្រើន មិនបានអនុវត្តច្បាប់សំណង់ ឬច្បាប់សាងសង់ ឲ្យបានត្រឹមត្រូវទេ ដោយសំណង់អាគារធំៗមួយចំនួន របស់ពួកគេ បានសាងសង់ ដោយមិនមានសុំច្បាប់សាងសង់ ពីអាជ្ញាធរជំនាញជាមុនឲ្យបានត្រឹមត្រូវទេ។
ត្រង់ចំណុចនេះ មន្ត្រីសមាគមអាដហុករូបនេះ បានស្នើដល់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជួយពង្រឹងការអនុវត្តច្បាប់សាងសង់នេះ ឲ្យបានត្រឹមត្រូវឡើងវិញ ជាពិសេសត្រូវពិនិត្យទៅលើសកម្មភាពសំណង់អាគារខុនដូកម្ពស់ ១៩ជាន់ របស់លោក ប៉ា សុជាតិវង្ស ថាតើការសាងសង់នេះ មានច្បាប់អនុញ្ញាតត្រឹមត្រូវដែរឬទេ។
លោក ស៊ឹង សែនករុណ សំណូមពរថា ប្រសិនបើក្រសួងដែនដី រកឃើញកំហុសឆ្គងថា ពិតជាសំណង់នេះ សង់គ្មានច្បាប់អនុញ្ញាតសាងសង់ជាដើមនោះ ត្រូវតែមានវិធានការតាមផ្លូវច្បាប់ ឲ្យបានធ្ងន់ធ្ងរ ដោយមិនត្រូវបង្កើតឲ្យវប្បធ៌មបក្សពួកនិយម និងអំពើពុករលួយ បន្តកើតមានដូចកន្លងទៅទៀតទេ។
ទាក់ទិនបញ្ហានេះ កាលពីថ្ងៃទី១៣ ខែមិថុនា ឆ្នាំ២០១៧ លោកស្រី កែវ ណាទី ជាប្រជាពលរដ្ឋរស់នៅផ្ទះលេខ២៥៣ ផ្លូវ លេខ១០៧ សង្កាត់បឹងព្រលឹត ខណ្ឌ៧មករា រាជធានីភ្នំពេញ។ លោកស្រីបានបានដាក់លិខិតជូន លោក ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី សុំប្ដឹងលោក ប៉ា សុជាតិវង្ស និងភរិយា ជាម្ចាស់ ដីឡូត៍លេខ ៤៨ នៅជាប់ផ្លូវលេខ ១១១ ទល់ខ្នងដីឡូត៍ផ្ទះ របស់គាត់ ថាបានសង់អាគារកម្ពស់ ១៩ជាន់ នាំឲ្យប៉ះពាល់បាក់ស្រុតផ្ទះគាត់ស្ទើរទាំងស្រុងនាពេលកន្លងមកនេះ។
ពាក្យបណ្តឹង របស់ លោកស្រី កែវ ណាទី បានស្នើឲ្យ លោក ជា សុផារ៉ា ជួយផ្អាកសកម្មភាពសាងសង់អាគារខុនដូកម្ពស់ ១៩ជាន់ របស់ លោក ប៉ា សុជាតិវង្ស អតីតអភិបាលរាជធានីភ្នំពេញ ជាបន្ទាន់សិន ដើម្បីឲ្យម្ចាស់អាគារខុនដូនេះ ផ្ដល់សំណងការខូចខាតពីការបាក់ស្រុតផ្ទះ ឬសង់ផ្ទះថ្មីជូនលោកស្រីជាមុនសិន ទើបឲ្យបន្តការសាងសង់ទៀត។
ទោះយ៉ាងនេះក្ដី លោកស្រី កែវ ណាទី បានឲ្យដឹងថា រហូតមកដល់ពេលនេះ លោក ប៉ា សុជាតិវង្ស និងភរិយា មិនទាន់បានដោះស្រាយសំណងខូចខាតពីការបាក់ស្រុតផ្ទះ ជូនលោកស្រីទេ គិតត្រឹមថ្ងៃទី១២ ខែតុលា។ ជាងនេះទៀត សកម្មភាពសាងសង់ខុនដូនេះ ក៏បានបន្តធ្វើសកម្មភាពរាល់ថ្ងៃ ដោយមិនស្ដាប់តាមលិខិតឲ្យផ្អាកសកម្មភាពសាងសង់ជាបណ្ដោះអាសន្ន របស់ក្រសួងរៀបចំដែនដីនោះទេ។
ក្រសួងរៀបចំដែនដី កាលពីថ្ងៃទី២០ ខែមិថុនា ឆ្នាំ២០១៧ បានចេញលិខិតផ្អាកការដ្ឋានកម្ពស់ ១៩ជាន់ របស់ អ្នកស្រី អ៊ួន សុវណ្ណារិន្ទ មានទីតាំងនៅលើដីឡូត៍មានវិញ្ញាបនបត្រសម្គាល់ម្ចាស់អចលនវត្ថុលេខ ភព ១៣៦៧៥ ផ្លូវលេខ ២៣២ កែងផ្លូវលេខ ១១១ សង្កាត់បឹងព្រលឹត ខណ្ឌ៧មករា រាជធានីភ្នំពេញ។ លិខិតផ្អាកដំណើរការសាងសង់នេះ ដោយសំអាងថា សកម្មភាពសាងសង់អាគារខុនដូ កម្ពស់ ១៩ជាន់ របស់លោក ប៉ា សុជាតិវង្ស និងអ្នកស្រី អ៊ួន សុវណ្ណារិន្ទ បានសង់ដោយគ្មានលិខិតអនុញ្ញាតបើកការដ្ឋាន និងមានពាក្យបណ្តឹងពីអ្នកជិតខាង។
លិខិតចុះថ្ងៃទី២០ ខែមិថុនា មានចុះហត្ថលេខា និងបោះត្រា លោក ហ៊ុយ ណារ៉ា អគ្គនាយក នៃអគ្គនាយកដ្ឋានសំណង់ បានជម្រាប់ជូន អ្នកស្រី អ៊ួន សុវណ្ណារិន្ទ ឲ្យផ្អាកជាបណ្ដោះអាសន្ន ចាប់ពីថ្ងៃចេញលិខិត ផ្អាកការដ្ឋាននេះតទៅ។ ប៉ុន្តែក្នុងករណីការដ្ឋាន របស់អ្នកស្រី អ៊ួន សុវណ្ណារិន មិនបានផ្អាកជាបណ្ដោះអាសន្ននោះទេ អ្នកស្រី ត្រូវប្រឈមមុខ នឹងវិធានការផ្លូវច្បាប់ជាធរមាន។
ទោះជាបែបនេះក្តី លោកស្រី កែវ ណាទី ពលរដ្ឋរងគ្រោះ បានប្រាប់ប្រព័ន្ធផ្សព្វផ្សាយថា សកម្មភាពសាងសង់សំណង់អាគារខុនដូ កម្ពស់ ១៩ជាន់ របស់ លោក ប៉ា សុជាតិវង្ស និងអ្នកស្រី អ៊ួន សុវណ្ណារិន្ទ បានបន្តសកម្មភាពរាល់ថ្ងៃ ទោះមានលិខិតផ្អាកការសាងសង់ពីក្រសួងរៀបចំដែនដី គឺពួកគេមិនអនុវត្តតាមនោះទេ។
ផ្ដើមពីបញ្ហានេះ អ្នកស្រី កែវ ណាទី បានសំណូមពរជាថ្មីទៀតដល់ លោក ជា សុផារ៉ា រដ្ឋមន្ត្រីក្រសួងរៀបចំដែនដី ជាពិសេសលោកនាយករដ្ឋមន្ត្រី ហ៊ុន សែន ឲ្យអន្តរាគមន៍លើករណីនេះជូនគ្រួសារអ្នកស្រី ដែលជាមន្ត្រីរាជការមានឋានៈតូចទាបនេះដោយអនុគ្រោះផង។
អាស៊ីសេរី មិនទាន់អាចទាក់ទងសុំការបំភ្លឺ ជុំវិការចោទប្រកាន់នេះពី លោក ប៉ា សុជាតិវង្ស និងអ្នកស្រី អ៊ួន សុវណ្ណារិន្ទ ម្ចាស់សំណង់អាគារ ១៩ជាន់ ដែលត្រូវអ្នកស្រី កែវ ណាទី ប្ដឹងចោទនេះបានទេ នៅថ្ងៃទី១២ ខែតុលា។
យ៉ាងណា នៅក្នុងពាក្យបណ្ដឹងរបស់លោកស្រី កែវ ណាទី ដាក់ជូន លោក ជា សុផារ៉ា រដ្ឋមន្ត្រីក្រសួងរៀបចំដែនដី កាលពីថ្ងៃទី១៣ ខែមិថុនា ឆ្នាំ២០១៧ បានឲ្យដឹងថា កន្លងមក លោក ប៉ា សុជាតិវង្ស និង អ្នកស្រី អ៊ួន សុវណ្ណារិន្ទ ធ្លាប់បានជួលក្រុមហ៊ុនធានារ៉ាប់រង ឲ្យមកវាយតម្លៃ សងការខូចខាតពីការបាក់ស្រុតផ្ទះលោកស្រីម្ដងហើយ ប៉ុន្តែលោកស្រីមិនបានឯកភាព ដោយសារក្រុមហ៊ុននោះ បានវាយតម្លៃនៃការខូចខាតមិនបានសមរម្យ ទៅលើទំហំនៃការបាក់ស្រុតផ្ទះលោកស្រីទេ ទើបលោកស្រី សម្រេចដាក់ពាក្យបណ្ដឹងសុំកិច្ចអន្តរាគមន៍ពី លោក ជា សុផារ៉ា ស្នើសុំផ្អាកការសាងសង់អគារកម្ពស់ ១៩ជាន់នេះ បណ្ដោះអាសន្ន ដើម្បីស្នើឲ្យម្ចាស់សំណង់នេះ សងការខូចខាតជាមុនសិន ព្រោះផ្ទះលោកស្រី បានបាក់ស្រុតស្ទើរទាំងស្រុងអស់ទៅហើយ។ លោកស្រី ឲ្យដឹងថា រាល់ថ្ងៃនេះក្រុមគ្រួសារលោកស្រី មានការភ័យខ្លាចមិនអាចចូលរស់នៅក្នុងផ្ទះ របស់ខ្លួនបានទៀតទេ ព្រោះបារម្ភខ្លាចផ្ទះនេះ បាក់ស្រុត ទើបទាមទារឲ្យ លោក ប៉ា សុជាតិវង្ស និងអ្នកស្រី អ៊ួន សុវណ្ណារិន្ទ ម្ចាស់សំណង់អាគារខុនដូកម្ពស់ ១៩ជាន់នេះ ត្រូវសងផ្ទះថ្មីទាំងមូល ជូនគ្រួសារលោកស្រីបានរស់នៅដូចដើមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។