ពលរដ្ឋនិងមន្ត្រីសង្គមស៊ីវិលស្នើទៅតំណាងរាស្ត្រចុះជួបពលរដ្ឋអំឡុងពេលបិទខ្ទប់និងពាំនាំទុក្ខពលរដ្ឋយកទៅដោះស្រាយ
2021.05.02
ពលរដ្ឋរស់នៅតំបន់បិទខ្ទប់ក្នុងរាជធានីភ្នំពេញ និងមន្ត្រីអង្គការសង្គមស៊ីវិល លើកឡើងស្រដៀងគ្នាថា ប្រសិនបើពេលនេះ មានវត្តមានតំណាងរាស្ត្ររបស់ពួកគាត់ នោះបញ្ហារបស់ពលរដ្ឋអាចនឹងត្រូវសមាជិកសភាទាំងនោះ ដាក់ជូនស្ថាប័នពាក់ព័ន្ធជួយដោះស្រាយ។ ពួកគាត់លើកឡើងថា ពេលនេះ មានបញ្ហារាប់រយជុំពួក ដែលពលរដ្ឋជួបប្រទះ ប៉ុន្តែដំណោះស្រាយដែលរដ្ឋាភិបាលដោះស្រាយឲ្យ គឺមិនទាន់ឆ្លើយតបគ្រន់គ្រាន់ ទៅនឹងតម្រូវការរបស់ពលរដ្ឋនៅឡើយទេ។
ពលរដ្ឋរស់នៅតំបន់ក្រហម សង្កាត់ស្ទឹងមានជ័យទី២ ខណ្ឌមានជ័យ លោក ឃួប សារ៉ាក់ ប្រាប់ថា រយៈពេលជិតពីរខែមកនេះ លោកមិនដែលឃើញតំណាងរាស្ត្រណាម្នាក់ ចុះមកសួរសុខទុក្ខ ពាំនាំការលំបាក ឬចែកអំណោយដល់លោកនិងពលរដ្ឋក្នុងតំបន់នេះទេ។ ពលរដ្ឋដែលប្រឈមការដាច់ស្បៀងរូបនេះ ស្នើទៅតំណាងរាស្ត្រ ដែលលោកបានបោះឆ្នោតជូន មកជួបពលរដ្ឋដើម្បីបានឃើញបញ្ហាដោយផ្ទាល់ និងដើម្បីលើកសំណើរបស់ពលរដ្ឋ ទៅដោះស្រាយបន្តជាមួយស្ថាប័នពាក់ព័ន្ធ៖ «បើសិនខាងតំណាងរាស្ត្រ ឬបងប្អូនសប្បុរសជនដែលចិត្តសប្បុរសដែលបានចុះមកជួយក៏ត្រេកអរជាខ្លាំងដែរណាព្រោះអីពិបាកមែន»។
មន្ត្រីសង្គមស៊ីវិលឃ្លាំមើលការបោះឆ្នោត ក៏មើលនូវភាពឆកល្វែងនៃការបំពេញភារកិច្ច ឲ្យស្របតាមឆន្ទៈរាស្រ្តម្ចាស់ឆ្នោតនេះដែរ។
មន្រ្តីសម្របសម្រួលផ្នែកអង្កេតរបស់គណៈកម្មាធិការ ដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល លោក កន សាវាង្ស លើកឡើងថា នៅក្នុងប្រទេសដែលគោរពគោលការណ៍លទ្ធិប្រជាធិបតេយ្យ តំណាងរាស្រ្តជាមនុស្សសំខាន់ សម្រាប់ប្រជាពលរដ្ឋ។ តំណារាស្រ្តមានតួនាទីមិនត្រឹមតែជាអ្នកអនុម័តច្បាប់ ឬកែប្រែច្បាប់ប៉ុណ្ណោះទេ តែក៏ជាអ្នកដែលតាមដានការអនុវត្តច្បាប់លើស្ថាប័ននីតិប្រតិបត្តិផងដែរ.
លោកបន្តថា មិនមែនត្រឹមតែតំណាងរាស្ត្រ១២រូបនៅមណ្ឌលភ្នំពេញប៉ុណ្ណោះទេ គឺតំណាងរាស្ត្រទាំងអស់ក្នុងសភាសុទ្ធតែមានភារៈកិច្ចជួយប្រជាពលរដ្ឋឱ្យមានសំឡេង និងពាំនាំនូវការព្រួយបារម្ភ ព្រមទាំងការលំបាករបស់ពលរដ្ឋ៖ «កាលណាមានបញ្ហាហ្នឹង ប្រជាពលរដ្ឋសម្ដែងមានការស្នើសុំទៅឱ្យតំណាងរាស្ត្រខ្លួនឯងពាំនាំដល់សភា ដើម្បីឱ្យសភាធ្វើការពិចារណាឡើងវិញនូវអ្វីដែលជាទុក្ខកង្វល់របស់ខ្លួនឯងហើយម៉្យាងទៀតសភាក៏មានតួនាទីមួយធ្វើការត្រួតពិនិត្យលើមន្ត្រីឬក៏ស្ថាប័ននីតិប្រតិបត្តិដែរ»។
ស្រដៀងគ្នានេះដែរ ស្ថាបនិកគណបក្សប្រជាធិបតេយ្យមូលដ្ឋានលោក យ៉ង សាំងកុមារ សរសេរលើហ្វេសប៊ុកលោកថា រាស្រ្តត្រូវការតំណាងរាស្រ្តជួយ។ លោកបន្តថា ពេលប្រទេសកំពុងជួបវិបត្តិកូវីដ-១៩ តំណាងរាស្ត្រទាំងអស់ ជាពិសេសតំណាងរាស្រ្តមណ្ឌលភ្នំពេញ ខេត្តកណ្តាល និងសមាជិកក្រុមប្រឹក្សាខេត្តរាជធានីផងដែរ គួរតែជួបជុំគ្នាដើម្បីជំរុញ និងជួយតំរង់ទិសការដឹកនាំរបស់រដ្ឋាភិបាល ក្នុងការទប់ទល់ និងដោះស្រាយបញ្ហាកូវីដ-១៩ ជាពិសេសវិធានការដោះស្រាយផលប៉ះពាល់ខាងជីវភាពនិងសេដ្ឋកិច្ច។
ទាក់ទងការលើកឡើងនេះ អាស៊ីសេរីបានព្យាយាមសុំការបំភ្លឺពីសមាជិកសភានៃគណបក្សប្រជាជនកម្ពុជា ដែលជាតំណាងរាស្ត្រនៅមណ្ឌលភ្នំពេញ ក្នុងនោះមានដូចជា លោក កែប ជុតិមា អ្នកស្រី ឡោក ខេង អ្នកស្រី ម៉ាណា ណាវី និងលោក ជៀប ស៊ីវន ប៉ុន្តែទូរស័ព្ទចូលគ្មានអ្នកទទួល។ ចំណែកតំណាងរាស្ត្រពីររូបដែលបានលើកទូរស័ព្ទគឺលោក ហ៊ូ ស្រ៊ី និងលោក លី ឆេង បន្ទាប់ពីលឺសំណួរអាស៊ីសេរី សួរពាក់ព័ន្ធបញ្ហាទុក្ខលំបាកពលរដ្ឋក្នុងតំបន់បិទខ្ទប់ អ្នកទាំងពីរប្រាប់ថា កំពុងជាប់រវល់៖ «សុំទោសខ្ញុំជាប់រវល់បន្តិចណាចាំពេលក្រោយខ្ញុំជាប់កម្មវិធីបាទ»។
ប៉ុន្តែ តំណាងរដ្ឋសភាឯកបក្សឯណោះ ថាតំណាងរាស្រ្ត មិនបានចុះទៅជួបរាស្រ្តមែន តែរាស្រ្តទទួលបានការយកចិត្តទុកដាក់ពីសំណាក់រដ្ឋាភិបាលដែរ។
អគ្គលេខាធិការដ្ឋានរដ្ឋសភា លោក ឡេង ប៉េងឡុង លោកឱ្យអាស៊ីសេរីដឹងថា អំឡុងពេលបិទខ្ទប់នេះ គឺរដ្ឋសភាសង្កេតឃើញវិធានការនិងការដោះស្រាយរបស់រដ្ឋាភិបាល គឺត្រឹមត្រូវនិងគ្រប់គ្រាន់ហើយ។ ទោះយ៉ាងណា លោកអះអាងថា ក៏មានតំណាងរាស្ត្រមួយចំនួន បានស្នើទៅប្រធានរដ្ឋសភា ដើម្បីចុះជួបពលរដ្ឋដែរ ប៉ុន្តែអង្គសភាមិនទាន់អនុញ្ញាតនៅឡើយ៖ «អ្វីដែលយើងត្រូវធ្វើ គឺគោរពវិធានការរបស់រដ្ឋាភិបាលហើយយើងទៅគគ្រឹកគគ្រេងនាំឱ្យរំខានដល់រដ្ឋាភិបាលផង នាំឱ្យហានិភ័យផង»។
ទោះជាយ៉ាងនេះក្ដី មន្រ្តីឃ្លាំមើលការបោះឆ្នោតថា គ្រាមានអាសន្នបែបនេះ គឺជាពេលវេលាសមស្រប និងសំខាន់បំផុត ដែលតំណាងរាស្រ្ត ត្រូវចេញមុខជួយដោះស្រាយបញ្ហារបស់រាស្រ្ត។
លោក កន សាវាង្ស យល់ថា ក្នុងស្ថានភាពបែបនេះ ពលរដ្ឋត្រូវការចាំបាច់គឹភាពកក់ក្ដៅនៃតំណាងរាស្ត្រខ្លួន៖ «គឺមានន័យថា ត្រូវការការជជែក ការនៅក្បែរគ្នា ការសួរសុខទុក្ខ ហើយទាក់ទងបញ្ហាផ្សេងជាមួយតំណាងរាស្ត្រហើយតំណាងរាស្ត្រពាំនាំទៅ»។
រដ្ឋាភិបាលលោក ហ៊ុន សែន បានបន្តបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាល ចូលដល់សប្តាហ៍ទីបី។ ការបន្ថែមបម្រាមមួយសប្តាហ៍ទៀតនេះ ត្រូវអនុវត្តរហូតដល់ថ្ងៃទី៥ ខែឧសភា ប៉ុន្តែរដ្ឋាភិបាលបានព្រមានរួចទៅហើយ ថាការបិទខ្ទប់នេះ អាចបន្តថែមយូរថ្ងៃទៀត បើស្ថានភាពចម្លងជំងឺកូវីដ-១៩ ក្នុងសហគមន៍ មិនថមថយ។ ប៉ុន្តែ ក្នុងការបិទខ្ទប់សប្តាហ៍ទីបីនោះ រដ្ឋាភិបាលបែងចែកតំបន់ក្នុងក្រុងទៅជា «តំបន់ក្រហម» «តំបន់លឿងទុំ» និង «តំបន់លឿង» ទៅតាមកម្រិតឆ្លងធ្ងន់ មធ្យម និងស្រាលផងដែរ។
ការបិទខ្ទប់នេះក៏នៅតំបន់មួយចំនួនតាមខេត្តដែរដូចជានៅខេត្តសៀមរាប និងខេត្តព្រះសីហនុជាដើម។
ទន្ទឹមគ្នានេះដែរ អង្គការសង្គមស៊ីវិលជាតិ និងអន្តរជាតិរួមទាំងមេដឹកនាំបក្សប្រឆាំងផង បានរិះគន់វិធាននេះ ថាអាជ្ញាធររឹតត្បិតហួសហេតុ និងមិនបានឆ្លើយតបតាមតម្រូវការថវិកា ស្បៀងអាហារបានគ្រប់គ្រាន់ និងទាន់ពេលវេលា។
ជាងនេះទៅទៀត នៅរយៈពេលចុងក្រោយនេះ ពេលពលរដ្ឋភាគច្រើនបាត់បង់ប្រាក់ចំណូល និងកំពុងខ្វះខាតស្បៀងអាហារ អគ្គិសនីកម្ពុជាមិនបានបន្ធូរបន្ថយបន្ទុកនេះទេ តែបែរជាចេញលិខិត ឱ្យពលរដ្ឋឆាប់បង់លុយថ្លៃភ្លើង ឱ្យទៀងពេលថែមទៀតផង។ រហូតមកទល់ពេលនេះ នៅមិនទាន់ឃើញតំណាងរាស្រ្តរបស់គណបក្សប្រជាជនកម្ពុជារូបណា ថ្លែងសារជួយអន្តរាគមន៍រឿងនេះ នៅឡើយនោះដែរ។
អ្នកឃ្លាំមើលសង្គម និងមន្រ្តីអង្គការសង្គមស៊ីវិល ជំរុញតំណាងរាស្រ្តទាំងនោះគួរតែចុះសួរសុខទុក្ខ និងពិនិត្យមើលលើបញ្ហាប្រឈមរបស់ប្រជាពលរដ្ឋ ការអនុវត្តច្បាប់របស់អាជ្ញាធរ ការដោះស្រាយរបស់អាជ្ញាធរ ជាពិសេសទាក់ទងលើច្បាប់ស្ដីពីការបង្ការជំងឺកូវីដ-១៩ ព្រមទាំងការដោះស្រាយបញ្ហារបស់ប្រជាពលរដ្ឋ ក្នុងគ្រាដ៏លំបាកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។